ଭୁବନେଶ୍ୱର: ଓଡ଼ିଶାକୁ ଦେଶର ଏକ ପ୍ରମୁଖ କେମିକାଲ୍ ଓ ପେଟ୍ରୋକେମିକାଲ୍ ହବ୍‌ରେ ପରିଣତ କରିବାକୁ ରାଜ୍ୟ ସରକାରଙ୍କ ବଡ଼ ପ୍ରୟାସ। ଏହି ଲକ୍ଷ୍ୟ ନେଇ ମୁମ୍ବାଇରେ ପହଞ୍ଚିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ଦୁଇଦିନିଆ ଗସ୍ତ ଅବସରରେ ସେ ଦେଶ-ବିଦେଶର ଶିଳ୍ପପତି ଓ ନିବେଶକଙ୍କ ସହ ଆଲୋଚନା କରି ଓଡ଼ିଶାରେ ନୂଆ ଶିଳ୍ପ ପ୍ରତିଷ୍ଠା ଏବଂ ଅଧିକ ପୁଞ୍ଜିନିବେଶ ପାଇଁ ପ୍ରୟାସ କରିବେ।

ମୁମ୍ବାଇର ଗୋରେଗାଓଁସ୍ଥିତ NESCOରେ ଅକ୍ଟୋବର ୨୨ରୁ ୨୪ ତାରିଖ ପର୍ଯ୍ୟନ୍ତ ଆୟୋଜିତ ହେଉଛି ‘ଇଣ୍ଡିଆ କେମ୍ ୨୦୨୬’। ଏହି ଜାତୀୟସ୍ତରୀୟ କେମିକାଲ୍ ଓ ପେଟ୍ରୋକେମିକାଲ୍ ପ୍ରଦର୍ଶନୀ ଏବଂ ସମ୍ମିଳନୀରେ ୧୦୦ରୁ ଅଧିକ ଦେଶର ଶିଳ୍ପପତି, ନୀତି ନିର୍ଦ୍ଧାରକ ଓ ନିବେଶକ ଯୋଗ ଦେଉଛନ୍ତି। ଏହାର ଉଦ୍‌ଘାଟନୀ ଅଧିବେଶନ ସହ କେନ୍ଦ୍ରମନ୍ତ୍ରୀ ଜେ.ପି. ନଡ୍ଡାଙ୍କ ଅଧ୍ୟକ୍ଷତାରେ ହେବାକୁ ଥିବା CEO ରାଉଣ୍ଡଟେବୁଲ୍‌ରେ ମଧ୍ୟ ମୁଖ୍ୟମନ୍ତ୍ରୀ ଯୋଗ ଦେବେ।

୨୦ରୁ ଅଧିକ କମ୍ପାନୀ ସହ ଆଲୋଚନା

ଓଡ଼ିଶାରେ ନୂଆ ପୁଞ୍ଜିନିବେଶ ଆଣିବା ଏହି ଗସ୍ତର ପ୍ରମୁଖ ଉଦ୍ଦେଶ୍ୟ। ମୁଖ୍ୟମନ୍ତ୍ରୀ ୨୦ରୁ ଅଧିକ ପ୍ରମୁଖ କମ୍ପାନୀର ପ୍ରତିନିଧିଙ୍କ ସହ ପୃଥକ୍‌ ଭାବେ ଆଲୋଚନା କରିବେ। ନୂଆ ଶିଳ୍ପ ପ୍ରତିଷ୍ଠା, ଚାଲୁଥିବା ଶିଳ୍ପର ସମ୍ପ୍ରସାରଣ, ଡାଉନ୍‌ଷ୍ଟ୍ରିମ୍‌ ମାନୁଫାକ୍ଚରିଂ ଏବଂ ନୂଆ ବ୍ୟବସାୟିକ ସୁଯୋଗ ଉପରେ ଗୁରୁତ୍ୱ ଦିଆଯିବ।

ଏହି ଅବସରରେ ଓଡ଼ିଶାର ଶିଳ୍ପ ଭିତ୍ତିଭୂମି, ଅନୁକୂଳ ଶିଳ୍ପନୀତି, ପ୍ରାକୃତିକ ସମ୍ପଦ ଓ ବନ୍ଦର ସୁବିଧାକୁ ନିବେଶକଙ୍କ ସାମ୍ନାରେ ରଖାଯିବ। କୋଇଲା ଗ୍ୟାସିଫିକେସନ୍‌ ପ୍ରକଳ୍ପ ସମ୍ପର୍କରେ ମଧ୍ୟ ଉପସ୍ଥାପନା କରାଯିବ। ଏଥିସହ କେମିକାଲ୍, ପେଟ୍ରୋକେମିକାଲ୍, ପ୍ଲାଷ୍ଟିକ୍‌ ଓ ପ୍ୟାକେଜିଂ ଶିଳ୍ପକୁ ନେଇ ଏକ ବୃହତ୍‌ ସ୍ୱତନ୍ତ୍ର ଶିଳ୍ପ ପାର୍କ ପ୍ରତିଷ୍ଠା ନେଇ ଯୋଜନା ଘୋଷଣା ହେବାର ସମ୍ଭାବନା ରହିଛି।

୧.୯୩ ଲକ୍ଷ କୋଟିର ପ୍ରସ୍ତାବିତ ନିବେଶ

ରାଜ୍ୟ ସରକାରଙ୍କ ତଥ୍ୟ ଅନୁଯାୟୀ, ଗତ ଦୁଇବର୍ଷ ମଧ୍ୟରେ ଓଡ଼ିଶାର କେମିକାଲ୍ ଓ ପେଟ୍ରୋକେମିକାଲ୍ କ୍ଷେତ୍ରରେ ୫୬ଟି କମ୍ପାନୀ ପୁଞ୍ଜିନିବେଶ ପାଇଁ ଆଗ୍ରହ ପ୍ରକାଶ କରିଛନ୍ତି। ଏହି ପ୍ରକଳ୍ପଗୁଡ଼ିକର ପ୍ରସ୍ତାବିତ ନିବେଶ ପରିମାଣ ୧,୯୩,୦୮୭.୯୪ କୋଟି ଟଙ୍କା ରହିଥିବା ବେଳେ ୧,୧୨,୩୨୪ ଜଣଙ୍କ ପାଇଁ ନିଯୁକ୍ତି ସମ୍ଭାବନା ରହିଛି।

ଏଥିମଧ୍ୟରୁ ୨୭ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ କିମ୍ବା ଉଦ୍‌ଘାଟନ ହୋଇସାରିଛି। ଏହି ପ୍ରକଳ୍ପଗୁଡ଼ିକରେ ୬୦,୮୨୫.୩୪ କୋଟି ଟଙ୍କାର ନିବେଶ ଏବଂ ୩୫,୩୫୧ ଜଣଙ୍କ ପାଇଁ ନିଯୁକ୍ତି ସମ୍ଭାବନା ରହିଛି। ନିକଟରେ ଯାଜପୁରରେ ୯ଟି ପ୍ରକଳ୍ପର ଶୁଭାରମ୍ଭ ଓ ଭିତ୍ତିପ୍ରସ୍ତର ସ୍ଥାପନ ହୋଇଥିଲା। ଏଥିରେ ୪,୧୩୬ କୋଟି ଟଙ୍କାର ନିବେଶ ସହ ୧,୫୦୮ଟି ନିଯୁକ୍ତି ସୁଯୋଗ ସୃଷ୍ଟି ହେବାର ଆକଳନ କରାଯାଇଛି।

ଶିଳ୍ପ ବିଭାଗର ଅତିରିକ୍ତ ମୁଖ୍ୟ ସଚିବ ହେମନ୍ତ ଶର୍ମା କହିଛନ୍ତି, ଇଣ୍ଡିଆ କେମ୍‌ ୨୦୨୬ରେ ଯୋଗଦେବା ଦ୍ୱାରା ପ୍ରମୁଖ କମ୍ପାନୀଗୁଡ଼ିକ ସହ ସିଧାସଳଖ ଆଲୋଚନା କରିବା, ଓଡ଼ିଶାର ନିବେଶ ସୁଯୋଗ ଉପସ୍ଥାପନ କରିବା ଏବଂ ଭବିଷ୍ୟତର ବିକାଶ ପାଇଁ ସହଭାଗିତା ଗଢ଼ିବାର ସୁଯୋଗ ମିଳିବ।

ଖଣିଜ ସମ୍ପଦ ଓ ଇସ୍ପାତ ଶିଳ୍ପ ପାଇଁ ପରିଚିତ ଓଡ଼ିଶା ଏବେ କେମିକାଲ୍ ଓ ପେଟ୍ରୋକେମିକାଲ୍ କ୍ଷେତ୍ରରେ ମଧ୍ୟ ନିଜର ସ୍ଥିତି ମଜବୁତ କରିବାକୁ ଚାହୁଁଛି। ଏହି ସମ୍ମିଳନୀରେ ମୁଖ୍ୟମନ୍ତ୍ରୀଙ୍କ ଆଲୋଚନା କେତେ ନୂଆ ନିବେଶ ଓ ଶିଳ୍ପ ପ୍ରକଳ୍ପରେ ପରିଣତ ହେଉଛି, ଏବେ ତାହା ଉପରେ ନଜର ରହିବ।

ଟେକ୍ନୋଲୋଜିର ପ୍ରକୃତ ଶକ୍ତି କେବଳ କ୍ଷମତା ହାସଲ କରିବାରେ ନୁହେଁ, ବରଂ ଲୋକଙ୍କୁ ସଶକ୍ତ କରିବାରେ ରହିଛି। ଡିଜିଟାଲ୍‌ ପେମେଣ୍ଟ UPIଠାରୁ ଆରମ୍ଭ କରି ଷ୍ଟାର୍ଟଅପ୍‌ ପର୍ଯ୍ୟନ୍ତ ଉଦାହରଣ ଦେଇ ଏହି ବାର୍ତ୍ତା ଦେଇଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଭାରତର ରାଜଧାନୀ ଦିଲ୍ଲୀରେ ଆୟୋଜିତ ବ୍ଲୁମବର୍ଗ ନ୍ୟୁ ଇକୋନୋମି ଫୋରମ୍‌ରେ ଯୋଗଦେଇ ‘ପାୱାର ଟୁ ଏମ୍ପାୱାର’ ଚିନ୍ତାଧାରା ଉପରେ ସେ ଗୁରୁତ୍ୱ ଦେଇଛନ୍ତି।

ମୋଦୀ କହିଛନ୍ତି, ଆଜିର ସମୟରେ ଟେକ୍ନୋଲୋଜି, ଡାଟା, ଜ୍ଞାନ ଓ ନୂଆ ଉଦ୍ଭାବନ ହେଉଛି ଶକ୍ତିର ପ୍ରମୁଖ ମାଧ୍ୟମ। କିନ୍ତୁ ଏହାର ଲାଭ କେବଳ ଅଳ୍ପ କିଛି ଲୋକଙ୍କ ମଧ୍ୟରେ ସୀମିତ ରହିବା ଉଚିତ୍‌ ନୁହେଁ। ଏହା ଦ୍ୱାରା କୋଟି କୋଟି ଲୋକଙ୍କ ପାଇଁ ନୂଆ ସୁଯୋଗ ସୃଷ୍ଟି ହେବା ଦରକାର।

ପ୍ରଧାନମନ୍ତ୍ରୀ କହିଛନ୍ତି, ଏଥିପାଇଁ ସମାଜର ଚିନ୍ତାଧାରାରେ ପରିବର୍ତ୍ତନ ଜରୁରୀ। ନିୟନ୍ତ୍ରଣ ବଦଳରେ ସଶକ୍ତୀକରଣ, ପ୍ରତିଯୋଗିତା ବଦଳରେ ସହଯୋଗ ଏବଂ କେବଳ ନିଜ ସଫଳତା ବଦଳରେ ଅନ୍ୟମାନଙ୍କୁ ସଫଳ କରିବା ଉପରେ ଧ୍ୟାନ ଦେବା ଆବଶ୍ୟକ। ଶକ୍ତିର ପ୍ରକୃତ ମୂଲ୍ୟ ଏହାର ଉଦ୍ଦେଶ୍ୟ ଉପରେ ନିର୍ଭର କରେ ବୋଲି ସେ କହିଛନ୍ତି।

UPI ଭାରତର ଅନ୍ତର୍ଭୁକ୍ତିମୂଳକ ଟେକ୍ନୋଲୋଜିର ଉଦାହରଣ

ଭାରତର ଡିଜିଟାଲ୍‌ ପେମେଣ୍ଟ ବ୍ୟବସ୍ଥା UPIର ଉଦାହରଣ ଦେଇ ମୋଦୀ କହିଛନ୍ତି, ଜଣେ ରାସ୍ତାକଡ଼ ଦୋକାନୀ ଓ ଏକ ବଡ଼ କାର୍‌ ଶୋ’ରୁମ୍‌ ଭିନ୍ନ ଭିନ୍ନ ସ୍ତରରେ ବ୍ୟବସାୟ କରୁଥିଲେ ମଧ୍ୟ ଉଭୟ ଏକା ପ୍ଲାଟଫର୍ମରେ ଡିଜିଟାଲ୍‌ କାରବାର କରିପାରୁଛନ୍ତି। ଏହା ହିଁ ସମସ୍ତଙ୍କୁ ସୁଯୋଗ ଦେଉଥିବା ଟେକ୍ନୋଲୋଜିର ଶକ୍ତି ବୋଲି ସେ କହିଛନ୍ତି। ଏହି ଅବସରରେ ବିଦେଶୀ ପ୍ରତିନିଧିମାନଙ୍କୁ ଭାରତର ଡିଜିଟାଲ୍‌ ପେମେଣ୍ଟ ବ୍ୟବସ୍ଥାକୁ ନିଜେ ବ୍ୟବହାର କରି ଦେଖିବାକୁ ଆମନ୍ତ୍ରଣ କରିଛନ୍ତି ମୋଦୀ।

ଉଲ୍ଲେଖଯୋଗ୍ୟ, ବ୍ଲୁମବର୍ଗ ନ୍ୟୁ ଇକୋନୋମି ଫୋରମ୍‌ ପ୍ରଥମ ଥର ପାଇଁ ଭାରତରେ ଆୟୋଜିତ ହୋଇଛି। ଏହି ମଞ୍ଚରେ ଟେକ୍ନୋଲୋଜିର ବ୍ୟବହାର, ଅର୍ଥନୈତିକ ବିକାଶ ଓ ସାଧାରଣ ଲୋକଙ୍କ ସଶକ୍ତୀକରଣ ଉପରେ ମୋଦୀଙ୍କ ମତ ଗୁରୁତ୍ୱ ପାଇଛି। 

ଭୁବନେଶ୍ୱର: ଓଡ଼ିଶାର ବିକାଶକୁ ଆହୁରି ତ୍ୱରାନ୍ୱିତ କରିବା ଏବଂ ସରକାରୀ ସେବାକୁ ଲୋକଙ୍କ ପାଖରେ ଅଧିକ ସହଜରେ ପହଞ୍ଚାଇବା ଲକ୍ଷ୍ୟରେ ବୁଧବାର ଖାରବେଳ ଭବନରେ ଏକ ଉଚ୍ଚସ୍ତରୀୟ ସମୀକ୍ଷା ବୈଠକ ଅନୁଷ୍ଠିତ ହୋଇଛି। ବୈଠକରେ ମୁଖ୍ୟ ଶାସନ ସଚିବ ଅନୁ ଗର୍ଗ ବିଭିନ୍ନ ବିଭାଗର କାର୍ଯ୍ୟକଳାପର ସମୀକ୍ଷା କରି ନିର୍ଦ୍ଦିଷ୍ଟ ସମୟ ମଧ୍ୟରେ ପ୍ରକଳ୍ପ ଶେଷ କରିବାକୁ ଅଧିକାରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।

ବୈଠକରେ ବିକାଶ ଆୟୁକ୍ତ, ଅତିରିକ୍ତ ମୁଖ୍ୟ ଶାସନ ସଚିବ ଏବଂ ସମସ୍ତ ବିଭାଗର ସଚିବମାନେ ଯୋଗଦେଇ ରାଜ୍ୟର ପ୍ରମୁଖ ଯୋଜନା ଓ ବିକାଶ କାର୍ଯ୍ୟର ଅଗ୍ରଗତି ଉପରେ ଆଲୋଚନା କରିଥିଲେ।

ମୁଖ୍ୟ ଶାସନ ସଚିବ ମହିଳା ଉଦ୍ୟୋଗୀ ପ୍ଲାଟଫର୍ମ, କେଜିରୁ ପିଜି ପର୍ଯ୍ୟନ୍ତ ମାଗଣା ଶିକ୍ଷା, ମୁଖ୍ୟମନ୍ତ୍ରୀ ଅପୂର୍ବ ଯୋଜନା ଏବଂ ସାର୍ବଜନୀନ ଖାଦ୍ୟ ବଣ୍ଟନ ବ୍ୟବସ୍ଥା ଭଳି ଯୋଜନାର ସଫଳତା ଉପରେ ସନ୍ତୋଷ ପ୍ରକାଶ କରିଥିଲେ। ସେହିପରି ବୈଷୟିକ ଶିକ୍ଷା, ଦକ୍ଷତା ବିକାଶ, କ୍ରୀଡ଼ା ଓ ଷ୍ଟାର୍ଟଅପ୍ କ୍ଷେତ୍ରକୁ ଅଧିକ ସୁଦୃଢ଼ କରିବାକୁ ଗୁରୁତ୍ୱ ଦେଇଥିଲେ।

ବୈଠକରେ ଲୋକକୈନ୍ଦ୍ରିକ ପ୍ରଶାସନ, ସରକାରୀ ସେବାରେ ସ୍ୱଚ୍ଛତା ଓ ଦ୍ରୁତ ସେବା ପ୍ରଦାନ ପାଇଁ କୃତ୍ରିମ ବୁଦ୍ଧିମତା (AI) ଏବଂ ଡାଟା ଆନାଲିଟିକ୍ସର ବ୍ୟବହାର ଉପରେ ବିଶେଷ ଆଲୋଚନା ହୋଇଥିଲା। ନୀତି ପ୍ରସ୍ତୁତି ଏବଂ ସେବା ଉନ୍ନତିରେ ଏହି ଆଧୁନିକ ପ୍ରଯୁକ୍ତିକୁ ଅଧିକ ବ୍ୟବହାର କରିବାକୁ ବିଭାଗଗୁଡ଼ିକୁ ପରାମର୍ଶ ଦିଆଯାଇଛି।

ଅର୍ଥ ବିଭାଗ ଜୁନ୍ ୩୦ ପର୍ଯ୍ୟନ୍ତର ଆର୍ଥିକ ସମୀକ୍ଷା ଉପସ୍ଥାପନ କରି କୃଷି, ସାମାଜିକ କଲ୍ୟାଣ ଓ ବିକାଶମୂଳକ ଯୋଜନାରେ ଅଗ୍ରଗତି ସମ୍ପର୍କରେ ସୂଚନା ଦେଇଥିଲା। ଏଥିସହ ବଜେଟ୍‌ର ସଠିକ୍ ବ୍ୟବହାର ଓ ଆର୍ଥିକ ଶୃଙ୍ଖଳା ବଜାୟ ରଖିବାକୁ ମଧ୍ୟ ନିର୍ଦ୍ଦେଶ ଦିଆଯାଇଛି।

ଇଲେକ୍ଟ୍ରୋନିକ୍ସ ଓ ଆଇଟି ବିଭାଗ ପକ୍ଷରୁ ଏଆଇ ଆଧାରିତ ଓଡ଼ିଆ ଭଏସ୍ ଫିଡ୍‌ବ୍ୟାକ୍ ବ୍ୟବସ୍ଥା ଏବଂ ପୁରୁଣା ହସ୍ତଲିଖିତ ରେକର୍ଡକୁ OCR ମାଧ୍ୟମରେ ଡିଜିଟାଲ କରିବା ଯୋଜନା ଉପସ୍ଥାପନ କରାଯାଇଥିଲା।

ଏହାସହ ଝାରସୁଗୁଡ଼ା ଜିଲ୍ଲା ପାଇଁ ୨୫ ଦଫା ବିକାଶ ରୋଡମ୍ୟାପ୍ ମଧ୍ୟ ପ୍ରସ୍ତୁତ କରାଯାଇଥିଲା। ଶିକ୍ଷା, ଶିଳ୍ପ, ପରିବହନ, ବିମାନ ସେବା, ଡିଜିଟାଲ ସୁବିଧା ଓ ସବୁଜ ଶକ୍ତି କ୍ଷେତ୍ରରେ ଏହି ଯୋଜନା ଜିଲ୍ଲାର ସାମଗ୍ରିକ ବିକାଶ ଓ ରୋଜଗାର ସୃଷ୍ଟିରେ ସହାୟକ ହେବ ବୋଲି କୁହାଯାଇଛି।

ବୈଠକ ଶେଷରେ ଅନୁ ଗର୍ଗ ସମସ୍ତ ବିଭାଗକୁ ପରସ୍ପର ସମନ୍ୱୟ ରଖି ପ୍ରଯୁକ୍ତିନିର୍ଭର ଓ ଜନମୁଖୀ ପ୍ରଶାସନ ମାଧ୍ୟମରେ ଓଡ଼ିଶାର ବିକାଶ ଯାତ୍ରାକୁ ଆହୁରି ଗତିଶୀଳ କରିବାକୁ ଆହ୍ୱାନ ଜଣାଇଛନ୍ତି।

ବ୍ରହ୍ମପୁର/ ସମ୍ବଲପୁର: ରାଜ୍ୟର ଯୁବପିଢ଼ିଙ୍କୁ ବିଶ୍ୱସ୍ତରୀୟ ଦକ୍ଷତା ପ୍ରଶିକ୍ଷଣ ଦେବା ଲକ୍ଷ୍ୟରେ ଓଡ଼ିଶା ସରକାରଙ୍କ ଆଉ ଏକ ବଡ଼ ପଦକ୍ଷେପ ଆଗକୁ ବଢ଼ିଛି। ବ୍ରହ୍ମପୁର ଓ ସମ୍ବଲପୁରରେ ଦୁଇଟି ନୂଆ ୱର୍ଲ୍ଡ ସ୍କିଲ୍ ସେଣ୍ଟର (WSC) ସ୍ଥାପନ ପାଇଁ ଜମି ଚିହ୍ନଟ ହୋଇଥିବାବେଳେ ଭୂମି ହସ୍ତାନ୍ତର ପ୍ରକ୍ରିୟା ଆରମ୍ଭ ହୋଇଛି।

ଚଳିତ ୨୦୨୬-୨୭ ଆର୍ଥିକ ବର୍ଷର ବଜେଟରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ଦୁଇ କେନ୍ଦ୍ର ସ୍ଥାପନ ପାଇଁ ୨୭୮ କୋଟି ଟଙ୍କା ବ୍ୟୟବରାଦ କରିଥିଲେ। ବଜେଟ ଘୋଷଣା ପରେ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ଏହାର କାର୍ଯ୍ୟକାରୀ ପଦକ୍ଷେପ ନେଇଛି। ଏନେଇ ଗଞ୍ଜାମ ଓ ସମ୍ବଲପୁର ଜିଲ୍ଲାପାଳଙ୍କୁ ଆବଶ୍ୟକ ନିର୍ଦ୍ଦେଶ ମଧ୍ୟ ଜାରି କରାଯାଇଛି।

ବ୍ରହ୍ମପୁରରେ କ୍ୟାମ୍ପସ ପାଇଁ ଗଞ୍ଜାମ ଜିଲ୍ଲା କନିଶି ତହସିଲ ଅଧୀନ ଲଉଡ଼ିଗାଁକୁ ଚୂଡ଼ାନ୍ତ ଭାବେ ଚୟନ କରାଯାଇଛି। ପ୍ରାୟ ୪୦ ଏକର ଜମି ଉପଲବ୍ଧ ଥିବା ସହ ଆଇଜର୍ ବ୍ରହ୍ମପୁର ନିକଟରେ ଅବସ୍ଥିତ ହେବା ଏବଂ ସମୁଦ୍ର ଉପକୂଳ ସହ ସଂଯୋଗ ଥିବାରୁ ଏହି ସ୍ଥାନକୁ ଅଧିକ ଉପଯୁକ୍ତ ବୋଲି ବିଶେଷଜ୍ଞ ଦଳ ସୁପାରିସ କରିଥିଲେ। ଭବିଷ୍ୟତରେ ଏଠାରେ ମେରିନ୍ ଇଞ୍ଜିନିୟରିଂ ଓ ହସ୍ପିଟାଲିଟି ଭଳି ଆଧୁନିକ ପାଠ୍ୟକ୍ରମ ଆରମ୍ଭ କରିବାର ସୁଯୋଗ ରହିବ।

ସେହିପରି ସମ୍ବଲପୁର ସଦର ତହସିଲ ଅଧୀନ ବଡ଼ସିଂହାରି ମୌଜାରେ ପ୍ରାୟ ୧୫ ଏକର ସରକାରୀ ଜମି ଚିହ୍ନଟ କରାଯାଇଛି। ଏହି ଜମି ବର୍ତ୍ତମାନ ମତ୍ସ୍ୟ ଓ ପ୍ରାଣୀ ସମ୍ପଦ ବିକାଶ ବିଭାଗ ଅଧୀନରେ ଥିବାରୁ ଏହାକୁ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ନାମରେ ହସ୍ତାନ୍ତର କରିବାକୁ ପ୍ରକ୍ରିୟା ଆରମ୍ଭ ହୋଇଛି।

ଭୁବନେଶ୍ୱରରେ ସଫଳତାର ସହ ଚାଲୁଥିବା ୱର୍ଲ୍ଡ ସ୍କିଲ୍ ସେଣ୍ଟର ଭଳି ଆଧୁନିକ ଶିକ୍ଷା ଓ ପ୍ରଶିକ୍ଷଣ ବ୍ୟବସ୍ଥାକୁ ଏବେ ଦକ୍ଷିଣ ଓ ପଶ୍ଚିମ ଓଡ଼ିଶାରେ ବିସ୍ତାର କରିବା ସରକାରଙ୍କ ଲକ୍ଷ୍ୟ। ଏହା ଫଳରେ ସେହି ଅଞ୍ଚଳର ଛାତ୍ରଛାତ୍ରୀମାନେ ନିଜ ଜିଲ୍ଲା ନିକଟରେ ରହି ବିଶ୍ୱମାନର ଦକ୍ଷତା ପ୍ରଶିକ୍ଷଣ ପାଇପାରିବେ।

ବିଭାଗୀୟ ସୂତ୍ର ଅନୁସାରେ, ଭୂମି ହସ୍ତାନ୍ତର କାମ ସମ୍ପୂର୍ଣ୍ଣ ହେବା ପରେ କ୍ୟାମ୍ପସ ନିର୍ମାଣ ପାଇଁ ପରବର୍ତ୍ତୀ ପ୍ରକ୍ରିୟା ଆରମ୍ଭ ହେବ। ଏହି ଦୁଇ ୱର୍ଲ୍ଡ ସ୍କିଲ୍ ସେଣ୍ଟର କାର୍ଯ୍ୟକ୍ଷମ ହେଲେ ଓଡ଼ିଶାର ଯୁବପିଢ଼ିଙ୍କ ପାଇଁ ଆନ୍ତର୍ଜାତିକ ମାନର ପ୍ରଶିକ୍ଷଣ ଓ ରୋଜଗାର ସୁଯୋଗ ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି। 

ଭୁବନେଶ୍ୱର: ଓଡ଼ିଶାକୁ ଦେଶର ଏକ ପ୍ରମୁଖ ଶିଳ୍ପ କେନ୍ଦ୍ରରେ ପରିଣତ କରିବା ଲକ୍ଷ୍ୟରେ ରାଜ୍ୟ ସରକାର ଆଉ ଏକ ବଡ଼ ପଦକ୍ଷେପ ନେଇଛନ୍ତି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଭୁବନେଶ୍ୱରରେ ଆୟୋଜିତ CII Eastern Regional Council Meeting 2026ରେ ‘Go East’ ପ୍ଲାଟଫର୍ମର ଶୁଭାରମ୍ଭ କରିବା ସହ ଶିଳ୍ପନୀତି IPR-2022ରେ ବଡ଼ ସଂଶୋଧନ ଘୋଷଣା କରିଛନ୍ତି।

‘Go East’ର ଅର୍ଥ ହେଉଛି Government of Odisha Eastern Investment Accelerator and Special Task Force। ଏହି ନୂଆ ପଦକ୍ଷେପ ମାଧ୍ୟମରେ ପୂର୍ବ ଓ ଉତ୍ତର-ପୂର୍ବ ଭାରତରୁ ଅଧିକ ପୁଞ୍ଜିନିବେଶ ଆଣିବାକୁ ସରକାର ଲକ୍ଷ୍ୟ ରଖିଛନ୍ତି। ଏଥିରେ ନିବେଶକଙ୍କୁ ଶୀଘ୍ର ଅନୁମୋଦନ, ସରକାରୀ ସହଯୋଗ ଏବଂ ପ୍ରକଳ୍ପ କାର୍ଯ୍ୟକାରୀ କରିବାରେ ସହଜ ସୁବିଧା ମିଳିବ। ଅନ୍ୟ ରାଜ୍ୟରେ ମୂଳ କାର୍ଯ୍ୟାଳୟ ରଖିଥିଲେ ମଧ୍ୟ ଓଡ଼ିଶାରେ ଶିଳ୍ପ ବିସ୍ତାର କରିବାକୁ କମ୍ପାନୀମାନଙ୍କୁ ପ୍ରୋତ୍ସାହନ ଦିଆଯିବ।

ଏହି ଯୋଜନାକୁ ସଫଳ କରିବା ପାଇଁ ସ୍ପେଶାଲ ଟାସ୍କ ଫୋର୍ସ, IPICOLରେ ଏକ ସ୍ୱତନ୍ତ୍ର Go East Cell ଏବଂ Go Swift ଡିଜିଟାଲ ମଡ୍ୟୁଲ୍ ଗଠନ କରାଯିବ। ଏହା ମାଧ୍ୟମରେ ଶିଳ୍ପ ପ୍ରକଳ୍ପର ଅନୁମୋଦନ ଓ କାର୍ଯ୍ୟର ଅଗ୍ରଗତିକୁ ରିଅଲ୍-ଟାଇମରେ ନଜର ରଖାଯିବ। ବିଶେଷ କରି ଓଡ଼ିଶାର ସୀମାବର୍ତ୍ତୀ ଜିଲ୍ଲାଗୁଡ଼ିକରେ ନୂଆ ଶିଳ୍ପ କେନ୍ଦ୍ର ଗଢ଼ି ଉଠିବା ସହ ରୋଜଗାରର ସୁଯୋଗ ବଢ଼ିବ।

ମୁଖ୍ୟମନ୍ତ୍ରୀ ଶିଳ୍ପନୀତି IPR-2022ରେ ସଂଶୋଧନ କରି ରାଜ୍ୟର ୧୫ଟି ଆର୍ଥିକ ଦୃଷ୍ଟିରୁ ପଛୁଆ ଜିଲ୍ଲାକୁ ‘Thrust Sector’ ମାନ୍ୟତା ଦେବା ଘୋଷଣା କରିଛନ୍ତି। ଏଥିରେ ବଲାଙ୍ଗୀର, କଳାହାଣ୍ଡି, ନୂଆପଡ଼ା, କନ୍ଧମାଳ, ବୌଦ୍ଧ, ଗଜପତି ସମେତ ୧୫ଟି ଜିଲ୍ଲା ସାମିଲ ରହିଛି। ଏହି ଅଞ୍ଚଳରେ ଖଣିଜ ଭିତ୍ତିକ ଶିଳ୍ପ ବଦଳରେ ଅନ୍ୟାନ୍ୟ ଶିଳ୍ପ ସ୍ଥାପନକୁ ପ୍ରାଥମିକତା ଦିଆଯିବ।

ଶାସନ ବ୍ୟବସ୍ଥାରେ ସଂସ୍କାର ଆଣି ଶିଳ୍ପ ପ୍ରକଳ୍ପ ଅନୁମୋଦନ ସମୟ ପ୍ରାୟ ୪୦୦ ଦିନରୁ କମି ୧୬୦ ଦିନ ମଧ୍ୟରେ ସୀମିତ କରାଯାଇଛି। ଆଗାମୀ ଦିନରେ ଏହାକୁ ୧୦୦ ଦିନରୁ କମ୍ କରିବା ଲକ୍ଷ୍ୟ ରହିଛି। ଜୁନ୍ ୨୦୨୪ ପରଠାରୁ ରାଜ୍ୟରେ ୪୭୭ଟି ପ୍ରକଳ୍ପକୁ ଅନୁମୋଦନ ମିଳିଛି, ଯାହାର ମୋଟ ପୁଞ୍ଜିନିବେଶ ପ୍ରାୟ ୯.୫ ଲକ୍ଷ କୋଟି ଟଙ୍କା। ଏହା ମାଧ୍ୟମରେ ପ୍ରାୟ ୬ ଲକ୍ଷ ଲୋକଙ୍କ ପାଇଁ ରୋଜଗାର ସୃଷ୍ଟି ହେବାର ସମ୍ଭାବନା ରହିଛି। ସେଥିମଧ୍ୟରୁ ୩.୧୧ ଲକ୍ଷ କୋଟି ଟଙ୍କାର ୧୨ଟି ବଡ଼ ପ୍ରକଳ୍ପ ଖୁବ୍ ଶୀଘ୍ର ଉଦ୍ଘାଟନ ପାଇଁ ପ୍ରସ୍ତୁତ ହେଉଛି।

ମୁଖ୍ୟମନ୍ତ୍ରୀ କହିଛନ୍ତି, ‘ସମୃଦ୍ଧ ଓଡ଼ିଶା-୨୦୩୬’ ଏବଂ ‘ବିକଶିତ ଭାରତ-୨୦୪୭’ ଲକ୍ଷ୍ୟକୁ ସାକାର କରିବାରେ ଏହି ପଦକ୍ଷେପ ଗୁରୁତ୍ୱପୂର୍ଣ୍ଣ ଭୂମିକା ନେବ।

ନୂଆଦିଲ୍ଲୀ/ଭୁବନେଶ୍ୱର: ନୀତି ଆୟୋଗର ୧୧ତମ ଗଭର୍ଣ୍ଣିଂ କାଉନ୍ସିଲ୍ ବୈଠକରେ ଓଡ଼ିଶା ପୁଣି ଥରେ ନିଜ ସାମର୍ଥ୍ୟର ଛାପ ଛାଡ଼ିଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ‘ବିକଶିତ ଭାରତ-୨୦୪୭’ ଲକ୍ଷ୍ୟ ସହ ‘ବିକଶିତ ଓଡ଼ିଶା’ର ଏକ ଦୂରଦର୍ଶୀ ରୋଡମ୍ୟାପ୍ ଉପସ୍ଥାପନ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଛନ୍ତି। ଆର୍ଥିକ ଶୃଙ୍ଖଳା, ଦ୍ରୁତ ଅଭିବୃଦ୍ଧି, ଅର୍ଥନୈତିକ ବିକାଶ ଓ ମାନବ ସମ୍ପଦ ଗଠନ କ୍ଷେତ୍ରରେ ଓଡ଼ିଶାର ସଫଳତାକୁ ମୁଖ୍ୟମନ୍ତ୍ରୀ ଜାତୀୟ ମଞ୍ଚରେ ଉପସ୍ଥାପନ କରିଥିଲେ।

ବୈଠକରେ ପ୍ରଧାନମନ୍ତ୍ରୀଙ୍କ ନେତୃତ୍ୱକୁ ପ୍ରଶଂସା କରି ମୋହନ ମାଝୀ କହିଥିଲେ ଯେ, ବିଶ୍ୱସ୍ତରୀୟ ଅନିଶ୍ଚିତତା ମଧ୍ୟରେ ଭାରତର ଉର୍ଜା ସୁରକ୍ଷାକୁ ସୁଦୃଢ଼ କରିବା ଓ ବିକଳ୍ପ ଇନ୍ଧନକୁ ପ୍ରୋତ୍ସାହନ ଦେବା ଦିଗରେ କେନ୍ଦ୍ର ସରକାରଙ୍କ ପଦକ୍ଷେପ ଦେଶକୁ ନୂଆ ଦିଗ ଦେଉଛି।

୭.୯ ପ୍ରତିଶତ ଅଭିବୃଦ୍ଧି, ଆର୍ଥିକ ସ୍ୱାସ୍ଥ୍ୟରେ ଦେଶରେ ନଂ-୧

୨୦୨୫-୨୬ ଆର୍ଥିକ ବର୍ଷରେ ଓଡ଼ିଶା ୭.୯ ପ୍ରତିଶତ ଆର୍ଥିକ ଅଭିବୃଦ୍ଧି ହାସଲ କରିଥିବା ବେଳେ ରାଜ୍ୟର ଋଣ ଓ ଆର୍ଥିକ ନିଅଣ୍ଟ FRBM ମାନଦଣ୍ଡ ମଧ୍ୟରେ ରହିଛି। ଏହାର ପ୍ରତିଫଳ ସ୍ୱରୂପ ନୀତି ଆୟୋଗର Fiscal Health Index-2026ରେ ଓଡ଼ିଶା ଦେଶରେ ପ୍ରଥମ ସ୍ଥାନ ଅଧିକାର କରିଛି। ଏହା ରାଜ୍ୟର ସୁଦୃଢ଼ ଆର୍ଥିକ ପରିଚାଳନା ଓ ଦାୟିତ୍ୱବୋଧର ପ୍ରମାଣ ବୋଲି ମୁଖ୍ୟମନ୍ତ୍ରୀ କହିଛନ୍ତି।

ରେଳ, ବନ୍ଦର ଓ ସେମିକଣ୍ଡକ୍ଟରରେ ବଡ଼ ଲମ୍ଫ

ଅବକାଠା ବିକାଶ କ୍ଷେତ୍ରରେ ମଧ୍ୟ ଓଡ଼ିଶା ଦ୍ରୁତ ଗତିରେ ଆଗକୁ ବଢ଼ୁଛି। କେନ୍ଦ୍ର ବଜେଟ୍ ୨୦୨୬-୨୭ରେ ରେଳ ବିକାଶ ପାଇଁ ଓଡ଼ିଶାକୁ ୧୦,୯୨୮ କୋଟି ଟଙ୍କା ମଞ୍ଜୁର ହୋଇଥିବା ବେଳେ ରାଜ୍ୟରେ ୯୦ ହଜାର କୋଟି ଟଙ୍କାରୁ ଅଧିକ ମୂଲ୍ୟର ପ୍ରକଳ୍ପ କାର୍ଯ୍ୟକାରୀ ହେଉଛି।

ସାଗରମାଳା ଓ PM ଗତିଶକ୍ତି ଯୋଜନା ମାଧ୍ୟମରେ ଓଡ଼ିଶା ପୂର୍ବ ଭାରତର ଏକ ବୃହତ୍ ଲଜିଷ୍ଟିକ୍ସ ଓ ସାମୁଦ୍ରିକ କେନ୍ଦ୍ରରେ ପରିଣତ ହେଉଛି। ପ୍ରସ୍ତାବିତ ବାହୁଦା ଡିପ୍ ସି ପୋର୍ଟ ଓ ନ୍ୟାସନାଲ୍ ୱାଟରୱେ-୫ ରାଜ୍ୟର ବାଣିଜ୍ୟ ଓ ରପ୍ତାନି କ୍ଷମତାକୁ ନୂଆ ଉଚ୍ଚତାକୁ ନେବ। ଏହାସହ ଇଣ୍ଡିଆ ସେମିକଣ୍ଡକ୍ଟର ମିଶନ୍ ଅଧୀନରେ ଦୁଇଟି ସେମିକଣ୍ଡକ୍ଟର ପ୍ରକଳ୍ପକୁ ମଞ୍ଜୁରି ମିଳିବା ରାଜ୍ୟକୁ ଉନ୍ନତ ପ୍ରଯୁକ୍ତି ଓ ଇଲେକ୍ଟ୍ରୋନିକ୍ସ ଉତ୍ପାଦନର ଏକ ନୂଆ ହବ୍ ଭାବେ ଗଢ଼ି ତୋଳିବ।

ଶିଶୁରୁ ଯୁବକ ପର୍ଯ୍ୟନ୍ତ, ମାନବ ବିକାଶରେ ଫୋକସ୍

‘Inclusive Human Development’ ଥିମ୍‌କୁ ଗୁରୁତ୍ୱ ଦେଇ ମୋହନ ମାଝୀ କହିଥିଲେ ଯେ, ଓଡ଼ିଶା କେବଳ ରାସ୍ତା, ସେତୁ କିମ୍ବା କାରଖାନା ନିର୍ମାଣରେ ସୀମିତ ନୁହେଁ, ବରଂ ମାନବ ସମ୍ପଦ ଗଠନକୁ ସର୍ବାଧିକ ପ୍ରାଥମିକତା ଦେଉଛି।

‘ଆମ କୁନି ପିଲା’ କାର୍ଯ୍ୟକ୍ରମ ମାଧ୍ୟମରେ ୦ରୁ ୩ ବର୍ଷ ବୟସର ଶିଶୁଙ୍କ ବିକାଶ ଉପରେ ବିଶେଷ ଧ୍ୟାନ ଦିଆଯାଉଛି। ଶିକ୍ଷା କ୍ଷେତ୍ରରେ ୪୪,୮୭୫ଟି ଶିଶୁ ବାଟିକା ଶ୍ରେଣୀକକ୍ଷ ସ୍ଥାପନ ହୋଇଥିବା ବେଳେ ୩.୧୭ ଲକ୍ଷରୁ ଅଧିକ ଶିଶୁ ଉପକୃତ ହେଉଛନ୍ତି। ପ୍ରତ୍ୟେକ ଗ୍ରାମ ପଞ୍ଚାୟତରେ ମଡେଲ୍ ପ୍ରାଥମିକ ବିଦ୍ୟାଳୟ ସ୍ଥାପନ ଲକ୍ଷ୍ୟ ରହିଛି।

ଝିଅମାନଙ୍କ ପାଇଁ ବଡ଼ ଉପହାର

ମୁଖ୍ୟମନ୍ତ୍ରୀ କନ୍ୟା ସୁମଙ୍ଗଳା ଯୋଜନା ଅଧୀନରେ ଝିଅମାନଙ୍କୁ ସର୍ତ୍ତମୂଳକ ଆର୍ଥିକ ସହାୟତା ସହ ପରିପକ୍ୱତା ବେଳେ ୧ ଲକ୍ଷ ୧ ଟଙ୍କା ପ୍ରଦାନ କରାଯିବ। ଏହା ମହିଳା ସଶକ୍ତିକରଣ ଦିଗରେ ଏକ ବଡ଼ ପଦକ୍ଷେପ ବୋଲି କୁହାଯାଉଛି।

ଦକ୍ଷତା, କ୍ରୀଡ଼ା ଓ ଟେକ୍ନୋଲୋଜିରେ ନୂଆ ଯୁଗ

ରାଜ୍ୟର ୧୦ଟି ITIକୁ ‘ଉତ୍କର୍ଷ ITI’ରେ ପରିଣତ କରାଯାଉଥିବା ବେଳେ ପ୍ରତ୍ୟେକରେ ୧୦୦ କୋଟି ଟଙ୍କା ନିବେଶ ହେବ। ଏହାସହ ୱାର୍ଲ୍ଡ ସ୍କିଲ୍ ସେଣ୍ଟରର ସମ୍ପ୍ରସାରଣ, PM SETU ଯୋଜନା କାର୍ଯ୍ୟକାରୀ କରିବା ଓ ନୂଆ ଦକ୍ଷତା ବିକାଶ କେନ୍ଦ୍ର ସ୍ଥାପନ ଯୋଜନା ରହିଛି।

କ୍ରୀଡ଼ା କ୍ଷେତ୍ରରେ ଦେଶରେ ପ୍ରଥମ ଥର ପାଇଁ ୩୧୪ଟି ବ୍ଲକ୍ ସ୍ତରୀୟ ଷ୍ଟାଡିୟମ୍ ନିର୍ମାଣ କରାଯାଉଛି। ସେହିପରି AgriStack, Ama Sathi ଭଳି ଡିଜିଟାଲ୍ ପ୍ଲାଟଫର୍ମ ଓ AIର ବ୍ୟବହାର ମାଧ୍ୟମରେ ଶାସନ ବ୍ୟବସ୍ଥାକୁ ଅଧିକ ସ୍ୱଚ୍ଛ ଓ ଜନମୁଖୀ କରାଯାଉଛି।

“ବିକଶିତ ଭାରତର ସ୍ୱପ୍ନ ସାକାର ହେବା ସହ ଓଡ଼ିଶା ଦେଶର ଏକ ଶକ୍ତିଶାଳୀ ସ୍ତମ୍ଭ ଭାବେ ଉଭା ହେବ,” ବୋଲି ନୀତି ଆୟୋଗ ମଞ୍ଚରୁ ଦୃଢ଼ ବିଶ୍ୱାସ ବ୍ୟକ୍ତ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ।

କୋରାପୁଟ: କୋରାପୁଟବାସୀଙ୍କ ପାଇଁ ଆସିଛି ଖୁସି ଖବର । ଜଗା ଦର୍ଶନ ପାଇଁ ଫିଟିଲା ବାଟ, ସାବର ଶ୍ରୀକ୍ଷେତ୍ରରୁ ଶ୍ରୀକ୍ଷେତ୍ରକୁ ଗଡ଼ିବ ଟ୍ରେନ । ଦୀର୍ଘ ଦିନର ଦାବି ପରେ ଶେଷରେ ସାବର ଶ୍ରୀକ୍ଷେତ୍ର କୋରାପୁଟରୁ ଶ୍ରୀକ୍ଷେତ୍ର ପୁରୀକୁ ଯୋଡିହେବ ସ୍ଵତନ୍ତ୍ର ଟ୍ରେନ । ଏହି ଟ୍ରେନ୍ ଚଳାଚଳ ଫଳରେ ଏବେ କୋରାପୁଟବାସୀଙ୍କ ଯାତାୟତ ସମସ୍ୟା ଦୂର ହେବା ସହ ଜଗନ୍ନାଥ ଦର୍ଶନ ପାଇଁ ଯାତ୍ରା ହେବ ସହଜ । 

ଦୀର୍ଘ ଦିନ ଧରି କୋରାପୁଟବାସୀ ଦାବି କରୁଥିଲେ ସିଧାସଳଖ ପୁରୀକୁ ଟ୍ରେନ୍ ସେବା ପାଇଁ । କାରଣ ଶ୍ରୀଜଗନ୍ନାଥଙ୍କ ଦର୍ଶନ ପାଇଁ ପୁରୀ ଯିବାକୁ ଯାତ୍ରୀମାନଙ୍କୁ ବହୁତ ସମସ୍ୟାର ସମ୍ମୁଖୀନ ହେବାକୁ ପଡ଼ୁଥିଲା । ଟ୍ରେନ୍ ବଦଳାଇବା ସହ ଦୀର୍ଘ ସମୟର ଯାତ୍ରା ଯାତ୍ରୀଙ୍କୁ ଅସୁବିଧାରେ ପକାଉଥିଲା କିନ୍ତୁ ଏବେ ସେହି ସମସ୍ୟାର ଅନ୍ତ ହୋଇଛି । ସାବର ଶ୍ରୀକ୍ଷେତ୍ର ଭାବେ ପରିଚିତ କୋରାପୁଟରୁ ଶ୍ରୀକ୍ଷେତ୍ର ପୁରୀକୁ ଆରମ୍ଭ ହୋଇଛି ସିଧାସଳଖ ଟ୍ରେନ୍ ସେବା । ଏହା ଫଳରେ କୋରାପୁଟ ସହ ଦକ୍ଷିଣ ଓଡ଼ିଶାର ହଜାର ହଜାର ଲୋକ ଉପକୃତ ହେବେ । ସବୁଠାରୁ ବଡକଥା କି ରାଜ୍ୟ ରାଜଧାନୀକୁ ମଧ୍ୟ ହିରାଖଣ୍ଡ ଏକ୍ସପ୍ରେସ ବ୍ୟତିତ ଆଉ ଏକ ଦ୍ୱିତୀୟ ଟ୍ରେନ ସଂଯୋଗ ପାଇଁ ମଧ୍ୟ ଦାବି ବେସ ଜୋର ଧରିଥିଲ। ବର୍ତମାନ ଏହି ନୂତନ ଟ୍ରେନ ଏବେ ଏହି ସମସ୍ୟାର ଗୋଟେ ପ୍ରକାର ଅନ୍ତ ଘଟାଇଛି । ବର୍ତମାନ ଏହି ଟ୍ରେନ କୋରାପୁଟ ବଦଳରେ ଯଦି ଜୟପୁର ସହରକୁ ସମ୍ପ୍ରସାରଣ ହୁଏ ତେବେ ନିହାତି ଭାବରେ କୋରାପୁଟ ସମେତ ପଡୋଶୀ ଜିଲ୍ଲା ମାଲକାନଗିରି ଓ ନବରଙ୍ଗପୁର ବାସୀମାନେ ମଧ୍ୟ ବେସ ଲାଭବାନ ହୋଇ ପାରିବେ ବୋଲି ସ୍ଥାନୀୟ ବାସିନ୍ଦାମାନେ ମତ ପ୍ରକାଶ କରିଛନ୍ତି |

ନୂଆ ଟ୍ରେନ୍ ସେବାକୁ ନେଇ ଯାତ୍ରୀମାନଙ୍କ ମଧ୍ୟରେ ଦେଖିବାକୁ ମିଳିଛି ଭାରି ଉତ୍ସାହ । ବିଶେଷ କରି ଜଗନ୍ନାଥ ପ୍ରେମୀ ଓ ବ୍ୟବସାୟୀମାନେ ଏହାକୁ ସ୍ୱାଗତ କରିଛନ୍ତି । ଏହି ଟ୍ରେନ୍ ଚଳାଚଳ ଫଳରେ ପର୍ଯ୍ୟଟନ ଓ ବ୍ୟବସାୟ କ୍ଷେତ୍ରରେ ମଧ୍ୟ ଉନ୍ନତି ଆସିବ ବୋଲି ଆଶା କରାଯାଉଛି । ସବୁଠାରୁ ବଡକଥା କି ଅନେକ ଦିନ ଧରି ଯାତ୍ରୀମାନେ ଏହି ପୁରୀ ଟ୍ରେନ ପାଇଁ ଦାବି କରି ଆସୁଥିଲେ ଯାହାକୁ ନଜରରେ ରଖି ପ୍ରଥମ ଥର ପାଇଁ  ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ କୋରାପୁଟ ଭଳି ପର୍ଯ୍ୟଟନ ସ୍ଥାନକୁ ଯୋଗାଯୋଗର ସୁବିଧା ପାଇଁ ଏହି ଟ୍ରେନକୁ ଆରମ୍ଭ କରିଛନ୍ତି | ଏହି ଟ୍ରେନ କୋରାପୁଟରୁ ସକାଳ 5 ଟା ରେ ବାହାରି ରାତି 10.20 ରେ ପୁରୀରେ ପହଞ୍ଚିବ । ସେହିଭଳି ପୁରୀରୁ ସକାଳ 7 ଟାରେ ବାହାରି ରାତି 11.30 ରେ ପହଞ୍ଚିବ | କୋରାପୁଟ ସମେତ ପଶ୍ଚିମ ଓଡିଶାର ଅନେକ ଜିଲ୍ଲାକୁ ସଂଯୋଗ କରିବ ଏହି ରେଳ |

ଆପଣ ଅନେକ ଥର ଏଭଳି ଗଛଗୁଡ଼ିକ ବିଷୟରେ ଶୁଣିଥିବେ, ଯେଉଁଥିରେ ଏକ ସଙ୍ଗେ ଅନେକ ପ୍ରକାରର ଆମ୍ବ ଫଳିଥାଏ। ଏଭଳି ପରିସ୍ଥିତିରେ ଲୋକେ ଏହା ଭାବନ୍ତି  ଯେ ଏମିତି କେମିତି ହୁଏ? ପ୍ରକୃତରେ, ଏହା କୌଣସି ଜାଦୁ ନୁହେଁ ବରଂ ବୈଜ୍ଞାନିକ ପ୍ରଯୁକ୍ତିବିଦ୍ୟାର କମାଲ। ବିଶେଷ କରି ଆମ୍ବ ଗଛଗୁଡ଼ିକରେ ଏହି ପ୍ରଯୁକ୍ତିବିଦ୍ୟାର ବ୍ୟବହାର ବହୁତ ଲୋକପ୍ରିୟ ହେଉଛି, କାରଣ ଏହାଦ୍ୱାରା ଚାଷୀ ଏବଂ ବଗିଚା ମାଲିକମାନେ କମ୍ ଜାଗାରେ ଅଧିକ କିସମର ଫଳ ଗୋଟିଏ ହିଁ ଗଛରେ ଉଗାଇ ପାରିବେ। ଏହି ପ୍ରଯୁକ୍ତିବିଦ୍ୟାକୁ ଗ୍ରାଫ୍ଟିଙ୍ଗ୍  କୁହାଯାଏ। ଯାହାର ସାହାଯ୍ୟରେ ଆପଣ ଗୋଟିଏ ହିଁ ଗଛରେ ଅନେକ ପ୍ରକାରର ଫଳ ଉଗାଇ ପାରିବେ।

ଏହି ପ୍ରଣାଳୀ ଏବେ ବହୁତ ଅଧିକ ପପୁଲାର ହେଉଛି। ବିଶେଷ କରି ଆମ୍ବ ଗଛ ଏବଂ ପନିପରିବାରେ ଏହାର ବ୍ୟବହାର ବହୁତ ଅଧିକ ହୋଇଗଲାଣି। ଚାଲନ୍ତୁ ଜାଣିବା ଗ୍ରାଫ୍ଟିଙ୍ଗ୍ ପ୍ରଣାଳୀ କ’ଣ ଅଟେ? ଏହାକୁ କିପରି ବ୍ୟବହାର କରାଯାଏ ଏବଂ ଏହା ସହ ଜଡ଼ିତ ଅନେକ ଜରୁରୀ କଥା।

କ’ଣ ଅଟେ ଗ୍ରାଫ୍ଟିଙ୍ଗ୍ ପ୍ରଣାଳୀ?

ଗ୍ରାଫ୍ଟିଙ୍ଗ୍ ଏକ ଏଭଳି ପ୍ରକ୍ରିୟା ଅଟେ, ଯେଉଁଥିରେ ଦୁଇଟି ଅଲଗା ଅଲଗା ଗଛର ଅଂଶ କିମ୍ବା ଡାଳକୁ ଯୋଡ଼ି ଏକ ନୂଆ ଗଛ ପ୍ରସ୍ତୁତ କରାଯାଏ। ଯାହାକୁ “ରୁଟ୍ଷ୍ଟକ୍” (Rootstock) କୁହାଯାଏ। ଏହା ସହିତ ଅନ୍ୟ ଗଛର ଶାଖା କିମ୍ବା କଲମୀ, ଯାହାକୁ “ସାୟନ୍” (Scion) କୁହାଯାଏ, ତାହାକୁ ଯୋଡ଼ାଯାଏ। ଯେତେବେଳେ ଏହି ଦୁଇଟିଯାକ ଅଂଶ ସଠିକ୍ ଭାବେ ଯୋଡ଼ି ହୋଇଯାଏ, ସେତେବେଳେ ସେଗୁଡ଼ିକ ଗୋଟିଏ ହିଁ ଗଛ ଭଳି ବଢ଼ିବାକୁ ଲାଗନ୍ତି। ଏହି ପ୍ରଣାଳୀର ସାହାଯ୍ୟରେ ଗୋଟିଏ ଗଛରୁ ଅଲଗା ଅଲଗା କିସମର ଫଳ ଉତ୍ପନ କରାଯାଇପାରେ, ଯେମିତି କି ଗୋଟିଏ ହିଁ ଆମ୍ବ ଗଛରେ ଦଶହରୀ, ଲଙ୍ଗଡ଼ା ଏବଂ ଅଲଫାନ୍ସୋ ଭଳି ଅନେକ କିସମ ଫଳିବା।

ଆମ୍ବ ଗଛ ପାଇଁ କିପରି କରିବେ ଗ୍ରାଫ୍ଟିଙ୍ଗ୍?

ଯଦି ଆପଣଙ୍କ ଘରେ କମ୍ ଜାଗା ଅଛି ଏବଂ ଆପଣ ଗୋଟିଏ ହିଁ ଗଛରେ ଆମ୍ବର ଅନେକ କିସମ ଅମଳ କରିବାକୁ ଚାହୁଁଛନ୍ତି ତେବେ ଗ୍ରାଫ୍ଟିଙ୍ଗ୍ ଏକ ଭଲ ଉପାୟ ଅଟେ। ଏଥିପାଇଁ ଆପଣଙ୍କୁ ସବୁଠାରୁ ପ୍ରଥମେ ଏକ ସୁସ୍ଥ ଏବଂ ମଜଭୁତ ରୁଟ୍ଷ୍ଟକ୍ ଅର୍ଥାତ୍ ଚେର ଥିବା ଗଛକୁ ବାଛିବାକୁ ହେବ। ଏହାପରେ ଯେଉଁ କିସମଗୁଡ଼ିକର ଆମ୍ବ ଅମଳ କରିବାର ଅଛି, ସେଗୁଡ଼ିକର ସୁସ୍ଥ ଏବଂ ସତେଜ ଡାଳ ନିଅନ୍ତୁ। ଗଛର ଶାଖା ଉପରେ ହାଲୁକା କଟ୍  ଲଗାଇ ଅନ୍ୟ କିସମର ଡାଳକୁ ସେଥିରେ ଫିଟ୍ କରନ୍ତୁ ଏବଂ ପ୍ଲାଷ୍ଟିକ୍ ଟେପ୍ କିମ୍ବା ଗ୍ରାଫ୍ଟିଙ୍ଗ୍ ଟେପ୍ରେ ଭଲ ଭାବେ ବାନ୍ଧି ଦିଅନ୍ତୁ। ଧ୍ୟାନ ରଖନ୍ତୁ ଯେ ଦୁଇଟିଯାକ ଅଂଶର କଣ୍ଟାକ୍ଟ (ସମ୍ପର୍କ) ସଠିକ୍ ଭାବେ ହେଉ, ତେବେ ଯାଇ ଗ୍ରାଫ୍ଟିଙ୍ଗ୍ ସଫଳ ହୋଇଥାଏ। କିଛି ସପ୍ତାହ ପରେ ଯେତେବେଳେ ନୂଆ ପତ୍ର ବାହାରିବାକୁ ଲାଗେ, ତେବେ ଏହାର ଅର୍ଥ ହେଉଛି ଯେ ଗ୍ରାଫ୍ଟିଙ୍ଗ୍ ସଫଳ ରହିଲା।

ଗ୍ରାଫ୍ଟିଙ୍ଗ୍ ପରେ ଆମ୍ବ ଗଛର ଯତ୍ନ ନେବାର ଟିପ୍ସ

ଯଦି ଆପଣ ଗ୍ରାଫ୍ଟିଙ୍ଗ୍ ସାହାଯ୍ୟରେ ଫଳ ଅମଳ କରୁଛନ୍ତି ତେବେ ଏହାର ଯତ୍ନ ନେବା ମଧ୍ୟ ଜରୁରୀ ଅଟେ। ଆରମ୍ଭରେ ଗ୍ରାଫ୍ଟିଙ୍ଗ୍ କରାଯାଇଥିବା ଗଛକୁ ହାଲୁକା ଖରାରେ ରଖିବାକୁ ହୋଇଥାଏ।ଏହା ସହିତ ମାଟିକୁ ବହୁତ ଅଧିକ ଓଦା ହେବାରୁ ମଧ୍ୟ ବଞ୍ଚାଇବା ଉଚିତ୍। ବହୁତ ଅଧିକ ପାଣି ଦେବା ଦ୍ୱାରା ଚେର ଖରାପ ହୋଇପାରେ। ସବୁଠାରୁ ଜରୁରୀ କଥା ସମୟ ସମୟରେ ଶୁଖିଲା କିମ୍ବା ଦୁର୍ବଳ ଶାଖାଗୁଡ଼ିକୁ ହଟାଉଥାନ୍ତୁ, ଯଦ୍ୱାରା ଗଛର ଏନର୍ଜି (ଶକ୍ତି) ସଠିକ୍ ବିକାଶରେ ଲାଗିପାରିବ। ସମୟ ସମୟରେ ଜୈବିକ ଖତର ମଧ୍ୟ ବ୍ୟବହାର କରନ୍ତୁ। ଏହାଦ୍ୱାରା ଗଛର ଗ୍ରୋଥ୍ (ବୃଦ୍ଧି) ଭଲ ହୋଇଥାଏ ଏବଂ ଫଳ ମଧ୍ୟ ଶୀଘ୍ର ଆସିଥାଏ।

ଭୁବନେଶ୍ୱର: ଓଡ଼ିଶାର ଭିତ୍ତିଭୂମି ବିକାଶକୁ ମିଳିଲା ନୂଆ ଗତି। ରାଜ୍ୟର ଉପାନ୍ତରୁ ଉପକୂଳ ପର୍ଯ୍ୟନ୍ତ ସଡ଼କ ସଂଯୋଗକୁ ସୁଦୃଢ଼ କରିବା ପାଇଁ କେନ୍ଦ୍ର ସରକାର ନେଇଛନ୍ତି ବଡ଼ ନିଷ୍ପତ୍ତି। ୨୦୨୬-୨୭ ଆର୍ଥିକ ବର୍ଷ ପାଇଁ କେନ୍ଦ୍ରୀୟ ସଡ଼କ ଓ ଭିତ୍ତିଭୂମି ପାଣ୍ଠି (CRIF) ଯୋଜନା ଅଧୀନରେ ଓଡ଼ିଶାର ୧୦ଟି ଗୁରୁତ୍ୱପୂର୍ଣ୍ଣ ସଡ଼କ ଓ ଫ୍ଲାଇଓଭର ପ୍ରକଳ୍ପ ପାଇଁ ୭୬୯ କୋଟିରୁ ଅଧିକ ଟଙ୍କା ମଞ୍ଜୁର କରାଯାଇଛି।

ଏହି ବୃହତ୍ ପ୍ରକଳ୍ପ ଘୋଷଣା ପରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସୋସିଆଲ୍ ମିଡିଆ ‘X’ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ କେନ୍ଦ୍ର ସଡ଼କ ପରିବହନ ମନ୍ତ୍ରୀ ନୀତିନ ଗଡକରୀଙ୍କୁ ଧନ୍ୟବାଦ ଜଣାଇଛନ୍ତି। ସେ କହିଛନ୍ତି, ଏହି ପ୍ରକଳ୍ପଗୁଡ଼ିକ ଦୁର୍ଗମ ଓ ଉପାନ୍ତ ଅଞ୍ଚଳରେ ଯୋଗାଯୋଗ ବ୍ୟବସ୍ଥାରେ ବୈପ୍ଳବିକ ପରିବର୍ତ୍ତନ ଆଣିବ।

ବିଶେଷ କରି ବ୍ରହ୍ମପୁରରେ ଦୁଇଟି ବଡ଼ ଫ୍ଲାଇଓଭର ପ୍ରକଳ୍ପ ନଗର ଯାତାୟାତକୁ ସହଜ କରିବାକୁ ଯାଉଛି। ଟାଟା ବେଞ୍ଜ ଛକରୁ MKCG ପର୍ଯ୍ୟନ୍ତ ୧୪୬ କୋଟିର ଫ୍ଲାଇଓଭର ଓ ଗିରିରୋଡ଼ ଛକରୁ ପୁରୁଣା ବସ୍‌ଷ୍ଟାଣ୍ଡ ପର୍ଯ୍ୟନ୍ତ ୧୬୮ କୋଟିର ଫ୍ଲାଇଓଭର ନିର୍ମାଣ ହେବ। ସେହିପରି ଝାରସୁଗୁଡାରେ ଆପ୍ରୋଚ୍ ବ୍ରିଜ, କୋରାପୁଟରେ ରାସ୍ତା ଉନ୍ନତିକରଣ, ନବରଙ୍ଗପୁରରେ ରାସ୍ତା ପ୍ରଶସ୍ତିକରଣ, ଗଜପତି ଓ ନୂଆପଡାରେ ସଡ଼କ ସୁଦୃଢୀକରଣ ସହ ବାଲେଶ୍ୱରର ଜଳେଶ୍ୱର-ଚନ୍ଦନେଶ୍ୱର ରାସ୍ତାର ମେଗା ଉନ୍ନତିକରଣ କାମ ହେବ।

ପ୍ରଶାସନର ଆକଳନ ଅନୁଯାୟୀ, ଏହି ସବୁ ପ୍ରକଳ୍ପ କେବଳ ଯାତାୟାତକୁ ସହଜ କରିବ ନୁହେଁ, ବରଂ ଶିକ୍ଷା, ସ୍ୱାସ୍ଥ୍ୟ, ବ୍ୟବସାୟ ଓ ପର୍ଯ୍ୟଟନ କ୍ଷେତ୍ରରେ ମଧ୍ୟ ନୂଆ ସମ୍ଭାବନା ସୃଷ୍ଟି କରିବ। ରାଜ୍ୟର ଅର୍ଥନୀତିକୁ ଗତି ଦେବା ସହ ହଜାର ହଜାର ଲୋକଙ୍କ ପାଇଁ ଏହା ନୂଆ ଆଶାର ସଡ଼କ ଖୋଲିବ ବୋଲି ଚର୍ଚ୍ଚା ହେଉଛି।

ଅଧିକ ପଢନ୍ତୁ: ରଥଯାତ୍ରା ପାଇଁ ଆସନ୍ତାକାଲି ପ୍ରଥମ ସମନ୍ୱୟ ବୈଠକ; ସୁପରିଚାଳନା ପାଇଁ ବ୍ଲୁପ୍ରିଣ୍ଟ ପ୍ରସ୍ତୁତ, ବିଭିନ୍ନ ବିଭାଗ ମଧ୍ୟରେ ହେବ ଆଲୋଚନା

Under the Central Road and Infrastructure Fund (CRIF) scheme for the financial year 2026–27, projects worth over ₹769 crore have been sanctioned for 10 key infrastructure works across various regions of Odisha. These initiatives are expected to significantly strengthen… pic.twitter.com/aXh4tePPVL

— Mohan Charan Majhi (@MohanMOdisha) May 7, 2026

ଏଲନ୍ ମସ୍କ ବହୁତ ସମୟ ଧରି X କୁ ‘ଏଭ୍ରିଥିଙ୍ଗ୍ ଆପ୍’ (ଗୋଟିଏ ଆପ୍‌ରେ ସବୁକିଛି ମିଳୁଥିବା) ବନାଇବା କଥା କହୁଛନ୍ତି। XChat ପରେ ଏବେ ଏଲନ୍ ମସ୍କଙ୍କ ପରବର୍ତ୍ତୀ ପଦକ୍ଷେପ ଆପ୍‌ରେ ପେମେଣ୍ଟସ ଫିଚର୍‌କୁ ସାମିଲ କରିବା। ରିପୋର୍ଟ ଅନୁସାରେ, X Money ନାମକ ଏକ ନୂଆ ସେବା ଏବେ ଲଞ୍ଚ୍ ହେବାକୁ ଯାଉଛି ଏବଂ ଏହା ବ୍ୟାଙ୍କିଙ୍ଗ୍ ଏବଂ କାରବାର (ଟ୍ରାଞ୍ଜାକସନ୍) କୁ ସିଧାସଳଖ ଆପ୍ ଭିତରେ ହିଁ ଏକୀକୃତ (ଇଣ୍ଟିଗ୍ରେଟ୍) କରିପାରେ। ଏହା ଏପରି ଏକ କ୍ଷେତ୍ର ଯାହା ସହିତ ମସ୍କ ପୂର୍ବରୁ ହିଁ ପରିଚିତ, କାରଣ PayPal କୁ ବନାଇବାରେ ତାଙ୍କର ପ୍ରାରମ୍ଭିକ ଭୂମିକା ରହିଥିଲା। 

X Money ରେ କ’ଣ କ’ଣ ସୁବିଧା?

ବ୍ଲୁମବର୍ଗର ଏକ ରିପୋର୍ଟ ଅନୁସାରେ, X Money ରୁ ପିଅର୍-ଟୁ-ପିଅର୍ ପେମେଣ୍ଟସ (ଜଣେ ବ୍ୟକ୍ତିଙ୍କଠାରୁ ଅନ୍ୟ ଜଣେ ବ୍ୟକ୍ତିଙ୍କୁ ଟଙ୍କା ପଠାଇବା) ର ସୁବିଧା ମିଳିବା ଆଶା କରାଯାଉଛି। ଆପଣ ଆପ୍‌ରୁ ବାହାରକୁ ନ ଯାଇ, ସିଧାସଳଖ ଚାଟ୍ ଜରିଆରେ କିମ୍ବା କାହାର ପ୍ରୋଫାଇଲ୍ ଜରିଆରେ ବି ସେମାନଙ୍କୁ ଟଙ୍କା ପଠାଇପାରିବେ।

ଆକାଉଣ୍ଟ ସହିତ ଜଡ଼ିତ ଏକ ଡେବିଟ୍ କାର୍ଡର ମଧ୍ୟ ଉଲ୍ଲେଖ ଅଛି। କିଛି ରିପୋର୍ଟ ଅନୁସାରେ, ଏହା ଏକ ବ୍ୟକ୍ତିଗତ (ପର୍ସନାଲାଇଜଡ୍) Visa କାର୍ଡ ହୋଇପାରେ, ଯାହା ବୋଧହୁଏ ଆପଣଙ୍କ X ହ୍ୟାଣ୍ଡେଲ୍ ସହିତ ଜଡ଼ିତ। ଏହାଦ୍ୱାରା ଉପଭୋକ୍ତାମାନେ ଆପ୍ ବାହାରେ ବି ଟଙ୍କା ଖର୍ଚ୍ଚ କରିପାରିବେ। ଆଉ ଏକ ଫିଚର୍ ଯାହାର ପରୀକ୍ଷଣ (ଟେଷ୍ଟିଙ୍ଗ୍) ଚାଲିଛି, ତାହା ହେଉଛି xAI ଦ୍ୱାରା ପ୍ରସ୍ତୁତ ଏକ AI ସହାୟକ। ଏହା ଆପଣଙ୍କ ଖର୍ଚ୍ଚ ଉପରେ ନଜର ରଖିବା, ଆପଣଙ୍କ କାରବାରକୁ ସର୍ଟ କରିବା ଏବଂ ସହଜ ଉପାୟରେ ଏହା ଦେଖାଇବାରେ ଆପଣଙ୍କୁ ସାହାଯ୍ୟ କରିପାରେ ଯେ ଆପଣଙ୍କ ଟଙ୍କା କେଉଁଠାକୁ ଯାଉଛି।

କିଛି ପ୍ରାରମ୍ଭିକ ପରୀକ୍ଷକ କିଛି ଖାସ୍ ପେମେଣ୍ଟ ଉପରେ ୩ ପ୍ରତିଶତ ପର୍ଯ୍ୟନ୍ତ କ୍ୟାଶବ୍ୟାକ୍ ଏବଂ ପ୍ରାୟ ୬ ପ୍ରତିଶତର ସଞ୍ଚୟ ସୁଧ ହାର ବିଷୟରେ ମଧ୍ୟ ଜଣାଇଛନ୍ତି। ତେବେ, ଏହା ସ୍ପଷ୍ଟ ନୁହେଁ ଯେ ଏହି ଫାଇଦାଗୁଡ଼ିକ ଦୀର୍ଘ ସମୟ ପର୍ଯ୍ୟନ୍ତ ରହିବ କିମ୍ବା କେବଳ ପ୍ରାରମ୍ଭିକ ରୋଲଆଉଟ୍‌ର ଅଂଶ।

ଏୟାରଲାଇନ ଇଣ୍ଡଷ୍ଟ୍ରୀ ଉପରେ ଫୁଏଲ ସଙ୍କଟ, ବିମାନ ସେବା ବନ୍ଦ ହେବାର ବଢିଲା ବିପଦ

X Money ଲଞ୍ଚ୍ ସମୟସୀମା

କୁହାଯାଉଛି ଯେ X Money ଶୀଘ୍ର ସାଧାରଣ ଲୋକଙ୍କ ପାଇଁ ଉପଲବ୍ଧ ହେବାକୁ ଯାଉଛି, କିନ୍ତୁ ଏପର୍ଯ୍ୟନ୍ତ ଏହାର କୌଣସି ସ୍ଥିର ଲଞ୍ଚ୍ ତାରିଖ ନାହିଁ। ଏହାକୁ ଲଞ୍ଚ୍ କରିବାରେ ଆଶାଠାରୁ ଅଧିକ ସମୟ ଲାଗିଯାଇଛି, ଯାହାର ମୁଖ୍ୟ କାରଣ ଅନୁମୋଦନ (ଆପ୍ରୁଭାଲ୍) ମିଳିବାରେ ବିଳମ୍ବ। ଆମେରିକାରେ ପେମେଣ୍ଟ ସେବା ଚଲାଇବା ପାଇଁ, X କୁ ଅଲଗା ଅଲଗା ରାଜ୍ୟରେ ଲାଇସେନ୍ସର ଆବଶ୍ୟକତା ହୋଇଥାଏ। ଏଗୁଡ଼ିକ ମଧ୍ୟରୁ କିଛି ଲାଇସେନ୍ସ ଏବେ ବି ବିଚାରାଧୀନ (ପେଣ୍ଡିଙ୍ଗ୍) ଅଛି, ଯେପରିକି ନ୍ୟୁୟର୍କ ଭଳି ରାଜ୍ୟରେ, ଯେଉଁଥିପାଇଁ କାମର ଗତି ଧିମା ହୋଇଯାଇଛି। ଏହି କାରଣରୁ, ହୋଇପାରେ ଯେ ଏହା ଏକାସଙ୍ଗେ ସବୁ ସ୍ଥାନରେ ଲଞ୍ଚ୍ ହେବ ନାହିଁ।