ମୁମ୍ବାଇ: ମହାରାଷ୍ଟ୍ର ରାଜନୀତିରେ ପୁଣି ତେଜିଲା ବାକ୍‌ଯୁଦ୍ଧ। କଂଗ୍ରେସ ସାଂସଦ ରାହୁଲ ଗାନ୍ଧୀଙ୍କ ଫୋନ୍ ଟ୍ୟାପିଂ ଅଭିଯୋଗକୁ ନେଇ ତାଙ୍କୁ କଡ଼ା ଭାଷାରେ ସମାଲୋଚନା କରିଛନ୍ତି ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ। ରାହୁଲ ଗାନ୍ଧୀ ‘ମୋଦୀ ଫୋବିଆ’ରେ ପୀଡ଼ିତ ବୋଲି କହି ସେ କଟାକ୍ଷ କରିଛନ୍ତି। ଏହାକୁ ନେଇ ଦେଶର ରାଜନୈତିକ ମହଲରେ ଚର୍ଚ୍ଚା ଜୋର୍ ଧରିଛି।

ଏକନାଥ ସିନ୍ଦେ ସୋସିଆଲ ମିଡିଆ ପ୍ଲାଟଫର୍ମ ‘ଏକ୍ସ’ରେ ଏକ ପୋଷ୍ଟ କରି ରାହୁଲ ଗାନ୍ଧୀଙ୍କୁ ଟାର୍ଗେଟ୍ କରିଛନ୍ତି। ତାଙ୍କ କହିବା ଅନୁସାରେ, ରାହୁଲ ଗାନ୍ଧୀ ଶୋଇଥିବା ବେଳେ ହେଉ କି ଉଠିବା ସମୟରେ, ସବୁବେଳେ କେବଳ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ କଥା ଭାବୁଛନ୍ତି। ମୋଦୀଙ୍କ ନାଁ ନନେଲେ ତାଙ୍କୁ ଗଣମାଧ୍ୟମରେ ଆବଶ୍ୟକ ଚର୍ଚ୍ଚା ମିଳୁନାହିଁ ବୋଲି ସିନ୍ଦେ ଟିପ୍ପଣୀ ଦେଇଛନ୍ତି।

ଫୋନ୍ ଟ୍ୟାପିଂ ଅଭିଯୋଗକୁ ନେଇ ରାହୁଲଙ୍କୁ ଟାର୍ଗେଟ୍

ରାହୁଲ ଗାନ୍ଧୀଙ୍କ ଫୋନ୍ ଟ୍ୟାପିଂ ସମ୍ପର୍କିତ ଅଭିଯୋଗକୁ ନେଇ ମଧ୍ୟ ଏକନାଥ ସିନ୍ଦେ ପ୍ରଶ୍ନ ଉଠାଇଛନ୍ତି। ରାଜନୈତିକ ଭାବେ ନିଜ ସ୍ଥିତି ଦୁର୍ବଳ ହେଉଥିବାରୁ ଆଲୋଚନାରେ ରହିବା ପାଇଁ ରାହୁଲ ଏଭଳି ଅଭିଯୋଗ କରୁଥିବା ସେ କହିଛନ୍ତି। ତାଙ୍କ ମତରେ, ରାହୁଲଙ୍କ ପାଖରେ ନା ରହିଛି କୌଣସି ଠୋସ୍ ପ୍ରସଙ୍ଗ, ନା ଦେଶର ବିକାଶ ପାଇଁ ସ୍ପଷ୍ଟ ଦୃଷ୍ଟିକୋଣ ଏବଂ ନା ଅଭିଯୋଗକୁ ପ୍ରମାଣ କରିବା ପାଇଁ ଆବଶ୍ୟକ ତଥ୍ୟ।

ସିନ୍ଦେ ଆହୁରି କହିଛନ୍ତି ଯେ, ରାହୁଲ ଗାନ୍ଧୀ ପ୍ରମାଣ ଥିବା କଥା କହୁଛନ୍ତି, କିନ୍ତୁ ସେଗୁଡ଼ିକୁ ସାର୍ବଜନୀନ କରୁନାହାନ୍ତି। ପ୍ରତିଦିନ ନୂଆ ଅଭିଯୋଗ ଆଣିବା ଏବଂ ନୂଆ ରାଜନୈତିକ ବୟାନ ତିଆରି କରିବା ହିଁ ତାଙ୍କର କାମ ହୋଇଯାଇଛି ବୋଲି ସେ ଆକ୍ଷେପ କରିଛନ୍ତି।

ମୋଦୀଙ୍କ ବିକାଶକୁ ନେଇ ବିରୋଧୀଙ୍କୁ ସମାଲୋଚନା

ଏକନାଥ ସିନ୍ଦେଙ୍କ କହିବା ଅନୁସାରେ, ଗୋଟିଏ ପଟେ ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଦେଶ ବିକାଶର ନୂଆ ଶିଖର ଛୁଇଁବାକୁ ଆଗେଇ ଚାଲିଛି। ଅନ୍ୟପଟେ ବିରୋଧୀ ନେତାମାନେ ନିଜ ବୟାନ ପାଇଁ ନିଜେ ଅପଦସ୍ତ ହେଉଛନ୍ତି। ରାହୁଲ ଗାନ୍ଧୀଙ୍କ ଉପରେ କଟାକ୍ଷ କରି ସେ ‘ଖିସିଆନି ବିଲ୍ଲୀ ଖମ୍ଭା ନୋଚେ’ ଉକ୍ତିର ଉଦାହରଣ ଦେଇଛନ୍ତି।

ରାହୁଲଙ୍କ ଅଭିଯୋଗ ଉପରେ ବିଜେପିର ପାଲଟା ଜବାବ

ସୂଚନାଯୋଗ୍ୟ, କଂଗ୍ରେସ ସାଂସଦ ରାହୁଲ ଗାନ୍ଧୀ ପ୍ରଧାନମନ୍ତ୍ରୀ ମୋଦୀଙ୍କ ଉପରେ ଫୋନ୍ ଟ୍ୟାପିଂ କରାଉଥିବା ଅଭିଯୋଗ ଆଣିଥିଲେ। ଏହାପରେ ଦେଶର ରାଜନୈତିକ ପରିବେଶ ଉଷ୍ମ ହୋଇଛି। ରାହୁଲଙ୍କ ଅଭିଯୋଗକୁ ଖଣ୍ଡନ କରି ବିଜେପି ନେତା ତଥା କେନ୍ଦ୍ରମନ୍ତ୍ରୀ ବିଏଲ୍ ବର୍ମା କହିଛନ୍ତି ଯେ, ରାହୁଲ ଗାନ୍ଧୀ ପୂର୍ବରୁ ମଧ୍ୟ ଏଭଳି ଅନେକ ଅଭିଯୋଗ କରିଛନ୍ତି। କିନ୍ତୁ ନିଜ ଦାବି ସପକ୍ଷରେ କୌଣସି ପ୍ରମାଣ ଦେଇପାରିନାହାନ୍ତି।

ନୂଆଦିଲ୍ଲୀ: ବାରମ୍ବାର ସରକାରଙ୍କ ଉପରେ ଭୋଟ୍ ଚୋରିର ଅଭିଯୋଗ ଆଣୁଥିବା କଂଗ୍ରେସକୁ କେନ୍ଦ୍ର ମନ୍ତ୍ରୀ ରାମଦାସ ଆଠୱଲେ ବଡ଼ ଚ୍ୟାଲେଞ୍ଜ ଦେଇଛନ୍ତି । ଯଦି ୨୦୨୯ ନିର୍ବାଚନରେ କଂଗ୍ରେସ କ୍ଷମତାକୁ ଆସେ ତେବେ ସେ ରାହୁଲ ଗାନ୍ଧୀଙ୍କ ସହିତ ହାତ ମିଶାଇବେ ବୋଲି କହିଛନ୍ତି କେନ୍ଦ୍ରମନ୍ତ୍ରୀ । 

ଗୁରୁବାର ରାମଦାସ ଆଠୱଲେ କହିଛନ୍ତି ଯେ ଜନତା ଯାହାକୁ ଚାହାଁନ୍ତି ସିଏ କ୍ଷମତାକୁ ଆସେ । ଭୋଟ୍ ଚୋରି ଅଭିଯୋଗ ଆଣିବା ଠିକ୍ ନୁହେଁ । ଗଣତନ୍ତ୍ର ଯାହାକୁ ପସନ୍ଦ କରେ ତାର ଅଧିକାର । ରାମଦାସ ଓଡ଼ିଶାର ବିଜୁ ଜନତା ଦଳର ଉଦାହରଣ ଦେଇଛନ୍ତି । ବିଜେଡ଼ି ଅନେକ ବର୍ଷ କ୍ଷମତାରେ ରହିଛି, କିନ୍ତୁ ବିଜେପି କେବେବି ଭୋଟ୍ ଚୋରିର ଅଭିଯୋଗ ଆଣି ନାହିଁ । ଯାହାକୁ ସେଠାରେ ଲୋକ ପସନ୍ଦ କରନ୍ତି ସେଠାରେ ସିଏ ସରକାରକୁ ଆସେ । 

ସେହିପରି ରାମଦାସ ରାହୁଲ ଗାନ୍ଧୀଙ୍କୁ ବଡ଼ ଚ୍ୟାଲେଞ୍ଜ ଦେଇଛନ୍ତି । କେନ୍ଦ୍ର ମନ୍ତ୍ରୀ କହିଛନ୍ତି ଯେ ରାହୁଲ ଗାନ୍ଧୀଙ୍କ କ୍ରୋଧ ହେଉଛି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ପଣ୍ଡିତ ଜବାହାରଲାଲ ନେହେରୁଙ୍କ ରେକର୍ଡ ଭାଙ୍ଗି ଦେଇଛନ୍ତି । କାରଣ ନେହେରୁଙ୍କ ଠାରୁ ମୋଦୀ ଅଧିକ ସମୟ ପ୍ରଧାନମନ୍ତ୍ରୀ ହେବାର ଗୌରବ ଅର୍ଜନ କରିଛନ୍ତି । ରାମଦାସ ଦୃଢ଼ ଦାବି କରିଛନ୍ତି ୧୫ ବର୍ଷ ନୁହେଁ ତାଠାରୁ ଅଧିକ ସମୟ ମୋଦୀ ପ୍ରଧାନମନ୍ତ୍ରୀ ରହିବେ । ୨୦୨୯ରେ ମଧ୍ୟ ନିର୍ବାଚନ ଲଢ଼ିବାକୁ ବିଜେପି ପ୍ରସ୍ତୁତ ଅଛି । ଯଦି ଲୋକେ କଂଗ୍ରେସ ଏବଂ ବିରୋଧୀଙ୍କ ବହୁମତ ଦେବେ ତେବେ ସେ ରାହୁଲ ଗାନ୍ଧୀଙ୍କ ସହିତ ହାତ ମିଶାଇବେ କିନ୍ତୁ ତାଙ୍କ ସହିତ ଯିବେ ନାହିଁ । ଯଦି ମୋଦୀ ପୁଣି ଥରେ କ୍ଷମତାକୁ ଆସନ୍ତି, ତେବେ ଏହାକୁ ରାହୁଲ ଗାନ୍ଧୀଙ୍କୁ ସ୍ୱୀକାର କରିବାକୁ ପଡ଼ିବ । 

ନୂଆଦିଲ୍ଲୀ: ରାଜନୈତିକ ମଞ୍ଚରୁ ପୁଣିଥରେ କଂଗ୍ରେସ ନେତା ରାହୁଲ ଗାନ୍ଧୀଙ୍କୁ ପରୋକ୍ଷ ଭାବେ ଟାର୍ଗେଟ୍ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। କୌଣସି ନେତାଙ୍କ ନାମ ନନେଇ ସମ୍ବିଧାନର ନକଲ ହାତରେ ଧରି ବୁଲୁଥିବା କିଛି ଲୋକଙ୍କୁ ସେ କଟାକ୍ଷ କରିଛନ୍ତି। ତାଙ୍କର ଏହି ମନ୍ତବ୍ୟକୁ ନେଇ ଜାତୀୟ ରାଜନୀତିରେ ନୂଆ ଚର୍ଚ୍ଚା ଆରମ୍ଭ ହୋଇଛି।

ନଭେମ୍ବର ୧୨ରେ ଆୟୋଜିତ କିଷାନ ଟକ୍ ସମ୍ମିଳନୀରେ ଯୋଗଦେଇ ପ୍ରଧାନମନ୍ତ୍ରୀ ଏଭଳି ମନ୍ତବ୍ୟ ରଖିଥିବା ରିପୋର୍ଟ ପ୍ରକାଶ ପାଇଛି। ଯଦିଓ ସେ ସିଧାସଳଖ ରାହୁଲ ଗାନ୍ଧୀଙ୍କ ନାଁ ନେଇନଥିଲେ, ତଥାପି ତାଙ୍କ ଇଙ୍ଗିତ କଂଗ୍ରେସର ପୂର୍ବତନ ଅଧ୍ୟକ୍ଷଙ୍କ ଆଡ଼କୁ ଥିବା ରାଜନୈତିକ ମହଲରେ ଆଲୋଚନା ହେଉଛି।

ସମ୍ବିଧାନକୁ ନେଇ ବଢ଼ିଲା ରାଜନୈତିକ ବାକ୍‌ଯୁଦ୍ଧ

ରାହୁଲ ଗାନ୍ଧୀ ବିଭିନ୍ନ ସଭା, ରାଲି ଓ ସାର୍ବଜନୀନ କାର୍ଯ୍ୟକ୍ରମରେ ସମ୍ବିଧାନର ଏକ ନକଲ ହାତରେ ଧରି ଯୋଗଦେଉଥିବା ଦେଖିବାକୁ ମିଳେ। ସମ୍ବିଧାନର ସୁରକ୍ଷା ଓ ଗଣତାନ୍ତ୍ରିକ ଅଧିକାର ପ୍ରସଙ୍ଗରେ କଂଗ୍ରେସ ନେତା ଲଗାତାର କେନ୍ଦ୍ର ସରକାରଙ୍କୁ ସମାଲୋଚନା କରିଆସୁଛନ୍ତି।

ଏହି ପରିପ୍ରେକ୍ଷୀରେ ମୋଦୀଙ୍କ ମନ୍ତବ୍ୟକୁ ବିରୋଧୀ ଦଳର ରାଜନୈତିକ ଆଭିମୁଖ୍ୟ ଉପରେ ଏକ ପରୋକ୍ଷ ଆକ୍ରମଣ ଭାବେ ଦେଖାଯାଉଛି। ସମ୍ବିଧାନକୁ ନେଇ ବିଜେପି ଓ କଂଗ୍ରେସ ମଧ୍ୟରେ ପୂର୍ବରୁ ଚାଲିଥିବା ମତଭେଦ ଏହି ମନ୍ତବ୍ୟ ପରେ ଆହୁରି ଚର୍ଚ୍ଚାକୁ ଆସିଛି।

କୃଷି କ୍ଷେତ୍ରର ଉନ୍ନତି ଉପରେ ଗୁରୁତ୍ୱ

ଏହି ସମ୍ମିଳନୀରେ ପ୍ରଧାନମନ୍ତ୍ରୀ କେବଳ ରାଜନୈତିକ ପ୍ରସଙ୍ଗ ଉଠାଇନଥିଲେ, ବରଂ ଦେଶର କୃଷି କ୍ଷେତ୍ରର ଅଗ୍ରଗତି ଓ ଚାଷୀଙ୍କ ଆର୍ଥିକ ସ୍ଥିତିକୁ ନେଇ ମଧ୍ୟ ନିଜର ମତ ରଖିଥିଲେ। କୃଷି କ୍ଷେତ୍ରରେ ଚାଲିଥିବା ବିକାଶମୂଳକ ପଦକ୍ଷେପ ଏବଂ କ୍ଷୁଦ୍ର ଚାଷୀଙ୍କ ଜୀବନରେ ଆସୁଥିବା ପରିବର୍ତ୍ତନ ସମ୍ପର୍କରେ ସେ ଆଲୋକପାତ କରିଥିଲେ। ଚାଷୀଙ୍କ ଆୟ ବୃଦ୍ଧି, ଆଧୁନିକ କୃଷି ପ୍ରଣାଳୀର ବ୍ୟବହାର ଓ କୃଷି ଭିତ୍ତିଭୂମିର ବିକାଶ ଦେଶର ଅର୍ଥନୀତି ପାଇଁ ଗୁରୁତ୍ୱପୂର୍ଣ୍ଣ ବୋଲି ସେ ମତ ଦେଇଥିଲେ।

ରାଉରକେଲା: ଓଡ଼ିଶା ରାଜନୀତିରେ ବଡ଼ ଚର୍ଚ୍ଚା। ୨୦୨୯ ନିର୍ବାଚନ ଲଢ଼ିବେନି ରାଉରକେଲାର ଚାରିଥର ବିଧାୟକ ସାରଦା ପ୍ରସାଦ ନାୟକ। ସ୍ୱାସ୍ଥ୍ୟଗତ କାରଣରୁ ଆଗାମୀ ବିଧାନସଭା ନିର୍ବାଚନରେ ସେ ପ୍ରତିଦ୍ୱନ୍ଦ୍ୱିତା କରିବେ ନାହିଁ ବୋଲି ନିଜେ ଘୋଷଣା କରିଛନ୍ତି। ଏକ ମଦ ବିରୋଧୀ ଆନ୍ଦୋଳନର ସଭାରେ ତାଙ୍କର ଏହି ବୟାନ ଏବେ ରାଉରକେଲାଠାରୁ ଆରମ୍ଭ କରି ରାଜ୍ୟ ରାଜନୀତି ପର୍ଯ୍ୟନ୍ତ ଚର୍ଚ୍ଚା ସୃଷ୍ଟି କରିଛି।

ତେବେ ନିର୍ବାଚନ ନଲଢ଼ିବାର ନିଷ୍ପତ୍ତିକୁ ରାଜନୀତିରୁ ସନ୍ୟାସ ଭାବେ ଦେଖିବା ଠିକ୍ ହେବନାହିଁ। କାରଣ, ସକ୍ରିୟ ରାଜନୀତିରେ ରହି ବିଜୁ ଜନତା ଦଳର ସଂଗଠନକୁ ଆହୁରି ମଜଭୁତ କରିବା ସହ ନୂଆ ନେତୃତ୍ୱ ତିଆରି କରିବା ଉପରେ ସେ ଗୁରୁତ୍ୱ ଦେବେ ବୋଲି କହିଛନ୍ତି।

ନୂଆ ଚେହେରାଙ୍କୁ ମିଳିବ ସୁଯୋଗ

ଆଗାମୀ ଦିନରେ ମହିଳା ସଂରକ୍ଷଣକୁ ଦୃଷ୍ଟିରେ ରଖି ନୂଆ ଓ ଯୋଗ୍ୟ ଚେହେରାଙ୍କୁ ରାଜନୀତିରେ ଆଗକୁ ଆଣିବାକୁ ଚାହୁଁଛନ୍ତି ସାରଦା। ସୁନ୍ଦରଗଡ଼ ଜିଲ୍ଲାର ସମସ୍ତ ଆସନରେ ବିଜେଡିର ବିଜୟ ପାଇଁ ସଂଗଠନକୁ ମଜଭୁତ କରିବା ଏବଂ ନୂଆ ବିଧାୟକ ଗଢ଼ିବା ତାଙ୍କର ଆଗାମୀ ଲକ୍ଷ୍ୟ ବୋଲି ସେ ସ୍ପଷ୍ଟ କରିଛନ୍ତି।

୪ ଥର ବିଧାୟକ, ମନ୍ତ୍ରୀ ଭାବେ ରହିଛି ଅଭିଜ୍ଞତା

ରାଉରକେଲା ରାଜନୀତିରେ ସାରଦା ପ୍ରସାଦ ନାୟକ ଏକ ଜଣାଶୁଣା ନାମ। ୨୦୦୪, ୨୦୦୯, ୨୦୧୯ ଓ ୨୦୨୪ ମସିହାରେ ସେ ରାଉରକେଲା ବିଧାନସଭା ଆସନରୁ ବିଜୟୀ ହୋଇଛନ୍ତି। ୨୦୦୯ରୁ ୨୦୧୨ ମଧ୍ୟରେ ନବୀନ ପଟ୍ଟନାୟକ ସରକାରରେ ମନ୍ତ୍ରୀ ଭାବେ ମଧ୍ୟ ଦାୟିତ୍ୱ ତୁଲାଇଥିଲେ। ୨୦୨୪ ନିର୍ବାଚନରେ ସେ ବିଜେପି ପ୍ରାର୍ଥୀ ଦିଲ୍ଲୀପ ରାୟଙ୍କୁ ୩,୫୫୨ ଖଣ୍ଡ ଭୋଟ୍‌ରେ ପରାସ୍ତ କରିଥିଲେ।

ରାଉରକେଲାବାସୀଙ୍କ ଭଲପାଇବା ଓ ସମର୍ଥନ ପାଇଁ କୃତଜ୍ଞତା ଜଣାଇବା ସହ ଚାରିଥର ନିର୍ବାଚିତ କରିଥିବା ଜନସାଧାରଣଙ୍କ ଅବଦାନକୁ କେବେ ଭୁଲିବେ ନାହିଁ ବୋଲି ସେ କହିଛନ୍ତି। ତେବେ ୨୦୨୯ରେ ରାଉରକେଲାରୁ ବିଜେଡିର ନୂଆ ଚେହେରା କିଏ ହେବ? ସାରଦାଙ୍କ ଏହି ଘୋଷଣା ପରେ ଏବେ ସମସ୍ତଙ୍କ ନଜର ଆଗାମୀ ରାଜନୈତିକ ସମୀକରଣ ଉପରେ।

ନୂଆଦିଲ୍ଲୀ: ଆମ ଆଦମୀ ପାର୍ଟୀ ରାଷ୍ଟ୍ରୀୟ ସଂଯୋଜକ ତଥା ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଏବଂ ତାଙ୍କ ଝିଅ ହର୍ଷିତାଙ୍କୁ ଜୀବନରୁ ମାରିଦେବାକୁ ଧମକ ଆସିଛି । ୭ କୋଟି ଟଙ୍କା ନ ଦେଲେ ହତ୍ୟା କରାଯିବ ବୋଲି ତାଙ୍କୁ ଧମକ ଦିଆଯାଇଛି । ଲରେନ୍ସ ବିଷ୍ଣୋଇ ଗ୍ୟାଙ୍ଗ୍ ନାମରେ ଏହି ଧମକ ଆସିଥିବା ଜଣାପଡ଼ିଛି । 

ଦିଲ୍ଲୀ ତିଳକ ନଗର ବିଧାୟକ ଜରନୈଲ ସିଂହଙ୍କୁ ଧମକପୂର୍ଣ୍ଣ ଫୋନ୍ କଲ୍ ଏବଂ ୱାଟ୍ସଆପ୍ ମେସେଜ୍ ଆସିଛି । କେଜ୍ରିୱାଲଙ୍କୁ ଏହି ସୂଚନା ଦେବାକୁ କୁହାଯାଇଚି । ଏ ନେଇ ମୌହାଲୀ ଥାନାରେ ଅଭିଯୋଗ ହୋଇଛି । ଅଭିଯୁକ୍ତ ଜଣକ ନିଜକୁ ଲରେନ୍ସ ବିଷ୍ଣୋଇ ଗ୍ୟାଙ୍ଗର ସଦସ୍ୟ ବୋଲି ଦାବି କରିଥିଲା । 

ବିଧାୟକ ଜରନୈଲ ସିଂହ ପୋଲିସ ଅଭିଯୁକ୍ତର ମୋବାଇଲ୍ ନମ୍ବର, କଲ୍ ଡିଟେଲ୍ସ ଦାଖଲ କରିଛନ୍ତି । ଅରବିନ୍ଦ କେଜ୍ରିୱାଲ ଏବଂ ତାଙ୍କ ପରିବାରର ସୁରକ୍ଷା ବଢ଼ାଇବାକୁ ଦାବି କରିଛନ୍ତି । 

ସାଇବର କ୍ରାଇମ ଥାନା ପୋଲିସ ସୁନୀଲ କୁମାର ମାମଲାର ତଦନ୍ତ କରୁଛନ୍ତି । ପୋଲିସ ଅଭିଯୁକ୍ତକୁ ଧରିବାକୁ ତଦନ୍ତ ଆରମ୍ଭ କରିଛି । ଅଭିଯୁକ୍ତ ହରିୟାଣା ରୋହତକର ବାସିନ୍ଦା ବୋଲି ପ୍ରାଥମିକ ଯାଞ୍ଚରୁ ସ୍ପଷ୍ଟ ହୋଇଛି ।  ପୋଲିସ ପକ୍ଷରୁ ଏ ନେଇ କୌଣସି ସୂଚନା ଦେଇ ନାହିଁ । 

ଏହା ଉଲ୍ଲେଖନୀୟ ଯେ କେଜରିୱାଲଙ୍କୁ ପୂର୍ବରୁ ମେ ୨୦୨୪ ରେ ହତ୍ୟା ଧମକ ମିଳିଥିଲା। ଏକ ମେଟ୍ରୋ ଟ୍ରେନ କୋଚ ଭିତରେ ଅନେକ ମେସେଜ ଲେଖାଯାଇଥିଲା, ଯେଉଁଥିରେ ତାଙ୍କୁ ହତ୍ୟା କରିବାକୁ ଧମକ ଦିଆଯାଇଥିଲା। 

ନୂଆଦିଲ୍ଲୀ: ଉତ୍ତର ପ୍ରଦେଶ ବିଧାନସଭା ନିର୍ବାଚନ ପୂର୍ବରୁ ଅଖିଳେଶ ଯାଦବ ଏବଂ ମାୟାବତୀଙ୍କୁ ଏକ ଶକ୍ତ ଝଟକା ଲାଗିଛି । ୨୦୨୭ ନିର୍ବାଚନ ପୂର୍ବରୁ ରାଜ୍ୟରେ ପୁଣି ଏକ ରାଜନୈତିକ ମେଣ୍ଟ ଗଢ଼ି ଉଠିଛି । ଗୁରୁବାର ଲକ୍ଷ୍ନୌଠାରେ ଏକ ମିଳିତ ସାମ୍ବାଦିକ ସମ୍ମିଳନୀରେ ସାଂସଦ ଚନ୍ଦ୍ର ଶେଖର ଆଜାଦଙ୍କ ଆଜାଦ ସମାଜ ପାର୍ଟୀ ଏବଂ ଅସଦୁଦ୍ଦୀନ ଓବୈସୀଙ୍କୁ ଏଆଇଏମଆଇଏମ୍ ପାର୍ଟୀ ମେଣ୍ଟ ଘୋଷଣା କରିଛନ୍ତି । ଏହି ନୂତନ ମେଣ୍ଟକୁ ସାମାଜିକ ପରିବର୍ତ୍ତନ ମୋର୍ଚ୍ଚା (ଏସପିଏମ୍) ନାମରେ ନାମିତ କରାଯାଇଛି । ଏହି ମେଣ୍ଟ ଆସନ୍ତା ବିଧାନସଭା ନିର୍ବାଚନରେ ସମସ୍ତ ଆସନରେ ନିର୍ବାଚନ ଲଢ଼ିବ ବୋଲି ଘୋଷଣା ହୋଇଛି । 

ଚନ୍ଦ୍ର ଶେଖର ଏହାକୁ ରାଜ୍ୟର ପ୍ରଥମ ମୋର୍ଚ୍ଚା ବୋଲି କହିଛନ୍ତି । ଏହି ମେଣ୍ଟରେ ଦଳିତ, ପୀଡ଼ିତ ଏବଂ ଦୁର୍ବଳ ଶ୍ରେଣୀର ଲୋକଙ୍କୁ ସୁଯୋଗ ଦିଆଯିବ, ଆଉ ଯେତେ ସଂଖ୍ୟାରେ ଏମାନେ ଯୋଡ଼ି ହେବେ ଦଳ ଆଗକୁ ସେତେ ମଜବୁତ ହେବ । 

ଚନ୍ଦ୍ରଶେଖର ଆଜାଦ ମୁଖ୍ୟମନ୍ତ୍ରୀ ପ୍ରାର୍ଥୀ 

ଖାଲି ସେତିକି ନୁହେଁ ଓବୈସୀ ଆଉ ଏକ ଗୁରୁତ୍ୱପୂର୍ଣ୍ଣ ଘୋଷଣାରେ ଚନ୍ଦ୍ର ଶେଖର ଆଜାଦଙ୍କୁ ମୁଖ୍ୟମନ୍ତ୍ରୀ ପ୍ରାର୍ଥୀ ଭାବେ ଘୋଷଣା କରିଛନ୍ତି । ଅର୍ଥାତ ଏସପିଏମର ମୁଖ୍ୟମନ୍ତ୍ରୀ ପ୍ରାର୍ଥୀ ହେବେ ଚନ୍ଦ୍ର ଶେଖର ଆଜାଦ । ଏହା ଉତ୍ତର ପ୍ରଦେଶର 3ୟ ଥର କ୍ଷମତାକୁ ଆସିବାକୁ ଚେଷ୍ଟା କରୁଥିବା ବିଜେପିକୁ ରୋକିବାକୁ ବଡ଼ ବିକଳ୍ପ ସାବ୍ୟସ୍ତ ହେବ ବୋଲି ଓବୈସୀ ଦୃଢ଼ ବିଶ୍ୱାସର ସହିତ କହିଛନ୍ତି । 

ସମସ୍ତ ଆସନରେ ଲଢ଼ିବ ମେଣ୍ଟ 

ଓବୈସୀ ଘୋଷଣା କରିଛନ୍ତି ଯେ ଦଳ ରାଜ୍ୟରେ ସମସ୍ତ 403ଟି ଆସନରେ ନିର୍ବାଚନ ଲଢ଼ିବ । ଏହି ଘୋଷଣା ପରେ ଉତ୍ତର ପ୍ରଦେଶ ରାଜନୀତିରେ ବଡ଼ ହଲଚଲ ସୃଷ୍ଟି ହୋଇଛି । ଏହା ଅଖିଳେଶ ଯାଦବ ଏବଂ ମାୟାବତୀଙ୍କ ଖେଳ ବିଗାଡ଼ିବାରେ ଯଥେଷ୍ଟ ସମ୍ଭାବନା ଥିବା ଆଶଙ୍କା କରାଯାଉଛି । 

 ଅଖିଳେଶ ଓ ମାୟାବତୀଙ୍କ ରାସ୍ତାରେ କଣ୍ଟା  

ଉତ୍ତର ପ୍ରଦେଶରେ ଦଳିତ ଏବଂ ମୁସଲିମ୍ ମତଦାତାଙ୍କ ସଂଖ୍ୟା ମୋଟ ମତଦାତାର ୪୦ ପ୍ରତିଶତ ଅଟେ । ଏହା ସହିତ ରାଜ୍ୟରେ ଦଳିତ ଏବଂ ମୁସଲିମ୍ ସମୀକରଣରେ ପ୍ରାୟ ୨୦୦ ଆସନ ରହିଛି । ୧୪୩ଟି ଆସନକୁ ମୁସଲିମ ବହୁଳ ଏବଂ ୧୦୦ଟି ଆସନକୁ ଦଳିତ ବହୁଳ ଆସନ ଭାବରେ ବିବେଚନା କରାଯାଏ । ଯେଉଁଥିରେ ୮୫ଟି ଆସନ ଅନୁସୂଚିତ ଜାତି ପାଇଁ ସଂରକ୍ଷିତ ରହିଛି । ତେଣୁ ଏସପିଏମ୍ ମେଣ୍ଟର ଫୋକସ୍ ଏହି ଆସନ ଉପରେ ବିଶେଷ ଭାବରେ ରହିବ । 

ଚନ୍ଦ୍ରଶେଖର ଆଜାଦ ଏବଂ ମାୟାବତୀ ଗୋଟିଏ ଅଞ୍ଚଳ ଏବଂ ସମ୍ପ୍ରଦାୟରୁ ଆସିଛନ୍ତି। ଉଭୟ ପଶ୍ଚିମ ଉତ୍ତର ପ୍ରଦେଶର ଏବଂ ଜାଟଭ ସମ୍ପ୍ରଦାୟର। ଉଭୟଙ୍କ ରାଜନୈତିକ ଭାଗ୍ୟ ସମ୍ପୂର୍ଣ୍ଣ ଭାବରେ ଦଳିତ ଭୋଟ ଉପରେ ନିର୍ଭରଶୀଳ। ତେଣୁ ଏଠାରେ ପୁଣି ଏକ ବଡ଼ ରାଜନୈତିକ ଲଢ଼େଇ ହେବାର ଯଥେଷ୍ଟ ସମ୍ଭାବନା ରହିଛି । 

ପରୋକ୍ଷରେ ବିଜେପିକୁ ଲାଭ 

ରାଜନୈତିକ ବିଶ୍ଳେଷକମାନେ ଆଶଙ୍କା ପ୍ରକାଶ କରୁଛନ୍ତି ଯେ ଓବୈସୀ ଏବଂ ଚନ୍ଦ୍ରଶେଖରଙ୍କ ମଧ୍ୟରେ ଏହି ମେଣ୍ଟ ଉତ୍ତର ପ୍ରଦେଶରେ ଦ୍ୱିପାକ୍ଷିକ ପ୍ରତିଯୋଗିତାକୁ ତ୍ରିକୋଣୀୟରେ ପରିଣତ କରିବାର ଏକ ପ୍ରୟାସ। ଯଦିଓ "ସାମାଜିକ ପରିବର୍ତ୍ତନ ମୋର୍ଚ୍ଚା" ନିଜ ଦମରେ ଆସନ ଜିତି ନପାରେ, ତଥାପି ଏହା ପଶ୍ଚିମ ଉତ୍ତର ପ୍ରଦେଶ ଏବଂ ପୂର୍ବାଞ୍ଚଳରେ ମାୟାବତୀଙ୍କ ରାଜନୈତିକ ଉପସ୍ଥିତିକୁ ଆହୁରି ଦୁର୍ବଳ କରିବ ଏବଂ ଏସପିର ମୁସଲିମ ଏବଂ ଦଳିତ ଭୋଟକୁ କମ୍ କରିବା ସହିତ ପରୋକ୍ଷ ଭାବରେ ବିଜେପି ପାଇଁ ପଥ ସହଜ କରିପାରିବ। ଯଦି ଓବୈସୀ-ଚନ୍ଦ୍ରଶେଖର ମେଣ୍ଟ ୨୦୨୭ ମସିହାରେ ଉତ୍ତର ପ୍ରଦେଶରେ ୫ ରୁ ୬ ପ୍ରତିଶତ ଭୋଟ୍ ହାସଲ କରିବାରେ ସଫଳ ହୁଏ, ତେବେ ଏହା ସିଧାସଳଖ ମାୟାବତୀଙ୍କ ଦଳିତ ଭୋଟ୍ ବ୍ୟାଙ୍କ ଏବଂ ଅଖିଳେଶ ଯାଦବଙ୍କ ପିଡିଏ ମେଣ୍ଟକୁ କ୍ଷତି ପହଞ୍ଚାଇପାରେ। ତେଣୁ, ସେମାନେ ଉତ୍ତର ପ୍ରଦେଶରେ କି ଯାଦୁ ହାସଲ କରିପାରିବେ ତାହା ଦେଖିବା ବାକି ରହିଲା।

ନୂଆଦିଲ୍ଲୀ: କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ନୂଆ ପୁସ୍ତକକୁ ନେଇ ରାଜନୈତିକ ମହଲରେ ବିବାଦ ତୀବ୍ର ହେବାରେ ଲାଗିଛି। ପୁସ୍ତକ 'Belonging: A Journey of Love' ପ୍ରକାଶ ପାଇବା ପରେ ଏହାର ବିଷୟବସ୍ତୁକୁ ନେଇ ଏବେ ବିଭିନ୍ନ ନେତା ନିଜ ନିଜ ମତ ରଖୁଛନ୍ତି। ପୂର୍ବତନ ରାଷ୍ଟ୍ରପତି ପ୍ରଣବ ମୁଖାର୍ଜୀଙ୍କ ଝିଅ ଶର୍ମିଷ୍ଠା ମୁଖାର୍ଜୀଙ୍କ ପରେ ଏବେ ପୂର୍ବତନ ପ୍ରଧାନମନ୍ତ୍ରୀ ପି.ଭି. ନରସିଂହ ରାଓଙ୍କ ନାତି ଏନ୍‌.ଭି. ସୁଭାଷ ସୋନିଆଙ୍କୁ ଟାର୍ଗେଟ କରିଛନ୍ତି।

ସୁଭାଷ ଏହି ପୁସ୍ତକକୁ 'ମିଛର ପୁଟୁଳି' ବୋଲି ଆଖ୍ୟା ଦେଇଛନ୍ତି। ତାଙ୍କ ଅଭିଯୋଗ ଅନୁସାରେ, ପୁସ୍ତକରେ ଗାନ୍ଧୀ ପରିବାରର ଶାସନ ସମୟର କେତେକ ଐତିହାସିକ ଘଟଣା ଓ ନିଷ୍ପତ୍ତିକୁ ନେଇ ବିରୋଧାଭାସ ରହିଛି। ଏଥିସହ ଦେଶ ଓ କଂଗ୍ରେସ ପାଇଁ ପି.ଭି. ନରସିଂହ ରାଓଙ୍କ ଅବଦାନକୁ ଜାଣିଶୁଣି ଅଣଦେଖା କରାଯାଇଥିବା ସେ ଅଭିଯୋଗ କରିଛନ୍ତି।

ନରସିଂହ ରାଓଙ୍କ ଅବଦାନକୁ ଅଣଦେଖା କରାଯାଇଛି

ପି.ଭି. ନରସିଂହ ରାଓ ୧୯୯୧ରୁ ୧୯୯୬ ପର୍ଯ୍ୟନ୍ତ ଦେଶର ପ୍ରଧାନମନ୍ତ୍ରୀ ଥିଲେ। ଏହାସହ ୧୯୯୨ରୁ ୧୯୯୬ ପର୍ଯ୍ୟନ୍ତ ସେ କଂଗ୍ରେସର ଅଧ୍ୟକ୍ଷ ଦାୟିତ୍ୱ ମଧ୍ୟ ସମ୍ଭାଳିଥିଲେ। ତାଙ୍କ ନାତି ତଥା ବିଜେପିର ତେଲେଙ୍ଗାନା ମୁଖ୍ୟ ମୁଖପାତ୍ର ଏନ୍‌.ଭି. ସୁଭାଷ କହିଛନ୍ତି ଯେ, ସୋନିଆଙ୍କ ପୁସ୍ତକରେ ତାଙ୍କ ଜେଜେବାପାଙ୍କ ଉଲ୍ଲେଖ ନଥିବା ତାଙ୍କ ପରିବାର ପାଇଁ ଆଶ୍ଚର୍ଯ୍ୟଜନକ ନୁହେଁ।

ସୁଭାଷଙ୍କ ଅଭିଯୋଗ ହେଉଛି, କଂଗ୍ରେସ ଓ ଦେଶ ପାଇଁ ନରସିଂହ ରାଓଙ୍କ ଅବଦାନକୁ ଜାଣିଶୁଣି ପୁସ୍ତକରେ ସ୍ଥାନ ଦିଆଯାଇନାହିଁ। ଗାନ୍ଧୀ ପରିବାର ନିଜ ଦଳର ଅନ୍ୟ ବରିଷ୍ଠ ନେତାଙ୍କ ଗୁରୁତ୍ୱ କମାଇ ନିଜ ପରିବାରକୁ ଅଧିକ ଗୁରୁତ୍ୱ ଦେବାକୁ ଚେଷ୍ଟା କରୁଥିବା ସେ ମତ ରଖିଛନ୍ତି।

ପୁସ୍ତକରେ ଦେଖିବାକୁ ମିଳିଛି ବିରୋଧାଭାସ !

ସୋନିଆଙ୍କ ପୁସ୍ତକର ବିଷୟବସ୍ତୁକୁ ନେଇ ମଧ୍ୟ ସୁଭାଷ ପ୍ରଶ୍ନ ଉଠାଇଛନ୍ତି। ତାଙ୍କ କହିବା ଅନୁସାରେ, ଗୋଟିଏ ପଟେ ସୋନିଆ କହିଛନ୍ତି ଯେ ସେ ଚାହୁଁନଥିଲେ ତାଙ୍କ ସ୍ୱାମୀ ତଥା ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀ ରାଜନୀତିକୁ ଆସନ୍ତୁ। ଅନ୍ୟପଟେ ନିଜ ପିଲାମାନଙ୍କୁ ରାଜନୀତିର ମୁଖ୍ୟଧାରାକୁ ଆଣିଥିବା ସେ ଅଭିଯୋଗ କରିଛନ୍ତି। ଏହାକୁ ସେ ଦୋମୁହାଁ ନୀତି ବୋଲି କହିଛନ୍ତି। ଭବିଷ୍ୟତରେ ମଧ୍ୟ ଗାନ୍ଧୀ ପରିବାରର ପରବର୍ତ୍ତୀ ପିଢ଼ି ରାଜନୀତିରେ ସକ୍ରିୟ ରହିବାର ସମ୍ଭାବନା ଥିବା ନେଇ ସେ ଟିପ୍ପଣୀ ଦେଇଛନ୍ତି।

ଶର୍ମିଷ୍ଠା ମୁଖାର୍ଜୀ ମଧ୍ୟ ଉଠାଇଥିଲେ ପ୍ରଶ୍ନ

ସୋନିଆଙ୍କ ପୁସ୍ତକକୁ ନେଇ ଏହା ପ୍ରଥମ ବିବାଦ ନୁହେଁ। ଏହା ପୂର୍ବରୁ ପୂର୍ବତନ ରାଷ୍ଟ୍ରପତି ତଥା କଂଗ୍ରେସର ବରିଷ୍ଠ ନେତା ପ୍ରଣବ ମୁଖାର୍ଜୀଙ୍କ ଝିଅ ଶର୍ମିଷ୍ଠା ମୁଖାର୍ଜୀ ମଧ୍ୟ ସୋନିଆଙ୍କ ଏକ ଦାବିକୁ ନେଇ ପ୍ରଶ୍ନ ଉଠାଇଥିଲେ। ୨୦୧୦ରେ ପ୍ରଣବ ମୁଖାର୍ଜୀ ପ୍ରଧାନମନ୍ତ୍ରୀ ପଦ ପାଇଁ ନିଜ ନାମ ଆଗକୁ ଆଣିବାକୁ ଚାହୁଁଥିଲେ ବୋଲି ସୋନିଆଙ୍କ ପୁସ୍ତକରେ ଥିବା ଉଲ୍ଲେଖକୁ ଶର୍ମିଷ୍ଠା ପ୍ରଶ୍ନ କରିଥିଲେ।

ରାଜନୀତିରେ ଆକାଂକ୍ଷା ରଖିବା କ'ଣ ଭୁଲ୍ ବୋଲି ସେ ପାଲଟା ପ୍ରଶ୍ନ କରିଥିଲେ। ସୋନିଆ ଗାନ୍ଧୀଙ୍କ ଏହି ନୂଆ ପୁସ୍ତକକୁ ନେଇ ଏବେ ରାଜନୈତିକ ମତଭେଦ ସାମ୍ନାକୁ ଆସୁଥିବା ବେଳେ ଆଗକୁ ଏହି ବିବାଦ କେଉଁ ମୋଡ଼ ନେବ, ତାହା ଉପରେ ସମସ୍ତଙ୍କ ନଜର ରହିଛି।

ନୂଆଦିଲ୍ଲୀ: ଗାନ୍ଧୀ ପରିବାରର ରାଜନୈତିକ ଇତିହାସ ଯେତିକି ଚର୍ଚ୍ଚିତ, ପାରିବାରିକ ସମ୍ପର୍କର ଉତ୍ଥାନ-ପତନ ମଧ୍ୟ ସେତିକି ରୋଚକ। ବିଶେଷକରି ସଞ୍ଜୟ ଗାନ୍ଧୀଙ୍କ ପତ୍ନୀ ମେନକା ଗାନ୍ଧୀ ଏବଂ ଇନ୍ଦିରା ଗାନ୍ଧୀଙ୍କ ପରିବାର ମଧ୍ୟରେ ସମୟକ୍ରମେ ସୃଷ୍ଟି ହୋଇଥିବା ମତଭେଦ ଦୀର୍ଘଦିନ ଧରି ଚର୍ଚ୍ଚାରେ ରହିଛି। ଏବେ କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସ୍ମୃତିଚାରଣ ପୁସ୍ତକ 'Belonging: A Journey of Love'ରେ ଏହି ପାରିବାରିକ ବିବାଦର ଅନେକ ଦିଗ ସାମ୍ନାକୁ ଆସିଛି। ପୁସ୍ତକରେ ସୋନିଆ ଗାନ୍ଧୀ ମେନକାଙ୍କ ସହ ଗାନ୍ଧୀ ପରିବାରର ସମ୍ପର୍କ କିପରି ଆରମ୍ଭରେ ଭଲ ଥିଲା ଏବଂ ପରେ ତାହା କିପରି ତିକ୍ତତାରେ ପରିଣତ ହୋଇଥିଲା, ସେ ସମ୍ପର୍କରେ ଲେଖିଛନ୍ତି।

ପ୍ରେମ ବିବାହ ପରେ ଗାନ୍ଧୀ ପରିବାରରେ ମେନକା

ସୋନିଆଙ୍କ ଲେଖା ଅନୁସାରେ, ୧୯୭୩ ମସିହାର ଶେଷ ଭାଗରେ ସଞ୍ଜୟ ଗାନ୍ଧୀ ଓ ମେନକାଙ୍କ ମଧ୍ୟରେ ପରିଚୟ ହୋଇଥିଲା। ଅଳ୍ପ ସମୟ ମଧ୍ୟରେ ଦୁହିଁଙ୍କ ସମ୍ପର୍କ ପ୍ରେମରେ ପରିଣତ ହେବା ସହ ବିବାହର ରୂପ ନେଇଥିଲା। ମାତ୍ର ୧୮ ବର୍ଷ ବୟସରେ ମେନକା ଗାନ୍ଧୀ ପରିବାରର ସାନ ବୋହୂ ହୋଇଥିଲେ। ପ୍ରାରମ୍ଭରେ ମେନକାଙ୍କ ଉତ୍ସାହୀ ଓ ମିଶାଣିଆ ସ୍ୱଭାବ ସୋନିଆଙ୍କୁ ଭଲ ଲାଗିଥିଲା। ପରିବାରକୁ ଜଣେ ନୂଆ ସଦସ୍ୟ ଆସିବା ନେଇ ସେ ଖୁସି ଥିଲେ। କିନ୍ତୁ ସମୟ ଗଡ଼ିବା ସହ ପାରିବାରିକ ପରିବେଶରେ ଛୋଟ ଛୋଟ କଥାକୁ ନେଇ ଅସନ୍ତୋଷ ବଢ଼ିବାକୁ ଲାଗିଥିଲା।

ଇନ୍ଦିରାଙ୍କ ସାମ୍ନାରେ ମଧ୍ୟ ହେଉଥିଲା ତୀବ୍ର ଯୁକ୍ତିତର୍କ

ସୋନିଆଙ୍କ ବର୍ଣ୍ଣନା ଅନୁସାରେ, ବିବାହର କିଛି ସମୟ ପରେ ସଞ୍ଜୟ ଓ ମେନକାଙ୍କ ମଧ୍ୟରେ ମତଭେଦ ଦେଖାଦେଇଥିଲା। ବେଳେବେଳେ ଦୁହିଁଙ୍କ ମଧ୍ୟରେ ଯୁକ୍ତିତର୍କ ଏତେ ତୀବ୍ର ହେଉଥିଲା ଯେ ପରିବାରର ଅନ୍ୟ ସଦସ୍ୟମାନେ ମଧ୍ୟ ଅସହଜ ଅନୁଭବ କରୁଥିଲେ। ସୋନିଆ ଲେଖିଛନ୍ତି ଯେ, ରାଗିଗଲେ ମେନକା କଠୋର ଓ ଅପଶବ୍ଦ ବ୍ୟବହାର କରୁଥିଲେ। ଏପରିକି ଇନ୍ଦିରା ଗାନ୍ଧୀଙ୍କ ଉପସ୍ଥିତିରେ ମଧ୍ୟ ଏଭଳି ଭାଷା ପ୍ରୟୋଗ କରିବାକୁ ସେ ପଛାଉନଥିଲେ। ଗାନ୍ଧୀ ପରିବାରରେ ଏପରି ଭାଷା ବ୍ୟବହାରକୁ ଗ୍ରହଣ କରାଯାଉନଥିଲା। ଫଳରେ ସଞ୍ଜୟ ମଧ୍ୟ ଅନେକ ସମୟରେ ଅସ୍ୱସ୍ତି ଅନୁଭବ କରୁଥିଲେ।

ସଞ୍ଜୟଙ୍କ ପ୍ରଭାବରେ ରାଜୀବ-ସଞ୍ଜୟ ସମ୍ପର୍କରେ ଫାଟ

ସୋନିଆଙ୍କ ଅନୁସାରେ, ମେନକାଙ୍କ ସହ ସଞ୍ଜୟଙ୍କ ସମ୍ପର୍କର ପ୍ରଭାବ ଧୀରେ ଧୀରେ ରାଜୀବ ଓ ସଞ୍ଜୟଙ୍କ ଭାଇଚାରା ଉପରେ ମଧ୍ୟ ପଡ଼ିଥିଲା। ପୂର୍ବରୁ ଦୁଇ ଭାଇଙ୍କ ମଧ୍ୟରେ ଘନିଷ୍ଠ ସମ୍ପର୍କ ଥିଲେ ମଧ୍ୟ ପରବର୍ତ୍ତୀ ସମୟରେ ମତଭେଦ ବଢ଼ିଥିଲା। ଜରୁରୀକାଳୀନ ପରିସ୍ଥିତି ପରେ ସଞ୍ଜୟ ଗାନ୍ଧୀଙ୍କ ରାଜନୈତିକ କାର୍ଯ୍ୟକଳାପ ଅଧିକ ଚର୍ଚ୍ଚାକୁ ଆସିଥିଲା। ସେ ବିଭିନ୍ନ ସାକ୍ଷାତକାରରେ ପ୍ରଶାସନିକ ବ୍ୟବସ୍ଥାର ଧୀରଗତିକୁ ନେଇ ନିଜର ମତ ରଖୁଥିଲେ। ତାଙ୍କ କିଛି ମନ୍ତବ୍ୟକୁ ଇନ୍ଦିରା ଗାନ୍ଧୀଙ୍କ ସରକାର ପ୍ରତି ସମାଲୋଚନା ଭାବେ ମଧ୍ୟ ଦେଖାଯାଉଥିଲା।

ଇନ୍ଦିରାଙ୍କ ଚିନ୍ତା ବଢ଼ାଉଥିଲା ସଞ୍ଜୟଙ୍କ ରାଜନୈତିକ ଆଭିମୁଖ୍ୟ

ସୋନିଆଙ୍କ ଲେଖା ଅନୁସାରେ, ସଞ୍ଜୟଙ୍କ ରାଜନୈତିକ ଆକାଂକ୍ଷାକୁ କଂଗ୍ରେସର କିଛି ଗୋଷ୍ଠୀ ସମର୍ଥନ କରୁଥିଲେ। ଅନ୍ୟପଟେ ଇନ୍ଦିରା ଗାନ୍ଧୀଙ୍କ ମନରେ ଏହାକୁ ନେଇ ଚିନ୍ତା ବଢ଼ିଥିଲା। ତାଙ୍କ ମତରେ ମେନକା ସଞ୍ଜୟଙ୍କୁ ବୁଝାଇବା ପରିବର୍ତ୍ତେ ତାଙ୍କ କାର୍ଯ୍ୟକଳାପକୁ ଉତ୍ସାହିତ କରୁଥିଲେ। ୧୯୭୮ ମସିହାର ନିର୍ବାଚନ ପରେ ପରିବାର ମଧ୍ୟରେ ମତଭେଦ ଆହୁରି ବଢ଼ିଥିଲା। ସେହି ନିର୍ବାଚନରେ କଂଗ୍ରେସର ପରାଜୟ ପାଇଁ ସଞ୍ଜୟଙ୍କ ରାଜନୈତିକ ଆଭିମୁଖ୍ୟ ମଧ୍ୟ ଦାୟୀ ବୋଲି ରାଜୀବ ଭାବୁଥିଲେ।

ସଞ୍ଜୟଙ୍କ ଜିଦ୍‌, ତରବରିଆ ନିଷ୍ପତ୍ତି ଏବଂ ମାଆଙ୍କ ସହ ଆଲୋଚନା ନକରି କାମ କରିବାର ଅଭ୍ୟାସକୁ ନେଇ ରାଜୀବ ଅସନ୍ତୁଷ୍ଟ ଥିଲେ। ଏକ ପାରିବାରିକ ଆଲୋଚନା ସମୟରେ ସେ ସଞ୍ଜୟଙ୍କୁ ନିଜ ମାଆଙ୍କୁ ଏଭଳି ପରିସ୍ଥିତିରେ ପହଞ୍ଚାଇବା ପାଇଁ ଦାୟୀ କରିଥିବା କଥା ସୋନିଆ ପୁସ୍ତକରେ ଉଲ୍ଲେଖ କରିଛନ୍ତି।

ମେନକାଙ୍କୁ ନେଇ ଇନ୍ଦିରା ମଧ୍ୟ ଥିଲେ ଅସନ୍ତୁଷ୍ଟ

ପୁସ୍ତକରେ ସୋନିଆ ଆହୁରି ଲେଖିଛନ୍ତି ଯେ, ସଞ୍ଜୟଙ୍କ କିଛି କାର୍ଯ୍ୟକଳାପକୁ ନେଇ ଇନ୍ଦିରା ମଧ୍ୟ ଚିନ୍ତିତ ଥିଲେ। ସେ ଅନେକ ସମୟରେ ନିଜ ଅଜାଣତରେ ସଞ୍ଜୟ ନିଷ୍ପତ୍ତି ନେଉଥିବା ଘଟଣାକୁ ନେଇ ଅସନ୍ତୋଷ ପ୍ରକାଶ କରୁଥିଲେ। ଏଭଳି ଏକ ଆଲୋଚନା ସମୟରେ ମେନକା ମଧ୍ୟସ୍ଥତା କରିବାକୁ ଚେଷ୍ଟା କରିଥିଲେ। ଏହାପରେ ଇନ୍ଦିରା ତାଙ୍କୁ ନିଜ ଅଭିଯୋଗକୁ ଭୁଲ୍‌ ପ୍ରମାଣିତ କରିବାକୁ ଚ୍ୟାଲେଞ୍ଜ ଦେଇଥିଲେ। ଏହି ଘଟଣା ପରେ ପାରିବାରିକ ପରିବେଶ ଆହୁରି ଗମ୍ଭୀର ହୋଇଥିଲା ବୋଲି ସୋନିଆ ଲେଖିଛନ୍ତି।

ସଞ୍ଜୟଙ୍କ ମୃତ୍ୟୁ ପରେ ବଢ଼ିଥିଲା ଦୂରତା

ସୋନିଆଙ୍କ ଅନୁସାରେ, ମେନକାଙ୍କ ସହ ପରିବାରର ମତଭେଦ କେବଳ ଘରୋଇ ବିବାଦ ମଧ୍ୟରେ ସୀମିତ ରହିନଥିଲା। ଗଣମାଧ୍ୟମର କିଛି ସାମ୍ବାଦିକଙ୍କ ମାଧ୍ୟମରେ ପରିବାର ବିଷୟରେ ବିଭିନ୍ନ ଖବର ପ୍ରଚାର ହେଉଥିବା ନେଇ ସେ ଅଭିଯୋଗ କରିଛନ୍ତି। ବିଶେଷକରି ନିର୍ବାଚନରେ ପରାଜୟ ପରେ ରାଜୀବ ଓ ସୋନିଆ ଦେଶ ଛାଡ଼ି ଚାଲିଯିବାକୁ ଯୋଜନା କରୁଥିବା ଖବରକୁ ସେ ମିଥ୍ୟା ବୋଲି ଦର୍ଶାଇଛନ୍ତି। ୧୯୮୦ ଜୁନ୍‌ ୨୩ ତାରିଖରେ ଏକ ବିମାନ ଦୁର୍ଘଟଣାରେ ସଞ୍ଜୟ ଗାନ୍ଧୀଙ୍କ ମୃତ୍ୟୁ ହୋଇଥିଲା। ଏହି ଘଟଣା ପରେ ପରିବାରର ପରିସ୍ଥିତି ଆହୁରି ଜଟିଳ ହୋଇଥିଲା।

ରାଜନୀତିରେ ଆଗକୁ ବଢ଼ିବାକୁ ଚାହୁଁଥିଲେ ମେନକା!

ସଞ୍ଜୟଙ୍କ ମୃତ୍ୟୁ ପରେ ମେନକାଙ୍କ ରାଜନୈତିକ ଭବିଷ୍ୟତକୁ ନେଇ ମଧ୍ୟ ପରିବାରରେ ମତଭେଦ ଦେଖାଦେଇଥିଲା। ସଞ୍ଜୟଙ୍କ ସମର୍ଥକମାନେ କଂଗ୍ରେସରେ ମେନକାଙ୍କୁ ଏକ ଗୁରୁତ୍ୱପୂର୍ଣ୍ଣ ପଦ ଦେବାକୁ ଚାହୁଁଥିବା ଚର୍ଚ୍ଚା ହେଉଥିଲା। କିନ୍ତୁ ଇନ୍ଦିରା ଗାନ୍ଧୀଙ୍କ ମତ ଭିନ୍ନ ଥିଲା। ତାଙ୍କ ଅନୁସାରେ, ସେତେବେଳେ ମେନକାଙ୍କ ବୟସ ମାତ୍ର ୨୩ ବର୍ଷ ଥିଲା ଏବଂ ସେ ରାଜନୈତିକ ଦାୟିତ୍ୱ ନେବା ପାଇଁ ଆହୁରି ଅଭିଜ୍ଞତା ହାସଲ କରିବା ଆବଶ୍ୟକ ଥିଲା। ଏହା ସହ ତାଙ୍କର ଛୋଟ ଶିଶୁର ଯତ୍ନ ନେବା ମଧ୍ୟ ଜରୁରୀ ବୋଲି ଇନ୍ଦିରା ଭାବୁଥିଲେ।

କିନ୍ତୁ ମେନକାଙ୍କ ରାଜନୈତିକ ଆକାଂକ୍ଷା ଓ ପରିବାର ସହ ମତଭେଦ ମଧ୍ୟରେ ଦୂରତା ଦିନକୁ ଦିନ ବଢ଼ିଥିଲା। ଶେଷରେ ସଞ୍ଜୟଙ୍କ ମୃତ୍ୟୁର ଏକ ବର୍ଷ ମଧ୍ୟରେ ମେନକା ଗାନ୍ଧୀ ପରିବାରଠାରୁ ଅଲଗା ହୋଇଯାଇଥିଲେ। ସୋନିଆଙ୍କ ଏହି ପୁସ୍ତକରେ ବର୍ଣ୍ଣିତ ଘଟଣାଗୁଡ଼ିକ ଗାନ୍ଧୀ ପରିବାରର ଘରୋଇ ସମ୍ପର୍କ, ରାଜନୈତିକ ମତଭେଦ ଓ କ୍ଷମତାକୁ ନେଇ ରହିଥିବା ଆଭ୍ୟନ୍ତରୀଣ ଦ୍ୱନ୍ଦ୍ୱର ଏକ ଭିନ୍ନ ଚିତ୍ର ସାମ୍ନାକୁ ଆଣିଛି।

ନୂଆଦିଲ୍ଲୀ: ୨୦୦୪ ମସିହାର ଲୋକସଭା ନିର୍ବାଚନ ଭାରତୀୟ ରାଜନୀତିରେ ଏକ ବଡ଼ ପରିବର୍ତ୍ତନ ଆଣିଥିଲା। ବିଜେପି ନେତୃତ୍ୱାଧୀନ ଏନ୍‌ଡିଏକୁ ପରାସ୍ତ କରି କଂଗ୍ରେସ ନେତୃତ୍ୱାଧୀନ ୟୁପିଏ କେନ୍ଦ୍ରରେ ସରକାର ଗଠନ କରିବାକୁ ସଫଳ ହୋଇଥିଲା। ଏହି ବିଜୟ ପରେ କଂଗ୍ରେସର ତତ୍କାଳୀନ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସାମ୍ନାରେ ପ୍ରଧାନମନ୍ତ୍ରୀ ପଦ ଗ୍ରହଣ କରିବାର ପ୍ରସ୍ତାବ ଆସିଥିଲା। ହେଲେ ଏହି ପଦକୁ ନେଇ ସୋନିଆଙ୍କ ମନରେ ଦ୍ୱନ୍ଦ୍ୱ ରହିଥିଲା। ଏପରିକି ଏହି ନିଷ୍ପତ୍ତିକୁ ନେଇ ପରିବାର ମଧ୍ୟରେ ଭାବପ୍ରବଣ ଆଲୋଚନା ହୋଇଥିଲା।

ସୋନିଆ ଗାନ୍ଧୀଙ୍କ ପୁସ୍ତକ 'Belonging: A Journey of Love'ରେ ଏହି ଘଟଣା ସମ୍ପର୍କରେ ଅନେକ ରୋଚକ ତଥ୍ୟ ସ୍ଥାନ ପାଇଛି। ପୁସ୍ତକରେ ସେ ଉଲ୍ଲେଖ କରିଛନ୍ତି ଯେ, ନିର୍ବାଚନ ଫଳାଫଳ ଆସିବା ପୂର୍ବରୁ ହିଁ ସେ ନିଜ ପିଲା ରାହୁଲ ଓ ପ୍ରିୟଙ୍କାଙ୍କ ସହ ଏହି ପ୍ରସଙ୍ଗରେ କଥା ହୋଇଥିଲେ।

ସେତେବେଳେ ତାଙ୍କ ପିଲାମାନେ ପଚାରିଥିଲେ ଯେ, ୟୁପିଏ ନିର୍ବାଚନ ଜିତିଲେ ସେ କ'ଣ ପ୍ରଧାନମନ୍ତ୍ରୀ ହେବେ? ଏହାର ଉତ୍ତରରେ ସୋନିଆ ସ୍ପଷ୍ଟ ଭାବେ ମନା କରିଦେଇଥିଲେ। ତାଙ୍କ କହିବା ଅନୁସାରେ, ସେତେବେଳେ ଏହି ପଦ ଗ୍ରହଣ କରିବା ନେଇ ତାଙ୍କର କୌଣସି ଇଚ୍ଛା ନଥିଲା। ପୁଣିଥରେ ରାହୁଲ ଓ ପ୍ରିୟଙ୍କା ନିଷ୍ପତ୍ତି ବିଷୟରେ ନିଶ୍ଚିତ ହେବାକୁ ପଚାରିଥିଲେ ମଧ୍ୟ ସୋନିଆ ନିଜ ମତରେ ଅଟଳ ରହିଥିଲେ।

ସହଯୋଗୀଙ୍କ ଚାପରେ ବଦଳିଥିଲା ନିଷ୍ପତ୍ତି

ନିର୍ବାଚନରେ ୟୁପିଏର ବିଜୟ ପରେ ପରିସ୍ଥିତି ବଦଳିଯାଇଥିଲା। ୧୦ ଜନପଥସ୍ଥିତ ବାସଭବନରେ ଦଳୀୟ ନେତା ଓ ସହଯୋଗୀଙ୍କ ସହ ହୋଇଥିବା ବୈଠକରେ ସୋନିଆଙ୍କୁ ପ୍ରଧାନମନ୍ତ୍ରୀ ପଦ ଗ୍ରହଣ କରିବାକୁ ବାରମ୍ବାର ଅନୁରୋଧ କରାଯାଇଥିଲା। ନେତାମାନଙ୍କ ଚାପ ଏତେ ବଢ଼ିଥିଲା ଯେ, ଶେଷରେ ସେ ଅନିଚ୍ଛା ସତ୍ତ୍ୱେ ଧୀର ସ୍ୱରରେ ସମ୍ମତି ଜଣାଇଥିଲେ।

ହେଲେ ଏହି ଖବର ପରିବାର ମଧ୍ୟରେ ନୂଆ ଭାବପ୍ରବଣ ପରିସ୍ଥିତି ସୃଷ୍ଟି କରିଥିଲା। ବୈଠକ କକ୍ଷ ବାହାରେ ଅପେକ୍ଷା କରିଥିବା ପ୍ରିୟଙ୍କା ମାଆଙ୍କ ସମ୍ମତି ବିଷୟରେ ଜାଣିବା ପରେ ଭାଙ୍ଗି ପଡ଼ିଥିଲେ। ସେ କାନ୍ଦି କାନ୍ଦି ରାହୁଲଙ୍କୁ ଖୋଜି ତାଙ୍କ ପାଖରେ ପହଞ୍ଚିଥିଲେ।

ମାଆଙ୍କ ନିଷ୍ପତ୍ତିରେ ଖୁସି ନଥିଲେ ରାହୁଲ

ସେହି ସମୟରେ ରାହୁଲ ନିଜ କୋଠରୀରେ ଥିଲେ। ପ୍ରିୟଙ୍କାଙ୍କଠାରୁ ମାଆଙ୍କ ନିଷ୍ପତ୍ତି ଶୁଣିବା ପରେ ଦୁହେଁ ଚିନ୍ତିତ ହୋଇ ସୋନିଆଙ୍କ ପାଖକୁ ଯାଇଥିଲେ। ସୋନିଆ ନିଜ ଉପରେ ନେତାମାନଙ୍କ ଚାପ ଥିବା କଥା ପୁଅ ରାହୁଲଙ୍କୁ ବୁଝାଇଥିଲେ। କିନ୍ତୁ ରାହୁଲ ଏହାକୁ ସହଜରେ ଗ୍ରହଣ କରିପାରିନଥିଲେ।

ମାଆଙ୍କ ନିଷ୍ପତ୍ତି ଯୋଗୁଁ ପରିବାର ଉପରେ କ'ଣ ପ୍ରଭାବ ପଡ଼ିବ, ସେନେଇ ସେ ଚିନ୍ତା ପ୍ରକାଶ କରିଥିଲେ। ଅନ୍ୟପଟେ ପ୍ରିୟଙ୍କା ମଧ୍ୟ ମାଆଙ୍କୁ ନିଜ ଇଚ୍ଛା ବିରୋଧରେ କୌଣସି ପଦ ଗ୍ରହଣ ନକରିବାକୁ ଅନୁରୋଧ କରିଥିଲେ।

କିଛି ଘଣ୍ଟା ପରେ ରାହୁଲଙ୍କୁ ଜଣାଇଲେ ଅନ୍ତିମ ନିଷ୍ପତ୍ତି

ଏହି ଘଟଣାର କିଛି ଘଣ୍ଟା ପରେ ସୋନିଆ ରାହୁଲଙ୍କ କୋଠରୀକୁ ଯାଇଥିଲେ। ସେଠାରେ ସେ ପୁଅଙ୍କୁ ନିଜର ଅନ୍ତିମ ନିଷ୍ପତ୍ତି ଜଣାଇଥିଲେ। ସୋନିଆ କହିଥିଲେ ଯେ, ସେ ଆଉ ପ୍ରଧାନମନ୍ତ୍ରୀ ପଦ ଗ୍ରହଣ କରିବେ ନାହିଁ ଏବଂ ପୂର୍ବ ନିଷ୍ପତ୍ତିରେ ଅଟଳ ରହିବେ। ମାଆଙ୍କ ଏହି କଥା ଶୁଣିବା ପରେ ରାହୁଲ ତାଙ୍କୁ ଆଲିଙ୍ଗନ କରିଥିଲେ। ମାଆଙ୍କ ନିଷ୍ପତ୍ତିକୁ ସେ ଠିକ୍ ବୋଲି କହିଥିଲେ।

ଶେଷରେ ୨୦୦୪ରେ ସୋନିଆ ଗାନ୍ଧୀ ପ୍ରଧାନମନ୍ତ୍ରୀ ପଦ ଗ୍ରହଣ ନକରିବାର ନିଷ୍ପତ୍ତି ନେଇଥିଲେ। ପରବର୍ତ୍ତୀ ସମୟରେ ଡ. ମନମୋହନ ସିଂହ ୟୁପିଏ ସରକାରର ପ୍ରଧାନମନ୍ତ୍ରୀ ହୋଇଥିଲେ। ଭାରତୀୟ ରାଜନୀତିର ଏହି ଘଟଣା ସୋନିଆ ଗାନ୍ଧୀଙ୍କ ବ୍ୟକ୍ତିଗତ ନିଷ୍ପତ୍ତି ଓ ପାରିବାରିକ ଭାବନାର ଏକ ଚର୍ଚ୍ଚିତ ଅଧ୍ୟାୟ ହୋଇ ରହିଛି।

ନୂଆଦିଲ୍ଲୀ: ଦୀର୍ଘ ୧୬ ବର୍ଷ ଧରି ଲୁଚାଇ ରଖିଥିଲେ ନିଜ ଜୀବନର ସବୁଠାରୁ ବଡ଼ ସଂଘର୍ଷ। ନିଜ ରୋଗ, ଯନ୍ତ୍ରଣା ଓ ମୃତ୍ୟୁଭୟ ବିଷୟରେ ଏବେ ମୁହଁ ଖୋଲିଛନ୍ତି କଂଗ୍ରେସର ପୂର୍ବତନ ଅଧ୍ୟକ୍ଷା ସୋନିଆ ଗାନ୍ଧୀ। ତାଙ୍କ ଆତ୍ମଜୀବନୀ ‘Belonging: A Journey of Love’ରେ ପ୍ରଥମ ଥର ପାଇଁ ୨୦୧୦ରେ ସ୍ତନ କର୍କଟ (ବ୍ରେଷ୍ଟ କ୍ୟାନସର) ରୋଗରେ ପୀଡ଼ିତ ହୋଇଥିବା କଥା ସାମ୍ନାକୁ ଆଣିଛନ୍ତି। ଏପରିକି ପରବର୍ତ୍ତୀ ସମୟରେ ଅଗ୍ନାଶୟ (ପାନକ୍ରିୟାସ୍)ରେ ମଧ୍ୟ ଟ୍ୟୁମର ଚିହ୍ନଟ ହୋଇଥିବା ନେଇ ସେ ଲେଖିଛନ୍ତି। ଏହି ଦୁଇଟି ରୋଗ ସହ ଲଢ଼ିବା ପାଇଁ ତାଙ୍କୁ ବିଦେଶରେ ଦୁଇଟି ବଡ଼ ଅସ୍ତ୍ରୋପଚାର କରାଇବାକୁ ପଡ଼ିଥିଲା।

୨୦୧୦ରେ ଚିହ୍ନଟ ହୋଇଥିଲା ବ୍ରେଷ୍ଟ କ୍ୟାନସର

ସୋନିଆଙ୍କ ଲେଖା ଅନୁସାରେ, ୨୦୧୦ରେ ତାଙ୍କ ଶରୀରରେ ପ୍ରଥମେ କର୍କଟ ରୋଗ ଚିହ୍ନଟ ହୋଇଥିଲା। ଏହି ଖବର ତାଙ୍କୁ ଭିତରୁ ଦୋହଲାଇ ଦେଇଥିଲା। ଡାକ୍ତରମାନେ ତାଙ୍କୁ ଏବଂ ତାଙ୍କ ପିଲାମାନଙ୍କୁ ତୁରନ୍ତ ଚିକିତ୍ସା ଆରମ୍ଭ କରିବାକୁ କହିଥିଲେ। ଦିଲ୍ଲୀର ସାର୍ ଗଙ୍ଗାରାମ ହସ୍ପିଟାଲର ଡାକ୍ତରଙ୍କ ଉପରେ ତାଙ୍କର ପୂର୍ଣ୍ଣ ଭରସା ଥିଲେ ମଧ୍ୟ ଭାରତରେ ଅସ୍ତ୍ରୋପଚାର କଲେ ଗଣମାଧ୍ୟମରେ ଅତ୍ୟଧିକ ଚର୍ଚ୍ଚା ହେବାର ଆଶଙ୍କା ତାଙ୍କୁ ଚିନ୍ତିତ କରିଥିଲା।

ଏହି କାରଣରୁ ସେ ବିଦେଶରେ ଚିକିତ୍ସା କରାଇବାକୁ ନିଷ୍ପତ୍ତି ନେଇଥିଲେ। ଇଟାଲୀର ମିଲାନ ସହରରେ ବିଶିଷ୍ଟ କର୍କଟ ରୋଗ ବିଶେଷଜ୍ଞ ଡାକ୍ତର ଭେରୋନେସି ତାଙ୍କର ପ୍ରଥମ ଅସ୍ତ୍ରୋପଚାର କରିଥିଲେ। ଅପରେସନ ପରେ ଡାକ୍ତର ତାଙ୍କୁ ସବୁକିଛି ଠିକ୍ ଥିବା ଏବଂ ଶରୀରରେ କୌଣସି ରୋଗାକ୍ରାନ୍ତ ଅଂଶ ବାକି ନଥିବା କହିଥିଲେ। ଦୁଇଟି ଟ୍ୟୁମର ବାହାର କରାଯିବା ସହ ରେଡିଏସନ୍ ଚିକିତ୍ସାର ଏକ ବିଶେଷ ପଦ୍ଧତି ମଧ୍ୟ ଅବଲମ୍ବନ କରାଯାଇଥିଲା। ଫଳରେ ତାଙ୍କୁ ପାଞ୍ଚ ସପ୍ତାହର ରେଡିଓଥେରାପିରୁ ମୁକ୍ତି ମିଳିଥିଲା।

ବର୍ଷକ ପରେ ପୁଣି ବଢ଼ିଲା ଚିନ୍ତା, ପାନକ୍ରିୟାସ୍‌ରେ ଟ୍ୟୁମର

ପ୍ରଥମ ଅସ୍ତ୍ରୋପଚାରର ମାତ୍ର ଗୋଟିଏ ବର୍ଷ ପରେ, ଅର୍ଥାତ୍ ୨୦୧୧ରେ ନିୟମିତ ସ୍ୱାସ୍ଥ୍ୟ ପରୀକ୍ଷା ସମୟରେ ତାଙ୍କ ଅଗ୍ନାଶୟରେ ଏକ ଟ୍ୟୁମର ଚିହ୍ନଟ ହୋଇଥିଲା। ଏହି ଖବର ତାଙ୍କ ସହ ପରିବାରକୁ ମଧ୍ୟ ଚିନ୍ତାରେ ପକାଇ ଦେଇଥିଲା। ପୂର୍ବରୁ ହୋଇଥିବା କର୍କଟ ରୋଗ ପୁଣି ଫେରିଆସିଛି କି ବୋଲି ସୋନିଆ ଓ ତାଙ୍କ ପିଲାମାନେ ଭୟ କରିଥିଲେ।

ଏକାଧିକ ଡାକ୍ତରଙ୍କ ସହ ପରାମର୍ଶ ପରେ ତୁରନ୍ତ ଅସ୍ତ୍ରୋପଚାର କରିବାକୁ ପରାମର୍ଶ ମିଳିଥିଲା। ଅପରେସନ ପୂର୍ବରୁ ରୋଗର ପ୍ରକୃତ ସ୍ଥିତି ଜଣାପଡ଼ିବ ନାହିଁ ବୋଲି ଡାକ୍ତରମାନେ କହିଥିଲେ। ଏହା ସୋନିଆଙ୍କ ମନରେ ମୃତ୍ୟୁଭୟ ସୃଷ୍ଟି କରିଥିଲା। ରୋଗ ଯଦି ଶରୀରର ଅନ୍ୟ ଅଂଶକୁ ବ୍ୟାପିଥାଏ, ତେବେ ସେ ବଞ୍ଚିପାରିବେ କି ନାହିଁ ବୋଲି ଚିନ୍ତା କରୁଥିଲେ।

ନେଦରଲ୍ୟାଣ୍ଡରେ ହେଲା ଦ୍ୱିତୀୟ ଅସ୍ତ୍ରୋପଚାର

ଏହାପରେ ନେଦରଲ୍ୟାଣ୍ଡର ରୋଟରଡାମ୍‌ରେ ଡାକ୍ତର କାସ୍ପର ଭାନ୍ ଏଜ୍କଙ୍କ ତତ୍ତ୍ୱାବଧାନରେ ତାଙ୍କର ଦ୍ୱିତୀୟ ଅସ୍ତ୍ରୋପଚାର ହୋଇଥିଲା। ଅପରେସନ ପରେ ଡାକ୍ତର ତାଙ୍କୁ ଆଶ୍ୱସ୍ତ କରିଥିଲେ ଯେ, ଟ୍ୟୁମରଟି ପ୍ରାରମ୍ଭିକ ଅବସ୍ଥାରେ ଚିହ୍ନଟ ହୋଇଥିବାରୁ ସେ ଭାଗ୍ୟବାନ। ଏହା ଶୀଘ୍ର ଧରାପଡ଼ିବା ତାଙ୍କ ପାଇଁ ବଡ଼ ଆଶ୍ୱସ୍ତି ଥିଲା।

ଏହି ଅସ୍ତ୍ରୋପଚାର ପରେ ସୋନିଆଙ୍କୁ ହସ୍ପିଟାଲରେ ଚାରି ସପ୍ତାହ ରହିବାକୁ ପଡ଼ିଥିଲା। ଏହି କଠିନ ସମୟରେ ତାଙ୍କ ଝିଅ ପ୍ରିୟଙ୍କା ଅଧିକାଂଶ ସମୟ ତାଙ୍କ ପାଖରେ ରହିଥିଲେ। ଦୀର୍ଘ ଅସ୍ତ୍ରୋପଚାର ପରେ ସେ ଶାରୀରିକ ଭାବେ ଦୁର୍ବଳ ହୋଇପଡ଼ିଥିଲେ ମଧ୍ୟ ଦୁଇଥର ଯାକ କେମୋଥେରାପି ନେବାକୁ ପଡ଼ିନଥିବାରୁ ନିଜକୁ ଭାଗ୍ୟବାନ ମନେ କରିଥିଲେ।

ଅଧିକ ପଢନ୍ତୁ- ପ୍ରଧାନମନ୍ତ୍ରୀ ଚୌକି ଛାଡ଼ିବା ପଛରେ କ’ଣ ଥିଲା କାରଣ? ସୋନିଆଙ୍କ ବହିରେ ଭାବପ୍ରବଣ ଖୁଲାସା

‘ମୁଁ କ'ଣ ନିଜ ପାଇଁ ଟିକିଏ ଗୋପନୀୟତା ପାଇପାରିବିନି?’

ନିଜ ରୋଗ ବିଷୟରେ ଲେଖିବା ସମୟରେ ସୋନିଆ ଗାନ୍ଧୀ ବ୍ୟକ୍ତିଗତ ଗୋପନୀୟତାର ଅଧିକାରକୁ ନେଇ ମଧ୍ୟ ପ୍ରଶ୍ନ ଉଠାଇଛନ୍ତି। ଜଣେ ସାର୍ବଜନୀନ ବ୍ୟକ୍ତିତ୍ୱ ହୋଇଥିଲେ ମଧ୍ୟ ତାଙ୍କର ବ୍ୟକ୍ତିଗତ ଜୀବନ ଓ ସ୍ୱାସ୍ଥ୍ୟକୁ ଗୋପନ ରଖିବାର ଅଧିକାର ରହିଛି ବୋଲି ସେ ମତ ଦେଇଛନ୍ତି।

ଏହି ଆତ୍ମଜୀବନୀରେ ସୋନିଆଙ୍କ ରାଜନୈତିକ ଜୀବନ ସହ ତାଙ୍କର ବ୍ୟକ୍ତିଗତ ସଂଘର୍ଷର ଏକ ଅଜଣା ଅଧ୍ୟାୟ ସାମ୍ନାକୁ ଆସିଛି। ଦୀର୍ଘ ବର୍ଷ ଧରି ଗୋପନ ରହିଥିବା ଏହି ସ୍ୱାସ୍ଥ୍ୟ ସମ୍ପର୍କିତ ଖୁଲାସା ଏବେ ଚର୍ଚ୍ଚାର ବିଷୟ ପାଲଟିଛି।