ଯାଜପୁର: ଧର୍ମଶାଳା ବିଧାୟକଙ୍କୁ ଆକ୍ରମଣ ଘଟଣାରେ ୧୦ ଜଣଙ୍କୁ ଗିରଫ କରାଯାଇଛି । ଯାଜପୁର ଏସଡିଜେଏମ କୋର୍ଟ ସେମାନଙ୍କ ଜାମିନ ନାମଞ୍ଜୁର କରିବା ପରେ ଜେଲ ଯାଇଛନ୍ତି ସମସ୍ତ ଅଭିଯୁକ୍ତ । 

ଗତକାଲି ଧର୍ମଶାଳା ବିଧାୟକ ହିମାଂଶୁ ଶେଖର ସାହୁଙ୍କୁ ଆକ୍ରମଣ ମାମଲାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି । ବିଧାୟକଙ୍କ ପିଏସଓଙ୍କ ଏତଲାକୁ ଆଧାର କରି ପୁଲିସ ଅଭିଯୁକ୍ତମାନଙ୍କୁ ଧରିଛି । ପୁଲିସ ଏହି ମାମଲାରେ ୧୦ ଜଣଙ୍କୁ ଗିରଫ କରିବା ପରେ କୋର୍ଟ ଚାଲାଣ କରିଛନ୍ତି । ଅଭିଯୁକ୍ତମାନଙ୍କର ଡାକ୍ତରୀମାଇନା କରାଯିବା ପରେ କୋର୍ଟ ଚାଲାଣ କରାଯାଇଛି । ମାନ୍ୟବର ଏସଡିଜେଏମ କୋର୍ଟ ଅଭିଯୁକ୍ତମାନଙ୍କର ଜାମିନ ଆବେଦନକୁ ପ୍ରତ୍ୟାଖ୍ୟାନ କରିଛନ୍ତି । ଫଳରେ ସମସ୍ତ ଅଭିଯୁକ୍ତ ଜେଲ ଯାଇଛନ୍ତି । 

ଗତକାଲି ସନ୍ଧ୍ୟାରେ ବିଧାୟକ ହିମାଂଶୁ ଶେଖର ସାହୁ କୌଣସି ଏକ କାମରେ ଡିଡିଏମ ଅଫିସ ଯାଉଥିବା ବେଳେ ବୁଢାଘାଟ ନିକଟରେ ବିଧାୟକଙ୍କ ଗାଡିକୁ ଆକ୍ରମଣ କରାଯାଇଥିଲା । ତାଙ୍କ ଗାଡ଼ିକୁ ଭଙ୍ଗାରୁଜା କରିବା ସହିତ ବିଧାୟକଙ୍କୁ ମାଡ଼ ମାରିଥିଲେ । ଏମିତିକି ତାଙ୍କ ସୁନା ଚେନ୍ ମଧ୍ୟ ଛଡ଼ାଇ ନେଇଯାଇଥିଲେ । ଆକ୍ରମଣକାରୀ ବବି ଦାସଙ୍କ ନାଁ ନେଇ ତାଙ୍କ ଆକ୍ରମଣ କରିଥିଲେ ବୋଲି ଅଭିଯୋଗ କରିଥିଲେ । ଘଟଣା ପରେ ଉକ୍ତ ଅଞ୍ଚଳରେ ଉତ୍ତେଜନା ପରିସ୍ଥିତି ସୃଷ୍ଟି ହୋଇଥିଲା । ପୁଲିସ ଘଟଣା ସ୍ଥଳରେ ପହଁଚି ସ୍ଥିତିକୁ ନିୟନ୍ତ୍ରଣ ଆଣିବାକୁ ଚେଷ୍ଟା କରିଥିଲା । 

ଯାଜପୁର: ଆକ୍ରମଣ ଘଟଣାରେ ଗୁରୁବାର ଏକ ସାମ୍ବାଦିକ ସମ୍ମିଳନୀରେ ପ୍ରତିକ୍ରିୟା ରଖିଛନ୍ତି ଧର୍ମଶାଳା ବିଧାୟକ ହିମାଂଶୁ ଶେଖର ସାହୁ । ଆକ୍ରମଣ ଘଟଣାକୁ ଦୃଢ଼ ନିନ୍ଦା କରିଛନ୍ତି ବିଧାୟକ । ଏହା ସହିତ ମାମଲାରେ ପୁଲିସ ୧୦ ଜଣଙ୍କୁ ଗିରଫ କରିଥିବାବେଳେ ଅନ୍ୟ ସମସ୍ତ ଅଭିଯୁକ୍ତଙ୍କୁ ଗିରଫ କରାଯିବ ବୋଲି ବିଧାୟକ ଗଣମାଧ୍ୟମକୁ ସୂଚନା ଦେଇଛନ୍ତି । 

ବିଧାୟକ ହିମାଂଶୁ ଶେଖର ସାହୁ କହିଛନ୍ତି କହିଲେ ଆକ୍ରମଣ ଘଟଣାରେ ପୁଲିସ ପ୍ରଶାସନ ସଜାଗ ରହିଛି । ମୁଖ୍ୟମନ୍ତ୍ରୀ ଏବଂ ଉପ ମୁଖ୍ୟମନ୍ତ୍ରୀ ତାଙ୍କ ସହିତ ଆଲୋଚନା କରିଛନ୍ତି । ରାଜ୍ୟ ସରକାର ମଧ୍ୟ ଏ ଘଟଣାକୁ ଗୁରୁତର ସହିତ ନେଇଥିବା ସେ କହିଛନ୍ତି । ଖୁବଶୀଘ୍ର ଏଥିରେ ପ୍ରତ୍ୟକ୍ଷ ଓ ପରୋକ୍ଷ ଭାବରେ ସମ୍ପୃକ୍ତ ସମସ୍ତ ଆସାମୀଙ୍କୁ ଗିରଫ କରାଯିବ ବୋଲି ରାଜ୍ୟ ସରକାର ତାଙ୍କୁ ପ୍ରତିଶ୍ରୁତି ଦେଇଥିବା କହିଛନ୍ତି ବିଧାୟକ । 

ସେହିପରି ଅତିରିକ୍ତ ଡିଜି ଓ ଯାଜପୁର ଏସପିଙ୍କ ସମେତ ଅନ୍ୟାନ୍ୟ ପୁଲିସ ପ୍ରଶାସନର ଅଧିକାରୀମାନେ ଉପସ୍ଥିତ ରହି ସ୍ଥିତି ଅନୁଧ୍ୟାନ କରୁଛନ୍ତି । ଯାଜପୁରରେ ଶୃଙ୍ଖଳା ବଜାୟ ରଖିବାକୁ ବ୍ୟାପକ ପୁଲିସ ମୁତୟନ ହୋଇଛନ୍ତି । ଆକ୍ରମଣ ଘଟଣା ପରେ ଧର୍ମଶାଳା ନିର୍ବାଚନ ମଣ୍ଡଳୀର ରାଜନୈତିକ ଉଷ୍ମତା ବୃଦ୍ଧି ପାଉଥିବା ବେଳେ କେହି ଆଇନକୁ ହାତକୁ ନ ନେଇ ଶାନ୍ତି ବଜାୟ ବିଧାୟକ ହିମାଂଶୁ ସାହୁ ଗଣମାଧ୍ୟମ ଜରିଆରେ ନିବେଦନ କରିଛନ୍ତି ।

ଅନ୍ୟପକ୍ଷରେ କୋରଇ ବିଧାୟକ ଆକାଶ ଦାସ ନାୟକ ମଧ୍ୟ ଘଟଣାକୁ ଦୃଢ଼ ନିନ୍ଦା କରିଛନ୍ତି । ଜଣେ ଜନ ପ୍ରତିନିଧିଙ୍କୁ ଏପରି ଆକ୍ରମଣ କରାଯିବା ନିନ୍ଦନୀୟ ଏବଂ ଏଭଳି ହିଂସାକୁ ବରଦାସ୍ତ କରାଯିବ ନାହିଁ ବୋଲି କହିଛନ୍ତି ଆକାଶ ଦାସ ନାୟକ । 

ଗତକାଲି ସନ୍ଧ୍ୟାରେ ଯାଜପୁର ବୁଢ଼ାନଦୀ ପୋଲ ଉପରେ ଧର୍ମଶାଳା ବିଧାୟକ ହିମାଂଶୁ ଶେଖର ସାହୁଙ୍କୁ ଆକ୍ରମଣ ହୋଇଥିବା ଅଭିଯୋଗ ହୋଇଥିଲା । କିଛି ଲୋକ ତାଙ୍କ କାରକୁ ଭାଙ୍ଗିବା ସହିତ ତାଙ୍କ ବେକରୁ ସୁନା ଚେନ୍ ଛିଡ଼ାଇ ନେଇଯାଇଥିଲେ । ପ୍ରଣବ ପ୍ରକାଶ ଦାସଙ୍କ ସମର୍ଥକ ଆକ୍ରମଣ କରିଥିଲେ ବୋଲି ସେ ସିଧାସଳଖ ଅଭିଯୋଗ କରିଥିଲେ । 

କବିସୂର୍ଯ୍ୟନଗର: ହାତରୁ କ୍ଷମତା ଚାଲିଯିବା ପରେ ବି ବିଜୁ ଜନତା ଦଳର କ୍ଷମତା ନିଶା ଏ ଯାଏ ଛାଡିନି । ନିର୍ବାଚନ ହାରିବାର ୫ ମାସ ବିତି ଯାଇଥିଲେ ସୁଦ୍ଧା ବିଜେଡିର ଜଣେ ପରେ ଜଣେ ନେତା ନିଜ କର୍ମୀଙ୍କୁ କ୍ଷମତାର ରଙ୍ଗୀନ ସ୍ୱପ୍ନ ଦେଖାଇ ଚାଲିଛନ୍ତି । ଏହି କ୍ରମରେ କବିସୂର୍ଯ୍ୟନଗରର ପୂର୍ବତନ ବିଧାୟକ ଲତିକା ପ୍ରଧାନ ବିଜେଡି ଅଳ୍ପ ଦିନରେ କ୍ଷମତାକୁ ଫେରିବ ଏବଂ ନବୀନ ପଟ୍ଟନାୟକ ଷଷ୍ଠ ଥର ମୁଖ୍ୟମନ୍ତ୍ରୀ ହେବେ ବୋଲି କହିଛନ୍ତି ।

ଗତକାଲି କବିସୂର୍ଯ୍ୟନଗରର କାଳିମେଘୀ ଗାଁ ନିକଟରେ ଏକ ସଭାରେ ଲତିକା କହିଛନ୍ତି, ନବୀନ ପଟ୍ଟନାୟକ ଖୁବଶୀଘ୍ର ଷଷ୍ଠଥର ପାଇଁ ମୁଖ୍ୟମନ୍ତ୍ରୀ ହେବେ । ସମସ୍ତେ ଏକାଠି ହୋଇ ନବୀନଙ୍କୁ ପୁଣି ମୁଖ୍ୟମନ୍ତ୍ରୀ କରିବାକୁ ବିଜେଡି କର୍ମୀଙ୍କୁ ଆହ୍ୱାନ ଦେଇଛନ୍ତି ଲତିକା। ଆଗାମୀ ଦିନରେ ପୁଣି ଲଢେଇ ହେବ ଏବଂ ନବୀନ ପଟ୍ଟନାୟକ ପୁଣି ଥରେ ମୁଖ୍ୟମନ୍ତ୍ରୀ ହେବା ବେଶି ଦୂର ନୁହେଁ । 

ସେ କହିଛନ୍ତି, ଆଉ ଅଳ୍ପ ଦିନରେ ନବୀନ ପଟ୍ଟନାୟକ ରାଜ୍ୟର ମୁଖ୍ୟମନ୍ତ୍ରୀ ହେବେ । ଆପଣମାନଙ୍କୁ ଯେଉଁ ସୁବିଧା ମିଳୁଥିଲା, ପୁଣି ଥରେ ସବୁ ଫେରି ଆସିବ । ଓଡିଶାବାସୀ ପୁଣି ହସିବେ । ସେହି ଭରସା,ବିଶ୍ୱାସ ଓ ସହଯୋଗ ଆପଣ ମାନଙ୍କର ରହିବା ଦରକାର। 

ସୂଚନାଯୋଗ୍ୟ, ଲତିକାଙ୍କ ପୂର୍ବରୁ ବିଜେଡି ସାଂସଦ ଦେବାଶିଷ ସାମନ୍ତରାୟ, ବିଜେଡି ନେତା ମୁନା ଖାନ୍ନ ଓ ଅତନୁ ସବ୍ୟସାଚ୍ଚୀ ନାୟକ ନିଜ କର୍ମୀ ମାନଙ୍କୁ ଏମିତି ରଙ୍ଗୀନ ସ୍ୱପ୍ନ ଦେଖାଇ ସାରିଛନ୍ତି । ନିକଟରେ ମହାକାଳପଡାର ପୂର୍ବତନ ବିଧାୟକ ଅତନୁ ସବ୍ୟସାଚ୍ଚୀ ନବୀନ ପଟ୍ଟନାୟକ ପୁଣି ଥରେ ମୁଖ୍ୟମନ୍ତ୍ରୀ ହେବା ନେଇ କର୍ମୀଙ୍କୁ ଗଣିତ ବୁଝାଇଥିଲେ । କେନ୍ଦ୍ରାପଡ଼ା ମହାକାଳପଡ଼ାରେ ଆୟୋଜିତ ଏକ ଦଳୀୟ ସଭାରେ ସେ କହିଥିଲେ, ଆମର ୫୧ ଓ କଂଗ୍ରେସ ୧୪ ଏବଂ ସ୍ୱାଧୀନର ୩ ବିଧାୟକଙ୍କ ସମର୍ଥନ ଅଛି। 

ତାଙ୍କ ପୂର୍ବରୁ ବିଜେଡିର ରାଜ୍ୟସଭା ସାଂସଦ ମୁନ୍ନା ଖାନ କହିଥିଲେ ଯେ, ବହୁତ ଶୀଘ୍ର ନବୀନ ପଟ୍ଟନାୟକ ପୁଣି ଥରେ ମୁଖ୍ୟମନ୍ତ୍ରୀ ହେବେ ବୋଲି କହିଥିଲେ । ନବରଙ୍ଗପୁରରେ ଆୟୋଜିତ ଜନସଂପର୍କ ପଦଯାତ୍ରାରେ ମୁନ୍ନା ଖାନ ଦାବି କରିଥିଲେ ଯେ, ୧୪ ବିଜେପି ବିଧାୟକ ବିଜେଡି ସଂପର୍କରେ ଅଛନ୍ତି । ଆଉ ସେମାନେ ହିଁ ବିଜେଡିକୁ ସରକାର ଗଢିବାରେ ସାହାଯ୍ୟ କରିବେ ।

ମୁମ୍ବାଇ: ମହାରାଷ୍ଟ୍ର ନିର୍ବାଚନ ପାଇଁ ଗତକାଲି ମତଦାନ ସଂପନ୍ନ ହୋଇ ସାରିଛି । ଭୋଟ୍ ଫଳାଫଳ ନଭେମ୍ବର ୨୩ ତାରିଖ ପ୍ରକାଶ ପାଇବ । କିନ୍ତୁ ରାଜ୍ୟରେ ରାଜନୈତିକ ଗୋଟି ଚାଳନା ଏବେଠୁ ଆରମ୍ଭ ହୋଇ ଯାଇଛି । ସମସ୍ତ ଏକଜିଟ୍ ପୋଲରେ ବିଜେପି ନେତୃତ୍ୱାଧୀନ ମହାୟୁତି ମେଣ୍ଟବହୁମତ ସହ ସରକାର ଗଢୁଥିବା ଆକଳନ କରାଯାଇଛି । ଏହି ସବୁ ମଧ୍ୟରେ ବିଜେପିର ବରିଷ୍ଠ ନେତା ତଥା ଉପମୁଖ୍ୟମନ୍ତ୍ରୀ ଦେବେନ୍ଦ୍ର ଫଡଣବିସ ବୁଧବାର ସନ୍ଧ୍ୟାରେ ଆରଏସଏସ ପ୍ରମୁଖ ମୋହନ ଭାଗବତଙ୍କୁ ଭେଟିଛନ୍ତି । ଏହି ସାକ୍ଷାତରୁ ଅନେକ ରାଜନୈତିକ ଅର୍ଥ ବାହାର କରାଯାଉଛି ।

ରାଜ୍ୟରେ ହୋଇଥିବା ଅଧିକ ମତଦାନରେ ବିଜେପି ଉତ୍ସାହିତ ହୋଇ ପଡିଛି । ଖୋଦ୍ ଫଡଣବିସ ବୁଧବାର କହିଥିଲେ ଯେ, ଭୋଟିଂ ବଢିବାର ଫାଇଦା ବିଜେପିକୁ ମିଳିବ । ବିଜେପି ଓ ମହାୟୁତିକୁ ପୁଣି ଥରେ ଜନତାଙ୍କ ଆଶୀର୍ବାଦ ମିଳିବ । ଉଲ୍ଲେଖନୀୟ ମହାରାଷ୍ଟ୍ରରେ ଏଥର ମତଦାନ ୬୫ ପ୍ରତିଶତରୁ ଅଧିକ ରହିଛି ।

ଏସବୁ ଭିତରେ ଗତକାଲି ସନ୍ଧ୍ୟାରେ ଦେବେନ୍ଦ୍ର ଫଡଣବିସ ଆରଏସଏସ ମୁଖ୍ୟାଳୟ ପହଞ୍ଚି ସଂଘ ପ୍ରମୁଖ ମୋହନ ଭାଗବତଙ୍କୁ ଭେଟିଛନ୍ତି । ଉଭୟଙ୍କ ମଧ୍ୟରେ ଆଲୋଚନା ପ୍ରାୟ ୨୦ ମିନିଟ୍ ଧରି ଚାଲିଥିଲା । ଏହି ସମୟରେ ବୈଠକରେ ଭୈୟାଜୀ ଯୋଶୀ ମଧ୍ୟ ଉପସ୍ଥିତ ଥିଲେ । କିନ୍ତୁ ବିଜେପିର କୌଣସି ନେତାଙ୍କୁ ବୈଠକ ବିଷୟରେ କୌଣସି ସୂଚନା ଦିଆଯାଇ ନାହିଁ । ଚର୍ଚ୍ଚା ଆରମ୍ଭ ହୋଇ ଯାଇଛି ଯେ, ମୁଖ୍ୟମନ୍ତ୍ରୀ ପଦ ପାଇଁ ଆରଏସଏସ ଫଡଣବିସଙ୍କ ନାମରେ ସବୁଜ ସଙ୍କେତ ଦେଇ ସାରିଛି ।

ସୂଚନାଯୋଗ୍ୟ, ଗତକାଲିର ସମସ୍ତ ଏକଜିଟ୍ ପୋଲରେ ମହାୟୁତି ମେଣ୍ଟକୁ ସଂଖ୍ୟା ଗରିଷ୍ଠତା ମିଳୁଥିବା ଆକଳନ କରାଯାଇଛି । ଏଥିରେ ସର୍ବାଧିକ ଆସନ ବିଜେପିକୁ ମିଳୁଥିବା କୁହାଯାଇଛି । ଯଦି ମହାୟୁତି ସରକାର ଗଠନ କରେ ତେବେ ମୁଖ୍ୟମନ୍ତ୍ରୀ ବିଜେପିର ହିଁ ହେବେ । ଆଉ ମୁଖ୍ୟମନ୍ତ୍ରୀ ପଦ ଦୌଡରେ ସବୁଠୁ  ଆଗରେ ଦେବେନ୍ଦ୍ର ଫଡଣବିସଙ୍କ ନାଁ ରହିଛି । ଫଡଣବିସଙ୍କ ନାଁ ଆଗରେ ରହିବାର ଅନେକ କାରଣ ରହିଛି । 

କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ସମର୍ଥନ ଫଡଣବିସଙ୍କ ଉପରେ ମଧ୍ୟ ରହିଛି । ବର୍ତ୍ତମାନ ମୁଖ୍ୟମନ୍ତ୍ରୀ ଥିବା ଶିବସେନାର ସିନ୍ଦେ ଗୋଷ୍ଠୀର ମୁଖ୍ୟ ଏକନାଥ ସିନ୍ଦେ ମଧ୍ୟ କହି ସାରିଛନ୍ତି ଯେ, ସେ ଏଥର ମୁଖ୍ୟମନ୍ତ୍ରୀ ଦୌଡରେ ନାହାନ୍ତି । ତେଣୁ ଦେବେନ୍ଦ୍ର ଫଡଣବିସ ମୁଖ୍ୟମନ୍ତ୍ରୀ ହେବାର ଅଧିକ ସମ୍ଭାବନା ଥିବା ମହାରାଷ୍ଟ୍ରର ରାଜନୈତିକ ଚିତ୍ରରୁ ସ୍ପଷ୍ଟ ସଙ୍କେତ ମିଳୁଛି ।

କୋଲକାତା: ଉଭୟ ଝାଡ଼ଖଣ୍ଡ ଓ ମହାରାଷ୍ଟ୍ରରେ ଡବଲ୍ ଇଞ୍ଜିନ୍ ସରକାର ଗଠନ କରାଯିବ ବୋଲି କେନ୍ଦ୍ର ବୟନ ଶିଳ୍ପ ମନ୍ତ୍ରୀ ଗିରିରାଜ ସିଂହ ବୁଧବାର କୋଲକାତାରେ କହିଛନ୍ତି। କେନ୍ଦ୍ରମନ୍ତ୍ରୀ କହିଛନ୍ତି ଯେ ଝାଡ଼ଖଣ୍ଡରେ ସରକାର ଗଠନ ହେଲେ ବାଂଲାଦେଶୀ ଅନୁପ୍ରବେଶକାରୀଙ୍କୁ ବାହାର କରି ଦିଆଯିବ। ଏହା ସହ ସେ ପଶ୍ଚିମବଙ୍ଗରେ ବିଜେପି ସରକାର ଗଠନ ପାଇଁ ଆଶା ବ୍ୟକ୍ତ କରିବା ସହ ସେଠାରେ ମଧ୍ୟ ସମାନ କରାଯିବ ବୋଲି କହିଛନ୍ତି।

ପଶ୍ଚିମବଙ୍ଗରେ ମମତା ବାନାର୍ଜୀ ସରକାରଙ୍କୁ ଦାୟୀ କରି ସେ କହିଛନ୍ତି ଯେ ଯେପର୍ଯ୍ୟନ୍ତ ସେ କ୍ଷମତାରେ ରହିବେ, ଆଇନ ଶୃଙ୍ଖଳା ମୁସଲମାନ ଗୁଣ୍ଡାଙ୍କ ହାତରେ ରହିବ। ପଶ୍ଚିମବଙ୍ଗ ବିଜେପି ସଭାପତି ତଥା କେନ୍ଦ୍ରମନ୍ତ୍ରୀ ସୁକାନ୍ତ ମଜୁମଦାରଙ୍କ ଗିରଫଦାରୀ ଉପରେ ପ୍ରତିକ୍ରିୟା ରଖି ସେ କହିଛନ୍ତି ଯେ ମମତା ସରକାରରେ ଆଇନ ପ୍ରତି କୌଣସି ସମ୍ମାନ ନାହିଁ।

ଯଦି କେନ୍ଦ୍ରମନ୍ତ୍ରୀ ତଥା ବିଜେପି ରାଜ୍ୟ ସଭାପତିଙ୍କ ସହ ଏପରି ହୋଇପାରିବ ତେବେ ମମତା ବାନାର୍ଜୀ ସରକାର ରାଜ୍ୟପାଳଙ୍କୁ ମଧ୍ୟ ଗିରଫ କରିପାରିବେ ବୋଲି ଗିରିରାଜ ସିଂହ କହିଛନ୍ତି। ଫେବ୍ରୁଆରିରେ ଦିଲ୍ଲୀରେ ଆୟୋଜିତ ହେବାକୁ ଥିବା ଭାରତ ଟେକ୍ସ ୨୦୨୫ର ଦ୍ବିତୀୟ ସଂସ୍କରଣକୁ ପ୍ରୋତ୍ସାହିତ କରିବା ପାଇଁ ଜୁଟ୍ ଉତ୍ପାଦ ବିକାଶ ଓ ରପ୍ତାନି ପ୍ରୋତ୍ସାହନ ପରିଷଦ (ଜେପିଇପିସି), ପୋଷାକ ରପ୍ତାନି ପ୍ରୋତ୍ସାହନ ପରିଷଦ (ଏଇପିସି) ଏବଂ ରପ୍ତାନି ପ୍ରୋତ୍ସାହନ ପରିଷଦ ଅଫ୍ ହସ୍ତଶିଳ୍ପ (ଇପିସିଏଚ୍)ର ମିଳିତ ସହଯୋଗରେ କେନ୍ଦ୍ରମନ୍ତ୍ରୀ କୋଲକାତାରେ ଥିଲେ।

ପଶ୍ଚିମବଙ୍ଗରେ ଆଇନ ଶୃଙ୍ଖଳା ନାହିଁ ବୋଲି ଗିରିରାଜ ସିଂହ ଅଭିଯୋଗ କରିଛନ୍ତି। ମମତା ବାନାର୍ଜୀଙ୍କ ସରକାର କିମ୍ ଜଙ୍ଗ୍ ଉନ୍‌ଙ୍କ ଭଳି କାର୍ଯ୍ୟ କରୁଛନ୍ତି। ଯଦି କୌଣସି ପ୍ରତିଦ୍ୱନ୍ଦ୍ୱୀ କିମ୍ ଜଙ୍ଗ୍ ଉନ୍‌ଙ୍କ ସମ୍ମୁଖରେ କଥା ହୁଅନ୍ତି, ତେବେ ତାଙ୍କୁ ମୃତ୍ୟୁଦଣ୍ଡ ମିଳିଥାଏ। ପଶ୍ଚିମବଙ୍ଗରେ ଆମ ଝିଅ କିମ୍ବା ଲୋକମାନେ ସୁରକ୍ଷିତ ନୁହଁନ୍ତି। କିମ୍ ଜଙ୍ଗ୍ ଉନ୍‌ଙ୍କ ସରକାର ଅଧିକ ଦିନ ଚାଲିପାରୁନାହିଁ। ଏକଦା ରାଜ୍ୟ ଥିଲା 'ମା' ଅଫ୍ ଟେକ୍ସଟାଇଲ୍'। ପରବର୍ତ୍ତୀ ସରକାର ଓ ମମତା ବାନାର୍ଜୀ ଏହାକୁ ନଷ୍ଟ କରିଥିଲେ।

ସୂଚନାଯୋଗ୍ୟ, ମହାରାଷ୍ଟ୍ର ଓ ଝାଡ଼ଖଣ୍ଡରେ ବୁଧବାର ମତଦାନ ଶେଷ ହୋଇଥିବା ବେଳେ ନଭେମ୍ବର ୨୩ରେ ଭୋଟ୍ ଗଣତି ସହ ଫଳାଫଳ ବାହାରିବ। 

ଅଧିକ ପଢ଼ନ୍ତୁ: ଭାରତ ଓ ଗୟାନା ମଧ୍ୟରେ ୧୦ଟି ବୁଝାମଣା ପତ୍ର ସ୍ୱାକ୍ଷରିତ

ରାଞ୍ଚି: ଝାଡ଼ଖଣ୍ଡର ୮୧ ସଦସ୍ୟ ବିଶିଷ୍ଟ ବିଧାନସଭା ନିର୍ବାଚନର ଦ୍ୱିତୀୟ ପର୍ଯ୍ୟାୟରେ ୩୮ ଆସନ ପାଇଁ ମତଦାନ ଶେଷ ହୋଇଛି । ଏହାସହ ବିଭିନ୍ନ ସଂସ୍ଥାର ଏକଜିଟ୍ ପୋଲ୍ ସାମ୍ନାକୁ ଆସିବାରେ ଲାଗିଛି । ସାମ୍ନାକୁ ଆସିଥିବା ଏକଜିଟ୍ ପୋଲରେ ଏନଡିଏ ଓ ଇଣ୍ଡି ମେଣ୍ଟ ମଧ୍ୟରେ କଡ଼ା ଟକ୍କର ହେଉଥିବା ଦେଖିବାକୁ ମିଳିଛି । କିଛି ସଂସ୍ଥାଙ୍କ ସର୍ଭେ ଏନଡିଏ ସପକ୍ଷରେ ଥିବା ବେଳେ କିଛିର ଏକଜିଟ୍ ପୋଲ୍ ଇଣ୍ଡି ମେଣ୍ଟ ସପକ୍ଷରେ ରହିଛି । ତେଣୁ ଝାଡଖଣ୍ଡରେ କିଏ ଗଢିବ ସରକାର ଚିତ୍ର ଅସ୍ପଷ୍ଟ ରହିଛି । 

ପିପୁଲ୍ସ ପଲ୍ସର ଏକଜିଟ୍ ପୋଲ୍ ଅନୁସାରେ ବିଜେପି ନେତୃତ୍ୱାଧୀନ ଏନଡିଏକୁ ୪୪ ରୁ ୫୩ ଆସନ ମିଳିପାରେ । ସେହିପରି ଇଣ୍ଡି ମେଣ୍ଟକୁ ୨୫ ରୁ ୩୭ ଆସନ ଏବଂ ଅନ୍ୟଙ୍କୁ ୫ରୁ ୯ ଆସନ ଯାଇପାରେ । ମାଟ୍ରିଜ୍ ଏକଜିଟ୍ ପୋଲର ଏକଜିଟ୍ ପୋଲ୍ ଅନୁସାରେ ଏନଡିଏ ୪୨ ରୁ୪୭ ଆସନ, ଇଣ୍ଡି ମେଣ୍ଟ ୨୫ ରୁ ୩୦ ଏବଂ ଅନ୍ୟ ୧ ରୁ ୪ ଆସନ ଜିତି ପାରନ୍ତି । ଚାଣକ୍ୟ ଷ୍ଟ୍ରାଟେଜିସର ଏକଜିଟ୍ ପୋଲରେ ଏନଡିଏ ଖାତାକୁ  ୪୫ ରୁ ୫୦ ଆସନ ଯାଉଥିବା ବେଳେ ଇଣ୍ଡି ମେଣ୍ଟକୁ ୩୫ ରୁ ୩୮ ଏବଂ ଅନ୍ୟଙ୍କୁ ୩ ରୁ ୫ ଆସନ ମିଳିପାରେ । 

ସେହିପରି  ପି ମାର୍କର ଏକଜିଟ୍ ପୋଲ ଅନୁଯାୟୀ, ଏନଡିଏ ୩୧ ରୁ ୪୦ ସିଟ୍ ଜିତିପାରେ ।  ଇଣ୍ଡି ମେଣ୍ଟକୁ ୩୭ ରୁ ୪୭ ଏବଂ ଅନ୍ୟଙ୍କୁ ୧ ରୁ ୬ ଆସନ ମିଳିପାରେ । ତେବେ ଆକ୍ସିସ୍ ମାଇ ଇଣ୍ଡିଆର ଏକଜିଟ୍ ପୋଲରେ ଇଣ୍ଡି ମେଣ୍ଟ ୫୩ ଆସନ ସହ ପୁଣି ଥରେ ସରକାର ଗଢୁଥିବା ପୂର୍ବାନୁମାନ କରାଯାଇଛି ।  ବିଜେପି ନେତୃତ୍ୱାଧୀନ ଏନଡିଏକୁ ୨୫ ଏବଂ ଅନ୍ୟଙ୍କୁ ୩ ଆସନ ମିଳିପାରେ ।

ସୂଚନାଯୋଗ୍ୟ, ରାଜ୍ୟରେ ବର୍ତ୍ତମାନ ଝାଡଖଣ୍ଡ ମୁକ୍ତି ମୋର୍ଚ୍ଚା(ଜେଏମଏମ) ନେତୃତ୍ୱାଧୀନ ଇଣ୍ଡି ମେଣ୍ଟ ସରକାର ଚାଲିଛି । ହେମନ୍ତ ସୋରେନ ରାଜ୍ୟର ମୁଖ୍ୟମନ୍ତ୍ରୀ ଅଛନ୍ତି । ଏଥର ନିର୍ବାଚନ ବେଶ କଡା ସଂଘର୍ଷ ହୋଇଛି । ଫଳାଫଳ ନଭେମ୍ବର ୨୩ ତାରିଖରେ ପ୍ରକାଶ ପାଇବ ।

ନୂଆଦିଲ୍ଲୀ: ମହାରାଷ୍ଟ୍ରରେ ବିଧାନସଭା ନିର୍ବାଚନ ସଂପନ୍ନ ହୋଇ ସାରିଛି। ୨୮୮ ବିଧାନସଭା ସିଟ୍ରେ ୫୮.୨୫ ପ୍ରତିଶତ ମତଦାତା ନିଜର ମତାଧିକାର ସାବ୍ୟସ୍ତ କରିଛନ୍ତି। ରାଜ୍ୟରେ କେଉଁ ଦଳ ସରକାର କରିବ, କାହାକୁ ଜନତା ଅଧିକ ପସନ୍ଦ କରିଛନ୍ତି, କିଏ କ୍ଷମତାରୁ ବାହାର ହେବ ଏସବୁର ଏକଜିଟ୍ ପୋଲ୍  ଆସି ଯାଇଛି। ଅନେକ ଏଜେନ୍ସିର ଏକଜିଟ୍ ପୋଲ୍ରେ ଭାରତୀୟ ଜନତା ପାର୍ଟି ନେତୃତ୍ଵାଧୀନ ମହାୟୁତି ମେଣ୍ଟ ଆଗୁଆ ରହୁଥିବା ପୂର୍ବାନୁମାନ କରାଯାଇଛି। ଆଉ କିଛି ଏକଜିଟ୍ ପୋଲରେ କଂଗ୍ରେସ ପାର୍ଟି ନେତୃତ୍ଵାଧୀନ ମହାବିକାଶ ଅଘାଡ଼ି ଆଗରେ ଥିବା ଅନୁମାନ କରିଛନ୍ତି।

ନ୍ୟୁଜ୍ ୧୮ ମ୍ୟାଟ୍ରିଜର ଏକଜିଟ୍ ପୋଲ୍ ଅନୁସାରେ ରାଜ୍ୟରେ ୨୮୮ ବିଧାନସଭା ସିଟ୍ରେ ମହାୟୁତି ମେଣ୍ଟକୁ ୧୫୦ ରୁ ୧୭୦ ସିଟ୍ ମିଳୁଥିବା ପୂର୍ବାନୁମାନ କରାଯାଇଛି। ଏହି ସର୍ଭେରେ କଂଗ୍ରେସ ପାର୍ଟି ନେତୃତ୍ଵାଧୀନ ମହାବିକାଶ ଅଘାଡ଼ିକୁ ୧୧୦ରୁ ୧୩୦ ସିଟ୍ ମିଳିବ ବୋଲି ଅନୁମାନ କରାଯାଇଛି। ଅନ୍ୟ ଖାତାକୁ ୮ରୁ ୧୦ ସିଟ୍ ମିଳିବ ବୋଲି ଅନୁମାନ କରାଯାଇଛି। ପି-ଏମଏଆରକ୍ୟୁର ଏକଜିଟ୍ ପୋଲରେ ମହାୟୁତି ମେଣ୍ଟକୁ ୧୩୭ରୁ ୧୫୭ ସିଟ୍ ମିଳିବ ବୋଲି ଆଶା କରାଯାଉଛି। 

ପିପୁଲ୍ସ ପଲ୍ସର ଏକଜିଟ୍ ପୋଲ୍ରେ ମହାବିକାଶ ଅଘାଡ଼ିକୁ ୧୨୬ରୁ ୧୪୬ ସିଟ୍ ମିଳିବ ବୋଲି ଆକଳନ କରାଯାଇଛି। କଂଗ୍ରେସ ମେଣ୍ଟକୁ ୯୭ ଓ ଅନ୍ୟକୁ ୯ ଆସନ ମିଳିପାରେ।  P-Marq ଏକଜିଟ୍ ପୋଲରେ ମହାୟୁତିକୁ ୧୩୭ ରୁ୧୫୭ ଆସନ, ଏମଭିଏକୁ ୧୧୦ରୁ ୧୩୦ ଆସନ ଏବଂ ଅନ୍ୟଙ୍କୁ ୨-୮ ଆସନ ମିଳିପାରେ ।

 ନ୍ୟୁଜ୍ ୨୪-ଚାଣକ୍ୟର ଏକଜିଟ୍ ପୋଲ୍‌ରେ ବିଜେପି ନେତୃତ୍ୱାଧୀନ ମହାୟୁତିକୁ ୧୫୨-୧୬୦, ମହାବିକାଶ ଅଘାଡ଼ିକୁ ୧୩୦-୧୩୮ ସିଟ୍ ଏବଂ ଅନ୍ୟଙ୍କୁ ୬ରୁ ୮ ଆସନ ମିଳିପାରେ । ଲୋକସାହୀ ମରାଠୀର ଏକଜିଟ୍ ପୋଲ୍ ଅନୁସାରେ ବିଜେପି ମେଣ୍ଟକୁ ୧୨୮ ରୁ ୧୪୨ ଆସନ, କଂଗ୍ରେସ ମେଣ୍ଟକୁ ୧୨୫ରୁ ୧୪୦ ଏବଂ ଅନ୍ୟଙ୍କୁ ୧୮-୨୩ ଆସନ ମିଳିପାରେ । 

ଏସଏଏସ ଗ୍ରୁପର ଏକଜିଟ୍ ପୋଲ୍‌ରେ  ମହାବିକାଶ ଅଘାଡ଼ିକୁ ୧୪୭ରୁ ୧୫୫ ସିଟ୍ ମିଳିବ ବୋଲି ଆଶା କରାଯାଉଛି। ମହାୟୁତି ମେଣ୍ଟକୁ ୧୨୭ରୁ ୧୩୫ ସିଟ୍ ମିଳିବ ବୋଲି ଆଶା କରାଯାଇଛି। ଅନ୍ୟକୁ ୧୦ରୁ ୧୩  ସିଟ୍ ମିଳିବ ବୋଲି ପୂର୍ବାନୁମାନ କରାଯାଇଛି।

ଯାଜପୁର: ନିର୍ବାଚନ ହାରିଲା ପରେ ଔଷଧ ବିକଳରେ ତାଟିଆ କାମୁଡୁଛି ବିଜେଡ଼ି । ଜଣେ ବିଧାୟକଙ୍କ ଉପରକୁ ଆକ୍ରମଣ ହୋଇଛି । ଯାଜପୁର ଧର୍ମଶାଳା ବିଧାୟକଙ୍କ ହିମାଂଶୁ ସାହୁଙ୍କ ଉପରେ ଆକ୍ରମଣ ହୋଇଥିବା ଅଭିଯୋଗ ହୋଇଛି । ତାଙ୍କୁ ବାଡ଼େଇ ତାଙ୍କଠାରୁ ସୁନା ଚେନ ଛଡ଼ାଇ ନେଲେ ଆକ୍ରମଣକାରୀ । ସେମାନେ ବବି ଦାସଙ୍କ ସମର୍ଥକ ଥିଲେ ବୋଲି ଅଭିଯୋଗ କରିଛନ୍ତି ବିଧାୟକ । 

ବିଧାୟକ ହିମାଂଶୁ ସାହୁଙ୍କ ଅଭିଯୋଗ ମୁତାବକ, ସେ ଡିଏମ୍‌ଙ୍କ ଅଫିସକୁ ଏକ ମିଟିଂ ପାଇଁ ଯିବାବେଳେ ଯାଜପୁର ବୁଢ଼ାପୋଲ ନିକଟରେ ବିଧାୟକଙ୍କୁ ଆକ୍ରମଣ କରାଯାଇଛି । କିଛି ଲୋକ ଟାୟାର ଜାଳି ରାସ୍ତାରୋକ କରିଥିଲେ । ରାସ୍ତା ବନ୍ଦ ଥିବାରୁ ତାଙ୍କ ଗାଡ଼ି ସେଠାରେ ଅଟକି ଥିଲା । କିନ୍ତୁ କିଛି ଲୋକ ହଠାତ୍ ତାଙ୍କ ଗାଡ଼ିକୁ ରଡ୍‌ ଓ ଠେଙ୍ଗାରେ ପିଟିଥିଲେ । ଗାଡ଼ିରେ ତାଙ୍କୁ ଦେଖି ମଧ୍ୟ ଆକ୍ରମଣ କରିଥିଲେ, ଏମିତିକି ବେକର ଥିବା ସୁନା ଚେନକୁ ଛିଣ୍ଡାଇ ନେଇଗଲେ । ଆଉ ନାରା ଦେଉଥିଲେ, ବବି ଭାଇ ଜିନ୍ଦାବାଦ୍‌, ଏ ବବି ଭାଇଙ୍କ ବିରୋଧରେ ବହୁତ କହୁଥିଲା ତୋତୋ ଜୀବନରୁ ମାରିଦେବୁ, ତୁରନ୍ତ ଏଠୁ ପଳା ବୋଲି କହିଥିଲେ । ଏମିତିକି ପୁଲିସ ସାମ୍ନାରେ ଏସବୁ ଘଟିଥିଲା ବୋଲି ଅଭିଯୋଗ କରିଛନ୍ତି ବିଧାୟକ । 

ଅନ୍ୟପକ୍ଷରେ ଜଣେ ବିଧାୟକଙ୍କ ଉପରକୁ ଏମିତି ଆକ୍ରମଣ ଘଟଣା ପରେ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି । ବିଜେପି କର୍ମୀ ଏବଂ ବିଧାୟକଙ୍କ ସମର୍ଥକମାନେ ଘଟଣା ସ୍ଥଳରେ ପହଁଚି ବିଧାୟକଙ୍କୁ ସୁରକ୍ଷା ଦେବା ସହିତ ଅଭିଯୁକ୍ତଙ୍କୁ ଗିରଫ କରିବାକୁ ଦାବି କରିଛନ୍ତି । 

ସେପଟେ ପୁଲିସ ମଧ୍ୟ ଘଟଣା ସ୍ଥଳରେ ପହଁଚି ଯାଞ୍ଚ କରିଛି । ମାମଲାକୁ ଗୁରୁତର ସହ ନେଇଛି ପୁଲିସ । ଏଥିରେ ଯିଏ ସମ୍ପୃକ୍ତି ଥିବ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୁଲିସ କହିଛି । 

ନୂଆଦିଲ୍ଲୀ: ଉତ୍ତର ପ୍ରଦେଶ ଉପ ନିର୍ବାଚନ ପୂର୍ବରୁ ମୁସଲିମ ଭୋଟରଙ୍କୁ ଖୁସି କରିବାକ ସମାଜବାଦୀ ପାର୍ଟି ନିର୍ବାଚନ ଆୟୋଗଙ୍କ ସମ୍ମୁଖରେ ଏକ ଅଜବ ଦାବି ଉପସ୍ଥାପନ କରିଛି । ଅଖିଳେଶ ଯାଦବଙ୍କ ସପା ଦଳ ନିର୍ବାଚନ ଆୟୋଗଙ୍କୁ ଚିଠି ଲେଖିଛି । ମତଦାନ ସମୟରେ ମୁସଲମାନ ମହିଳାଙ୍କ ବୁର୍ଖା ନ ହଟାଇବାକୁ ଚିଠିରେ ଉଲ୍ଲେଖ କରାଯାଇଛି । 

ସମାଜବାଦୀ ପାର୍ଟି ଲେଖିଛି, ଯଦି ମହିଳା ବୁର୍ଖା ପିନ୍ଧି ମତଦାନ କରନ୍ତି ତେବେ ପୁଲିସ ହସ୍ତକ୍ଷେପ ନ କରୁ । ବୁର୍ଖା ହଟାଇବାକୁ ନେଇ ମୁସଲମାନ ମହିଳାମାନେ ଡରି ଯାଉଛନ୍ତି । ଫଳରେ ସେମାନେ ମତଦାନ କରି ପାରୁ ନାହାଁନ୍ତି । 

ଖାଲି ସେତିକି ନୁହେଁ ସମାଜବାଦୀ ପାର୍ଟି ଆହୁରି କିଛି ଦାବି ରଖିଛି । ମତଦାନ ସମୟରେ ପରିଚୟ ପତ୍ର ଯାଞ୍ଚ କରିବା ଅଧିକାର ପୁଲିସ ପାଖରେ ନ ରଖିବାକୁ ମଧ୍ୟ ଦଳ କହିଛି । କାରଣ ମୁସଲମାନ ମହିଳାମାନେ ଭୟଭୀତ ହୋଇଯାଉଛନ୍ତି । ଆସନ୍ତା ନଭେମ୍ବର ୨୦ରେ ଉତ୍ତର ପ୍ରଦେଶରେ ୯ଟି  ବିଧାନସଭା ଆସନରେ ଉପ ନିର୍ବାଚନ ହେବାକୁ ଯାଉଛି । କରହଲ, କୁନ୍ଦରକୀ, ସୀସାମଉ, କଟେହରୀ, ମୀରାପୁର, ଫୁଲପୁର, ମଞ୍ଝବା, ଖୈର ଏବଂ ଗାଜିଆବାଦ ଆସନରେ ମତଦାନ ହେବ । ନଭେମ୍ବର ୨୩ରେ ଫଳାଫଳ ପ୍ରକାଶ ପାଇବ । 

ତେବେ ସପାର ଏହି ଦାବି କିଛି ନୂଆ ନୁହେଁ । ଏହାକୁ ବିଜେପି ମଧ୍ୟ ବିରୋଧ କରି ଆସିଛି । ଚଳିତ ବର୍ଷ ଦିଲ୍ଲାରେ ହୋଇଥିବା ଲୋକସଭା ନିର୍ବାଚନ ସମୟରେ ବିଜେପି ଏହାକୁ ତୀବ୍ର ବିରୋଧ କରିଥିଲା । ବିଧାୟକ ଅଜୟ ମହାୱର, ମୋହନ ସିଂହ ବିଷ୍ଟ, କିଶନ ଶର୍ମା, ନୀରଜ ଗୁପ୍ତାଙ୍କୁ ନେଇ ବିଜେପିର ଏକ ପ୍ରତିନିଧି ଦଳ ଦିଲ୍ଲାରେ ନିର୍ବାଚନ ଆୟୋଗ ମୁଖ୍ୟଙ୍କୁ ଭେଟି ଦାବି ପତ୍ର ଦେଇଥିଲେ । ମତଦାନବେଳେ ଯେଉଁମାନେ ବୁର୍ଖା କିମ୍ବା ମାସ୍କ ପିନ୍ଧି ଆସୁଛନ୍ତି ସେମାନଙ୍କର ଯାଞ୍ଚ କରିବା ପରେ ଭୋଟ ଦେବାକୁ ଅନୁମତି ଦିଆଯାଉ ବୋଲି ଦାବି କରିଥିଲେ । ମହିଳା ଅଧିକାରୀମାନେ ସେମାନଙ୍କର ମୁହଁ ଦେଖି ଭିତରକୁ ଛାଡ଼ିବେ । 

ଭୁବନେଶ୍ୱର: ବରିଷ୍ଠ ରାଜନେତା ସମୀର ଦେଙ୍କ ଦେହାନ୍ତରେ ଶୋକ ପ୍ରକାଶ କରିଛନ୍ତି ବିରୋଧୀ ଦଳ ନେତା ତଥା ବିଜେଡ଼ି ସଭାପତି ନବୀନ ପଟ୍ଟନାୟକ । ନବୀନ ତାଙ୍କ ଶୋସିଆଲ ମିଡ଼ିଆ ଆକାଉଣ୍ଟ ‘ଏକ୍ସ’ରେ ଲେଖିଛନ୍ତି, “ବିଶିଷ୍ଟ ରାଜନେତା ତଥା ପୂର୍ବତନ ମନ୍ତ୍ରୀ ସମୀର ଦେଙ୍କ ଦେହାନ୍ତ ବିଷୟରେ ଜାଣି ମୁଁ ଦୁଃଖିତ। ଦୀର୍ଘ ସମୟ ଧରି ଲୋକଙ୍କ ସେବା ଓ ଉନ୍ନତି ଦିଗରେ ତାଙ୍କର କାର୍ଯ୍ୟ ସର୍ବଦା ସ୍ମରଣୀୟ ରହିବ। ତାଙ୍କ ଅମର ଆତ୍ମାର ସଦଗତି କାମନା କରିବା ସହ ଶୋକ ସନ୍ତପ୍ତ ପରିବାର ସଦସ୍ୟଙ୍କ ପ୍ରତି ମୋର ସମବେଦନା ଜଣାଉଛି”। 

ସମୀର ଦେଙ୍କର ଆଜି ଅପରାହ୍ନରେ ଦେହାନ୍ତ ହୋଇଛି । କଟକର ଏକ ଘରୋଇ ମେଡ଼ିକାଲରେ ସେ ପ୍ରାଣ ତ୍ୟାଗ କରିଛନ୍ତି । ସମ୍ପୂର୍ଣ୍ଣ ରାଷ୍ଟ୍ରୀୟ ମର୍ଯ୍ୟାଦା ସହିତ ତାଙ୍କର ଶେଷ କୃତ୍ୟ କରାଯିବ ବୋଲି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଘୋଷଣା କରିଛନ୍ତି । 

ଅଧିକ ପଢ଼ନ୍ତୁ-ଆଉ ନାହାଁନ୍ତି ପୂର୍ବତନ ମନ୍ତ୍ରୀ ତଥା ବରିଷ୍ଠ ବିଜେପି ନେତା ସମୀର ଦେ