ଅବୈଧ ଅନଲାଇନ୍ ବେଟିଂ କାରବାର ବିରୋଧରେ କେନ୍ଦ୍ରୀୟ ତଦନ୍ତକାରୀ ସଂସ୍ଥା CBIର ବଡ଼ ଆକ୍ସନ୍। ବହୁଚର୍ଚ୍ଚିତ ମହାଦେବ ଅନଲାଇନ୍ ବୁକ୍ ବେଟିଂ ଆପ୍‌ର ନେଟୱର୍କ ଉପରେ ଦେଶବ୍ୟାପୀ ଚଢ଼ାଉ କରିଛି CBI। ଗତ କିଛି ଦିନ ମଧ୍ୟରେ ୬ଟି ରାଜ୍ୟର ୩୩ଟି ସ୍ଥାନରେ ରେଡ୍ କରିଛି ତଦନ୍ତକାରୀ ଟିମ୍। ଏହି ଚଢ଼ାଉରେ ଅନେକ ବେଆଇନ୍ ବେଟିଂ ପ୍ୟାନେଲ୍‌ର ପର୍ଦ୍ଦାଫାଶ ହୋଇଛି।

ସୂଚନା ଅନୁସାରେ, ବିଭିନ୍ନ ସ୍ଥାନରେ ପ୍ୟାନେଲ୍ ଅପରେଟରଙ୍କ ଠିକଣାରେ ଚଢ଼ାଉ କରିଥିଲା CBI। ଏହି ସମୟରେ କେତେକ ସ୍ଥାନରେ ଲାଇଭ୍ ବେଟିଂ ଓ ଅନଲାଇନ୍ ଜୁଆ କାରବାର ଚାଲୁଥିବା ଧରାପଡ଼ିଥିଲା। ତୁରନ୍ତ ସେହି ପ୍ୟାନେଲ୍‌ଗୁଡ଼ିକୁ ବନ୍ଦ କରାଯାଇଥିଲା। ଚଢ଼ାଉ ବେଳେ ବିଭିନ୍ନ ସ୍ଥାନରୁ ମୋବାଇଲ୍ ଫୋନ୍, ଡିଜିଟାଲ୍ ଡିଭାଇସ୍ ଏବଂ ଅନେକ ଗୁରୁତ୍ୱପୂର୍ଣ୍ଣ ଦସ୍ତାବିଜ୍ ଜବତ ହୋଇଛି।

ତଦନ୍ତରୁ ଜଣାପଡ଼ିଛି ଯେ, ବେଟିଂ କାରବାରରୁ ମିଳୁଥିବା ଟଙ୍କାକୁ ମ୍ୟୁଲ୍ ବ୍ୟାଙ୍କ ଆକାଉଣ୍ଟ ଏବଂ ହାୱାଲା ନେଟୱର୍କ ଜରିଆରେ ଅନ୍ୟ ଦେଶକୁ ପଠାଯାଉଥିବା ସନ୍ଦେହ ରହିଛି। ଏହି କାରବାରରେ ଅନେକ ପ୍ୟାନେଲ୍ ଅପରେଟର ସାମିଲ୍ ଥିବା ଜଣାପଡ଼ିଛି।

ମହାଦେବ ବେଟିଂ ଆପ୍‌ର ଅନ୍ୟତମ ମୁଖ୍ୟ ପ୍ରମୋଟର ସୌରଭ ଚନ୍ଦ୍ରାକରଙ୍କୁ ପଚରାଉଚରା ପରେ ମିଳିଥିବା ତଥ୍ୟ ଆଧାରରେ ଏହି ଚଢ଼ାଉ କରାଯାଇଛି। ଓମାନରୁ ଭାରତକୁ ପ୍ରତ୍ୟର୍ପଣ ପରେ ନଭେମ୍ବର ୧ ତାରିଖରେ ତାଙ୍କୁ CBI ଗିରଫ କରିଥିଲା। ପଚରାଉଚରା ସମୟରେ ଆପ୍‌ର କାର୍ଯ୍ୟପ୍ରଣାଳୀ ଏବଂ ଦେଶର ବିଭିନ୍ନ ଅଞ୍ଚଳରେ ସକ୍ରିୟ ଥିବା ପ୍ୟାନେଲ୍ ଅପରେଟରଙ୍କ ନେଟୱର୍କ ସମ୍ପର୍କରେ ଅନେକ ତଥ୍ୟ ମିଳିଥିବା କୁହାଯାଉଛି।

ତଦନ୍ତ ଅନୁସାରେ, ମହାଦେବ ଆପ୍‌ର ମୁଖ୍ୟ ନେଟୱର୍କ ବିଦେଶରୁ ପରିଚାଳିତ ହେଉଥିବା ବେଳେ ଭାରତରେ ପ୍ୟାନେଲ୍ ଅପରେଟରଙ୍କ ଜରିଆରେ ବେଟିଂ କାରବାର ଚାଲୁଥିଲା। ଗ୍ରାହକଙ୍କ ପାଇଁ ବେଟିଂ ଆଇଡି ପ୍ରସ୍ତୁତ କରିବା ସହ ଅନ୍ୟମାନଙ୍କ ନାଁରେ ଖୋଲାଯାଇଥିବା ବ୍ୟାଙ୍କ ଆକାଉଣ୍ଟରେ ଟଙ୍କା ଜମା କରାଯାଉଥିଲା। ପରେ ହାୱାଲା ମାଧ୍ୟମରେ ଏହି ଟଙ୍କା ବିଦେଶକୁ ପଠାଯାଉଥିବା ତଦନ୍ତରୁ ସୂଚନା ମିଳିଛି।

ଏହି ମାମଲାରେ CBI ଦୁଇଟି FIR ରୁଜୁ କରି ତଦନ୍ତ ଜାରି ରଖିଛି। ଅନ୍ୟପଟେ ନଭେମ୍ବର ୧୩ରେ ପ୍ରବର୍ତ୍ତନ ନିର୍ଦ୍ଦେଶାଳୟ (ED) ମଧ୍ୟ ସୌରଭ ଚନ୍ଦ୍ରାକରଙ୍କୁ ଗିରଫ କରି ମନି ଲଣ୍ଡରିଂ ମାମଲାରେ ପଚରାଉଚରା ପାଇଁ ହେପାଜତକୁ ନେଇଛି।

ଏବେ ଏହି ବେଆଇନ୍ ନେଟୱର୍କରେ ସାମିଲ୍ ଅନ୍ୟ ଅଭିଯୁକ୍ତ, ବିଦେଶରେ ଥିବା ସହଯୋଗୀ ଏବଂ କାରବାରକୁ ସହଯୋଗ କରିଥିବା ସନ୍ଦିଗ୍ଧ ସରକାରୀ କର୍ମଚାରୀଙ୍କ ଭୂମିକା ଖୋଜୁଛି CBI। ଏହାସହ ବିଦେଶରେ ଫେରାର ଥିବା ଅନ୍ୟ ଅଭିଯୁକ୍ତଙ୍କୁ ଭାରତ ଆଣିବା ପାଇଁ ମଧ୍ୟ ତଦନ୍ତକାରୀ ସଂସ୍ଥା ପଦକ୍ଷେପ ନେଉଛି।

ଭୁବନେଶ୍ବର : ଲକ୍ଷ୍ମୀସାଗର ଥାନା ଅଞ୍ଚଳରେ ହତ୍ୟା ଘଟଣାରେ କ୍ରାଇମ୍‌ ସ୍ପଟ୍‌କୁ ନେଇ କ୍ରାଇମ୍‌ ସିନ୍‌ ରିକ୍ରିଏସନ କରିଛି ପୋଲିସ। 

ଆଜି ବୁଦ୍ଧନଗରସ୍ଥିତ ବୃଦ୍ଧା କୁଞ୍ଜଲତା ନନ୍ଦ ହତ୍ୟାକାଣ୍ଡ ଘଟଣାରେ ଅଭିଯୁକ୍ତ କେୟାରଟେକର ବଳଭଦ୍ର ମହାରଣାକୁ ନେଇ କମିଶନରେଟ୍ ପୋଲିସ କ୍ରାଇମ୍ ସିନ୍ ରିକ୍ରିଏସନ୍ କରିଛି। ସେ କିପରି ଘରେ ପଶିଲା, କିଭଳି ହତ୍ୟା କଲା ଏବଂ କେଉଁ ବାଟ ଦେଇ ଫେରାର ହେଲା ତାହା ପୋଲିସ ଆଗରେ ଗୋଟି ଗୋଟି କରି ବଖାଣିଛି।

ଗତ ନଭେମ୍ବର ୩ ତାରିଖ ରାତିରେ ଭୁବନେଶ୍ୱର ବୁଦ୍ଧନଗର ଅଞ୍ଚଳରେ ୭୬ ବର୍ଷୀୟା କୁଞ୍ଜଲତା ନନ୍ଦଙ୍କୁ ହତ୍ୟା କରାଯାଇଥିଲା। ଖୋର୍ଦ୍ଧା ଜିଲ୍ଲା ଟାଙ୍ଗୀ ଅଞ୍ଚଳର ୪୦ ବର୍ଷୀୟ ବଳଭଦ୍ର ମହାରଣା ଗତ ପାଞ୍ଚ ମାସରୁ ଅଧିକ ସମୟ ଧରି ମୃତକଙ୍କ ଘରେ କେୟାରଟେକର ଭାବେ କାମ କରୁଥିଲା ଏବଂ ଉପର ମହଲାରେ ରହୁଥିଲା।

ପୋଲିସ ତଦନ୍ତ ଅନୁଯାୟୀ, ପୂର୍ବରୁ ନିଜ ସ୍ତ୍ରୀଙ୍କୁ କାମରୁ ବାହାର କରିଦିଆଯାଇଥିବାର ପୁରୁଣା ରାଗ ଏବଂ ସୁନା ଗହଣା ଓ ଟଙ୍କା ଲୋଭରେ ବଳଭଦ୍ର ଏହି ହତ୍ୟାକାଣ୍ଡ ଘଟାଇଥିଲା। ଘରେ ବୃଦ୍ଧା ଜଣକ ଏକୁଟିଆ ଥିବାର ସୁଯୋଗ ନେଇ ସେ ତାଙ୍କୁ ତଣ୍ଟି ଚିପି ଓ ଆକ୍ରମଣ କରି ହତ୍ୟା କରିଥିଲା। ହତ୍ୟା ପରେ ଅଭିଯୁକ୍ତ ପୁରୀ, କୋଲକାତା, ରାଞ୍ଚି, ପାନିପଥ ଏବଂ ସୁରତ ଭଳି ବିଭିନ୍ନ ସହରକୁ ଯାଇ ପୋଲିସକୁ ଚକମା ଦେବାକୁ ଚେଷ୍ଟା କରିଥିଲା।

ଲକ୍ଷ୍ମୀସାଗର ଥାନା ପୋଲିସ ଓ ଗୁଜରାଟ ପୋଲିସର ମିଳିତ ଟିମ୍ ମୋବାଇଲ ଲୋକେସନ୍ ଟ୍ରାକ୍ କରି ଗୁଜରାଟର ଭଦୋଦରା ଜିଲ୍ଲାରେ ଏକ ଚଳନ୍ତା ବସ୍‌ରୁ ତାକୁ ଗିରଫ କରିଥିଲେ। ଟ୍ରାନଜିଟ୍ ରିମାଣ୍ଡରେ ଓଡ଼ିଶା ଅଣାଯିବା ପରେ, ପୋଲିସ ବଳଭଦ୍ରକୁ ଘଟଣାସ୍ଥଳକୁ ନେଇ ସମ୍ପୂର୍ଣ୍ଣ ହତ୍ୟାକାଣ୍ଡର ଡେମୋ ବା ସିନ୍ ରିକ୍ରିଏସନ୍ କରାଇଛି। 

ଅନ୍ୟପଟେ କୁଞ୍ଜଲତା ନନ୍ଦ ହତ୍ୟା ମାମଲାରେ ଲୁଟ ସାମଗ୍ରୀ ଜବତ ହୋଇଛି। ଘରୁ ଚୋରି ହୋଇଥିବା ସମସ୍ତ ସୁନା, ରୁପା ବାସନ ଜବତ ହୋଇଛି। ବିଭିନ୍ନ ପ୍ରକାର ଅଳଙ୍କାର ସହ ଗୋଲ୍ଡ ପ୍ଲେଟେଡ ତାସ ମଧ୍ୟ ଜବତ ହୋଇଛି। ପୁରୀ ବ୍ରହ୍ମଗିରି ଅଞ୍ଚଳର ସବିତା ସେଠୀ ନାମକ ମହିଳାଙ୍କ ଘରୁ ଚୋରି ଜିନିଷ ଜବତ ହୋଇଛି। ବଳଭଦ୍ର ସମସ୍ତ ଜିନିଷ ନେଇ ସେଠାରେ ରଖିଥିବା ଜଣାପଡିଛି। 

ଭୁବନେଶ୍ୱର: ବୃଦ୍ଧାଙ୍କୁ ହତ୍ୟା କରି ଲୁଟ୍ ଘଟଣାରେ ବଡ଼ ଖୁଲାସା। ସାଙ୍ଗ ଘରୁ ମିଳିଲା ପ୍ରାୟ ଅଧା କିଲୋ ସୁନା ଅଳଙ୍କାର। ଜବତ ସୁନା ଓ ଅନ୍ୟାନ୍ୟ ସାମଗ୍ରୀର ମୂଲ୍ୟ ୧୦ ଲକ୍ଷ ଟଙ୍କାରୁ ଅଧିକ ହେବ ବୋଲି ଜଣାପଡ଼ିଛି। ଏହି ଘଟଣାରେ କମିଶନରେଟ୍ ପୋଲିସ ଆଉ ଜଣେ ମହିଳାଙ୍କୁ ଗିରଫ କରିଛି।

ସୂଚନା ଅନୁସାରେ, ଭୁବନେଶ୍ୱର ବୁଦ୍ଧନଗର ଅଞ୍ଚଳରେ ୭୬ ବର୍ଷୀୟା କୁଞ୍ଜଲତା ନନ୍ଦଙ୍କୁ ଗତ ନଭେମ୍ବର ୩ ତାରିଖରେ ହତ୍ୟା କରାଯାଇଥିଲା। ଲକ୍ଷ୍ମୀସାଗର ଥାନା ଅଞ୍ଚଳରେ ଘଟିଥିବା ଏହି ହତ୍ୟା ଓ ଲୁଟ୍ ଘଟଣାରେ ତାଙ୍କ କେୟାରଟେକର ବଳରାମ ମହାରଣା ଓରଫ ବାଲିଆ ଅଭିଯୁକ୍ତ ଅଟନ୍ତି।

ପୋଲିସର ସୂଚନା ଅନୁଯାୟୀ, ହତ୍ୟା ପରେ ବଳରାମ ଲୁଟ୍ କରିଥିବା ସୁନା ଅଳଙ୍କାର ଓ ଅନ୍ୟାନ୍ୟ ସାମଗ୍ରୀକୁ ପୁରୀ ଜିଲ୍ଲା ବ୍ରହ୍ମଗିରିରେ ରହୁଥିବା ନିଜ ସାଙ୍ଗ ସବିତା ସେଠୀଙ୍କ ଘରେ ଲୁଚାଇ ରଖିଥିଲା। କାମରେ ବାହାରକୁ ଯାଉଥିବା କହି ସେ ତାଙ୍କ ଘରେ ଏହି ସାମଗ୍ରୀ ରଖିଥିଲା।

ପୋଲିସ ଉକ୍ତ ଘରୁ ପ୍ରାୟ ଅଧା କିଲୋ ଓଜନର ସୁନା ଅଳଙ୍କାର, ୫୨ଟି ସୁନା ଛାଉଣି ଖେଳ କାର୍ଡ, ରୁପା ବାସନ, ଲୁଟ୍ ଟଙ୍କା ଓ ଏକ ସ୍କୁଟି ଜବତ କରିଛି। ଜବତ ସାମଗ୍ରୀର ମୂଲ୍ୟ ୧୦ ଲକ୍ଷ ଟଙ୍କାରୁ ଅଧିକ ଆକଳନ କରାଯାଇଛି। 

ଘଟଣାର ୯ ଦିନ ପରେ ଗୁଜରାଟର ବଡୋଦରାରୁ ଅଭିଯୁକ୍ତ ବଳରାମକୁ ଗିରଫ କରିଥିଲା ପୋଲିସ। ହତ୍ୟା ଓ ଲୁଟ୍ ଉଦ୍ଦେଶ୍ୟରେ ସେ ଏହି ଅପରାଧ ଘଟାଇଥିବା ପୋଲିସ ଆଗରେ ସ୍ୱୀକାର କରିଥିବା କୁହାଯାଇଛି। ଅପରାଧ ବିଷୟରେ ଜାଣି ମଧ୍ୟ ଅଭିଯୁକ୍ତକୁ ସହଯୋଗ କରିଥିବା ଅଭିଯୋଗରେ ସବିତାଙ୍କୁ ମଧ୍ୟ ଗିରଫ କରାଯାଇଛି।

କଟକ/ବ୍ରହ୍ମପୁର: ବ୍ରହ୍ମପୁରର ବହୁଚର୍ଚ୍ଚିତ ଆଇନଜୀବୀ ପୀତବାସ ପଣ୍ଡା ହତ୍ୟାକାଣ୍ଡ ମାମଲାରେ ଆସିଛି ବଡ଼ ଅପଡେଟ୍। ୬ ଅଭିଯୁକ୍ତଙ୍କ ଜାମିନ ଆବେଦନ ଉପରେ ଶୁଣାଣି ଶେଷ କରିଛନ୍ତି ହାଇକୋର୍ଟ। ଉଭୟ ପକ୍ଷର ଯୁକ୍ତି ଶୁଣିବା ପରେ ମାନ୍ୟବର ଅଦାଲତ ରାୟ ସଂରକ୍ଷିତ ରଖିଛନ୍ତି। ଫଳରେ ଅଭିଯୁକ୍ତଙ୍କ ଜାମିନକୁ ନେଇ ଏବେ ସମସ୍ତଙ୍କ ନଜର ହାଇକୋର୍ଟଙ୍କ ପରବର୍ତ୍ତୀ ନିଷ୍ପତ୍ତି ଉପରେ।

ଏହି ମାମଲାରେ ଶିବ ଶଙ୍କର ଦାସ, ମଦନ ମୋହନ ଦଳାଇ, ସୁନୀଲ କୁମାର ହୋତା, ଯୋଗେନ୍ଦ୍ର ରାଉତ, ବିପିନ ସ୍ୱାଇଁ ଓ କାଳୁ ଚରଣ ଭୂୟାଁଙ୍କ ଜାମିନ ଆବେଦନର ଏକତ୍ର ଶୁଣାଣି ହୋଇଥିଲା। ଉଭୟ ପକ୍ଷଙ୍କ ଓକିଲ ନିଜ ନିଜ ପକ୍ଷରୁ ଯୁକ୍ତି ଉପସ୍ଥାପନ କରିଥିଲେ।

ସୋମବାର ସୁଦ୍ଧା ଲିଖିତ ଯୁକ୍ତି ଦାଖଲ ନିର୍ଦ୍ଦେଶ

ଶୁଣାଣି ଶେଷ ହେବା ପରେ ଉଭୟ ପକ୍ଷଙ୍କୁ ଆସନ୍ତା ସୋମବାର ସୁଦ୍ଧା ମାମଲା ସମ୍ପର୍କିତ ଲିଖିତ ଯୁକ୍ତି ଦାଖଲ କରିବାକୁ ହାଇକୋର୍ଟ ନିର୍ଦ୍ଦେଶ ଦେଇଛନ୍ତି। ଏବେ ରାୟ ସଂରକ୍ଷିତ ରହିଥିବାରୁ ୬ ଅଭିଯୁକ୍ତଙ୍କ ଜାମିନ ଆବେଦନ ଉପରେ ଅଦାଲତ କ'ଣ ନିଷ୍ପତ୍ତି ନେବେ, ତାହାକୁ ନେଇ ଚର୍ଚ୍ଚା ଜୋର ଧରିଛି।

ଦେବଗଡ଼: ଦେବଗଡ଼ ଜିଲ୍ଲାରେ ଚାଞ୍ଚଲ୍ୟ। ଜଣେ ୫ ବର୍ଷର ନିଷ୍ପାପ ଶିଶୁକନ୍ୟାଙ୍କ ସହ ଅମାନବୀୟ ଯୌନ ନିର୍ଯାତନା ଅଭିଯୋଗକୁ ନେଇ ସମଗ୍ର ଅଞ୍ଚଳରେ ତୀବ୍ର ଆକ୍ରୋଶ ଓ ଉଦ୍‌ବେଗ ପ୍ରକାଶ ପାଇଛି। ଗୁରୁତର ଆହତ ଶିଶୁକନ୍ୟାଙ୍କୁ ଉନ୍ନତ ଚିକିତ୍ସା ପାଇଁ ବୁର୍ଲା ସ୍ଥିତ ଭିମ୍‌ସାରକୁ ସ୍ଥାନାନ୍ତର କରାଯାଇଛି।

ପୋଲିସ ସୂତ୍ରରୁ ମିଳିଥିବା ସୂଚନା ଅନୁସାରେ, ରବିବାର ଦିନ କୁଣ୍ଢେଇଗୋଳା ଥାନା ଅନ୍ତର୍ଗତ କର୍ଲଗା ଗ୍ରାମର ଜଣେ ଯୁବକ ଦେବଗଡ଼ ସହର ଉପକଣ୍ଠସ୍ଥିତ ଏକ ଗ୍ରାମକୁ ଯାଇଥିଲେ। ସେ ପେସାରେ ଜଣେ ବୁଲା ଟେଲର ହୋଇଥିବା ବେଳେ ଗାଁ ଗାଁ ବୁଲି କନ୍ଥା ସିଲେଇ କରୁଥିଲେ। ଏହି ସମୟରେ ଘରେ ଏକୁଟିଆ ଥିବା ଶିଶୁକନ୍ୟାଙ୍କୁ ଟାର୍ଗେଟ କରି ଏଭଳି ଜଘନ୍ୟ କାଣ୍ଡ ଘଟାଇଥିବା ଅଭିଯୋଗ ହୋଇଛି।

ଘଟଣା ପରେ ମାଆ ଘରକୁ ଫେରି ଶିଶୁକନ୍ୟାଙ୍କୁ ଗୁରୁତର ଅବସ୍ଥାରେ ଦେଖିବା ପରେ ତୁରନ୍ତ ଦେବଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ। ସେଠାରେ ଡାକ୍ତର ଶିଶୁର ଅବସ୍ଥା ଗୁରୁତର ଥିବା ଦେଖି ଅଧିକ ଚିକିତ୍ସା ପାଇଁ ବୁର୍ଲା ଭିମ୍‌ସାରକୁ ରେଫର କରିଥିଲେ।

ଅନ୍ୟପଟେ ପୀଡ଼ିତାଙ୍କ ମାଆଙ୍କ ଅଭିଯୋଗ ଆଧାରରେ ଦେବଗଡ଼ ପୋଲିସ ମାମଲା ରୁଜୁ କରିଛି। ପୋକ୍ସୋ ଆଇନ ସମେତ ସମ୍ପୃକ୍ତ ଦଣ୍ଡବିଧି ଆଇନର ବିଭିନ୍ନ ଧାରାରେ ମାମଲା ରୁଜୁ ହୋଇଥିବା ବେଳେ ଅଭିଯୁକ୍ତ ଯୁବକଙ୍କୁ ପୋଲିସ ଗିରଫ କରିଛି। ଘଟଣାର ସମସ୍ତ ଦିଗକୁ ନେଇ ତଦନ୍ତ ଜାରି ରହିଛି।

ଭୁବନେଶ୍ୱର: ଦୀପାବଳି ପୂର୍ବରୁ ରକ୍ତ ରଞ୍ଜିତ ହୋଇଛି ରାଜ୍ୟ ରାଜଧାନୀ ଭୁବନେଶ୍ୱର । କମିଶନରେଟ୍ ପୋଲିସର ନିଦ ହଜାଇ ଦେଇଛି ହତ୍ୟା ମାମଲା । ଗତ ଦୁଇ ଦିନ ମଧ୍ୟରେ ଗଡ଼ିଛି ତିନି ତିନୋଟି ମୁଣ୍ଡ । ଶୁକ୍ରବାର ବିଳମ୍ବିତ ରାତିରେ ଭୁବନେଶ୍ୱରରେ ଭିନ୍ନ ଭିନ୍ନ ଦୁଇଟି ସ୍ଥାନରେ ଭିନ୍ନ ମାମଲାରେ  ୨ ଜଣଙ୍କୁ ହତ୍ୟା କରାଯାଇଛି । ଲକ୍ଷ୍ମୀସାଗର ଥାନା ଅନ୍ତର୍ଗତ ବମିଖାଲ ଅଞ୍ଚଳରେ ପଏଣ୍ଟ ବ୍ଲାଙ୍କରୁ ଜଣେ ଯୁବକଙ୍କୁ ଗୁଳି କରି ହତ୍ୟା କରାଯାଇଛି । ମୃତକ ହେଲେ ହଳଦିଆପଡ଼ାର ସୋନୁ ନାଏକ । ସେପଟେ ଭିଏସ୍ଏସ୍ ନଗରରେ ଜଣଙ୍କୁ ପରକୀୟା ପ୍ରୀତି ପାଇଁ ଜଣେ ଯୁବକଙ୍କୁ ପଥରରେ ଛେଚି ଛେଚି ହତ୍ୟା କରାଯାଇଛି । 

ବମିଖାଲ ହତ୍ୟା ମାମଲା 

ଗତକାଲି ରାତି ୩ଟା ସମୟରେ ସୋନୁ ନାଏକ ତାଙ୍କର ସାଙ୍ଗମାନଙ୍କ ଭୋଜି କରିବା ପରେ ସହିତ ରସୁଲଗଡ଼ ପେଟ୍ରୋଲ ପମ୍ପ ଗାଡ଼ିରେ ପେଟ୍ରୋଲ ଭରିବାକୁ ଯାଉଥିଲେ । ଏହି ସମୟରେ କିଛି ଦୁର୍ବୃତ୍ତ ଏକ ଅଟୋରେ ରାସ୍ତାରେ ଗୁଳି ଗୁଳି ଫୁଟାଇ ଫୁଟାଇ ଆସିଥିଲେ । ଏହି ସମୟରେ ସୋନୁଙ୍କୁ ଅଟକାଇ ପଏଣ୍ଟ ବ୍ଲାଙ୍କରୁ ଗୁଳି କରିଥିଲେ । ତୁରନ୍ତ ସୋନୁଙ୍କୁ କ୍ୟାପିଟାଲରେ ହସ୍ପିଟାଲରେ ଭର୍ତ୍ତି କରାଯାଇଥିଲା । ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । 

ଘଟଣା ସ୍ଥଳରେ ପୋଲିସ କମିଶନର ନିଜେ ପହଁଚି ତଦନ୍ତ କରିଛନ୍ତି । ଏହି ମାମଲାରେ ୪ ଜଣଙ୍କୁ ଗିରଫ କରାଯାଇଛି । 

ପରକୀୟା ପ୍ରୀତି ପାଇଁ ବିଭତ୍ସ ହତ୍ୟା

ଭିଏସଏସ୍ ନଗର ତାରିଣୀ ବସ୍ତିରେ ଜଣେ ଯୁବକଙ୍କୁ ପଥର ଛେଚି ହତ୍ୟା କରାଯାଇଛି । ଯୁବକ ଜଣକ ଗଞ୍ଜାମର ହୋଇଥିବା ଜଣାପଡ଼ିଛି । ଯୁବକ ଜଣକ ଜଣେ ନେପାଳ ଦମ୍ପତିଙ୍କ ପଡ଼ୋଶୀ ଥିଲେ । ନେପାଳ ମହିଳାଙ୍କ ସହିତ ଯୁବକ ଜଣକଙ୍କର ପରକୀୟା ପ୍ରୀତି ଥିଲା । ଅନେକ ସମୟରେ ସେ ତାଙ୍କ ଘରକୁ ଯାଇ ମହିଳାଙ୍କ ସହିତ ଅନୈତିକ ସମ୍ପର୍କ ରଖୁଥିଲେ । ଏହା ଜାଣିବା ପରେ ମହିଳାଙ୍କ ସ୍ୱାମୀ ଯୁବକଙ୍କୁ ପଥରରେ ଛେଚି ହତ୍ୟା କରିଛନ୍ତି । ତାଙ୍କ ସ୍ତ୍ରୀ କେଉଁଆଡ଼େ ଫେରାର ହୋଇଯାଇଛନ୍ତି । ପୋଲିସ ଉକ୍ତ ବ୍ୟକ୍ତିଙ୍କୁ ଅଟକ ରଖିବା ସହିତ ହତ୍ୟା ମାମଲା ରୁଜୁ କରି ତଦନ୍ତ ଆରମ୍ଭ କରିଛି । 

ଏଠାରେ ଉଲ୍ଲେଖ ଯୋଗ୍ୟ, ଧଉଳି ଥାନା ଅନ୍ତର୍ଗତ ଶିଶୁପାଳ ଗଡ଼ରେ ମଧ୍ୟ ଜଣକୁ ଗୁଳି କରି ହତ୍ୟା କରାଯାଇଥିଲା । 

ବାଲେଶ୍ୱର: ଲାଞ୍ଚ ନେବା ଅଭିଯୋଗରେ ଭିଜିଲାନ୍ସ ଜାଲରେ ପଡ଼ିଲେ ଆଉ ଜଣେ ସରକାରୀ ଅଧିକାରୀ। ବାଲେଶ୍ୱର ଜିଲ୍ଲା ବାଲିଆପାଳର ସବ୍-ରେଜିଷ୍ଟ୍ରାର ମନୀଷା ମିଶ୍ରଙ୍କୁ ୭ ହଜାର ଟଙ୍କା ଲାଞ୍ଚ ନେବାବେଳେ ଶୁକ୍ରବାର ଧରିଛି ଓଡ଼ିଶା ଭିଜିଲାନ୍ସ। ଜମି ବିକ୍ରି ଦଲିଲ୍ (Sale Deed) ପଞ୍ଜୀକରଣ କରିବା ପାଇଁ ସେ ଲାଞ୍ଚ ମାଗିଥିବା ଅଭିଯୋଗ ହୋଇଛି।

୧୦ ହଜାର ମାଗିଥିଲେ, ୭ ହଜାରରେ ରାଜି

ଭିଜିଲାନ୍ସର ସୂଚନା ଅନୁଯାୟୀ, ଅଭିଯୋଗକାରୀ ଜଣେ ଜମି କ୍ରେତାଙ୍କଠାରୁ ୦.୧୪ ଡେସିମିଲ୍ ଜମିର ବିକ୍ରି ଦଲିଲ୍ ପଞ୍ଜୀକରଣ ପାଇଁ ସବ୍-ରେଜିଷ୍ଟ୍ରାର ମନୀଷା ମିଶ୍ର ୧୦ ହଜାର ଟଙ୍କା ଦାବି କରିଥିବା ଅଭିଯୋଗ ହୋଇଥିଲା। ସେହି ଜମିର କିସମ 'ବଜ୍ୟାପ୍ତି ସ୍ଥିତିବାନ' ଭାବେ ରେକର୍ଡ ରହିଥିଲା। ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗର ନିର୍ଦ୍ଦେଶାବଳୀ ଅନୁଯାୟୀ ଏହାକୁ 'ସ୍ଥିତିବାନ' ଭାବେ ବିବେଚନା କରି ପଞ୍ଜୀକରଣ କରାଯାଇପାରିବ ବୋଲି ଅଭିଯୋଗକାରୀ ଜଣାଇଥିଲେ।

କିନ୍ତୁ ବାରମ୍ବାର ଅନୁରୋଧ ସତ୍ତ୍ୱେ ଦଲିଲ୍ ପଞ୍ଜୀକରଣ କରିବାକୁ ଅଧିକାରୀ ଜଣକ ରାଜି ହୋଇନଥିବା ଏବଂ ଲାଞ୍ଚ ଦାବିରେ ଅଡ଼ି ବସିଥିବା ଭିଜିଲାନ୍ସ ପକ୍ଷରୁ କୁହାଯାଇଛି। ଅଭିଯୋଗକାରୀ ୧୦ ହଜାର ଟଙ୍କା ଦେବାକୁ ଅସମର୍ଥତା ପ୍ରକାଶ କରିବାରୁ ଲାଞ୍ଚ ରାଶି ୭ ହଜାର ଟଙ୍କାକୁ କମାଇ ଦିଆଯାଇଥିବା ଅଭିଯୋଗ ରହିଛି।

ଭିଜିଲାନ୍ସ ଜାଲ ବିଛାଇ ଧରିଲା

ଅଧିକାରୀଙ୍କ ଏହି ଦାବି ଓ ହଇରାଣରେ ଅତିଷ୍ଠ ହୋଇ ଅଭିଯୋଗକାରୀ ଭିଜିଲାନ୍ସର ଦ୍ୱାରସ୍ଥ ହୋଇଥିଲେ। ଏହାପରେ ଭିଜିଲାନ୍ସ ଟିମ୍ ଯୋଜନାବଦ୍ଧ ଭାବେ ଜାଲ ବିଛାଇଥିଲା।

ଶୁକ୍ରବାର ୭ ହଜାର ଟଙ୍କା ଦାବି କରି ଗ୍ରହଣ କରୁଥିବା ସମୟରେ ମନୀଷା ମିଶ୍ରଙ୍କୁ ରଙ୍ଗେହାତ ଧରିଥିଲା ଭିଜିଲାନ୍ସ। ତାଙ୍କ ନିକଟରୁ ସମସ୍ତ ରଙ୍ଗବୋଳା ଲାଞ୍ଚ ଟଙ୍କା ଜବତ କରାଯାଇଛି।

ଦୁଇଟି ସ୍ଥାନରେ ଏକକାଳୀନ ଚଢ଼ାଉ

ଟ୍ରାପ୍ ପରେ ମନୀଷା ମିଶ୍ରଙ୍କ ସହ ଜଡ଼ିତ ଦୁଇଟି ସ୍ଥାନରେ ଆୟବର୍ହିଭୂତ ସମ୍ପତ୍ତି (Disproportionate Assets) ଦିଗରୁ ଏକକାଳୀନ ଯାଞ୍ଚ ଓ ଚଢ଼ାଉ ଜାରି ରହିଛି। ଏହି ଘଟଣାରେ ବାଲେଶ୍ୱର ଭିଜିଲାନ୍ସ ଥାନାରେ କେସ୍ ନମ୍ବର ୨୬/୨୦୨୬ ରୁଜୁ ହୋଇଛି। ଦୁର୍ନୀତି ନିବାରଣ (ସଂଶୋଧନ) ଆଇନ, ୨୦୧୮ର ଧାରା ୭ ଅନୁଯାୟୀ ମାମଲା ରୁଜୁ ହୋଇ ତଦନ୍ତ ଜାରି ରହିଛି।

ସୂଚନାଯୋଗ୍ୟ, ମନୀଷା ମିଶ୍ର ୨୦୨୪ରେ ORS ଅଧିକାରୀ ଭାବେ ଚାକିରିରେ ଯୋଗ ଦେଇଥିଲେ ଏବଂ ବର୍ତ୍ତମାନ ପ୍ରୋବେସନ୍‌ରେ ଥିଲେ। ସରକାରୀ କାର୍ଯ୍ୟାଳୟରେ ଲାଞ୍ଚ କାରବାର ବିରୋଧରେ ଭିଜିଲାନ୍ସର ଏହି କାର୍ଯ୍ୟାନୁଷ୍ଠାନ ପୁଣିଥରେ ଚର୍ଚ୍ଚାର ବିଷୟ ପାଲଟିଛି।

ପାଟନା: ଅପରାଧିଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିଛି ବିହାର ପୋଲିସ । ରାଜଧାନୀ ପାଟନାର ମାନେର ଥାନା ଅଞ୍ଚଳରେ ପ୍ୟାକ୍ସ ସଭାପତି ସଞ୍ଜିତ କୁମାର ଓରଫ ଭୋଲୁଙ୍କୁ ଗୁଳି କରି ହତ୍ୟା କରିବା ମାମଲାରେ ପୋଲିସ ଅଭିଯୁକ୍ତଙ୍କୁ ଏନକାଉଣ୍ଟର କରିଛି । ଶୁକ୍ରବାର ଭୋର ସମୟରେ ପାଟନା ପୋଲିସ ଶେରପୁର ଗଙ୍ଗା ନଦୀ ଅଞ୍ଚଳରେ ତିନି ଜଣ କୁଖ୍ୟାତ ଅପରାଧୀଙ୍କୁ ଏନକାଉଣ୍ଟରରେ ନିପାତ କରିଛି । ସେମାନେ ହେଲେ ଦାନାପୁର ଥାନା ଅନ୍ତର୍ଗତ ନୂଆ ତାରାଚକର ଜେ.ପି. ଯାଦବ, ଶାହପୁର ଥାନା ଅନ୍ତର୍ଗତ ଗଙ୍ଗହରାର ରାଜେଶ ଶର୍ମା ଏବଂ ମାନେର ଅଞ୍ଚଳର ସୁଆରମାରୱାର ବାବଲୁ କୁମାର। । ଏହି ସମୟରେ ମାନେର ପୋଲିସ ଷ୍ଟେସନ ମୁଖ୍ୟ ରଜନୀଶ କୁମାରଙ୍କ ବାମ ହାତରେ ଗୁଳି ବାଜିଥିଲା। ତାଙ୍କୁ ଚିକିତ୍ସା ପାଇଁ ପାଟନା ପଠାଯାଇଛି ।

ସେପେଟେ ଏହି ଏନକାଉଣ୍ଟରକୁ ନେଇ ସମ୍ପର୍କୀୟମାନେ ହଙ୍ଗାମା କରିଛନ୍ତି । ତିନି ଜଣ ବ୍ୟକ୍ତିଙ୍କ ମୃତଦେହକୁ ଶବ ବ୍ୟବଚ୍ଛେଦ ପାଇଁ ଦାନାପୁର ଉପଖଣ୍ଡ ଡାକ୍ତରଖାନାକୁ ଅଣାଯାଇଥିଲା। ଏହି ଖବର ପାଇବା ପରେ ମୃତକଙ୍କ ସମ୍ପର୍କୀୟମାନେ ଡାକ୍ତରଖାନାରେ ପହଞ୍ଚି ହଙ୍ଗାମା କରିଛନ୍ତି । 

ଜେପି ଯାଦବ, ସୁରଜ କୁମାର ଏବଂ ବାବଲୁ କୁମାର ଭୟାପୁରର ପ୍ୟାକ୍ସ ସଭାପତି ଭୋଲୁଙ୍କ ହତ୍ୟାରେ ସମ୍ପୃକ୍ତ ଥିଲେ। ପୋଲିସ ଅନୁଯାୟୀ, ବବଲୁ ଏବଂ ସୁରଜ ସୁଟର ଭାବରେ କାର୍ଯ୍ୟ କରୁଥିଲେ ଏବଂ ଜେପି ଯାଦବ ମୁଖ୍ୟ ଷଡଯନ୍ତ୍ରକାରୀ ଥିଲେ। ନିହତ ତିନି ଅପରାଧୀ ବୃତ୍ତିଗତ ସୁଟର ଥିଲେ ଏବଂ ସୁପାରୀ କିଲର୍ ଭାବେ କାମ କରୁଥିଲେ । ସେମାନଙ୍କୁ ଧରିବାକୁ ପାଟନା ପୋଲିସ ସ୍ପେଶାଲ୍ ଟାସ୍କ ଫୋର୍ସ ଗଠନ କରିଥିଲା । 

ଏସ୍‌ଏସ୍‌ପି କାର୍ତ୍ତିକେୟ କେ. ଶର୍ମାଙ୍କ ଅନୁଯାୟୀ, ଶୁକ୍ରବାର ଭୋର ପ୍ରାୟ ସାଢ଼େ ୪ଟା ସମୟରେ ପୋଲିସ ଏବଂ ଅପରାଧୀଙ୍କ ମଧ୍ୟରେ ଗୁଳିବିନିମୟ ଘଟିଥିଲା। ଅପରାଧୀମାନେ ପୋଲିସ ଉପରକୁ ୨୪ ରାଉଣ୍ଡ ଗୁଳି ଚଳାଇଥିଲେ। ଏହାର ଜବାବରେ ପୋଲିସ ୧୮ ରାଉଣ୍ଡ ଗୁଳି ଚଳାଇଥିଲା। ଉଭୟ ପକ୍ଷ ମଧ୍ୟରେ ପ୍ରାୟ ୨୦ ମିନିଟ୍ ଧରି ଗୁଳିବିନିମୟ ଚାଲିଥିଲା। ଅପରାଧୀଙ୍କ ଗୁଳି ମାଡ଼ରେ ମାନେର୍ ଥାନା ଅଧିକାରୀ ରଜନୀଶ କୁମାର ମଧ୍ୟ ଆହତ ହୋଇଥିଲେ। ଗୁଳିଟି ତାଙ୍କ ହାତକୁ ଛୁଇଁ ଚାଲିଯାଇଥିଲା। ଏହି ଗୁଳିବିନିମୟ ପରେ, ସେମାନଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଥିଲା । ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ।

ଉଲ୍ଲେଖ ଯୋଗ୍ୟ, ୧୯ ଅକ୍ଟୋବର ରାତିରେ ସଭାପତି ସଞ୍ଜିତ କୁମାର ଏବଂ ବ୍ଲକ ମୁଖ୍ୟଙ୍କ ପିଣ୍ଟୁ କୁମାର ସେମାନଙ୍କ ବାରଣ୍ଡାରେ ବସିଥିଲେ। ଚାରି ଜଣ ମୁଖାପିନ୍ଧା ଦୁର୍ବୃତ୍ତ ଦୁଇଟି ବାଇକ୍ ଆଖି ବୁଜା ଗିଳ କରିଥିଲେ । ପ୍ରାୟ ଏକ ଡଜନ ରାଉଣ୍ଡ ଗୁଳି ଚଳାଇଥିଲେ। ଗୁଳି ବାଜିବା ପରେ ଉଭୟ ରକ୍ତାକ୍ତ ହୋଇ ପଡ଼ିଥିଲେ। ଏହା ପରେ ସେମାନଙ୍କ ପରିବାର ସଦସ୍ୟମାନେ ତୁରନ୍ତ ସେମାନଙ୍କୁ ଡାକ୍ତରଖାନାକୁ ନେଇଯାଇଥିଲେ। ସଭାପତିଙ୍କ ହସ୍ପିଟାଲରେ ଚିକିତ୍ସା ସମୟରେ ମୃତ୍ୟୁ ହୋଇଥିଲା। ଏହି ସମୟରେ ପିଣ୍ଟୁ କୁମାର ଗୁରୁତର ହୋଇପଡ଼ିଥିଲେ । 

ବେଙ୍ଗାଲୁରୁ: ବେଙ୍ଗାଲୁରୁରେ ଏକ ଭୟଙ୍କର ଗଣ ହତ୍ୟା ଘଟଣା ସାମ୍ନାକୁ ଆସିଛି । ଜଣେ ଜ୍ୱାଇଁ ନିଜ ସ୍ତ୍ରୀ ସହିତ ଶ୍ୱଶୁର ଘରର ସାତ ଜଣ ସଦସ୍ୟଙ୍କୁ ନିର୍ମମ ହତ୍ୟା କରିଛି । ରାଜାଜୀନଗର ଥାନା ଅଧୀନସ୍ଥ ବାସରୁମ୍ ସର୍କଲ ନିକଟସ୍ଥ ୫୯ ନଂ କ୍ରସ୍‌ରେ ଥିବା ଏକ ଆବାସିକ ଅଞ୍ଚଳରେ ଏହି ହତ୍ୟାକାଣ୍ଡ ଘଟିଛି। ଅଭିଯୁକ୍ତ ଜଣକ ହେଲା ଇନ୍ଦୁଶେଖର । ସେ ଜଣେ କ୍ୟାବ୍ ଡ୍ରାଇଭର୍ । ମୃତକମାନଙ୍କ ମଧ୍ୟରେ ଅଛନ୍ତି ଇନ୍ଦୁଶେଖରଙ୍କ ପତ୍ନୀ ସୁନିତା, ଶାଶୁ ରୂପାବତୀ, ଶଳା ଶିବକୁମାର ଓ ଶଙ୍କର, ଶଳାଭାଉଜ ଦିବ୍ୟା ଓ ନଳିନୀ ଏବଂ ଶଙ୍କରଙ୍କ ସାତ ବର୍ଷର ପୁଅ ପୁନୀତ ଅନ୍ତର୍ଭୁକ୍ତ। ପୋଲିସକୁ ମାତ୍ର ଗୋଟିଏ ମୃତଦେହ ମିଳିଥିବାବେଳେ ଅନ୍ୟମାନଙ୍କ ମୃତଦେହକୁ ଉଦ୍ଧାର କରିବାକୁ ସନ୍ଧାନ ଜାରି ରହିଛି । 

ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ, ଏକ ପାରିବାରିକ ବିବାଦକୁ କେନ୍ଦ୍ର କରି ହତ୍ୟାକାଣ୍ଡ ହୋଇଥିବା ପୋଲିସ ସ୍ପଷ୍ଟ କରିଛି । ଅଭିଯୁକ୍ତ ଇନ୍ଦୁଶେଖର ଏବଂ ତା ପତ୍ନୀ ସୁନିତାଙ୍କ ମଧ୍ୟରେ ପ୍ରାୟ ୨୦ ବର୍ଷର ବୈବାହିକ ସମ୍ପର୍କ । କିନ୍ତୁ ଦମ୍ପତିଙ୍କ ମଧ୍ୟରେ ଅଧିକାଂଶ ସମୟରେ କଳହ ଲାଗି ରହୁଥିଲା । ସୁନୀତା ନିଜ ବାପଘରକୁ ଯିବାକୁ ନେଇ ଉଭୟଙ୍କ ମଧ୍ୟରେ ବିବାଦ ସୃଷ୍ଟି ହେଉଥିଲା।ପରିବାର ସଦସ୍ୟମାନେ ଉଭୟଙ୍କ ମଧ୍ୟରେ ବୁଝାମଣା କରାଇବାକୁ ଚେଷ୍ଟା କରିଥିଲେ, କିନ୍ତୁ ସେମାନଙ୍କ ମଧ୍ୟରେ ମତଭେଦ ଲାଗି ରହିଲା।

ସୁନିତାଙ୍କୁ ତାଙ୍କ ବାପାଙ୍କ ଘର ପକ୍ଷରୁ ମିଳୁଥିବା ସମର୍ଥନ ପାଇଁ ଶେଖର ଅଧିକ ଝଗଡ଼ା କରୁଥିଲେ । ଶେଷରେ ସୁନିତାଙ୍କ ସମ୍ପୂର୍ଣ୍ଣ ପରିବାରକୁ ଶେଷ କରିଦେବାକୁ ଶେଖର ପ୍ରତିଜ୍ଞା କରିଥିଲା । ଇନ୍ଦୁ ଶେଖର ପ୍ରଥମେ ଯୋଜନା ମୁତାବକ, ପ୍ରଥମେ ନିଜ ପତ୍ନୀଙ୍କୁ ଶିଳରେ ଛେଚି ହତ୍ୟା କରିଥିଲା। ଏହା ପରେ ସେ ମୃତଦେହକୁ କପଡ଼ାରେ ଗୁଡ଼ାଇ ନନ୍ଦି ହିଲ୍ସ ନିକଟରେ ଫିଙ୍ଗି ଦେଇଥିଲା। କାହାର ସନ୍ଦେହ ନ ହେବା ପାଇଁ ସେ ସୁନିତାଙ୍କ ମୋବାଇଲ୍ ଫୋନ୍ ବନ୍ଦ କରିଦେଇଥିଲା ଏବଂ ପଡ଼ୋଶୀମାନଙ୍କୁ କହିଥିଲା ଯେ ସୁନିତା କୌଣସି ଯାତ୍ରାରେ ବାହାରକୁ ଯାଇଛନ୍ତି।

ଏହା ପରେ, ସେ ଏକ ଭୋଜି ବାହାନାରେ ନିଜର ଦୁଇ ଶଳା ଶିବକୁମାର ଏବଂ ଶଙ୍କରଙ୍କୁ ଘରକୁ ଡାକି ସେହି ଶିଳ ପୁଆରେ ଛେଚି ହତ୍ୟା କରିଥିଲେ। ସେ ସେମାନଙ୍କ ପତ୍ନୀମାନଙ୍କୁ, ନିଜ ଶାଶୁଙ୍କୁ ଏବଂ ଶଙ୍କରଙ୍କ ଛୋଟ ପୁଅକୁ ମଧ୍ୟ ହତ୍ୟା କରିଥିଲେ। ଏମିତି ଦୁଇ ଦିନ ମଧ୍ୟରେ ସାତ ସାତ ଜଣଙ୍କୁ ହତ୍ୟା କରିଥିଲା । 

ଗୁରୁବାର ଦିନ ସୁନିତୀଙ୍କ ଭାଉଜ, ନଳିନୀଙ୍କ ମା’ ଶ୍ରୀରାମପୁରା ଥାନାରେ ନିଖୋଜ ଥିବା ନେଇ ଅଭିଯୋଗ କରିବା ପରେ ଏହି ହତ୍ୟାକାଣ୍ଡ ଉପରୁ ପରଦା ହଟିଥିଲା । ପରବର୍ତ୍ତୀ ତଦନ୍ତ ସମୟରେ ପୋଲିସ ଏହି ହତ୍ୟାକାଣ୍ଡ ବିଷୟରେ ଜାଣିବାକୁ ପାଇଥିଲା ଏବଂ ଶେଖରକୁ ଗିରଫ କରିଥିଲା।

ଅଭିଯୁକ୍ତ ଜଣକ ହତ୍ୟାକାଣ୍ଡ ପରେ ଘର ସଫା କରିବା ଏବଂ ରକ୍ତ ଦାଗ ହଟାଇବା ପାଇଁ ବିଭିନ୍ନ ରାସାୟନିକ ପଦାର୍ଥ ବ୍ୟବହାର କରିଥିବା ଅଭିଯୋଗ ହୋଇଛି। ପୋଲିସ ସେହି କାର୍‌କୁ ଜବତ କରିଛି ଯାହା ମୃତଦେହଗୁଡ଼ିକୁ ନେବା ପାଇଁ ବ୍ୟବହୃତ ହୋଇଥିଲା ବୋଲି ସନ୍ଦେହ କରାଯାଉଛି। ଏହା ସହିତ, ହତ୍ୟାକାଣ୍ଡରେ ବ୍ୟବହୃତ ହୋଇଥିବା 'ଶିଳ'କୁ ମଧ୍ୟ ପୋଲିସ ଉଦ୍ଧାର କରିଛି।

ଏହି ହତ୍ୟାକାଣ୍ଡରେ ତାଙ୍କୁ କେହି ସହଯୋଗ କରିଥିଲେ କି ନାହିଁ, ସେ ନେଇ ମଧ୍ୟ ପୋଲିସ ତଦନ୍ତ କରୁଛି; ଏଥିରେ ତାଙ୍କ ଝିଅର ସମ୍ଭାବ୍ୟ ସମ୍ପୃକ୍ତି ରହିଛି କି ନାହିଁ, ତାହା ମଧ୍ୟ ଯାଞ୍ଚ କରାଯାଉଛି। ଏହା ବ୍ୟତୀତ, ଘରଟି ଏକ ଜନବସତି ଅଞ୍ଚଳରେ ଅବସ୍ଥିତ ଥିବା ସତ୍ତ୍ୱେ, କିପରି ଏହି ହତ୍ୟାକାଣ୍ଡ କାହାରି ନଜରକୁ ଆସିଲା ନାହିଁ, ସେ ବିଷୟରେ ପୋଲିସ ଜାଣିବାକୁ ଚେଷ୍ଟା କରୁଛି।

ଭୁବନେଶ୍ୱର: ରାଜଧାନୀରେ ଚାଞ୍ଚଲ୍ୟ। ଘର ଭିତରୁ ମିଳିଲା ୭୬ ବର୍ଷୀୟା ବୃଦ୍ଧାଙ୍କ ରକ୍ତାକ୍ତ ମୃତଦେହ। ହତ୍ୟା ପରେ ଘରୁ ସୁନାଗହଣା, ଟଙ୍କା ଓ ସ୍କୁଟି ଲୁଟ୍ ହୋଇଥିବା ଅଭିଯୋଗ। ଘଟଣା ପରଠାରୁ ଘରେ ରହୁଥିବା କେୟାରଟେକର ଫେରାର ଥିବାରୁ ତାଙ୍କ ଉପରେ ପୋଲିସର ସନ୍ଦେହ ଘନୀଭୂତ ହୋଇଛି।

ଭୁବନେଶ୍ୱରର ବୁଦ୍ଧନଗର ଅଞ୍ଚଳରେ ଘଟିଛି ଏହି ଚାଞ୍ଚଲ୍ୟକର ଘଟଣା। ମୃତ ବୃଦ୍ଧା ହେଉଛନ୍ତି କୁଞ୍ଜଲତା ନନ୍ଦ। ତାଙ୍କ ମୁଣ୍ଡର ପଛପଟେ ଗଭୀର କ୍ଷତଚିହ୍ନ ଥିବା ଜଣାପଡ଼ିଛି।

ପରିବାର ଲୋକଙ୍କ ଅଭିଯୋଗ ଅନୁସାରେ, ଘରୁ ପ୍ରାୟ ୪୦ରୁ ୫୦ ଗ୍ରାମ ସୁନା ଗହଣା, ୬୦ ହଜାର ଟଙ୍କା ନଗଦ ଓ ଏକ ସ୍କୁଟି ଗାଏବ ହୋଇଯାଇଛି। ଏହି ହତ୍ୟା ଓ ଲୁଟ୍ ପଛରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ଥାଇପାରେ ବୋଲି ମୃତାଙ୍କ ଝିଅ ଓ ଜ୍ୱାଇଁ ସନ୍ଦେହ ପ୍ରକାଶ କରିଛନ୍ତି।

୪ ମାସ ହେଲା ରହୁଥିଲେ କେୟାରଟେକର

କୁଞ୍ଜଲତା ଘରେ ଏକୁଟିଆ ରହୁଥିବା ବେଳେ ତାଙ୍କ ପିଲାମାନେ ଅନ୍ୟତ୍ର ରହୁଥିଲେ। ଗତ ୪ ମାସ ଧରି ତାଙ୍କ ଘରେ କେୟାରଟେକର ଭାବେ ରହୁଥିଲେ ଟାଙ୍ଗୀ ଅଞ୍ଚଳର ବଳଭଦ୍ର ମହାରଣା। ଘଟଣା ପରଠାରୁ ସେ ଫେରାର ଥିବା ଜଣାପଡ଼ିଛି।

କବାଟ ଖୋଲିବା ପରେ ମିଳିଲା ରକ୍ତାକ୍ତ ମୃତଦେହ

ସକାଳେ ଘରର ତଳ ମହଲାରେ ରହୁଥିବା ଭଡ଼ାଟିଆମାନେ କୁଞ୍ଜଲତାଙ୍କୁ ବାରମ୍ବାର ଡାକିଥିଲେ ମଧ୍ୟ କୌଣସି ଉତ୍ତର ପାଇନଥିଲେ। ଏନେଇ ଝିଅଙ୍କୁ ଖବର ଦିଆଯାଇଥିଲା। ଜ୍ୱାଇଁ ଘରେ ପହଞ୍ଚିବା ପରେ ବାହାରୁ ତାଲା ପଡ଼ିଥିବା ଦେଖିଥିଲେ। ପରେ ପୋଲିସ ଉପସ୍ଥିତିରେ କବାଟ ଭଙ୍ଗାଯିବାରୁ ଘର ଭିତରେ ରକ୍ତାକ୍ତ ଅବସ୍ଥାରେ ପଡ଼ିଥିଲା ବୃଦ୍ଧାଙ୍କ ମୃତଦେହ।

CCTV ଫୁଟେଜ୍ ଯାଞ୍ଚ କରୁଛି ପୋଲିସ

ଘଟଣାସ୍ଥଳରେ ଡିସିପି ଓ ପୋଲିସ କମିଶନର ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି। ଲକ୍ଷ୍ମୀସାଗର ଥାନା ପୋଲିସ ଘଟଣାର ତଦନ୍ତ ଆରମ୍ଭ କରିବା ସହ ଆଖପାଖ ଅଞ୍ଚଳର CCTV ଫୁଟେଜ୍ ଯାଞ୍ଚ କରୁଛି।

ମୃତଦେହକୁ ପୋଷ୍ଟମର୍ଟମ ପାଇଁ କ୍ୟାପିଟାଲ ହସ୍ପିଟାଲ ପଠାଯାଇଛି। ପୋଷ୍ଟମର୍ଟମ ରିପୋର୍ଟ ଆସିବା ପରେ ମୃତ୍ୟୁର ପ୍ରକୃତ କାରଣ ସ୍ପଷ୍ଟ ହେବ। ତେବେ ବୃଦ୍ଧାଙ୍କ ମୃତ୍ୟୁ ପଛରେ କିଏ ଏବଂ ଲୁଟ୍ ପଛରେ ଆଉ କାହାର ହାତ ରହିଛି, ତାହା ଏବେ ପୋଲିସ ତଦନ୍ତର ମୁଖ୍ୟ ପ୍ରସଙ୍ଗ।