ନୂଆଦିଲ୍ଲୀ: ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କୁ ପୁଣିଥରେ ପରାମର୍ଶ ଦେଇଛନ୍ତି କେନ୍ଦ୍ରମନ୍ତ୍ରୀ କିରେନ ରିଜିଜୁ। ରାହୁଲଙ୍କୁ ନେଇ ନିଜର ପୂର୍ବ ମନ୍ତବ୍ୟ ଉପରେ ସ୍ପଷ୍ଟୀକରଣ ରଖିବା ସହ ଏହାକୁ ନକାରାତ୍ମକ ଭାବେ ନ ନେବାକୁ ସେ କହିଛନ୍ତି। ଜଣେ ରାଜନୈତିକ ପ୍ରତିଦ୍ୱନ୍ଦ୍ୱୀ ଭାବେ ନୁହେଁ, ବରଂ ଜଣେ ଶୁଭେଚ୍ଛୁ ଭାବେ ରାହୁଲଙ୍କୁ ପରାମର୍ଶ ଦେଉଥିବା ରିଜିଜୁ କହିଛନ୍ତି।

ରିଜିଜୁଙ୍କ ମତରେ, ଭାରତର ଗଣତନ୍ତ୍ର ପାଇଁ ଏକ ଶକ୍ତିଶାଳୀ ବିରୋଧୀ ଦଳ ରହିବା ଅତ୍ୟନ୍ତ ଜରୁରୀ। ଦେଶକୁ ଅଟଳ ବିହାରୀ ବାଜପେୟୀ, ଲାଲକୃଷ୍ଣ ଆଡଭାଣୀ, ସୁଷମା ସ୍ୱରାଜ ଏବଂ ଅରୁଣ ଜେଟଲୀଙ୍କ ଭଳି ପରିପକ୍ୱ ବିରୋଧୀ ନେତାଙ୍କ ଆବଶ୍ୟକତା ରହିଛି। କଂଗ୍ରେସ ନିଜର ରାଜନୈତିକ ଆଭିମୁଖ୍ୟରେ ପରିବର୍ତ୍ତନ ନ ଆଣିଲେ ଦଳ ଆହୁରି ଦୁର୍ବଳ ହୋଇପାରେ ବୋଲି ସେ ମତ ଦେଇଛନ୍ତି। ଏଥିସହ ବାରମ୍ବାର 'ଭୋଟ୍ ଚୋରି' ଭଳି ଅଭିଯୋଗ ଉଠାଇବାକୁ ମଧ୍ୟ ସେ ସମାଲୋଚନା କରିଛନ୍ତି।

କାହିଁକି ରାହୁଲଙ୍କୁ ପରାମର୍ଶ ଦେଲେ ରିଜିଜୁ?

ନଭେମ୍ବର ୪ ତାରିଖରେ ରିଜିଜୁ ସୋସିଆଲ ମିଡିଆରେ ଏକ ପୋଷ୍ଟ କରି ରାହୁଲ ଗାନ୍ଧୀଙ୍କୁ କିଛି ପରାମର୍ଶ ଦେଇଥିଲେ। ଯଦି ରାହୁଲ ଏହି ପରାମର୍ଶଗୁଡ଼ିକୁ ଗ୍ରହଣ କରନ୍ତି, ତେବେ କଂଗ୍ରେସ ଅଧିକ ସଂଖ୍ୟକ ଆସନ ଜିତିପାରିବ ବୋଲି ସେ ଉଲ୍ଲେଖ କରିଥିଲେ।

ସେହି ପୋଷ୍ଟରେ ରିଜିଜୁ ରାହୁଲଙ୍କୁ ଅଧିକ ସମୟ ଭାରତରେ ବିତାଇବା ସହ ବାରମ୍ବାର ବିଦେଶ ଗସ୍ତରୁ ଦୂରେଇ ରହିବାକୁ କହିଥିଲେ। ଏଥିସହ ଦଳର ବରିଷ୍ଠ ନେତାଙ୍କୁ ସମ୍ମାନ ଦେବା ଏବଂ ସେମାନଙ୍କ ଅଭିଜ୍ଞତାରୁ ଶିଖିବାକୁ ପରାମର୍ଶ ଦେଇଥିଲେ।

ବିଜେପିକୁ ଶତ୍ରୁ ନୁହେଁ, ପ୍ରତିଦ୍ୱନ୍ଦ୍ୱୀ ଭାବନ୍ତୁ

ରିଜିଜୁ ଆହୁରି କହିଥିଲେ ଯେ ରାହୁଲ ଗାନ୍ଧୀ ଭାରତ ବିରୋଧୀ ଚିନ୍ତାଧାରା ରଖୁଥିବା ଲୋକଙ୍କ ସହ ସମ୍ପର୍କ ରଖିବା ଏବଂ ସେମାନଙ୍କ ଏଜେଣ୍ଡାକୁ ପ୍ରୋତ୍ସାହନ ଦେବାରୁ ଦୂରେଇ ରହିବା ଉଚିତ। ବିଜେପି, ଆରଏସଏସ ଏବଂ ପ୍ରଧାନମନ୍ତ୍ରୀ ମୋଦୀଙ୍କ ପ୍ରତି ରାଜନୈତିକ ଶତ୍ରୁତା ମନୋଭାବ ଛାଡ଼ିବାକୁ ମଧ୍ୟ ସେ କହିଥିଲେ। ବିଜେପିକୁ ଶତ୍ରୁ ଭାବିବା ପରିବର୍ତ୍ତେ ଏକ ରାଜନୈତିକ ପ୍ରତିଦ୍ୱନ୍ଦ୍ୱୀ ଭାବେ ଦେଖିବା ଉଚିତ ବୋଲି ରିଜିଜୁଙ୍କ ପରାମର୍ଶ ଥିଲା।

କୋଚି: ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (SIR)କୁ ନେଇ ଦେଶରେ ରାଜନୈତିକ ବିବାଦ ଜାରି ରହିଛି। ଏହାକୁ ବିରୋଧ କରି କେରଳର କୋଚିରେ କକରୋଚ୍ ଜନତା ପାର୍ଟି (CJP) ପକ୍ଷରୁ ପ୍ରତିବାଦ ପ୍ରଦର୍ଶନ ଆୟୋଜନ କରାଯାଇଛି। ଏହି ପ୍ରତିବାଦରେ ସାମିଲ ହେବାକୁ ପହଞ୍ଚିଥିବା ଅଭିଜିତ ଦୀପକେ ଭୋଟର ତାଲିକାରୁ ବହୁ ସଂଖ୍ୟକ ନାଁ ବାଦ୍ ପଡ଼ିବାକୁ ନେଇ ପ୍ରଶ୍ନ ଉଠାଇଛନ୍ତି।

ଅଭିଜିତଙ୍କ ଦାବି ଅନୁସାରେ, ଦେଶରେ ୧୩ କୋଟିରୁ ଅଧିକ ଭୋଟରଙ୍କ ନାଁ ତାଲିକାରୁ ହଟାଇ ଦିଆଯାଇଛି। ଏତେ ସଂଖ୍ୟକ ଭୋଟରଙ୍କ ନାଁ ବାଦ୍ ପଡ଼ିବା ପରେ ନିର୍ବାଚନ କିପରି ସ୍ୱାଧୀନ ଓ ନିରପେକ୍ଷ ହୋଇପାରିବ ବୋଲି ସେ ପ୍ରଶ୍ନ କରିଛନ୍ତି। ତାଙ୍କ କହିବା ଅନୁଯାୟୀ, ଭୋଟର ପଞ୍ଜୀକରଣର ପ୍ରାୟ ୧୩ରୁ ୧୪ ପ୍ରତିଶତ ନାଁ ହଟାଯାଇଥିବା ନେଇ ଅଭିଯୋଗ ରହିଛି।

ନିର୍ବାଚନ ଆୟୋଗଙ୍କ ବିରୋଧରେ ଲଢ଼େଇ ଜାରି ରହିବ

କୋଚି ବିମାନବନ୍ଦରରେ ପହଞ୍ଚିବା ପରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ଅଭିଜିତ କହିଛନ୍ତି, ଏହା କୌଣସି ଦଳର ନୁହେଁ, ବରଂ ସାଧାରଣ ଲୋକଙ୍କ ପ୍ରତିବାଦ। ଆୟୋଜକ ଏବଂ ଅଭିନେତା ପ୍ରକାଶ ରାଜଙ୍କ ନିମନ୍ତ୍ରଣରେ ସେ ଏଠାକୁ ଆସିଛନ୍ତି। ସେ ଆହୁରି କହିଛନ୍ତି ଯେ, ଭାରତରେ ଏକ ସ୍ୱାଧୀନ ଓ ନିରପେକ୍ଷ ନିର୍ବାଚନ ବ୍ୟବସ୍ଥା ପ୍ରତିଷ୍ଠା ନହେବା ପର୍ଯ୍ୟନ୍ତ ମୁଖ୍ୟ ନିର୍ବାଚନ ଆୟୁକ୍ତ ଜ୍ଞାନେଶ କୁମାରଙ୍କ ବିରୋଧରେ ଏହି ଲଢ଼େଇ ଜାରି ରହିବ।

ଭୋଟର ତାଲିକାରୁ ନାଁ ବାଦ୍ ପଡ଼ିବା ପ୍ରସଙ୍ଗରେ ସେ କହିଛନ୍ତି, ସାରା ଦେଶରେ ଭୋଟରଙ୍କ ନାଁ ହଟାଯାଉଥିବା ଅଭିଯୋଗ ଆସୁଛି। ଏଥିରୁ କୌଣସି ରାଜ୍ୟ ବାଦ୍ ପଡ଼ିନାହିଁ। ଭୋଟର ତାଲିକାରୁ ଏଭଳି ନାଁ ହଟାଯିବା ଉଚିତ ନୁହେଁ ବୋଲି ସେ ମତ ଦେଇଛନ୍ତି।

ପଶ୍ଚିମବଙ୍ଗର ନିର୍ବାଚନ ପ୍ରସଙ୍ଗ ଉଠାଇ ଅଭିଜିତ କହିଛନ୍ତି, ସେଠାରେ ବିଜେପି ବିଜୟୀ ହେବା ପରେ ନିର୍ବାଚନ ଆୟୁକ୍ତଙ୍କୁ ମୁଖ୍ୟମନ୍ତ୍ରୀଙ୍କ ପ୍ରମୁଖ ସଚିବ ଭାବେ ନିଯୁକ୍ତ କରାଯାଇଥିବା ଭଳି ଘଟଣା ଘଟିଥିଲା। ନିର୍ବାଚନ ବ୍ୟବସ୍ଥାର ନିରପେକ୍ଷତା ଉପରେ ପ୍ରଶ୍ନ ଉଠୁଥିବା ବେଳେ ଏପରି ଘଟଣାକୁ ଗ୍ରହଣ କରାଯାଇପାରିବ ନାହିଁ ବୋଲି ସେ କହିଛନ୍ତି।

ସାମିଲ ହେବାକୁ ପ୍ରକାଶ ରାଜଙ୍କ ଆହ୍ୱାନ

ଅନ୍ୟପଟେ ଅଭିନେତା ପ୍ରକାଶ ରାଜ ମଧ୍ୟ ଏହି ପ୍ରତିବାଦକୁ ସମର୍ଥନ କରିଛନ୍ତି। ଶନିବାର ଆୟୋଜିତ ଏହି ପ୍ରଦର୍ଶନରେ ଅଧିକରୁ ଅଧିକ ଲୋକ ସାମିଲ ହେବାକୁ ସେ ଆହ୍ୱାନ ଦେଇଛନ୍ତି। ଗଣତନ୍ତ୍ରର ସୁରକ୍ଷା ପାଇଁ ନାଗରିକମାନେ ଏକାଠି ହେବା ଆବଶ୍ୟକ ବୋଲି ସେ କହିଛନ୍ତି।

ଅଭିଜିତ ଦୀପକେଙ୍କ ବ୍ୟତୀତ ସୌରଭ ଦାସ ଏବଂ ଆଶୁତୋଷ ରାଙ୍କା ମଧ୍ୟ ଏହି ପ୍ରତିବାଦରେ ଯୋଗଦେବା ପାଇଁ କୋଚିରେ ପହଞ୍ଚିଛନ୍ତି। SIR ପ୍ରକ୍ରିୟାକୁ ନେଇ ଦେଶରେ ଚାଲିଥିବା ବିତର୍କ ମଧ୍ୟରେ ଏହି ପ୍ରତିବାଦ ରାଜନୈତିକ ଓ ସାମାଜିକ ଚର୍ଚ୍ଚାକୁ ଆହୁରି ଜୋରଦାର କରିଛି।

କର୍ଣ୍ଣାଲ: ଭୋଟର ତାଲିକାର ସ୍ୱତନ୍ତ୍ର ସଘନ ସଂଶୋଧନ (SIR)କୁ ନେଇ ଦେଶରେ ରାଜନୈତିକ ତାତି ବଢ଼ୁଥିବାବେଳେ କଂଗ୍ରେସ ଏବଂ ରାହୁଲ ଗାନ୍ଧିଙ୍କୁ କଡ଼ା ଭାଷାରେ ଟାର୍ଗେଟ୍ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ। ଲଗାତାର ନିର୍ବାଚନୀ ପରାଜୟରେ ହତାଶ ହୋଇ ରାହୁଲ ଗାନ୍ଧି ନିର୍ବାଚନ ଆୟୋଗ ଉପରେ ଦୋଷ ଲଦୁଥିବା ସେ ଅଭିଯୋଗ କରିଛନ୍ତି। ଗଣତନ୍ତ୍ରରେ ଆଲୋଚନା ପାଇଁ ସଂସଦ ହିଁ ସବୁଠାରୁ ଉପଯୁକ୍ତ ମଞ୍ଚ, ରାସ୍ତା ନୁହେଁ ବୋଲି ଶାହ କହିଛନ୍ତି।

ଗୁରୁବାର ହରିୟାଣାର କର୍ଣ୍ଣାଲରେ ବିଜେପି ପକ୍ଷରୁ ଆୟୋଜିତ ‘ଗଣତନ୍ତ୍ର ବଞ୍ଚାଅ, ଅରାଜକତା ହଟାଅ’ ପଦଯାତ୍ରାର ସମାପନୀ କାର୍ଯ୍ୟକ୍ରମରେ ଯୋଗଦେଇ ଅମିତ ଶାହ ବିରୋଧୀ ଦଳ ନେତା ରାହୁଲ ଗାନ୍ଧିଙ୍କୁ ଘେରିଥିଲେ। ନିର୍ବାଚନରେ ପରାଜୟ ପରେ କଂଗ୍ରେସ ନିଜର ବିଫଳତାକୁ ସ୍ୱୀକାର କରିବା ବଦଳରେ ନିର୍ବାଚନ ଆୟୋଗ ଏବଂ SIR ପ୍ରକ୍ରିୟାକୁ ଦାୟୀ କରୁଥିବା ସେ କହିଥିଲେ।

ସଂସଦରେ ଆଲୋଚନା ନକରି ରାସ୍ତାରେ ହଙ୍ଗାମା କାହିଁକି ?

ଅମିତ ଶାହ କହିଥିଲେ ଯେ, ଗଣତନ୍ତ୍ରରେ ସଂସଦ ହେଉଛି ଆଲୋଚନା ଓ ବିତର୍କର ସର୍ବୋଚ୍ଚ ମଞ୍ଚ। କିନ୍ତୁ ରାହୁଲ ଗାନ୍ଧି ସଂସଦର କାର୍ଯ୍ୟକୁ ସ୍ୱାଭାବିକ ଭାବେ ଚାଲିବାକୁ ଦେଉନାହାନ୍ତି। ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଆଲୋଚନା କରିବା ବଦଳରେ ହୋହଲ୍ଲା ଓ ବହିଷ୍କାରକୁ କଂଗ୍ରେସ ନିଜର ରାଜନୈତିକ ଶୈଳୀ କରିଦେଇଛି ବୋଲି ସେ କଟାକ୍ଷ କରିଥିଲେ।

ଶାହଙ୍କ କହିବା ଅନୁଯାୟୀ, ଦେଶର ଆଇନ ପ୍ରଣୟନ, ଜନସାଧାରଣଙ୍କ ସମସ୍ୟା ଏବଂ ଲୋକଙ୍କ କଲ୍ୟାଣ ପାଇଁ ହେଉଥିବା ଯୋଜନା ଉପରେ ଆଲୋଚନା ସଂସଦରେ ହେବା ଉଚିତ। ରାସ୍ତାରେ ଭିଡ଼ ଜମାଇ ଅରାଜକତା ସୃଷ୍ଟି କରିବା ଗଣତାନ୍ତ୍ରିକ ପଦ୍ଧତି ନୁହେଁ ବୋଲି ସେ କହିଥିଲେ।

ରାହୁଲଙ୍କୁ ଖୋଲା ଚ୍ୟାଲେଞ୍ଜ ଦେଲେ ଗୃହମନ୍ତ୍ରୀ

ରାହୁଲ ଗାନ୍ଧିଙ୍କ ଆଲୋଚନା ପାଇଁ ଆହ୍ୱାନକୁ ନେଇ ମଧ୍ୟ ଅମିତ ଶାହ ଜବାବ ରଖିଥିଲେ। ସେ କହିଥିଲେ, ଯଦି ରାହୁଲ ଗାନ୍ଧିଙ୍କର ରାସ୍ତାରେ ଆଲୋଚନା କରିବାକୁ ଏତେ ଆଗ୍ରହ ଅଛି, ତେବେ ବିଜେପି ଏଥିପାଇଁ ପ୍ରସ୍ତୁତ। ହରିୟାଣାର ଯେକୌଣସି ଛକର ସ୍ଥାନ ନିର୍ଦ୍ଧାରଣ କରିବାକୁ ସେ ରାହୁଲଙ୍କୁ କହିଥିଲେ। ସେଠାକୁ ବିଜେପି ଯୁବମୋର୍ଚ୍ଚାର ସଭାପତି ଯାଇ ତାଙ୍କ ସହ ଆଲୋଚନା କରିବେ ବୋଲି ଶାହ ଆହ୍ୱାନ ଦେଇଥିଲେ। ସେ ଆହୁରି କହିଥିଲେ ଯେ, ନିର୍ବାଚନରେ ପରାଜୟ ହେବାର ଆଶଙ୍କା ଥିବାରୁ ରାହୁଲ ଗାନ୍ଧି ଆଗୁଆ ନିର୍ବାଚନ ଆୟୋଗ ଏବଂ SIR ପ୍ରକ୍ରିୟାକୁ ଦୋଷ ଦେଉଛନ୍ତି।

SIR ଉପରେ ସ୍ୱତନ୍ତ୍ର ସଂସଦ ଅଧିବେଶନ ପାଇଁ ପ୍ରସ୍ତୁତ ବିଜେପି

SIR ପ୍ରସଙ୍ଗରେ ଆଲୋଚନାକୁ ନେଇ ଅମିତ ଶାହ ରାହୁଲ ଗାନ୍ଧିଙ୍କୁ ଆଉ ଏକ ଚ୍ୟାଲେଞ୍ଜ ଦେଇଥିଲେ। ଯଦି ଏହି ପ୍ରସଙ୍ଗରେ ଆଲୋଚନା କରିବାକୁ କଂଗ୍ରେସ ଚାହୁଁଛି, ତେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଚିଠି ଲେଖିବାକୁ ସେ କହିଥିଲେ। SIR ପ୍ରକ୍ରିୟା ଉପରେ ବିତର୍କ ପାଇଁ ସରକାର ସଂସଦର ସ୍ୱତନ୍ତ୍ର ଅଧିବେଶନ ଡାକିବାକୁ ପ୍ରସ୍ତୁତ ଅଛନ୍ତି ବୋଲି ଶାହ ସ୍ପଷ୍ଟ କରିଥିଲେ।

ନୂଆଦିଲ୍ଲୀ: ନିକଟରେ ଦିଲ୍ଲୀର ରାମଲୀଳା ମଇଦାନରେ ଇଣ୍ଡି ମେଣ୍ଟ ଦ୍ୱାରା ଆୟୋଜନ କରାଯାଇଥିବା ରାଲିରେ ଯୋଗ ନ ଦେବାକୁ ନେଇ କଂଗ୍ରେସ ଆକ୍ସନ ମୁଡକୁ ଆସିଛି । ଦେଶବ୍ୟାପୀ  ୨୦୦ ରୁ ଅଧିକ ନେତାଙ୍କୁ ଦଳରୁ ନିଲମ୍ବିତ କରିଛି ଭାରତୀୟ ଯୁବ କଂଗ୍ରେସ । ଏଥିରେ ଯୁବ କଂଗ୍ରେସର ସାଧାରଣ ସମ୍ପାଦକ ରୋହିତ ରାଜୋରିଆ ମଧ୍ୟ ଅନ୍ତର୍ଭୁକ୍ତ । ରୋହିତଙ୍କୁ ତାଙ୍କ ପଦରୁ ହଟାଇ ଦିଆଯାଇଛି । 

ପ୍ରକାଶିତ ବିଜ୍ଞପ୍ତି ଅନୁସାରେ, ବର୍ତ୍ତମାନ ସୁଦ୍ଧା  ୭ଟି ରାଜ୍ୟରୁ ଅତିକମରେ ୧୮୫ ଜଣ ସଦସ୍ୟଙ୍କୁ ନିଲମ୍ବିତ କରାଯାଇଛି ଏବଂ ସେମାନଙ୍କୁ ଅନୁପସ୍ଥିତିର କାରଣ ଦର୍ଶାଇବାକୁ କୁହାଯାଇଛି। ମଧ୍ୟପ୍ରଦେଶରେ ସର୍ବାଧିକ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ଯେଉଁଠାରେ ୬୦ ଜଣ ସଦସ୍ୟଙ୍କୁ ନିଲମ୍ବିତ କରାଯାଇଛି। ଏହା ବ୍ୟତୀତ ଗୁଜୁରାଟରେ ୪୯ ଜଣ, ପଶ୍ଚିମବଙ୍ଗରେ ୨୬ ଜଣ, ତେଲେଙ୍ଗାନାରେ ୧୪ ଜଣ, ଉତ୍ତରପ୍ରଦେଶରେ ୧୩ ଜଣ, ହିମାଚଳ ପ୍ରଦେଶରେ ୧୩ ଜଣ ଏବଂ ହରିୟାଣାରେ ୧୦ ଜଣ ସଦସ୍ୟଙ୍କୁ ନିଲମ୍ବିତ କରାଯାଇଛି। ଏହି ସଂଖ୍ୟା ୫୦୦ ପର୍ଯ୍ୟନ୍ତ ବୃଦ୍ଧି ପାଇପାରେ ବୋଲି କୁହାଯାଉଛି । 

ସେପଟେ ଦଳର ଏଭଳି ନିଷ୍ପତି ଉପରେ ଯୁବ କଂଗ୍ରେସର ନେତାମାନେ ଅସନ୍ତୋଷ ଝାଡ଼ିଛନ୍ତି । କେବଳ ଗୋଟିଏ ଘଟଣାକୁ ଆଧାର କରି ଦଳ କିପରି ସେମାନଙ୍କ ବିରୋଧରେ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରିପାରିଲା ବୋଲି ପ୍ରଶ୍ନ କରିଛନ୍ତି । ରୋହିତ ରାଜୋରିଆ କହିଛନ୍ତି ଯେ ଦଳ ପାଇଁ ସେମାନେ ଅନେକ ଯନ୍ତ୍ରଣାର ସମ୍ମୁଖୀନ ହୋଇଛନ୍ତି । ଏଫ୍‌ଆଇଆର୍ ର ସାମ୍ନା କରିବା ସହିତ ଜେଲ୍ ମଧ୍ୟ ଯାଇଛନ୍ତି । କେବଳ ଗୋଟିଏ କାର୍ଯ୍ୟକ୍ରମରେ ଯୋଗ ଦେଇପାରିନଥିବାରୁ ଆମକୁ ପଦରୁ ହଟାଇ ଦିଆଯାଉଛି କି ବୋଲି ସେ ପ୍ରଶ୍ନ କରିଛନ୍ତି । ସେ ନିଜ କକାଙ୍କ ଏକାଦଶାହ କର୍ମରେ ଯୋଗ ଦେବାକୁ ଯାଇଥିଲେ । କକାଙ୍କ ଏକାଦଶର ନିମନ୍ତ୍ରଣ କାର୍ଡ ମଧ୍ୟ ଦେଖାଇ ପ୍ରମାଣ ଦେଇଛନ୍ତି । 

ଭୁବନେଶ୍ୱର: ଓଡ଼ିଶାର ଯୁବପିଢ଼ି, ବିଶେଷକରି Gen-Z ଭୋଟରଙ୍କୁ ନିଜ ସହ ଯୋଡ଼ିବା ପାଇଁ ବିଜେପି ଆରମ୍ଭ କରିବାକୁ ଯାଉଛି ଏକ ରାଜ୍ୟବ୍ୟାପୀ ଅଭିଯାନ। ନଭେମ୍ବର ୬ରୁ ‘ଯୁବ ସମ୍ବାଦ’ ନାମରେ ଏହି ସ୍ୱତନ୍ତ୍ର କାର୍ଯ୍ୟକ୍ରମ ଆରମ୍ଭ ହେବ। ବିଜେପି ଯୁବ ମୋର୍ଚ୍ଚା ଏହି ଅଭିଯାନର ନେତୃତ୍ୱ ନେବ।

ଯୁବପିଢ଼ିଙ୍କ ମଧ୍ୟରେ ଦଳର ସାଂଗଠନିକ ଆଧାରକୁ ମଜଭୁତ କରିବା ଏବଂ ସେମାନଙ୍କ ସହ ସିଧାସଳଖ ଯୋଡ଼ି ହେବା ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ। ଏଥିପାଇଁ କଲେଜ ଓ ବିଶ୍ୱବିଦ୍ୟାଳୟ କ୍ୟାମ୍ପସ ସହିତ ପଞ୍ଚାୟତ ଏବଂ ମଣ୍ଡଳ ସ୍ତରରେ ମଧ୍ୟ ବିଭିନ୍ନ ଆଲୋଚନା ଓ ସମ୍ପର୍କ କାର୍ଯ୍ୟକ୍ରମ ଆୟୋଜନ କରାଯିବ।

ସୂଚନା ଅନୁସାରେ, ରାଜ୍ୟ ବିଜେପି ମୁଖ୍ୟାଳୟରେ ଯୁବ ମୋର୍ଚ୍ଚାର ଏକ ବୈଠକରେ ଏହି ଅଭିଯାନର ରୂପରେଖ ଚୂଡ଼ାନ୍ତ ହୋଇଛି। କ୍ୟାମ୍ପସରେ ଛାତ୍ରଛାତ୍ରୀଙ୍କ ସହ ଜାତୀୟ ଏକତା, ସଂଘୀୟ ବ୍ୟବସ୍ଥା ଓ ଜାତୀୟ ସ୍ୱାର୍ଥ ଭଳି ପ୍ରସଙ୍ଗରେ ଆଲୋଚନା କରିବେ ଯୁବ ମୋର୍ଚ୍ଚା କର୍ମୀ। ଏହା ସହ ଯୁବପିଢ଼ିଙ୍କ ପ୍ରତିଭାକୁ ପ୍ରୋତ୍ସାହନ ଦେବା ପାଇଁ ବିଭିନ୍ନ ପ୍ରତିଯୋଗିତା ମଧ୍ୟ ଆୟୋଜନ ହେବ।

ଅନ୍ୟପଟେ, ଗାଁ ଓ ପଞ୍ଚାୟତ ସ୍ତରରେ ଯୁବକଯୁବତୀଙ୍କ ସହ ଆଲୋଚନା କରି ସେମାନଙ୍କ ସମସ୍ୟା, ଆଶା ଓ ଆକାଂକ୍ଷା ବୁଝିବାକୁ ଦଳ ଯୋଜନା କରିଛି।

ଉଲ୍ଲେଖଯୋଗ୍ୟ, ଦୀର୍ଘ ୮ ବର୍ଷର ବ୍ୟବଧାନ ପରେ ଗତ ଅକ୍ଟୋବର ୧୫ରେ ଓଡ଼ିଶାରେ ଛାତ୍ର ସଂସଦ ନିର୍ବାଚନ ହୋଇଥିଲା। ଏଥିରେ ଏବିଭିପି ସମର୍ଥିତ ପ୍ରାର୍ଥୀ ଅନେକ ଶିକ୍ଷାନୁଷ୍ଠାନରେ ସଫଳତା ପାଇଥିବା ବେଳେ ରେଭେନ୍ସା ଓ ରମାଦେବୀ ଭଳି ପ୍ରମୁଖ ଅନୁଷ୍ଠାନରେ ବିଜେଡିର ଛାତ୍ର ସଂଗଠନ ମଧ୍ୟ ବିଜୟୀ ହୋଇଥିଲା।

ତେବେ କେବଳ ରାଜନୈତିକ ଆଲୋଚନା ନୁହେଁ, ନିଯୁକ୍ତି, ଶିକ୍ଷା, ଦକ୍ଷତା ବିକାଶ ଓ ଯୁବପିଢ଼ିଙ୍କ ଭବିଷ୍ୟତ ସମ୍ପର୍କିତ ପ୍ରସଙ୍ଗରେ ବିଜେପି କେତେ ଗୁରୁତ୍ୱ ଦେଉଛି, ତାହା ହିଁ ଏହି ଅଭିଯାନର ସଫଳତା ନିର୍ଣ୍ଣୟ କରିବ। 

ମୁମ୍ବାଇ: ଏନ୍‌ସିପି ମୁଖ୍ୟ ଶରଦ ପାୱାରଙ୍କୁ ଫୋନ୍ କରି ସ୍ୱାସ୍ଥ୍ୟାବସ୍ଥା ପଚାରି ବୁଝିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଏହି ଫୋନ୍ କଲ୍ ପରେ ମହାରାଷ୍ଟ୍ର ରାଜନୀତିରେ ନୂଆ ଚର୍ଚ୍ଚା ଆରମ୍ଭ ହୋଇଛି। ଶରଦ ପାୱାରଙ୍କ ଝିଅ ତଥା ସାଂସଦ ସୁପ୍ରିୟା ସୁଲେଙ୍କୁ ନେଇ ମଧ୍ୟ ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି। ମୋଦୀ ତାଙ୍କୁ କହିଥିବା ଏକ ବିଶେଷ ବାର୍ତ୍ତା ସମ୍ପର୍କରେ ଶରଦ ପାୱାରଙ୍କ ଘନିଷ୍ଠ ସହଯୋଗୀ ବିଠଲ ମଣିୟାର ଦାବି କରିଛନ୍ତି।

ମଣିୟାରଙ୍କ କହିବା ଅନୁଯାୟୀ, ଫୋନ୍‌ରେ ମୋଦୀ ଶରଦ ପାୱାରଙ୍କୁ ବିଶ୍ରାମ ନେବାକୁ ପରାମର୍ଶ ଦେବା ସହ ସୁପ୍ରିୟା ସୁଲେ ଏବେ ଦେଶର ଦାୟିତ୍ୱ ସମ୍ଭାଳିବା ପାଇଁ ପ୍ରସ୍ତୁତ ବୋଲି କହିଥିଲେ। ତେବେ ଏହି କଥାବାର୍ତ୍ତାକୁ ନେଇ ଉଭୟ ମୋଦୀ ଓ ଶରଦ ପାୱାରଙ୍କ ପକ୍ଷରୁ ଆନୁଷ୍ଠାନିକ ପୁଷ୍ଟି କରାଯାଇନାହିଁ।

ମୋଦୀଙ୍କ ଫୋନ୍ ପରେ ସୁପ୍ରିୟାଙ୍କୁ ନେଇ ଚର୍ଚ୍ଚା

ବିଠଲ ମଣିୟାର ସାମ୍ବାଦିକଙ୍କୁ କହିଛନ୍ତି ଯେ, ବୁଧବାର ସକାଳେ ପ୍ରଧାନମନ୍ତ୍ରୀ ଶରଦ ପାୱାରଙ୍କୁ ଫୋନ୍ କରିଥିଲେ। ଏହି ସମୟରେ ମୋଦୀ ତାଙ୍କ ସହ ଆତ୍ମୀୟତାର ସହ କଥା ହୋଇ ସ୍ୱାସ୍ଥ୍ୟାବସ୍ଥା ବିଷୟରେ ପଚାରିଥିଲେ ଏବଂ ଅଧିକ ବିଶ୍ରାମ ନେବାକୁ କହିଥିଲେ।

ମଣିୟାରଙ୍କ ଦାବି ଅନୁସାରେ, ମୋଦୀ କହିଥିଲେ ଯେ ସୁପ୍ରିୟା ସୁଲେ ଏବେ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି। ସେ ଏବଂ ଅନ୍ୟମାନେ ଦେଶ ପାଇଁ କାମ କରିପାରିବେ। ତେଣୁ ଶରଦ ପାୱାର ନିଜ ସ୍ୱାସ୍ଥ୍ୟର ଯତ୍ନ ନେଇ ବିଶ୍ରାମ କରିବା ଉଚିତ। ପ୍ରଧାନମନ୍ତ୍ରୀଙ୍କ ଏହି ଆଶ୍ୱାସନା ପାଇଁ ପାୱାର କୃତଜ୍ଞତା ଜଣାଇଥିବା ମଧ୍ୟ ସେ କହିଛନ୍ତି।

ଶରଦ ପାୱାରଙ୍କ ସ୍ୱାସ୍ଥ୍ୟକୁ ନେଇ ଚିନ୍ତା

୮୫ ବର୍ଷୀୟ ଶରଦ ପାୱାରଙ୍କୁ ନଭେମ୍ବର ୨ ତାରିଖରେ କାଶ ଓ ଛାତିରେ ଯନ୍ତ୍ରଣା ଅନୁଭବ ହେବାରୁ ପୁଣେର ରୁବି ହଲ୍ କ୍ଲିନିକ୍‌ରେ ଭର୍ତ୍ତି କରାଯାଇଥିଲା। ଦୁଇ ଦିନ ଚିକିତ୍ସା ପରେ ନଭେମ୍ବର ୪ରେ ତାଙ୍କୁ ଡିସଚାର୍ଜ କରାଯାଇଥିଲା। ତେବେ ପରେ ପୁଣି ସ୍ୱାସ୍ଥ୍ୟାବସ୍ଥା ବିଗିଡ଼ିବାରୁ ମୁମ୍ବାଇର ବ୍ରିଚ୍ କ୍ୟାଣ୍ଡି ହସ୍ପିଟାଲରେ ତାଙ୍କୁ ଭର୍ତ୍ତି କରାଯାଇଥିବା ଖବର ମିଳିଛି। ଏହା ପୂର୍ବରୁ ଶରଦ ପାୱାରଙ୍କ ଝିଅ ସୁପ୍ରିୟା ସୁଲେ କହିଥିଲେ ଯେ ତାଙ୍କ ପିତାଙ୍କ ସମସ୍ତ ମେଡିକାଲ ରିପୋର୍ଟର ମାନଦଣ୍ଡ ସ୍ଥିର ରହିଛି ଏବଂ ଆବଶ୍ୟକୀୟ ପରୀକ୍ଷା ଚାଲିଛି।

ନୂଆଦିଲ୍ଲୀ: ଭୋଟର ତାଲିକାରେ ପୂର୍ବରୁ ନାମ ଥିଲା, ହେଲେ ଏବେ SIR ଡ୍ରାଫ୍ଟ ଭୋଟର ଲିଷ୍ଟରେ ନାମ ଦେଖାଯାଉନାହିଁ କି? ତେବେ ଆଉ ଚିନ୍ତା କରିବାର ଆବଶ୍ୟକତା ନାହିଁ। ଏଭଳି ଭୋଟରଙ୍କୁ ପୁଣି ଥରେ ନିଜ ନାମ ଭୋଟର ତାଲିକାରେ ସାମିଲ କରିବା ପାଇଁ ସୁଯୋଗ ଦେଇଛନ୍ତି ନିର୍ବାଚନ କମିଶନ। ଏଥିପାଇଁ ସେମାନେ Form 6 ଦାଖଲ କରିପାରିବେ। ଏହାକୁ ନେଇ କୌଣସି ଆଇନଗତ ଭୟ ରଖିବା ଦରକାର ନାହିଁ ବୋଲି କମିଶନ ସ୍ପଷ୍ଟ କରିଛନ୍ତି।

ମଙ୍ଗଳବାର ଏନେଇ ସମସ୍ତ ରାଜ୍ୟର ମୁଖ୍ୟ ନିର୍ବାଚନ ଅଧିକାରୀଙ୍କୁ ଚିଠି ଲେଖିଛନ୍ତି ନିର୍ବାଚନ କମିଶନ। ବର୍ତ୍ତମାନ ଚାଲିଥିବା ସ୍ପେଶାଲ ଇଣ୍ଟେନସିଭ୍ ରିଭିଜନ (SIR) ପ୍ରକ୍ରିୟାରେ ଅନେକ ପୁରୁଣା ଭୋଟରଙ୍କ ନାମ ଡ୍ରାଫ୍ଟ ତାଲିକାରେ ନଥିବାରୁ ସେମାନେ ନୂଆ ଆବେଦନ କରିବାକୁ ଦ୍ୱିଧାରେ ଥିବା କମିଶନଙ୍କ ନଜରକୁ ଆସିଥିଲା।

Form 6 ଦାଖଲ କଲେ ହେବନି ମାମଲା

ନିର୍ବାଚନ କମିଶନଙ୍କ ଏହି ସ୍ପଷ୍ଟୀକରଣ ପଛରେ ରହିଛି ଏକ ଗୁରୁତ୍ୱପୂର୍ଣ୍ଣ ଆଇନଗତ ଦ୍ୱନ୍ଦ୍ୱ। Form 6ରେ ଆବେଦନକାରୀ ପ୍ରଥମ ଥର ପାଇଁ ଭୋଟର ତାଲିକାରେ ନାମ ସାମିଲ କରିବାକୁ ଆବେଦନ କରୁଥିବା ନେଇ ଘୋଷଣା କରିବାକୁ ପଡ଼ିଥାଏ।

ଏପରି ସ୍ଥିତିରେ ପୂର୍ବରୁ ଭୋଟର ଥିବା ବ୍ୟକ୍ତି ପୁଣି Form 6 ଭରିଲେ ଏହାକୁ ମିଥ୍ୟା ଘୋଷଣା ବୋଲି ଧରାଯାଇପାରେ ଏବଂ ଜନପ୍ରତିନିଧିତ୍ୱ ଆଇନ, ୧୯୫୦ର ଧାରା ୩୧ ଅନୁସାରେ ଆଇନଗତ କାର୍ଯ୍ୟାନୁଷ୍ଠାନ ହୋଇପାରେ ବୋଲି ଅନେକ ଭୋଟର ଆଶଙ୍କା କରୁଥିଲେ।

କିନ୍ତୁ କମିଶନ ସ୍ପଷ୍ଟ କରିଛନ୍ତି ଯେ, ପୂର୍ବରୁ ଭୋଟର ଥିବା ବ୍ୟକ୍ତିଙ୍କ ନାମ SIR ଡ୍ରାଫ୍ଟ ତାଲିକାରୁ ବାଦ୍ ପଡ଼ିଥିଲେ, କେବଳ ପୁଣି ଥରେ Form 6 ଦାଖଲ କରିବା ମିଥ୍ୟା ଘୋଷଣା ଭାବେ ବିବେଚିତ ହେବ ନାହିଁ।

କେଉଁ ପରିସ୍ଥିତିରେ ହୋଇପାରିବ କାର୍ଯ୍ୟାନୁଷ୍ଠାନ ?

ଏହି ପ୍ରସଙ୍ଗରେ ନିର୍ବାଚନ କମିଶନ ଏକ ସର୍ତ୍ତ ମଧ୍ୟ ସ୍ପଷ୍ଟ କରିଛନ୍ତି। ଯଦି ଜଣେ ବ୍ୟକ୍ତି ଅନ୍ୟ କୌଣସି ନିର୍ବାଚନ ମଣ୍ଡଳୀରେ ପୂର୍ବରୁ ପଞ୍ଜୀକୃତ ଅଛନ୍ତି କିମ୍ବା ଜାଣିଶୁଣି ଭୁଲ୍ ତଥ୍ୟ ଓ ବେଆଇନ ଘୋଷଣା ଦେଇଛନ୍ତି, ତେବେ ତାଙ୍କ ବିରୋଧରେ ଆଇନ ଅନୁସାରେ ପଦକ୍ଷେପ ନିଆଯାଇପାରିବ।

କେବଳ ପୁରୁଣା ଭୋଟର ହୋଇ ମଧ୍ୟ SIR ଡ୍ରାଫ୍ଟ ତାଲିକାରେ ନାମ ନଥିବା କାରଣରୁ Form 6 ଦାଖଲ କରିଥିଲେ, ନିର୍ବାଚନ ପଞ୍ଜୀକରଣ ଅଧିକାରୀ (ERO) ଧାରା ୩୧ ଅନୁସାରେ ମାମଲା ଆରମ୍ଭ କରିପାରିବେ ନାହିଁ।

ବାରାଣସୀ: ଉତ୍ତରପ୍ରଦେଶ ରାଜନୀତିରେ ଏବେଠୁ ୨୦୨୭ ବିଧାନସଭା ନିର୍ବାଚନକୁ ନେଇ ଚର୍ଚ୍ଚା ଜୋର ଧରିଛି। ଏହାରି ମଧ୍ୟରେ ସମାଜବାଦୀ ପାର୍ଟି (SP) ମୁଖ୍ୟ ଅଖିଳେଶ ଯାଦବଙ୍କ ଏକ ବଡ଼ ବୟାନ ରାଜନୈତିକ ମହଲରେ ହଟଚମଟ ସୃଷ୍ଟି କରିଛି। ଆସନ୍ତା ୨୦୨୭ ବିଧାନସଭା ନିର୍ବାଚନରେ ସେ ନିଜେ ପ୍ରାର୍ଥୀ ହେବେ ନାହିଁ ବୋଲି ସ୍ପଷ୍ଟ କରିବା ସହ ସିଧାସଳଖ ମୁଖ୍ୟମନ୍ତ୍ରୀ ପଦର ଶପଥ ନେବା ନେଇ ଆତ୍ମବିଶ୍ୱାସ ପ୍ରକାଶ କରିଛନ୍ତି।

ମଙ୍ଗଳବାର ବାରାଣସୀ ଗସ୍ତ ସମୟରେ ସାମ୍ବାଦିକଙ୍କ ସହ ଆଲୋଚନା ବେଳେ ଅଖିଳେଶ ଏହି ମନ୍ତବ୍ୟ ଦେଇଛନ୍ତି। କାଶୀର କୌଣସି ବିଧାନସଭା ଆସନରୁ ସେ ନିର୍ବାଚନ ଲଢ଼ିବେ କି ନାହିଁ ବୋଲି ପଚରାଯିବାରୁ ନିଜ ନିଷ୍ପତ୍ତି ସ୍ପଷ୍ଟ କରିଥିଲେ। ତାଙ୍କ କହିବା ଅନୁଯାୟୀ, ଯେଉଁ ରାସ୍ତା ତାଙ୍କ ପାଇଁ ପୂର୍ବରୁ ଶୁଭ ସାବ୍ୟସ୍ତ ହୋଇଛି, ସେ ଏଥର ମଧ୍ୟ ସେହି ରାସ୍ତା ଆପଣାଇବେ।

୨୦୧୨ର ଉଦାହରଣ ଦେଲେ ସପା ମୁଖ୍ୟ

ନିଜ ରାଜନୈତିକ ଅଭିଜ୍ଞତାକୁ ଉଦାହରଣ ଭାବେ ରଖି ଅଖିଳେଶ କହିଛନ୍ତି ଯେ, ସେ ଯେତେବେଳେ ମୁଖ୍ୟମନ୍ତ୍ରୀ ହୋଇଥିଲେ, ସେତେବେଳେ ବିଧାନସଭା ନିର୍ବାଚନ ଲଢ଼ିନଥିଲେ। ବରଂ ଲୋକସଭା ସାଂସଦ ଥାଇ ମୁଖ୍ୟମନ୍ତ୍ରୀ ହୋଇଥିଲେ। ତେଣୁ ଏଥର ମଧ୍ୟ ସେହି ରାଜନୈତିକ ପଥ ଅନୁସରଣ କରିବେ ବୋଲି ସଙ୍କେତ ଦେଇଛନ୍ତି।

ଉଲ୍ଲେଖଯୋଗ୍ୟ, ୨୦୧୨ରେ ଉତ୍ତରପ୍ରଦେଶରେ ସମାଜବାଦୀ ପାର୍ଟି ସରକାର ଗଠନ କରିବା ପରେ ଅଖିଳେଶ ଯାଦବ ମୁଖ୍ୟମନ୍ତ୍ରୀ ହୋଇଥିଲେ। ସେହି ସମୟରେ ସେ କନ୍ନୌଜରୁ ଲୋକସଭା ସାଂସଦ ଥିଲେ। ମୁଖ୍ୟମନ୍ତ୍ରୀ ହେବା ପରେ ଲୋକସଭା ସଦସ୍ୟତାରୁ ଇସ୍ତଫା ଦେଇଥିଲେ।

ଯୋଗୀ ସରକାରଙ୍କୁ ଘେରିଲେ ଅଖିଳେଶ

ବାରାଣସୀରେ କେବଳ ନିର୍ବାଚନ ନୁହେଁ, ବିଭିନ୍ନ ପ୍ରସଙ୍ଗରେ ଯୋଗୀ ଆଦିତ୍ୟନାଥଙ୍କ ସରକାରକୁ ମଧ୍ୟ ଟାର୍ଗେଟ କରିଛନ୍ତି ସପା ମୁଖ୍ୟ। ଏମଏଲସି ନିର୍ବାଚନରେ ସପା ପ୍ରାର୍ଥୀଙ୍କୁ ହରାଇବା ପାଇଁ ପ୍ରଶାସନ ଉଦ୍ୟମ କରିଥିବା ସେ ଅଭିଯୋଗ କରିଛନ୍ତି। ତେବେ ବାବା ବିଶ୍ୱନାଥଙ୍କ ଆଶୀର୍ବାଦରୁ ଦଳକୁ ସଫଳତା ମିଳିଥିବା ସେ କହିଛନ୍ତି।

ଉଦଳା: ପୁଣି ଥରେ ବିଜୁ ଜନତା ଦଳର ନେତାଙ୍କ ଦାଦାଗିରି ସାମ୍ନାକୁ ଆସିଛି । ପୂର୍ବତନ ବିଜେଡ଼ି ଉଦଳା ବିଧାୟକ ଶ୍ରୀନାଥ ସୋରେନଙ୍କ ନାଁରେ ସାଙ୍ଘାତିକ ଅଭିଯୋଗ । ମଝି ରାସ୍ତାରେ ସ୍ପଷ୍ଟ ଦିବାଲୋକରେ ବିଜେଡ଼ି ନେତା ଜଣେ ଯୁବକଙ୍କୁ ନିର୍ଘାତ ମାଡ଼ ମାରିଛନ୍ତି । ପୂର୍ବତନ ବିଜେଡି ବିଧାୟକ ଶ୍ରୀନାଥ ସୋରେନ ଏବଂ ଅନ୍ୟ କର୍ମୀ। ଶ୍ରୀନାଥ ସୋରେନ ଙ୍କ ସହିତ ଉଦଳା ବ୍ଲକ ସଭାପତି ଗୋବିନ୍ଦ ବେହେରା, ଜିଲ୍ଲା ଉପ ସଭାପତି ଶଶଧର ସ୍ୱାଇଁ ଙ୍କ ସମେତ ଅନ୍ୟ ବିଜେଡି କର୍ମୀ ସଂଘବଦ୍ଧ ଆକ୍ରମଣ କରିଥିବା ଅଭିଯୋଗ ହୋଇଛି । 

ଉଦଳା ଥାନା ବୃନ୍ଦାଗଡି ଛକରେ ନିକଟରେ ଗାଡ଼ି ଚଳାଇବାକୁ ନେଇ ଗଣ୍ଡଗୋଳ ହୋଇଛି । ଭରଡ଼ାଡ଼ିହି ଅଞ୍ଚଳର ଦେବାଶିଷ ହାଁସଦା ବାଇକରେ ଆସୁଥିବାବେଳେ ଶ୍ରୀନାଥ ସୋରେନ ଏବଂ ତାଙ୍କ କର୍ମୀମାନେ କାରରେ ହାଟସାହିରୁ ଉଦଳା ଅଭିମୁଖେ ଆସୁଥିଲେ । ରାସ୍ତା ଛାଡ଼ିବାକୁ ନେଇ ବାକ ବିତଣ୍ଡା ହୋଇଥିଲା । ଏହି ସମୟରେ ଦେବାଶିଷଙ୍କୁ ଅତର୍କିତ ଭାବେ ପୂର୍ବତନ ବିଧାୟକ ଏବଂ ଅନ୍ୟ ମାନେ ବାଡ଼ିରେ ନିର୍ଘାତଭାବେ ମାଡ଼ ମାରିଥିଲେ। ଗୋଡେଇ ଗୋଡେଇ ଯୁବକଙ୍କୁ ମାଡ଼ ମାରିଛନ୍ତି, ଏପରିକି ଯୁବକଙ୍କ ମୁଣ୍ଡ ଫଟାଇ ଲହୁଲୁହାଣ କରିଛନ୍ତି। 

ମାଡ଼ ମରା ସମୟର ଭିଡ଼ିଓ ସାମ୍ନାକୁ ଆସିଛି। ଯେଉଁଥିରେ ପୂର୍ବତନ ବିଧାୟକ ନିଜେ ମାଡ଼ ମାରୁଥିବା ଦେଖିବାକୁ ମିଳିଛି । 

ସେପଟେ ପୂର୍ବତନ ବିଧାୟକ ମାଡ଼ ମାରି ନ ଥିବା କହି ସଫେଇ ଦେଇଛନ୍ତି । ସେ କହିଛନ୍ତି ରାସ୍ତା ନ ଛାଡ଼ିବାକୁ ଯୁକ୍ତି ତର୍କ ହୋଇଥିଲା । ସେ ନିଜର ପରିଚୟ ଦେଇଥିଲେ କିନ୍ତୁ ଦେବାଶିଷ ଏବଂ ତାଙ୍କ ସହିତ ଯୁବକ ଅଶ୍ଳୀଳ ଭାଷାରେ ଗାଳି ଗୁଲଜ କରିଥିଲେ । ଉକ୍ତ ଯୁବକ ତାଙ୍କ ମୁଣ୍ଡ ଧରିବାକୁ ସେ ନିଜର ଆତ୍ମସମ୍ମାନ ପାଇଁ ମାରିଥିବା କହିଛନ୍ତି । ଛକରେ ଥିବା ସ୍ଥାନୀୟ ଲୋକେ ଉକ୍ତ ଯୁବକଙ୍କୁ ପିଟିଥିବା ସେ କହିଛନ୍ତି । 

ଏ ନେଇ ଉଦଳା ଥାନାରେ ଅଭିଯୋଗ ହୋଇଛି । ଯୁବକଙ୍କ ମୁଣ୍ଡରେ ପ୍ରବଳ ଆଘାତ ଲାଗିଥିବାବେଳେ ପ୍ରବଳ ରକ୍ତସ୍ରାବ ହୋଇଥିଲା । ପୋଲିସ ତାଙ୍କୁ ଡାକ୍ତରଖାନାକୁ ନେଇ ଚିକିତ୍ସା କରାଇଛନ୍ତି । 

ହାଇଦ୍ରାବାଦ: ତେଲେଙ୍ଗାନାର ହାଇଦ୍ରାବାଦଠାରେ ବିଜେପି ଦ୍ୱାରା ଆୟୋଜିତ 'ଲୋକତନ୍ତ୍ର ବଞ୍ଚାଓ, ଅରାଜକତା ହଟାଓ' ପଦଯାତ୍ରା ଅବସରରେ କେନ୍ଦ୍ର ଗୃହମନ୍ତ୍ରୀ ଅମିତ ଶାହ ବିରୋଧୀ ଦଳ ଉପରେ କଡ଼ା ଆକ୍ରମଣ କରିଛନ୍ତି। ବିଶେଷ କରି କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ସମାଲୋଚନା କରିବା ସହ ଏସଆଇଆର (SIR) କାର୍ଯ୍ୟକ୍ରମ ଏବଂ ଅନୁପ୍ରବେଶକାରୀଙ୍କ ପ୍ରସଙ୍ଗକୁ ନେଇ ସେ ସୁରକ୍ଷା ଓ ରାଜନୈତିକ ସ୍ଥିତି ଉପରେ ନିଜର ପକ୍ଷ ରଖିଛନ୍ତି।

କଂଗ୍ରେସର ମକ୍ ପାର୍ଲାମେଣ୍ଟ (ନକଲି ସଂସଦ)କୁ ନେଇ କଟାକ୍ଷ କରି ଶାହ କହିଛନ୍ତି ଯେ, ରାହୁଲ ଗାନ୍ଧୀ କେବଳ ନକଲି ସଂସଦରେ ହିଁ ପ୍ରଧାନମନ୍ତ୍ରୀ ହୋଇପାରିବେ, କାରଣ ଅସଲି ସଂସଦରେ ସେ କେବେ ବି ପ୍ରଧାନମନ୍ତ୍ରୀ ହୋଇପାରିବେ ନାହିଁ। ଏହାଦ୍ୱାରା ଅନ୍ତତଃ ସୋନିଆ ଗାନ୍ଧୀଙ୍କ ମନକୁ ଶାନ୍ତି ମିଳିବ ବୋଲି ସେ ତାଚ୍ଛଲ୍ୟ କରିଛନ୍ତି। ନିର୍ବାଚନ ଜିତିବା ପାଇଁ ଲୋକଙ୍କ ସମସ୍ୟା ବୁଝିବା ଆବଶ୍ୟକ, ପ୍ରତି ତିନି-ଚାରି ମାସରେ ବିଦେଶ ଗସ୍ତ କରିବା କିମ୍ବା ହାତରେ ସମ୍ବିଧାନ ଧରି ସଂସଦ ଚାଲିବାକୁ ନଦେବା ଠିକ୍‌ ନୁହେଁ।

ଗୃହମନ୍ତ୍ରୀ ବିରୋଧୀଙ୍କୁ ଖୋଲା ଚ୍ୟାଲେଞ୍ଜ ଦେଇ କହିଛନ୍ତି ଯେ, ସରକାର ସଂସଦର ସ୍ୱତନ୍ତ୍ର ଅଧିବେଶନ ଡାକିବାକୁ ସମ୍ପୂର୍ଣ୍ଣ ପ୍ରସ୍ତୁତ ଅଛନ୍ତି, ବିରୋଧୀ ଆସି ଯେକୌଣସି ମୁଦ୍ଦା ଉପରେ ଆଲୋଚନା କରନ୍ତୁ। କିନ୍ତୁ ବିରୋଧୀ ଆଲୋଚନା କରିବେ ନାହିଁ, କାରଣ ସେମାନେ ଜାଣିଛନ୍ତି ଯେ ସଂସଦରେ ଚର୍ଚ୍ଚା ହେଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ସେମାନଙ୍କ ଅଭିଯୋଗକୁ ଖଣ୍ଡନ କରିଦେବେ। କେବଳ ଅରାଜକତା ସୃଷ୍ଟି କରି ଖବରରେ ରହିବା ସେମାନଙ୍କର ଲକ୍ଷ୍ୟ।

ଦିଲ୍ଲୀରେ କଂଗ୍ରେସର ରାଲିକୁ 'ଅନୁପ୍ରବେଶକାରୀଙ୍କୁ ବଞ୍ଚାଓ ରାଲି' ଭାବେ ଅଭିହିତ କରି ଶାହ କହିଛନ୍ତି ଯେ, କଂଗ୍ରେସ ଏସଆଇଆର କାର୍ଯ୍ୟକ୍ରମକୁ ରୋକି ଭୋଟର ତାଲିକାରୁ ବାଂଲାଦେଶୀ ଅନୁପ୍ରବେଶକାରୀଙ୍କୁ ସୁରକ୍ଷା ଦେବାକୁ ଚେଷ୍ଟା କରୁଛି। କିନ୍ତୁ ବିଜେପି ପ୍ରତ୍ୟେକ ଅନୁପ୍ରବେଶକାରୀଙ୍କୁ ଭୋଟର ତାଲିକା ଏବଂ ଦେଶରୁ ବାହାର ନକରିବା ପର୍ଯ୍ୟନ୍ତ ଶାନ୍ତ ହୋଇ ବସିବ ନାହିଁ।

ଭୋଟର ତାଲିକାରୁ ୧୩ କୋଟି ନାମ କଟାଯିବା ନେଇ ରାହୁଲ ଗାନ୍ଧୀଙ୍କ ଅଭିଯୋଗକୁ ସେ ସମ୍ପୂର୍ଣ୍ଣ ମିଥ୍ୟା ବୋଲି କହିଛନ୍ତି। ଏହି ନାମଗୁଡ଼ିକ ମଧ୍ୟରୁ ସବା ୬ କୋଟି ଅନ୍ୟତ୍ର ସ୍ଥାନାନ୍ତରିତ ହୋଇଥିବା ଲୋକ, ୨.୮ କୋଟି ମୃତ ବ୍ୟକ୍ତି, ୧ କୋଟି ଡୁପ୍ଲିକେଟ୍ ନାମ ଏବଂ ଅବଶିଷ୍ଟ ୩ କୋଟି କୌଣସି ପ୍ରକୃତ ନାଗରିକ ନୁହଁନ୍ତି ବରଂ ବାଂଲାଦେଶୀ ଅନୁପ୍ରବେଶକାରୀ ଅଟନ୍ତି ବୋଲି ଗୃହମନ୍ତ୍ରୀ ସ୍ପଷ୍ଟ କରିଛନ୍ତି।