କ୍ଷମତାଶାଳୀ ମନ୍ତ୍ରୀ ପ୍ରତାପ ଜେନାଙ୍କୁ ଏବେ ମାହାଙ୍ଗା ଅଡୁଆ  । ନିଜ ନିର୍ବାଚନମଣ୍ଡଳୀରେ କଡା ବିରୋଧର ସାମ୍ନା କରୁଛନ୍ତି ସୂଚନା ଓ ଲୋକସମ୍ପର୍କ ମନ୍ତ୍ରୀ ଶ୍ରୀ ଜେନା  । ଆଗକୁ ସାଧାରଣ ନିର୍ବାଚନ ସେପଟେ ନିର୍ବାଚନମଣ୍ଡଳୀରେ ନେତାଙ୍କ ଖୋଲାଖୋଲି ବିରୋଧ  । ଏପରି ସ୍ଥିତିରେ ସୁରକ୍ଷିତ ସ୍ଥାନ ଖୋଜୁଛନ୍ତି ଶ୍ରୀ ଜେନା  । ଏପରିକି ଏଥର ସେ ବିଧାନସଭା କ୍ଷେତ୍ରରେ ନଲଢି ଲୋକସଭା କ୍ଷେତ୍ରରେ ଲଢିବା ପାଇଁ ପ୍ରକ୍ରିୟା ଆରମ୍ଭ କରିଛନ୍ତି  । ତାଙ୍କର ଏହି ସ୍ୱପ୍ନକୁ ଚରିତାର୍ଥ କରିବା ପାଇଁ ସେ ଜଣେ ଅଣଓଡିଆ ଅଫିସରଙ୍କ ନିକଟରେ ଅଧିଆ ପଡିଥିବା କଥା ଏବେ ବିଜେଡି ମହଲରେ ଆଲୋଚନା ହେଉଛି  । ଏପରିକି ବୈଜୟନ୍ତ ବିଜେଡି ଛାଡିବା ପରେ ଏବେ କେନ୍ଦ୍ରାପଡା ଲୋକସଭା ଆସନ ଉପରେ ନଜର ରଖିଛନ୍ତି ମନ୍ତ୍ରୀ ଶ୍ରୀ ଜେନା  । ଏଥିପାଇଁ ସେ ଏବେ ତୃତୀୟ ମହଲାର କ୍ଷମତାଶାଳୀ ବାବୁଙ୍କୁ ମନାଇବା ପାଇଁ  ଲାଗିପଡିଥିବା କଥା ପାୱାର କରିଡରରେ ଚର୍ଚ୍ଚା ଜୋର ଧରିଛି  ।

ବିଶେଷ କରି ପ୍ରତାପଙ୍କ ଦାଦାଗିରି ଓ ଗୁଣ୍ଡାଗିରି ତାଙ୍କ ପାଇଁ ମହଙ୍ଗା ପଡିବ ବୋଲି ଏବେ ମାହାଙ୍ଗା ଅଞ୍ଚଳରେ ଆଲୋଚନାର ବିଷୟ ପାଲଟିଛି  । ନିକଟରେ ବୈଜୟନ୍ତ ପଣ୍ଡାଙ୍କ ଉପରେ ଆକ୍ରମଣ ଘଟଣାରେ ଚର୍ଚ୍ଚାକୁ ମଧ୍ୟ ଆସିଥିଲେ ଶ୍ରୀ ଜେନା  । ଏହି ଘଟଣା ପରେ ମାହାଙ୍ଗାରେ ଦିନକୁ ଦିନ ତାଙ୍କର ଲୋକପ୍ରିୟତା କମିବାରେ ଲାଗିଥିବା ଦେଖିବାକୁ ମିଳିଛି  । ଅନ୍ୟପଟେ ସେ ଅଞ୍ଚଳରେ ବିଜେପି ଦିନକୁ ଦିନ ଶକ୍ତିଶାଳୀ ହେଉଥିବା ବେଳେ ଅନ୍ୟପଟେ କଂଗ୍ରେସ ମଧ୍ୟ ତାର ସଙ୍ଗଠନ ସଜାଡିବାରେ ଲାଗିଛି । ଏହାକୁ ଦେଖି ମନ୍ତ୍ରୀ ଶ୍ରୀ ଜେନାଙ୍କ ଶିବିରରେ ଏକପ୍ରକାର ଛନକା ଖେଳାଇ ଦେଇଛି  । ସେଥିପାଇଁ ମାହାଙ୍ଗା ଛାଡିବା ପାଇଁ ଶ୍ରୀ ଜେନା ଯୋଜନା କରିଥିବା କଥା ଏବେ ତାଙ୍କର ସମର୍ଥକ ମାନେ କହି ବୁଲୁଥିବା ଶୁଣିବାକୁ ମିଳୁଛି  । ତେବେ ମାହାଙ୍ଗା ଛାଡିଲେ କେନ୍ଦ୍ରାପଡା ଲୋକସଭା ଆସନରେ ଲଢିବେ ନା ଅନ୍ୟ କେଉଁଠିକୁ ଯିବେ ଏହା ଉପରେ ଏବେ ରହିଛି ସମସ୍ତଙ୍କ ନଜର  ।

 ବୁଡିଗଲାଣୀ ନେତାଙ୍କ ଭାବମୂର୍ତି  । ନେତାଙ୍କ ଧଳା କୂର୍ତ୍ତାରେ ଲାଗିଛି କଳାଛିଟା  । ମୁଣ୍ଡ ଉପରେ ନିର୍ବାଚନ  । ଏହାକୁ ନେଇ ଏବେ ଚିନ୍ତାରେ ପଡିଯାଇଛି ବିଜେଡି ମୁଖିଆ । କ୍ରମାଗତ ଭାବେ ଚତୁର୍ଥ ଥର ମୁଖ୍ୟମନ୍ତ୍ରୀ ହୋଇଥିବା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଆଖିରୁ ଏକପ୍ରକାର ନିଦ ହଜିଯାଇଛି । ଏପରି ସ୍ଥିତି ଅନ୍ୟଦଳରୁ ନେତା ଆମଦାନୀ କରିବା ପାଇଁ ଦଳ ଦଳ ପକ୍ଷରୁ ବ୍ଲୁପ୍ରିଣ୍ଟ ପ୍ରସ୍ତୁତ କରାଯାଇଛି  । ଏଥିପାଇଁ ତୃତୀୟ ମହଲାରେ ଏବେ ଠାରୁ ମିଶାଣ-ଫେଡାଣ କାର୍ଯ୍ୟକ୍ରମ ଆରମ୍ଭ ହୋଇଯାଇଛି  । ତୃତୀୟ ମହଲାର ଜଣେ ଅଣଓଡିଆ ଆଇଏଏସ ଓ ଆଉ ଜଣେ ଆଇପିଏସ ଅଫସର ଏବେ ନେତାଙ୍କ ଆମଦାନୀ କାର୍ଯ୍ୟକ୍ରମରେ ଲାଗିଥିବା ବେଳେ ତାଙ୍କୁ ସହାୟତା ପାଇଁ ଲାଗିଛନ୍ତି ନିକଟରେ ମନ୍ତ୍ରୀପଦରୁ ତଡା ଖାଇଥିବା କିଛି ବିଧାୟକ । ସେମାନେ ବିଜେଡିର ସୁରକ୍ଷା ପାଇଁ ଅନ୍ୟଦଳରୁ ନେତା ଉଠାଇବା କାମରେ ଲାଗିପଡିଥିବା ନେଇ ଦଳ ଭିତରେ ଚର୍ଚ୍ଚା ଆଲୋଚନା ଆରମ୍ଭ ହୋଇଯାଇଛି  ।

ରାଜ୍ୟରେ ହୋଇଥିବା ଖଣି ମହାଦୁର୍ନୀତି, ଚିଟଫଣ୍ଡ ମହାଦୁର୍ନୀତି, ଜମି ଦୁର୍ନୀତି ଠାରୁ ଆରମ୍ଭ କରି ଗ୍ୟାଙ୍ଗଷ୍ଟାର ମାନଙ୍କ ସହ ନେତାମାନଙ୍କର ରହିଥିବା ଲିଙ୍କ୍ ଅଭିଯୋଗ ବିଜେଡିର ଗଣ୍ଡାଗଣ୍ଡା ବିଧାୟକ ଓ ସାଂସଦ ଏବଂ ମନ୍ତ୍ରୀମାନଙ୍କ ନାମରେ ଅଭିଯୋଗ ଆସିଛି  । ବ୍ଲାକରୋଜ ଜାହଜ ବୁଡି ଠାରୁ ଆରମ୍ଭ କରି ଚିଟଫଣ୍ଡ ଦୁର୍ନୀତି ବିଜେଡି ପାଇଁ ଅଡୁଆ ପରିସ୍ଥିତି ସୃଷ୍ଟି କରିଛି  । ବିଶେଷ କରି ଚିଟଫଣ୍ଡ ଦୁର୍ନୀତିରେ ଦଳର ଏକାଧିକ ନେତା ଜେଲ୍ ଯିବା ସହ ବେଲ୍ ରେ ଆସିଛନ୍ତି  । ଏହି ନେତାମାନଙ୍କ ବିରୋଧରେ ତୃଣମୂଳ ସ୍ତରରେ ଅସନ୍ତୋଷ ଲାଗି ରହିଛି  । ତେଣୁ ଏପରି ଦୁର୍ନୀତି ଓ କଳାଛିଟା ଲାଗିଥିବା ନେତାମାନଙ୍କୁ ନେଇ ନିର୍ବାଚନ ଲଢିବା ଏବେ ଦଳ ପାଇଁ କାଠିକର ପାଠ ହୋଇପଡିଛି  । ତେଣୁ ଏପରି ସ୍ଥିତିରେ ଅନ୍ୟ ଦଳରୁ ନେତା ଆମଦାନୀ ପାଇଁ ଲାଗିପଡିଛନ୍ତି ତୃତୀୟ ମହଲାରେ ଦବଦବା ରହିଥିବା କିଛି ଅଫିସର ଓ ନେତା  । ଏପରି ଚର୍ଚ୍ଚା ଏବେ ପାୱାର କରିଡରରେ ଜୋର ଧରିଛି  । ଏଥିପାଇଁ ତୃତୀୟ ମହଲାରେ ସାକ୍ଷାତକାର ଆରମ୍ଭ ହୋଇଥିବା କଥା ଦଳୀୟ ମହଲରେ ଆଲୋଚନାର ବିଷୟ ସାଜିଛି  ।

ବିଜେଡି ରାଜନୀତିରେ ଏବେ ଘଡିକେ ଘୋଡା ଛୁଟିବାରେ ଲାଗିଛି  । କେତେବେଳେ ଦଳରେ କାହାର  କ୍ଷମତାକୁ ବଢାଇ ଦିଆଯାଉଛି ତ ଆଉ କେତେବେଳେ ପକ୍ଷଛେଦନ କରାଯାଉଛି  । ଏହି କ୍ରମରେ ବିବାଦୀୟ ବୟାନ୍ ଦେଇ ଅଡୁଆରେ ପଡିଯାଇଛନ୍ତି କଂଗ୍ରେସ ଛାଡି ବିଜେଡିରେ ଯୋଗଦେଇ ମୁଖପାତ୍ର ହୋଇଥିବା ସୁଲୋଚନା ଦାସ  । ଦଳର ଏକ କାର୍ଯ୍ୟକ୍ରମରେ ଉଦବୋଧନ ଦେଉଥିବା ବେଳେ ସେ ଯେପରି ଭାବେ ବୟାନ ଦେଇଥିଲେ ତାହା ସୋସିଆଲ୍ ମିଡିଆରେ ଭାଇରାଲ୍ ହେବାପରେ ଦଳ ତାଙ୍କ ଉପରେ ଏକପ୍ରକାର ଖପ୍ପା ହୋଇଛି  । ଏପରିକି ତାଙ୍କୁ ଦଳରେ ଗୁରୁତ୍ୱକୁ କମାଇଦେବା ସହ ଏହି ସ୍ଥାନରେ ସୁଲତା ଦେଓଙ୍କ ଦବଦବା ସୃଷ୍ଟି କରାଯାଇଥିବା କଥା ଦଳୀୟ ମହଲରେ ଚର୍ଚ୍ଚା ହେଉଛି  ।

ନିର୍ବାଚନ ଆଉ ମାତ୍ର କେତେଦିନ ବାକି ଥିବା ବେଳେ ଏଭଳି ସ୍ଥିତି ସୁଲୋଚନାଙ୍କ ପାଇଁ ଅଡୁଆ ପରିସ୍ଥିତି ସୃଷ୍ଟି କରିଛି  । ଦଳର ଦୁଇ ମୁଖପାତ୍ର ସୁଲୋଚନା ଓ ସୁଲତା ଉଭୟ ଯାଜପୁର ଜିଲ୍ଲା ବରୀ ନିର୍ବାଚନମଣ୍ଡଳୀରୁ ବିଜେଡିର ଟିକେଟ୍ ପାଇବା ପାଇଁ ଦାବିଦାର ରହିଥିବା କୁହାଯାଉଥିବା ବେଳେ ସୁଲୋଚନାଙ୍କ ବିବାଦୀୟ ବୟାନ ଏବେ ଦଳରେ ତାଙ୍କୁ ଏକପ୍ରକାର କୋଣଠେସା କରିଦେଇଛି । ଏପରିକି ସେ କଂଗ୍ରେସରେ ଥିବା ହେତୁ ତାଙ୍କର କଂଗ୍ରେସ ଚିନ୍ତାଧାରା ମନରୁ ଯାଇନି ବୋଲି ଅଧିକାଂଶ କର୍ମୀମାନେ ପ୍ରକାଶ କରିବାରେ ଲାଗିଛନ୍ତି  । ଏପରିକି ଅଧିକାଂଶ ପ୍ରସଙ୍ଗରେ ସୁଲତାଙ୍କୁ କହିବାକୁ ସୁଯୋଗ ଦିଆଯିବା ସହ ଦଳ ଏବେ ତାଙ୍କ ଉପରେ ଭରଷା ରଖିଥିବା କର୍ମୀଙ୍କ ମହଲରେ ଆଲୋଚନା ହେଉଛି  ।

ଦେଶ  ହେଉ କି ରାଜ୍ୟ ଆଜି ସବୁଠୁ ଚାଲିଛି ଭୋଟ୍ ସର୍ବସ୍ଵ ରାଜନୀତି। ବିକାଶ ବରଂ ଚୁଲିକୁ ଯାଉ ଆମର ସିଟ୍ ଖଣ୍ଡିକ ବଞ୍ଚିଥାଉ, ଆମର ଗାଦି ରହୁ ଏବଂ କ୍ଷମତା ଉପଭୋଗ କରୁ। ଖାସ୍ କରି ଏହି ନୀତି ଓଡ଼ିଶାରେ ଆପଣେଇଛି ବିଜୁ ଜନତା ଦଳ। ରାଜ୍ୟରେ ଦୀର୍ଘ ୧୯ ବର୍ଷ ନିରଙ୍କୁଶ ଶାସନ କରି ଆସୁଥିବା ନବୀନ ସରକାର ୨୦୧୯ ନିର୍ବାଚନ ଜିତି ପୁଣି ଥରେ କ୍ଷମତା ଉପଭୋଗ କରିବା ପାଇଁ ଆରମ୍ଭ କରି ଦେଇଛନ୍ତି ଚକ୍ରାନ୍ତ। ରାଜ୍ୟ ସରକାର ନିଜର ସମ୍ବଳ ଓ  ରୋଜଗାର ଅନୁସାରେ  ଯୋଜନା ନକରି ଭୋଟ୍ ଲୋଭରେ ଅସୁମାରୀ ଲୋକ ଦେଖାଣିଆ କାର୍ଯ୍ୟକ୍ରମ ହାତକୁ ନେଇ ଥିବାରୁ ରାଜ୍ୟର ଆର୍ଥିକ ସ୍ଥିତି ଏବେ ଉଦବେଗଜନକ ରହିଛି। ଆମ ରାଜ୍ୟର ଋଣ ବୋଝଭାରକୁ ଦେଖିଲେ ଏହା ମନକୁ ଆସିବା ସ୍ଵାଭାବିକ। 

୨୦୦୧ରୁ  ଆଜି ପର୍ୟ୍ୟନନ୍ତ ଦୀର୍ଘ ୧୮ ବର୍ଷ ମଧ୍ୟରେ ଓଡ଼ିଶାର ଋଣଭାର ୬୨ ପ୍ରତିଶତ ବୃଦ୍ଧି ପାଇଛି। ଚଳିତ ଆର୍ଥିକ ବର୍ଷରେ ଏହି ବୋଝଭାର  ୯୧, ୯୪୩ କୋଟି ଟଙ୍କାରେ ପହଞ୍ଚିବ ବୋଲି ସରକାରୀ ତଥ୍ୟରୁ ଜଣା ପଡିଛି। ଗୋଟିଏ ସରକାର ଦୀର୍ଘ ୧୯ ବର୍ଷ ନିରବଚ୍ଛିନ୍ନ ଭାବେ କ୍ଷମତାରେ ଥିଲେ ମଧ୍ୟ ଏହି ପରି ଋଣ ବୋଝଭାର ବଢି ବଢି ଚାଲିବା ନିଶ୍ଚିତ ରୂପେ ଚିନ୍ତାଜନକ ବିଷୟ।  ଏବେ ପ୍ରତ୍ୟେକ ଓଡ଼ିଶାବାସୀଙ୍କ ମୁଣ୍ଡ ପିଛା ଋଣ ୨୧ ହଜାର ଟଙ୍କାରୁ ଅଧିକ ପହଞ୍ଚି ଗଲାଣି। ରାଜକୋଷର  ସ୍ଥିତିକୁ ବିଚାର ନକରି ରାଜ୍ୟ ସରକାର କେବଳ ଭୋଟ୍ ଗୋଟେଇବା ପାଇଁ ରାଜ୍ୟର ଆର୍ଥିକ ସ୍ଥିତିକୁ ଦେବାଳିଆ କରିବାକୁ ମଧ୍ୟ ପଛାଉ ନାହାନ୍ତି। ସମ୍ବଳ ନଥାଇ ନିର୍ବାଚନ ପାଖେଇ ଆସିବାରୁ ମାଳ ମାଳ ଲୋକ ଦେଖାଣିଆ ଯୋଜନା  ଘୋଷଣା କରୁଛନ୍ତି। ଯାହା ରାଜ୍ୟର ଆର୍ଥିକ ସ୍ଥିତି ଉପରେ କୁପ୍ରଭାବ ପଡ଼ୁଛି। 

ଋଣ ଆଣିବା ଅପରାଧ ନୁହେଁ ଏହା ଠିକ୍ କଥା। ସରକାର ଋଣ କରନ୍ତି ଏବଂ ଆର୍ଥିକ ସ୍ଥିତିରେ ସୁଧାର ଆସିଲେ ସରକାର ଉକ୍ତ ଋଣ ପରିଶୋଧ ମଧ୍ୟ କରନ୍ତି। ମାତ୍ର ରାଜ୍ୟ ସରକାର ଲୋକ ଦେଖାଣିଆ ଯୋଜନା ପାଇଁ ଋଣ କରିବା ଦୁର୍ଭାଗ୍ୟର କଥା। କାରଣ ସରକାର ଯେଉଁସବୁ ଯୋଜନା କରୁଛନ୍ତି ସେଥିରେ ରାଜ୍ୟ ସମ୍ବଳର ବୃଦ୍ଧି ଘଟିବ ନାହିଁ। ଅଦୂରଦୃଷ୍ଟି ଓ ଅଣସମ୍ବଳହୀନ ଯୋଜନା କରିବା ଦ୍ଵାରା ଋଣ ପରିଶୋଧ ମଧ୍ୟ ହୋଇ ପାରିବ ନାହିଁ। ଋଣ ସୁଧ ମଧ୍ୟ ଦିନକୁ ଦିନ ବଢି ଚାଲିବ। ରାଜ୍ୟ ସରକାର ଏହା ଉପରେ ଗୁରୁତ୍ଵାରୋପ ନକରି କେବଳ ଭୋଟ୍ ପାଇଁ ମାଳ ମାଳ ଯୋଜନା କରି ଚାଲିଛନ୍ତି। 

ଓଡ଼ିଶାରେ ଯେଉଁ ନୀତଗି ରହିଛି ତଦନୁସାରେ  ନିଜର ମୋଟ୍ ଘରୋଇ ଆୟ(ଜିଡିପି)ର ୨୦ ଶତାଂଶ ମଧ୍ୟରେ  ହିଁ ରାଜ୍ୟ ସରକାର ଋଣ କରି ପାରିବେ।  ମାତ୍ର ତାହା ଏବେ ବୃଦ୍ଧି ପାଇ ୨୩ ଶତାଂଶ ପହଞ୍ଚିଗଲାଣି।  ୨୦୦୧ ହିସାବରେ ଏଥିରେ ୧୧ ଶତାଂଶ ବୃଦ୍ଧି ଘଟିଛି। ଅନ୍ୟ ପଟେ   ଜିଏସଟି ଲାଗୁ ହେବା ପରେ  ରାଜ୍ୟ ସରକାରଙ୍କ ଅତିରିକ୍ତ ସମ୍ବଳ ବାଟ ପ୍ରାୟତଃ ବନ୍ଦ ହୋଇ ଯାଇଛି।  ତେଣୁ ବିଭିନ୍ନ ସୂତ୍ରରୁ  ଯେଉଁ ଅର୍ଥ ଆସୁଛି ତାହାର ସୁବିନିଯୋଗ କରିବା ରାଜ୍ୟ ସରକାରଙ୍କ ପାଇଁ ଜରୁରୀ ଅଟେ।  ମାତ୍ର ଦୂରଦୃଷ୍ଟିର ଅଭାବ ଏବଂ କ୍ଷମତା ଲୋଭରେ ନବୀନ ସରକାର  ଚୂନା ଦେଖି ପିଠା କରିବା ପରିବର୍ତ୍ତେ ଗଣ୍ଡା ଗଣ୍ଡା ଯୋଜନା କରି ଚାଲିଛନ୍ତି। ନିର୍ବାଚନ ଆଗରେ ଥିବାରୁ ଏମିତି କେଉଁ ଦିନ ନାହିଁ  ଯେଉଁଦିନ ଯୋଜନା ଘୋଷଣା କରାଯାଉନି। ରାଜ୍ୟ ସରକାରଙ୍କ କାଳିଆ ଯୋଜନା ହେଉ କି,  ବିଜୁ ସ୍ଵାସ୍ଥ୍ୟ କଲ୍ୟାଣ ଯୋଜନା ହେଉ। ଏମିତି ଯୋଜନା ପାଇଁ ରାଜ୍ୟ ସରକାରଙ୍କ ପାଖରେ ସମ୍ବଳ ନଥିବାରୁ ଋଣ କରିବାକୁ ପଡ଼ୁଛି। ଏଥିରେ କେବଳ ଋଣ ବୋଝଭାର  ବୃଦ୍ଧି ହେଉନି ବରଂ ଏହା ରାଜ୍ୟର ଆର୍ଥିକ ସ୍ଥିତିକୁ ଦେବାଳିଆ ଆଡକୁ ନେଇ ଯାଉଛି।

ଋଣ ଆଣି ପରିଶୋଧ କରିବା କମ ନଜିର ରହିଛି। ଯଦି ଗୋଟିଏ ସରକାର ଏହି ଋଣ ପରିଶୋଧ କରନ୍ତି ନାହିଁ ତେବେ ନୂତନ ଭାବେ କ୍ଷମତାକୁ ଆସୁଥିବା ସରକାର ଏହାର ଚାପଗ୍ରସ୍ତ ହୁଅନ୍ତି। ଫଳରେ ଜନତାଙ୍କ ଉପରେ ଟିକସ୍ ଭାର ଲଦିବାକୁ ସରକାର ପଛାନ୍ତି ନାହିଁ। ଦୁର୍ଭାଗ୍ୟର କଥା ୧୯ ବର୍ଷ ଧରି କ୍ଷମତାରେ ରହିଥିବା ରାଜ୍ୟ ସରକାର ନିର୍ବାଚନୀ ମାଇଲେଜ୍ ପାଇଁ ଅନେକ କ୍ଷେତ୍ରରେ କେନ୍ଦ୍ର ସରକାରଙ୍କ ସହ ପ୍ରତିଯୋଗିତା କରୁଛନ୍ତି। କେନ୍ଦ୍ର ସରକାରଙ୍କ ଯୋଜନାରେ ଆସୁଥିବା ଅର୍ଥକୁ ହଡ଼ପ କରି ନିଜ ନାମରେ କରି ବାହା ବାହା ଲୁଟିବାକୁ ହୀନ ଉଦ୍ୟମ କରୁଛନ୍ତି। ଯେମିତି ଆୟୁଷ୍ମାନ ଯୋଜନା। ଏହି ଯୋଜନାକୁ ରାଜ୍ୟ ସରକାର ଲାଗୁ ନକରି ନିଜସ୍ଵ ବିଜୁ ସ୍ଵାସ୍ଥ୍ୟ କଲ୍ୟାଣ ଯୋଜନା ଲାଗୁ କରିଛନ୍ତି। ଏହା ବାଦ୍ ରାଜ୍ୟ ପ୍ରତି କେନ୍ଦ୍ର ଅବହେଳା ନାରା ଦେଇ ଅଧିକ ଅର୍ଥ ଦାବି କରୁଛନ୍ତି। ଆଉ ଏହି  ଅର୍ଥକୁ ଲୋକଦେଖାଣିଆ ଯୋଜନାରେ ବିନିଯୋଗ ଭୋଟ୍ ସାଉଁଟିବାକୁ ପ୍ରୟାସ ଚଳାଇଛନ୍ତି ନବୀନ ସରକାର। 

ସବୁଠୁ ବଡ଼ ଦୁର୍ଭାଗ୍ୟର କଥା, ଦୀର୍ଘ ୧୯ ବର୍ଷ ଧରି ନିରବଚ୍ଛିନ୍ନ ଭାବେ କ୍ଷମତାରେ ରହିବା ପରେ ସରକାର ରାଜ୍ୟର ଅର୍ଥନୀତିକୁ ସୁଦୃଢ କରିବା ଭଳି ଯୋଜନ ନକରି କେବଳ ଭୋଟ୍ ହାତେଇବା ପଛରେ ଧାଇଁବା ନିଶ୍ଚିତ ରୂପେ ସରକାରଙ୍କ ହୀନ ରାଜନୀତିକୁକ ସୂଚାଉଛି। ଯେମିତି କାଳିଆ  ଯୋଜନା କରି ସରକାର ଏବେ ଜରୁରୀକାଳୀନ ପାଣ୍ଠିର ଅର୍ଥ ଲୁଟ୍ କରିଛନ୍ତି। 

ଋଣ କରିବା ଠିକ୍ କଥା ଏବଂ ସ୍ଵାଗତଯୋଗ୍ୟ। ମାତ୍ର କେବଳ ଲୋକଦେଖାଣିଆ, ଭୋଟ୍ ପାଇଁ ଯୋଜନା କରି ସେଥିରେ ଋଣରେ ଆଣିଥିବା ଅର୍ଥକୁ ବିନିଯୋଗ କଲେ ରାଜ୍ୟର ବିକାଶ ଘଟିବ ନାହିଁ। ତେଣୁ ସରକାରଙ୍କୁ ଏହା ଉପରେ ଗଭୀରତାର ସହ ବିଚାର କରିବା ଉଚିତ୍। 

ରାଜ୍ୟରେ ଦିନକୁ ଦିନ ମହିଳାଙ୍କ ପ୍ରତି ପାଶବିକ ଅତ୍ୟାଚାର ବଢି ଚାଲିଛି। ବିପର୍ଯ୍ୟନ୍ତ କାନୁନ ବ୍ୟବସ୍ଥା ପରୋକ୍ଷ ରୂପେ ଏହି ସବୁ ଘଟଣାକୁ ପ୍ରୋତ୍ସାହନ ଦେଉଛି। ବର୍ଷ ବର୍ଷ  ବିତିଗଲେ  ମଧ୍ୟ ପୀଡ଼ିତାଙ୍କୁ ନ୍ୟାୟ ନମିଳିବା ଏବଂ ଶାସକ ଦଳ ପକ୍ଷରୁ ବଳାତ୍କାରୀଙ୍କୁ ଘଣ୍ଟ ଘଉଡ଼ାଇବା ଯୋଗୁଁ ରାଜ୍ୟରେ ମହିଳା ଅସୁରକ୍ଷିତ ହୋଇପଡ଼ିଲେଣି। ଏହାକୁ ନେଇ ରାଜଧାନୀରେ ବିଜେପି ମହିଳା ମୋର୍ଚ୍ଚାର ଶତାଧିକ କର୍ମୀ ସୋମବାର ବିଶାଳ ବିକ୍ଷୋଭ ପ୍ରଦର୍ଶନ କରି ସଚିବାଳୟରେ ଲାଲଚୁଡି ଦେବାକୁ ଉଦ୍ୟମ କରିଛନ୍ତି। ଏହା ପୂର୍ବରୁ ଲୟର ପିଏମଜି ପୋଲିସ ବଳ ପ୍ରୟୋଗ କରି ରାଲିକୁ ଅଟକାଇଛି। ଏହି ସମୟରେ ମହିଳା କର୍ମୀ ଓ ପୋଲିସ ସମୟରେ ଧସ୍ତାଧସ୍ତି ହୋଇଛି। ପୋଲିସ ଜୋର ଜବରଦସ୍ତ ଟାଣି ଘୋଷାଡ଼ି ମହିଳା କର୍ମୀଙ୍କୁ ବସରେ ଭର୍ତ୍ତି କରିଛି। ଏହା ଠିକ୍ କଥା ଯେ ସଚିବାଳୟ ଘେରାଉ କରିବାକୁ ଉଦ୍ୟମ କରୁଥିବା ମହିଳା ପ୍ରଦର୍ଶନକାରୀଙ୍କୁ ଅଟକାଇବା ପୋଲିସର କାମ। ପୋଲିସ ଏହା ଭୁଲିବା ଉଚିତ୍ ନୁହେଁ ଯେ  ମହିଳାଙ୍କୁ ସୁରକ୍ଷା ଦେବା ସେମାନଙ୍କର ପ୍ରଥମ କାମ। 

ଏଠାରେ ପ୍ରଶ୍ନ ମଧ୍ୟ ଉଠୁଛି ଯେ ସଚିବାଳୟ ଘେରାଉ କରିବା ପର୍ଯ୍ୟନ୍ତ କଥା କଣ ପାଇଁ ଯାଉଛି ? ରାଜ୍ୟରେ ଏବେ ଦେଖିବାକୁ ମିଳୁଛି ଯେ ବିରୋଧ ପ୍ରଦର୍ଶନକାରୀଙ୍କ ପ୍ରତି  କାର୍ଯ୍ୟାନୁଷ୍ଠାନ ନେବା ଏବେ ପୋଲିସ ପାଇଁ ପ୍ରଥମ ପ୍ରାଥମିକତା ହୋଇଛି। ପୋଲିସ ଯେତିକି ତତ୍ପରତାର ସହ ପ୍ରଦର୍ଶନକାରୀଙ୍କୁ ଅଟକାଇବାକୁ ବଳ ପ୍ରୟୋଗ କରୁଛି ସେହି ଅନୁପାତରେ ପୀଡ଼ିତାଙ୍କୁ ନ୍ୟାୟ ଦେବାରେ କାହିଁକି ତତ୍ପର ହେଉ ନାହିଁ। ପୋଲିସ ପ୍ରଶାସନ ହେଉ କି କ୍ରାଇମବ୍ରାଞ୍ଚ ଏମିତି ତଦନ୍ତ କରୁଛନ୍ତି ଯେ ଦୀର୍ଘ ବର୍ଷ ପରେ ପୀଡ଼ିତାଙ୍କୁ ନ୍ୟାୟ ଦେବାରେ ତ ଦୂରର କଥା ଅଭିଯୁକ୍ତଙ୍କୁ ମଧ୍ୟ ଧରି ପାରୁନାହାନ୍ତି। ଓଲଟା ପ୍ରଦର୍ଶନକାରୀଙ୍କୁ ଅଟକାଇବାରେ ପୋଲିସ ଶତ ପ୍ରତିଶତ ଉଦ୍ୟମ କରୁଛନ୍ତି। ଯଦି ପୋଲିସ ବିଭାଗ ପ୍ରଥମରୁ ଆନ୍ତରିକତାର ସହ ତଦନ୍ତ କରନ୍ତା ତେବେ ହୁଏତ ଏମିତି ପରିସ୍ଥିତି ଉପଜୁନ୍ତା ନାହିଁ। ଅଭିଯୁକ୍ତଙ୍କୁ ଦଣ୍ଡ ମିଳନ୍ତା ଏବଂ ପୀଡ଼ିତାଙ୍କୁ ନ୍ୟାୟ ମିଳନ୍ତା। ପୋଲିସକୁ ଲୋକହସାରୁ ବର୍ତ୍ତିବା ସହିତ ଏମିତି ସ୍ଥିତି ଦେଖିବାକୁ ପଡ଼ନ୍ତା ନାହିଁ।

ବିରୋଧ ପ୍ରଦର୍ଶନକାରୀଙ୍କୁ ଅଟକାଇବାକୁ ଆମେ ବିରୋଧ କରୁନାହିଁ। ପୋଲିସର କର୍ତ୍ତବ୍ୟ ଆଇନ ଶୃଙ୍ଖଳାକୁ ଧ୍ୟାନରେ ରଖି ରାଜରାସ୍ତାରେ ବିକ୍ଷୋଭକାରୀଙ୍କୁ ରୋକିବା ଉଚିତ୍। ମାତ୍ର ପୋଲିସକୁ ମଧ୍ୟ ଏହା ଭୁଲିବା ଉଚିତ୍ ନୁହେଁ ତାଙ୍କରି ବିଫଳତା ପାଇଁ ବେବିନା, କୁନ୍ଦୁଲି, ଟିକିରି ଶିକ୍ଷୟିତ୍ରୀ ଇତିଶ୍ରୀ ପରି ପୀଡ଼ିତାଙ୍କୁ ଦୀର୍ଘ ବର୍ଷ ପରେ ମଧ୍ୟ ନ୍ୟାୟ ମିଳି ନାହିଁ। ପୋଲିସ  ପ୍ରଶାସନ ଏବଂ ତଦନ୍ତକାରୀ ସଂସ୍ଥା କଣ ହୃଦବୋଧ କରିବା କଥା ନୁହେଁ, ଯେ ତାଙ୍କରି ତଦନ୍ତରେ ଶିଥିଳତା, ଖାସ୍ କରି ଶାସକ ଦଳର କଥାରେ ଉଠ ବସ ହେବା ଆଜି ରାଜ୍ୟର ଆଇନ ବ୍ୟବସ୍ଥାକୁ କେଉଁ ସ୍ତରକୁ ନେଇଛି। ଖାସ୍ କରି ଆଜି ରାଜ୍ୟରେ ମହିଳା କେତେ ସୁରକ୍ଷିତ ଅଛନ୍ତି।  ଦୁର୍ଭାଗ୍ୟର କଥା ପୋଲିସ ବିଭାଗ ପୀଡ଼ିତାଙ୍କୁ ନ୍ୟାୟ ଦେବା ପରିବର୍ତ୍ତେ ଶାସକ ଦଳର ହାତବାରିସି ସାଜି ଅଭିଯୁକ୍ତକୁ ଘଣ୍ଟ ଘୋଡ଼ାଉଛି। ସେମାନଙ୍କର ଏହି ସମ୍ବେଦନହୀନ କାର୍ଯ୍ୟ ଯୋଗୁଁ ଆଜି ରାଜ୍ୟରେ ମହିଳାଙ୍କ ସୁରକ୍ଷା ପ୍ରତି ମହିଳାଙ୍କୁ ଖୋଦ୍ ରାଜରାସ୍ତାକୁ ଓହ୍ଲାଇବାକୁ ପଡ଼ିଛି। 

ଓଡିଶାରେ ଖଣିଲୁଟକୁ ନେଇ ଜୋର ଧରିଲା ରାଜନୀତି  । ସିଧାସଳଖ ଭାବେ ଖଣି ଲୁଟରେ ନିରଞ୍ଜନ ପଟ୍ଟନାୟକ ଓ ତାଙ୍କ ଭାଇ ବିଜେଡି ସାଂସଦ ସୌମ୍ୟରଞ୍ଜନ ପଟ୍ଟନାୟକଙ୍କ ନାଁ ଶ୍ରୀକାନ୍ତ ଜେନା ନେଇଥିବା ବେଳେ ତାର ଉତ୍ତର ଦେଇ ପାରିନାହାନ୍ତି ସୌମ୍ୟରଞ୍ଜନ  । କେବଳ ଏତିକି କହିଛନ୍ତି ମୋତେ କେହି ବୁଝିପାରିଲେ ନାହିଁ  । ମୁଁ ସବୁ ଦଳ ବୁଲି ଆସି ସାରିଲିଣୀ  । ତେଣୁ ଅନ୍ୟ ଦଳର କଥା କହିବା ଠିକ୍ ହେବନାହିଁ  ।

ଶ୍ରୀ ପଟ୍ଟନାୟକ ଆହୁରି କହିଛନ୍ତି ଯେ, ବର୍ତମାନ ରାଜନୀତିରେ ଥିବା ନେତାମାନେ ନିଜ ଦଳ ଅପେକ୍ଷା ଅନ୍ୟ ଦଳ କଥା ବେଶି ଚିନ୍ତା କରୁଛନ୍ତି  । ୨୦୧୩ ମସିହାରୁ ମୁଁ କଂଗ୍ରେସରୁ ବହିଷ୍କାର ହୋଇସାରିଛି  । ଯେଉଁମାନେ ମୋ ପରିବାରକୁ ନେଇ ରାଜନୀତି କରୁଛନ୍ତି ତାଙ୍କର ହିଁ କ୍ଷତି ହେବ ବୋଲି ସେ ଗଣମାଧ୍ୟମରେ ନିଜର ପ୍ରତିକ୍ରିୟାରେ ପ୍ରକାଶ କରିଛନ୍ତି  ।

ଶ୍ରୀ ପଟ୍ଟନାୟକ କହିଛନ୍ତି ନିରଞ୍ଜନ ପଟ୍ଟନାୟକ ମୋ ଭାଇ ଓ ଇନ୍ଦ୍ରାଣୀ ପଟ୍ଟନାୟକ ମୋ ଭାଉଜ ଏକଥାକୁ ମୁଁ କେବେ ମନା କରିପାରିବି ନାହିଁ  । ପଟ୍ଟନାୟକ ପରିବାରକୁ ନେଇ ରାଜନୀତି ବନ୍ଦ କରନ୍ତୁ ବୋଲି ସେ ଶ୍ରୀକାନ୍ତ ଜେନା ଓ ବିଜେପି ନେତା ସମୀର ମହାନ୍ତିଙ୍କ ଅଭିଯୋଗ ଉପରେ ପ୍ରତିକ୍ରିୟା ରଖି କହିଛନ୍ତି  ।

କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ଓ ନବୀନ ପଟ୍ଟନାୟକଙ୍କ ମଧ୍ୟରେ ମଧୁଚନ୍ଦ୍ରିକା ରହିଛି  । ରାହୁଲ ଗାନ୍ଧୀ ଖଣିମାଫିଆଙ୍କ ସହ ମହାଗଠବନ୍ଧନ କରିଛନ୍ତି  । ଓଡିଶାର ଅନ୍ତବୁଜୁଳାକୁ ଲୁଟ କରିବା ରେ କଂଗ୍ରେସର ପଟ୍ଟନାୟକ, ନବୀନ ପଟ୍ଟନାୟକ ଓ ରାହୁଲ ଗାନ୍ଧୀ ହାତ ମିଳାଇଛନ୍ତି ବୋଲି ସାମ୍ବାଦିକ ସମ୍ମିଳନୀରେ କହିଛନ୍ତି ଶ୍ରୀକାନ୍ତ ଜେନା  ।

ଶ୍ରୀକାନ୍ତ ଜେନା କହିଛନ୍ତି କଂଗ୍ରେସର କଲଚର କେବେ ନଥିଲା ଖଣିମାଫିଆଙ୍କ ହାତରେ ରହିବ  । ପ୍ରଥମ ଥର କରି ରାହୁଲ ଗାନ୍ଧୀଙ୍କ ପରି ନେତା କଂଗ୍ରେସକୁ ଏହି ସ୍ତରକୁ ନେଇଛନ୍ତି  । ଓଡିଶାର ଖଣିଲୁଟ ପଇଷାରେ ରାହୁଲ ଗାନ୍ଧୀ ରାଜନୀତି କରିବା ପାଇଁ ଚାହୁଁଛନ୍ତି  । ବର୍ତମାନ ଲଢେଇ ଆରମ୍ଭ ହୋଇଯାଇଛି  । ଏହି ଲଢେଇ ଆରପାରର ଲଢେଇ  । ଗୋଟିଏ ପଟେ ପଟ୍ଟନାୟକ ବ୍ରଦର୍ସ ଓ ଅନ୍ୟପଟେ ଓଡିଶାର ସାଧାରଣ ଜନତା  । ଓଡିଶା କଂଗ୍ରେସ ମୁଖିଆଙ୍କୁ ଅସଲମୁଖା ପୂର୍ବରୁ ଲୋକେ ଜାଣିଛନ୍ତି  । ଯେହେତୁ ଖଣିମାଫିଆଙ୍କ ବିରୋଧରେ ମୁହଁ ଖୋଲିଥିଲେ ସେଥିପାଇଁ ତାଙ୍କୁ ବିରୋଧ କରାଯାଇଥିବା ସେ ପ୍ରକାଶ କରିଛନ୍ତି  । ସେ କହିଛନ୍ତି ରାହୁଲ ଗାନ୍ଧୀଙ୍କର ଅସଲ ଚେହେରା କଣ ତାହା ଆସନ୍ତା  ୨୫ ତାରିଖ ସକାଳେ ଖୁଲାସା କରାଯିବ  ।

ରାଜ୍ୟ ରାଜନୀତିରେ ଖଣିଲୁଟ ପ୍ରସଙ୍ଗକୁ ନେଇ କମ୍ପନ  । ଶତାଦ୍ଦୀର ମହାଲୁଟ ଖଣିଲୁଟ ପ୍ରସଙ୍ଗରେ ବାରମ୍ବାର କହି ଶେଷରେ କଂଗ୍ରେସ ଦଳରୁ ବିଦା ହୋଇଛନ୍ତି ବରିଷ୍ଠ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା  । ଖଣିଲୁଟ, ପଟ୍ଟନାୟକ ପରିବାରର ରହିଥିବା ସମ୍ପର୍କର ଗୁମର ଖୋଲି ଶେଷରେ କଂଗ୍ରେସ ଦଳରୁ ତଡା ଖାଇଛନ୍ତି ଶ୍ରୀ ଜେନା  । ଏହାକୁ ନେଇ ଚଳଚଞ୍ଚଳ ହୋଇପଡିଛି ରାଜ୍ୟ ରାଜନୀତି  ।

ସେପଟେ ଏହି ଘଟଣା ପରେ ତୃତୀୟମହଲାର ପାଣ୍ଡିଆନ୍ , ତାମିଲ ବ୍ୟବସାୟୀ ପ୍ରଭାକରନ, ଓ କଂଗ୍ରେସର ପଟ୍ଟନାୟକ ଓ ବିଜେଡି ପରିବାର ମଧ୍ୟରେ ରହିଥିବା ସମ୍ପର୍କ ପଦାରେ ପଡିଯାଇଛି ବୋଲି ଅଭିଯୋଗ କରିଛନ୍ତି ବିଜେପି ଉପସଭାପତି ସମୀର ମହାନ୍ତି  ।

ଖଣିମହାଦୁର୍ନୀତିର ଗୁମର ଖୋଲିବା କାରଣରୁ ଏମାନଙ୍କ ବ୍ୟବସାୟିକ କାର୍ଯ୍ୟରେ ବାଧା ପଡିବା କାରଣରୁ ଶ୍ରୀକାନ୍ତ ଜେନାଙ୍କୁ ଦଳରୁ ବିଦା କରାଯାଇଥିବା ନେଇ ଏବେ ରାଜନୈତିକ ମହଲରେ ଚର୍ଚ୍ଚା ଆଲୋଚନା ହେଉଛି  । ଗତ କିଛିଦିନ ଧରି ୬୦ ବନାମ ୬୦ କଥା କହି ଚର୍ଚ୍ଚାରେ ଆସିଥିଲେ ଶ୍ରୀକାନ୍ତ  । ଏପରିକି ଖଣିମାଲିକ ଓ ଖଣିମାଫିଆ ଓ ଜଣେ ପ୍ରଶାସନିକ ଅଧିକାରୀଙ୍କ ହାତରେ ରାଜ୍ୟ ଶାସନର ଡୋରୀ ରହିଥିବା ବେଳେ ଏମାନେ ଓଡିଶା ଲୁଟ୍ କରୁଥିବା କଥା ଶ୍ରୀ ଜେନା ବାରମ୍ବାର ଅଭିଯୋଗ କରୁଥିଲେ  । ଶେଷରେ ରାତିଅଧିଆ ଶ୍ରୀ ଜେନାଙ୍କୁ କଂଗ୍ରେସ ଦଳରୁ ବହିଷ୍କାର କରାଯାଇଛି  । 

ସ୍ୱତନ୍ତ୍ର ରାଜ୍ୟପାହ୍ୟାକୁ ନେଇ ବିଳିବିଳି ହେବା ନବୀନ ବାବୁଙ୍କର ପୁରୁଣା ଅଭ୍ୟାସ  । ୨୦୦୦ ମସିହାରୁ ସେ ବିଳିବିଳି ହେଉଛନ୍ତି କେନ୍ଦ୍ରରେ ମନ୍ତ୍ରୀ ଥିବା ବେଳେ ସେ କଣ କରୁଥିଲେ ବୋଲି ପ୍ରଶ୍ନ କରିଛନ୍ତି ପିସିସି ସଭାପତି ନିରଞ୍ଜନ ପଟ୍ଟନାୟକ।

ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନର ଉତ୍ତରରେ ଶ୍ରୀ ପଟ୍ଟନାୟକ କହିଛନ୍ତି ଯେ, ୧୯ ବର୍ଷର ମୁଖ୍ୟମନ୍ତ୍ରୀ ସ୍ୱତନ୍ତ୍ର ରାଜ୍ୟପାହ୍ୟା ପାଇଁ କେଉଁ ପରିସ୍ଥିତି ଦରକାର କଣ ତାଙ୍କୁ ଜଣାନାହିଁ  । ମଝିରେ ମଝିରେ ସ୍ୱତନ୍ତ୍ର ରାଜ୍ୟପାହ୍ୟାକୁ ନେଇ ବିଳିବିଳି ହୋଇ କେନ୍ଦ୍ରକୁ ଚିଠି ଲେଖନ୍ତି  । ଗରିବ ଲୋକଙ୍କ ପାଇଁ ତାଙ୍କର ମାନସିକତା ସ୍ଥିରତା ନାହିଁ  । ଚିଟଫଣ୍ଡ ମାମଲାରେ ହଜାର ହଜାର ଲୋକ ହନ୍ତସନ୍ତ ହେଉଥିବା ବେଳେ ଏହି ପ୍ରସଙ୍ଗରେ ସିବିଆଇକୁ କଣ ପାଇଁ ମୁଖ୍ୟମନ୍ତ୍ରୀ ଚିଠି ଲେଖୁନାହାନ୍ତି ବୋଲି ଶ୍ରୀ ପଟ୍ଟନାୟକ ପ୍ରଶ୍ନ କରିଛନ୍ତି  ।

ମହାଲେଖାକାରଙ୍କ ପ୍ରାରମ୍ଭିକ ତଥ୍ୟ ଅନୁଯାୟୀ ୨୦୧୭-୧୮ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟ ସରକାରଙ୍କ ମୋଟ ଋଣଭାର ୭୩୮୬୪.୬୬ କୋଟି ଥିଲା  । ଚଳିତ ଆର୍ଥିକ ବର୍ଷ ଶେଷ ସୁଦ୍ଧା ମୋଟ ଋଣଭାର ୯୧୯୪୩.୬୮ କୋଟି ଟଙ୍କା ହେବ ବୋଲି ସରକାର ଅଟକଳ କରିଥିବା କଥା ସ୍ୱୀକାର କରିଛନ୍ତି ରାଜ୍ୟ ଅର୍ଥମନ୍ତ୍ରୀ ଶଶୀଭୂଷଣ ବେହେରା  ।

ଗତ ୨୦୧୮ ନଭେମ୍ବର ୧୯ ତାରିଖରେ ବିଧାନସଭାରେ ଦିଲ୍ଲୀପ ରାୟଙ୍କ ଏ ସମ୍ପର୍କିତ ଏକ ପ୍ରଶ୍ନର ଉତରରେ ମନ୍ତ୍ରୀ ତାଙ୍କର ଉତର ରଖି କହିଛନ୍ତି ଯେ, ୨୦୦୬-୦୭ ଓ ୨୦୧୦-୧୧ ଆର୍ଥିକ ବର୍ଷ ଶେଷ ସୁଦ୍ଧା ରାଜ୍ୟ ସରକାରଙ୍କର ମୋଟ ଋଣ ଯଥାକ୍ରମେ ୩୭୨୪୯.୫୧ କୋଟିଟଙ୍କା ଓ ୩୯୧୩୬.୯୧ କୋଟିଟଙ୍କା ଥିଲା  ।