କାମାକ୍ଷାନଗର: ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ଅନ୍ତର୍ଗତ ମାଳପୁରା ଗାଁର ଶବର ସାହିରେ ସ୍ୱାମୀ-ସ୍ତ୍ରୀଙ୍କ କଳହରୁ ଘଟିଛି ଏକ ଦୁଃଖଦ ଘଟଣା। ସ୍ୱାମୀର ଛୁରାମାଡ଼ରେ ସ୍ତ୍ରୀଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଛି। ମୃତ ମହିଳା ହେଉଛନ୍ତି କଙ୍କଡ଼ାହାଡ଼ ଥାନା କଣ୍ଟାପାଳ ୪ ନମ୍ବର କଲୋନୀର ସସ୍ମିତା ଖଟୁଆ। 

ସୂଚନା ଅନୁଯାୟୀ, ସସ୍ମିତା ମାଳପୁରା ଗାଁ ଶବର ସାହିରେ ଅଙ୍ଗନୱାଡ଼ି କର୍ମୀ ଭାବେ କାର୍ଯ୍ୟ କରୁଥିଲେ। ସ୍ୱାମୀ ଲଳିତ ରଣାଙ୍କଠାରୁ ବାରମ୍ବାର ନିର୍ଯାତନା ମିଳୁଥିବାରୁ ସସ୍ମିତା ଗତ ୬ ମାସ ହେବ ମାଳପୁରାସ୍ଥିତ ନିଜ ବାପଘରେ ରହୁଥିଲେ।ଆଜି ଉଭୟ ସ୍ୱାମୀ-ସ୍ତ୍ରୀଙ୍କ ମଧ୍ୟରେ କୌଣସି କାରଣକୁ ନେଇ ବଚସା ହୋଇଥିଲା। ଏହା ପରେ ଲଳିତ ଏକ ଛୁରୀରେ ସସ୍ମିତାଙ୍କୁ ଆକ୍ରମଣ କରିଥିବା ଅଭିଯୋଗ ହୋଇଛି। ଗୁରୁତର ଅବସ୍ଥାରେ ସସ୍ମିତାଙ୍କୁ କାମାକ୍ଷାନଗର ମେଡିକାଲକୁ ନିଆଯାଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।

ଘଟଣାକୁ ନେଇ କାମାକ୍ଷାନଗର ପୋଲିସ ତଦନ୍ତ ଜାରି ରଖିଛି। ଘଟଣାର ପ୍ରକୃତ କାରଣ ଓ ଅନ୍ୟାନ୍ୟ ଦିଗ ପୋଲିସ ତଦନ୍ତ ପରେ ସ୍ପଷ୍ଟ ହେବ।

ନୂଆଦିଲ୍ଲୀ: ଉତ୍ତର ପ୍ରଦେଶ ରାଜଧାନୀ ଲକ୍ଷ୍ନୌରେ ସ୍ପଷ୍ଟ ଦିବାଲୋକରେ ଗୁଳିକାଣ୍ଡରେ । ସୋମବାର ସକାଳେ ଏକ ପିଣ୍ଡି ବନାଇବାକୁ କେନ୍ଦ୍ର କରି ଗୋଟିଏ ପରିବାର ୩ ଜଣଙ୍କୁ ଗୁଳି କରି ହତ୍ୟା କରାଯାଇଛି । ମୃତକଙ୍କ ମଧ୍ୟରେ ଦୁଇ ଭାଇ ଏବଂ ପୁଅ ରହିଛନ୍ତି । ମୃତକ ହେଲେ ଶିବା ତିୱାରୀ, ଶମ୍ଭୁ ତିୱାରୀ ଏବଂ ଶିବାଙ୍କ ପୁଅ ସୁୟଶ ତିୱାରୀ । 

ଲକ୍ଷ୍ନୌ ସଆଦତଗଞ୍ଜ ଥାନା ଅନ୍ତର୍ଗତ ନୌବସ୍ଥାରେ ବର ଗଛ ମୂଳରେ ପିଣ୍ଡି ବନାଇବାକୁ ନେଇ ଶିବାଙ୍କ ପରିବାର ସହିତ ଅଭିଯୁକ୍ତଙ୍କର ବିବାଦ ହୋଇଥିଲା । ଏହି ସମୟରେ ଅଭିଯୁକ୍ତ ଜଣକ ଶିବା ତିୱାରୀ, ତାଙ୍କ ଭାଇ ଶମ୍ଭୁ ତିୱାରୀ ଏବଂ ପୁଅ ଉପରେ ଗୁଳି ଚଳାଇଥିଲା । ସ୍ଥାନୀୟ ଲୋକେ ତୁରନ୍ତ ପୋଲିସକୁ ସୂଚନା ଦେଇଥିଲେ । ପୋଲିସ ସ୍ଥାନୀୟ ଲୋକଙ୍କ ସହାୟତାରେ ସେମାନଙ୍କୁ ତୁରନ୍ତ ନିକଟସ୍ଥ ସିଏମ୍ଏମ୍ ହସ୍ପିଟାଲରେ ଭର୍ତ୍ତି କରିଥିଲେ । ମାତ୍ର ଡାକ୍ତର ସମସ୍ତ ତିନି ଜଣଙ୍କୁ ମୃତ ଘୋଷଣା କରିଛନ୍ତି । ସିଏମ୍ଏମ୍ ଟ୍ରମା ସେଣ୍ଟର୍ ଡାକ୍ତର ପ୍ରେମରାଜ ସିଂହ କହିଛନ୍ତି ଯେ ଶମ୍ଭୁଙ୍କ ଛାତିରେ ଗୁଳି ଲାଗିଥିବାବେଳେ ଶିବା ଏବଂ ସୁୟଶଙ୍କ ମୁଣ୍ଡରେ ଗୁଳି ବାଜିଛି । 

ଶିବାଜୀଙ୍କ ପୁଅ ସୁୟଶଙ୍କର ଆସନ୍ତା ମାସରେ ବିବାହ ହେବାର ଥିଲା। ଘରେ ବିବାହ ପାଇଁ ସମସ୍ତ ପ୍ରସ୍ତୁତି ସରିଯାଇଥିଲା। କିନ୍ତୁ ଗୋଟିଏ ପରିବାରର ତିନି ଜଣ ସଦସ୍ୟଙ୍କ ହତ୍ୟା ଘଟଣା, ବିବାହ ପ୍ରସ୍ତୁତିରେ ଲାଗିଥିବା ସେହି ପରିବାର ଉପରେ ଶୋକର ଛାୟା ଖେଳାଇ ଦେଇଛି ।

ଏହି ଗୁଳି କାଣ୍ଡ ପରେ ଆଖପାଖ ଅଞ୍ଚଳରେ ଚାଞ୍ଚଲ୍ୟ ଖେଳି ଯାଇଛି । ଖବର ପାଇ ସଆଦତଗଞ୍ଜ ଥାନା ପୋଲିସ ଘଟଣା ସ୍ଥଳରେ ପହଁଚି ମୃତଦେହ ଗୁଡ଼ିକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ ଦେଇଛି । ଏହା ସହିତ ଅଭିଯୁକ୍ତକୁ ଗିରଫ କରିଛି । ଅଭିଯୁକ୍ତ ଜଣକ ହେଲେ ଋଷଭ ଶୁକ୍ଳା । ସେ ଭାରତୀୟ ନୌସେନାରେ ପୂର୍ବତନ କର୍ମଚାରୀ ବୋଲି ଜଣାପଡ଼ିଛି । 

ପୋଲିସର ସୂଚନା ଅନୁସାରେ, ଦୁଇ ପକ୍ଷଙ୍କ ମଧ୍ୟରେ ପୂର୍ବରୁ ବିବାଦ ଲାଗି ରହିଥିଲା । ଯାହା ଆଜି ସଂଘର୍ଷର ରୂପ ନେଇଥିଲା । ଗୋଟିଏ ପକ୍ଷରୁ ଗୁଳି ଚାଳନା ହୋଇଥିଲା । ଗୁଳି ଚଳାଇଥିବା ବ୍ୟକ୍ତି ଜଣକ ଫେରାର ହୋଇଯାଇଥିବାବେଳେ ପୋଲିସ ତାକୁ କାବୁ କରି ନେଇଛି ।

ବାରିପଦା: ଘର ଆଗରେ ଖେଳୁଥିଲା କୁନି ଝିଅ। ହଠାତ୍‌ କେଉଁଆଡ଼େ ଉଭାନ ହୋଇଗଲା। ପରିବାର ଲୋକଙ୍କ ଚିନ୍ତା ବଢ଼ିଲା, ଥାନାରେ ହେଲା ଅଭିଯୋଗ। ଶେଷରେ ନିଖୋଜ ହେବାର ଦିନକ ପରେ ଘର ପଛପଟୁ ଉଦ୍ଧାର ହେଲା ସାଢ଼େ ୪ ବର୍ଷର ଶିଶୁକନ୍ୟା। ଏଭଳି ଏକ ଘଟଣା ମୟୂରଭଞ୍ଜ ଜିଲ୍ଲା ବାରିପଦା ସହରରେ ଚାଞ୍ଚଲ୍ୟ ସୃଷ୍ଟି କରିଛି।

ସୂଚନା ଅନୁସାରେ, ବାରିପଦା ପୌରପାଳିକାର ୧୮ ନମ୍ବର ୱାର୍ଡ ଅନ୍ତର୍ଗତ ଯମୁନାଦେଇପୁରର ଚନ୍ଦ୍ରମଣି ସୋରେନ ଓ ସୁନୀଲ ସୋରେନଙ୍କ ଝିଅ ମାହି ମାୟରା ସୋରେନ ଓରଫ୍ ସିଦ୍ଧି ରବିବାର ନିଖୋଜ ହୋଇଯାଇଥିଲେ। ଟ୍ୟୁସନରୁ ଫେରିବା ପରେ ସେ ଘର ସାମ୍ନାରେ ଥିବା ବାଲିଗଦା ନିକଟରେ ଖେଳୁଥିଲେ। ଏହି ସମୟରେ ମା’ ରୋଷେଇ କରିବାକୁ ଘର ଭିତରକୁ ଯାଇଥିଲେ। ପ୍ରାୟ ସକାଳ ୧୧ଟାରେ ଫେରି ଝିଅକୁ ନପାଇ ଖୋଜାଖୋଜି ଆରମ୍ଭ କରିଥିଲେ।

ଆଖପାଖ ଅଞ୍ଚଳରେ ଖୋଜିବା ପରେ ମଧ୍ୟ ଝିଅର କୌଣସି ସନ୍ଧାନ ନମିଳିବାରୁ ପରିବାର ପକ୍ଷରୁ ଭଞ୍ଜପୁର ଥାନାରେ ଲିଖିତ ଅଭିଯୋଗ କରାଯାଇଥିଲା। ଅଭିଯୋଗ ପାଇବା ପରେ ପୋଲିସ ତିନୋଟି ଟିମ୍ ଗଠନ କରି ଶିଶୁକନ୍ୟାର ସନ୍ଧାନ ଆରମ୍ଭ କରିଥିଲା।

ସୋମବାର ସକାଳେ ଜଣେ ଅଜଣା ଯୁବକ ଶିଶୁଟିକୁ ଘର ପଛପଟେ ଛାଡ଼ି ପଳାଇବାକୁ ଉଦ୍ୟମ କରୁଥିବା ବେଳେ ସ୍ଥାନୀୟ ଲୋକେ ତାଙ୍କୁ ଧରିଥିଲେ। ଏହାପରେ ଶିଶୁର ମା’ଙ୍କୁ ଖବର ଦେବା ସହ ପୋଲିସକୁ ସୂଚନା ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଯୁବକଙ୍କୁ ଅଟକ ରଖିଛି।

ଉଦ୍ଧାର ହୋଇଥିବା ଶିଶୁକନ୍ୟା ସୁସ୍ଥ ଥିବା ଜଣାପଡ଼ିଛି ଏବଂ ତାକୁ ପରିବାର ଲୋକଙ୍କ ନିକଟରେ ହସ୍ତାନ୍ତର କରାଯାଇଛି। ଅନ୍ୟପଟେ ଅଟକ ଯୁବକଙ୍କ ପରିଚୟ, ଶିଶୁକୁ ନେବା ପଛରେ ଉଦ୍ଦେଶ୍ୟ ଏବଂ ତାକୁ କେଉଁଠି ରଖାଯାଇଥିଲା, ସେନେଇ ପୋଲିସ ତଦନ୍ତ ଜାରି ରଖିଛି। ଝିଅକୁ ସୁରକ୍ଷିତ ଫେରି ପାଇବା ପରେ ପରିବାର ପକ୍ଷରୁ ପୋଲିସ, ସ୍ଥାନୀୟ ଲୋକ ଓ ଗଣମାଧ୍ୟମକୁ କୃତଜ୍ଞତା ଜଣାଯାଇଛି। 

ରାଜ୍ୟରେ ମହିଳା ଓ ନାବାଳିକାଙ୍କ ସୁରକ୍ଷାକୁ ନେଇ ପୁଣି ଉଠିଲା ପ୍ରଶ୍ନ। ସୁନ୍ଦରଗଡ଼ ଓ ରାଜଧାନୀ ଭୁବନେଶ୍ୱରରୁ ଆସିଛି ଦୁଇଟି ଦୁଷ୍କର୍ମ ଅଭିଯୋଗ। ସୁନ୍ଦରଗଡ଼ର ଧରୁଆଡିହି ଥାନା ଅଞ୍ଚଳରେ ଜଣେ ନାବାଳିକାଙ୍କୁ ଦୁଷ୍କର୍ମ ଅଭିଯୋଗରେ ପୁଲିସ ଜଣେ ଅଭିଯୁକ୍ତଙ୍କୁ ଗିରଫ କରିଛି। ସେହିପରି ଭୁବନେଶ୍ୱରରେ ଜଣେ ଯୁବତୀଙ୍କୁ ଦୀର୍ଘ ଦିନ ଧରି ଯୌନ ନିର୍ଯାତନା ଦେବା ଅଭିଯୋଗରେ ତାଙ୍କ ସମ୍ପର୍କୀୟ ଦାଦାଙ୍କୁ ଗିରଫ କରିଛି ମହିଳା ଥାନା ପୁଲିସ।

ସୁନ୍ଦରଗଡ଼ରେ ନାବାଳିକାଙ୍କୁ ଦୁଷ୍କର୍ମ ଅଭିଯୋଗ

ସୁନ୍ଦରଗଡ଼ ପୁଲିସ ଜିଲ୍ଲା ଅନ୍ତର୍ଗତ ଧରୁଆଡିହି ଥାନା ଅଞ୍ଚଳରେ ଏହି ଘଟଣା ଘଟିଛି। ଅଭିଯୋଗ ଅନୁଯାୟୀ, ଗତକାଲି ସନ୍ଧ୍ୟାରେ ନାବାଳିକାଙ୍କୁ ଏକୁଟିଆ ପାଇ ମେଢ଼ା ଅଞ୍ଚଳର ଜଣେ ଯୁବକ ଜୋରଜବରଦସ୍ତି ଦୁଷ୍କର୍ମ କରିଥିଲେ। ଘଟଣା ପରେ ପୀଡ଼ିତା ନିଜ ପରିବାରକୁ ଏ ସମ୍ପର୍କରେ ଜଣାଇଥିଲେ।

ପରେ ପରିବାର ଲୋକେ ରାତିରେ ଥାନାରେ ଲିଖିତ ଅଭିଯୋଗ କରିଥିଲେ। ଅଭିଯୋଗ ଆଧାରରେ ପୁଲିସ ପକ୍ସୋ (POCSO) ଆଇନ ସମେତ ଅନ୍ୟାନ୍ୟ ଦଫାରେ ମାମଲା ରୁଜୁ କରିଥିଲା। ଏତଲା ଦେବାର କିଛି ଘଣ୍ଟା ମଧ୍ୟରେ ପୁଲିସ ଅଭିଯୁକ୍ତଙ୍କୁ ଧରିଥିବା ସୂଚନା ମିଳିଛି। ଆବଶ୍ୟକ ଆଇନଗତ ପ୍ରକ୍ରିୟା ପରେ ତାଙ୍କୁ କୋର୍ଟ ଚାଲାଣ କରାଯିବ।

ଭୁବନେଶ୍ୱରରେ ସମ୍ପର୍କୀୟ ଦାଦା ଗିରଫ

ଅନ୍ୟପଟେ, ରାଜଧାନୀ ଭୁବନେଶ୍ୱରରେ ମଧ୍ୟ ଦୁଷ୍କର୍ମ ଅଭିଯୋଗରେ ଜଣେ ସମ୍ପର୍କୀୟ ଦାଦାଙ୍କୁ ଗିରଫ କରିଛି ମହିଳା ଥାନା ପୁଲିସ। ପୀଡ଼ିତାଙ୍କ ଲିଖିତ ଅଭିଯୋଗ ପରେ ପୁଲିସ ଅଭିଯୁକ୍ତଙ୍କୁ ପଚରାଉଚରା କରିଥିଲା।

ଅଭିଯୋଗ ଅନୁସାରେ, ଅଭିଯୁକ୍ତ ଦୀର୍ଘ ଦିନ ଧରି ଯୁବତୀଙ୍କୁ ନିଜ ପାଖରେ ରଖି ତାଙ୍କ ସହ ଜୋରଜବରଦସ୍ତି ଶାରୀରିକ ସମ୍ପର୍କ ରଖୁଥିଲେ। ଏହା ପରେ ପୀଡ଼ିତା ମହିଳା ଥାନାର ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଆଧାର କରି ପୁଲିସ ଅଭିଯୁକ୍ତଙ୍କୁ ଗିରଫ କରିଛି। ଏହି ଘଟଣାର ସମସ୍ତ ଦିଗକୁ ନେଇ ପୁଲିସ ତଦନ୍ତ ଜାରି ରଖିଛି। 

ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଜାଲରେ ପଡ଼ିଲେ ସରକାରୀ ଯନ୍ତ୍ରୀ। ଯାଜପୁର ଜିଲ୍ଲା ବଡ଼ଚଣା ଆର୍‌ ଆଣ୍ଡ୍‌ ବି (R&B) ସବ୍‌ଡିଭିଜନ୍‌ର ଆସିଷ୍ଟାଣ୍ଟ ଏକ୍‌ଜିକ୍ୟୁଟିଭ୍‌ ଇଞ୍ଜିନିୟର (AEE) ତପନ ସେଠୀଙ୍କୁ ଗିରଫ କରିଛି ଓଡ଼ିଶା ଭିଜିଲାନ୍ସ। ଚଢ଼ାଉ ସମୟରେ ତାଙ୍କ ସହ ଜଡ଼ିତ ବିଭିନ୍ନ ସ୍ଥାନରୁ ବିପୁଳ ସମ୍ପତ୍ତିର ସନ୍ଧାନ ମିଳିଛି। ଏହି ସମ୍ପତ୍ତି ତାଙ୍କ ଜଣାଶୁଣା ଆୟର ଉତ୍ସ ସହ ମେଳ ଖାଉନଥିବା ଅଭିଯୋଗ ହୋଇଛି।

ତପନ ସେଠୀ କଟକ ଜିଲ୍ଲା ଚୌଦ୍ୱାରର ଚାରବାଟିଆସ୍ଥିତ ଆର୍‌ ଆଣ୍ଡ୍‌ ବି ଡିଭିଜନ୍‌ର ଅଧୀକ୍ଷଣ ଯନ୍ତ୍ରୀଙ୍କ ଅଧୀନରେ କାର୍ଯ୍ୟ କରୁଥିଲେ। ଗିରଫ ପରେ ତାଙ୍କୁ କଟକର ସ୍ୱତନ୍ତ୍ର ଭିଜିଲାନ୍ସ ଜଜ୍‌ଙ୍କ ଅଦାଲତରେ ହାଜର କରାଯିବ।

ଚଢ଼ାଉରେ କ’ଣ ସବୁ ମିଳିଲା?

ଭିଜିଲାନ୍ସ ଟିମ୍‌ର ତଦନ୍ତ ବେଳେ ତପନ ସେଠୀଙ୍କ ସହ ଜଡ଼ିତ ସମ୍ପତ୍ତିରୁ ଅନେକ ଗୁରୁତ୍ୱପୂର୍ଣ୍ଣ ତଥ୍ୟ ସାମ୍ନାକୁ ଆସିଛି।

• ୩ଟି ବହୁତଳ କୋଠା: କଟକ, ଭୁବନେଶ୍ୱର ଓ ପୁରୀରେ ରହିଛି।
• ୩ଟି ମୂଲ୍ୟବାନ ପ୍ଲଟ୍‌: ବିଭିନ୍ନ ସ୍ଥାନରେ ଜମି ଠାବ ହୋଇଛି।
• ୧.୦୨ ଏକର ଫାର୍ମହାଉସ୍‌: ଏକ ବିସ୍ତୃତ ଫାର୍ମହାଉସ୍‌ର ସନ୍ଧାନ ମିଳିଛି।
• ୭୪୭ ଗ୍ରାମ ସୁନା: ବିପୁଳ ପରିମାଣର ସୁନା ଅଳଙ୍କାର ଠାବ ହୋଇଛି।
• ୨୦.୮୭ ଲକ୍ଷ ଟଙ୍କା ଜମା: ବ୍ୟାଙ୍କ ଜମା ରାଶିର ତଥ୍ୟ ମିଳିଛି।
• ୨ଟି ଦାମୀ ଚାରିଚକିଆ ଗାଡ଼ି: ଯାନବାହନ ମଧ୍ୟ ତଦନ୍ତ ପରିସରକୁ ଆସିଛି।

ଏହି ଘଟଣାରେ ଭିଜିଲାନ୍ସ ସେଲ୍‌ ଥାନାରେ କେସ୍‌ ନମ୍ବର ୮/୨୦୨୬ରେ ଦୁର୍ନୀତି ନିବାରଣ ଆଇନର ସମ୍ପୃକ୍ତ ଧାରାରେ ମାମଲା ରୁଜୁ ହୋଇଛି।

ତପନ ସେଠୀଙ୍କ ସମ୍ପତ୍ତିର ଉତ୍ସ, ଏଥିରେ ଅନ୍ୟ କେହି ସମ୍ପୃକ୍ତ ଅଛନ୍ତି କି ନାହିଁ ଏବଂ ଆଉ କେଉଁଠି ଗୁପ୍ତ ସମ୍ପତ୍ତି ରହିଛି, ସେନେଇ ତଦନ୍ତ ଜାରି ରହିଛି। ତେବେ ତଦନ୍ତ ପରେ ଏହି ମାମଲାରେ ଆଉ କେଉଁ ତଥ୍ୟ ସାମ୍ନାକୁ ଆସୁଛି, ତାହା ଉପରେ ନଜର ରହିଛି। 

ଏସିଏଫ୍ ସୌମ୍ୟରଞ୍ଜନ ମହାପାତ୍ର ମୃତ୍ୟୁ ମାମଲାରେ ପୁଣି ସାମ୍ନାକୁ ଆସିଛି ନୂଆ ମୋଡ଼। ବିଦ୍ୟାଭାରତୀଙ୍କ ଆଗୁଆ ଜାମିନ ଆବେଦନ ଉପରେ ଅନ୍ତରୀଣ ସୁରକ୍ଷା ଦେବାକୁ ମନା କରିଛନ୍ତି ହାଇକୋର୍ଟ। ଏଥିସହ ମାମଲାର କେସ୍ ଡାଏରୀ ଦାଖଲ କରିବାକୁ ଅଦାଲତ ନିର୍ଦ୍ଦେଶ ଦେଇଛନ୍ତି। ଫଳରେ ମାମଲାର ପରବର୍ତ୍ତୀ ଶୁଣାଣି ଉପରେ ଏବେ ସମସ୍ତଙ୍କ ନଜର ରହିଛି।

ସମ୍ଭାବ୍ୟ ଗିରଫଦାରୀରୁ ରକ୍ଷା ପାଇବା ପାଇଁ ବିଦ୍ୟାଭାରତୀ ହାଇକୋର୍ଟରେ ଆଗୁଆ ଜାମିନ ଆବେଦନ କରିଥିଲେ। ହେଲେ ଶୁଣାଣି ସମୟରେ ତାଙ୍କୁ ଅନ୍ତରୀଣ ସୁରକ୍ଷା ମିଳିନାହିଁ। ହାଇକୋର୍ଟଙ୍କ ଛୁଟି ଶେଷ ହେବା ପରେ ଏହି ମାମଲାର ପରବର୍ତ୍ତୀ ଶୁଣାଣି ହେବ।

ପୂର୍ବରୁ ବିଦ୍ୟାଭାରତୀଙ୍କୁ ଅକ୍ଟୋବର ୧ ତାରିଖ ସୁଦ୍ଧା ପାରଳାଖେମୁଣ୍ଡି ଏସ୍‌ଡିଜେଏମ୍‌ କୋର୍ଟରେ ହାଜର ହେବାକୁ ହାଇକୋର୍ଟ ନିର୍ଦ୍ଦେଶ ଦେଇଥିଲେ। ଏହାକୁ ଚ୍ୟାଲେଞ୍ଜ କରି ସେ ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ। କିନ୍ତୁ ସୁପ୍ରିମକୋର୍ଟ ହାଇକୋର୍ଟଙ୍କ ନିର୍ଦ୍ଦେଶକୁ କାଏମ ରଖିବା ସହ ତାଙ୍କୁ ଆଗୁଆ ଜାମିନ ପାଇଁ ଆବେଦନ କରିବାର ସୁଯୋଗ ଦେଇଥିଲେ।

ଏହାପରେ ନିମ୍ନ ଅଦାଲତରେ ହାଜର ହେବା ପାଇଁ ବିଦ୍ୟାଭାରତୀ ଅଧିକ ସମୟ ମାଗିଥିଲେ। ତାଙ୍କ ଆବେଦନକୁ ଗ୍ରହଣ କରି ଅକ୍ଟୋବର ୩୦ ସୁଦ୍ଧା ପାରଳାଖେମୁଣ୍ଡି ଏସ୍‌ଡିଜେଏମ୍‌ କୋର୍ଟରେ ହାଜର ହେବାକୁ ହାଇକୋର୍ଟ ଅନୁମତି ଦେଇଥିଲେ।

ଏବେ ଆଗୁଆ ଜାମିନ ଆବେଦନରେ ଅନ୍ତରୀଣ ସୁରକ୍ଷା ନ ମିଳିବା ପରେ ବିଦ୍ୟାଭାରତୀଙ୍କ ପରବର୍ତ୍ତୀ ପଦକ୍ଷେପ କ’ଣ ହେବ, ତାହାକୁ ନେଇ ଚର୍ଚ୍ଚା ଚାଲିଛି। ତେବେ ହାଇକୋର୍ଟ ଅନ୍ତରୀଣ ସୁରକ୍ଷା ଦେବାକୁ ମନା କରିବା ମାତ୍ରେ ଗିରଫଦାରୀ ନିଶ୍ଚିତ ବୋଲି କୁହାଯାଇପାରିବ ନାହିଁ। ଆଗାମୀ ଶୁଣାଣି ଏବଂ ଅଦାଲତଙ୍କ ପରବର୍ତ୍ତୀ ନିର୍ଦ୍ଦେଶ ଉପରେ ମାମଲାର ଗତି ନିର୍ଭର କରିବ।

କେନ୍ଦୁଝର:  ବୈତରଣୀ ନଦୀ ପଠାରୁ ଦୁଇଟି ମୃତଦେହ ଉଦ୍ଧାର ହୋଇଛି । ଯୋଡ଼ା ଥାନା ଇଙ୍ଗାନୀଝରଣ ନିକଟସ୍ଥ ପିଛଲା ଘାଟ ବୈତରଣୀ ନଦୀ କୂଳରୁ ଦୁଇଟି ମୃତ ଦେହ ମିଳିଛି । ଜଣଙ୍କର ପାଣିରେ ବୁଡ଼ିବା ଯିବଲାଗି ମୃତ୍ୟୁ ହୋଇଥିବା ବେଳେ ଅନ୍ୟ ଜଣଙ୍କୁ ହତ୍ୟା କରି ଫିଙ୍ଗି ଦିଆଯାଇଥିବା ସନ୍ଦେହ କରାଯାଉଛି । 

ଚିହ୍ନଟ ହୋଇଥିବା ମୃତକ ଜଣକ ହେଲେ ବାମେବାରୀ ଥାନା ଅନ୍ତର୍ଗତ ଜୁରୁଡ଼ି ପେଣ୍ଠେଇ ବସ୍ତିର ସନାତନ ପେଣ୍ଠେଇ (୪୫) ।  ଗତ ବୁଧବାର ଦିନ ସନାତନ ସାଙ୍ଗମାନଙ୍କ ସହ ଗୁରୁବେଡ଼ା ସ୍ଥିତ ବୈତରଣୀ ନଦୀକୁ ଗାଧୋଇବାକୁ ଯାଇଥିଲେ । ଗାଧୋଇବା ସମୟରେ ଅସାବଧାନତା ବଶତଃ ପାଣିରେ ବୁଡ଼ି ଯାଇ ନିଖୋଜ ହୋଇଯାଇଥିଲେ । ବହୁତ ଖୋଜା ଖୋଜି କରିବା ପରେ ତାଙ୍କର କୌଣସି ସନ୍ଧାନ ମିଳିନ ଥିଲା । ସ୍ଥାନୀୟ ଲୋକେ ଆଜି ନଦୀ ପଠାରେ ମୃତ ଦେହ ଭାସୁଥିବାରୁ ପୋଲିସକୁ ସୂଚନା ଦେଇଥିଲେ । ମୃତଦେହଟି ପାଣିରେ ଫୁଲିବା ଯୋଗୁଁ ଭାସି ଆସି କୂଳରେ ଲାଗିଥିବା ଅନୁମାନ କରାଯାଉଛି । ଅଗ୍ନିଶମ ବାହିନୀ ମୃତଦେହକୁ ଉଦ୍ଧାର କରିବା ପରେ ତାହା ସନାତନଙ୍କର ବୋଲି ଜଣାପଡ଼ିଛି । ପୋଲିସ ମୃତଦେହକୁ ବ୍ୟବଚ୍ଛେଦ ପାଇଁ ପଠାଇ ଦେଇଛି ।

ଅନ୍ୟପକ୍ଷରେ ବୈତରଣୀ ନଦୀର ଅନ୍ୟ ଏକ ସ୍ଥାନରେ ଆଉ ଗୋଟିଏ ଅଜଣା ମୃତ ଦେହ ଭାସୁଥିବାର ସ୍ଥାନୀୟ ଲୋକେ ଦେଖି ପୋଲିସକୁ ଖବର ଦେଇଛନ୍ତି । ତାଙ୍କର ଦୁଇ ହାତ ପଛପଟକୁ ବନ୍ଧା ହୋଇଛି । ଏହା ଶରୀରଟି ଅର୍ଦ୍ଧଦଗ୍ଧ ଅବସ୍ଥାରେ ରହିଛି । ନଦୀ କୂଳର ପଥର ଚଟାଣରେ ରକ୍ତର ଛିଟା ଏବଂ ପୋଡ଼ା ପାଉଁଶ ପଡ଼ିଥିବା ଦେଖିବାକୁ ମିଳିଛି ।  ତେଣୁ ବ୍ୟକ୍ତି ଜଣଙ୍କୁ ହତ୍ୟା କରି ଫିଙ୍ଗି ଦିଆଯାଇଥିବା ସନ୍ଦେହ କରାଯାଉଛି । 

ମୃତ ଦେହଟି କାହାର ତାହା ସ୍ପଷ୍ଟ ହୋଇ ନାହିଁ । ଯୋଡ଼ା ଥାନା ଆଇଆଇସି ଘଟଣାସ୍ଥଳରେ ପହଞ୍ଚି ଯାଞ୍ଚ କରିଛନ୍ତି । 

ଭୁବନେଶ୍ୱର: ୩୪୧ କୋଟିର ବେଆଇନ ଖଣି ଖନନ ଓ ଅର୍ଥ ହେରଫେର ମାମଲାରେ ଓଡ଼ିଶାର ଖଣି ବ୍ୟବସାୟୀ ରତିକାନ୍ତ ରାଉତଙ୍କ ପାଇଁ ବଢ଼ିଲା ଆଇନଗତ ଅଡ଼ୁଆ। ତାଙ୍କ ବିରୋଧରେ ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ (ED)। ଅକ୍ଟୋବର ୧୬ରେ ଭୁବନେଶ୍ୱରର ସ୍ୱତନ୍ତ୍ର PMLA କୋର୍ଟରେ ଏହି ଅତିରିକ୍ତ ଅଭିଯୋଗପତ୍ର ଦାଖଲ ହୋଇଛି।

ଏହି ମାମଲାରେ ପୂର୍ବରୁ ଜୁଲାଇ ୭ ତାରିଖରେ ED ପ୍ରଥମ ଚାର୍ଜସିଟ୍ ଦାଖଲ କରିଥିଲା। ଏଥିରେ ରତିକାନ୍ତଙ୍କ ପତ୍ନୀ ଲକ୍ଷ୍ମୀପ୍ରିୟା ପୃଷ୍ଟିଙ୍କ ସମେତ ଅନ୍ୟ କେତେକ ଘନିଷ୍ଠ ସହଯୋଗୀଙ୍କ ନାମ ରହିଥିଲା। ଏବେ ଅତିରିକ୍ତ ଚାର୍ଜସିଟ୍ ଦାଖଲ ପରେ ମାମଲା ପୁଣି ଚର୍ଚ୍ଚାକୁ ଆସିଛି।

୨୭ଟି FIR, ୩୪୧ କୋଟିର ଅପରାଧଜନିତ ଆୟ ଅଭିଯୋଗ

EDର ତଦନ୍ତ ଅନୁଯାୟୀ, ରତିକାନ୍ତଙ୍କ ବିରୋଧରେ ଓଡ଼ିଶାର ବିଭିନ୍ନ ଥାନାରେ ରୁଜୁ ହୋଇଥିବା ୨୭ଟି FIR ଆଧାରରେ ଅର୍ଥ ହେରଫେର ମାମଲାର ତଦନ୍ତ ଚାଲିଛି। ଏଥିରେ ବେଆଇନ ପଥର ଖନନ, ଖଣିଜ ଚୋରି, ଡକାୟତି ଏବଂ ବିନା ଅନୁମତିରେ ବିସ୍ଫୋରକ ଯୋଗାଣ ଓ ବ୍ୟବହାର ଭଳି ସଙ୍ଗୀନ ଅଭିଯୋଗ ରହିଛି।

ରତିକାନ୍ତ ରାଉତ ଢେଙ୍କାନାଳ ଜିଲ୍ଲାରେ ଲଘୁ ଖଣିଜ ଉତ୍ତୋଳନ ପାଇଁ ଲିଜ୍ ନେଇଥିଲେ। କିନ୍ତୁ ଅନୁମୋଦିତ ସୀମା ଅତିକ୍ରମ କରି ଖନନ କରାଯିବା ସହ ଲିଜ୍ ଅଞ୍ଚଳ ବାହାରେ ମଧ୍ୟ ବେଆଇନ ଖନନ ହୋଇଥିବା ED ଅଭିଯୋଗ କରିଛି। ଏହି କାରବାରରୁ ୩୪୧ କୋଟି ଟଙ୍କାରୁ ଅଧିକ ଅପରାଧଜନିତ ଆୟ ସୃଷ୍ଟି ହୋଇଥିବା ତଦନ୍ତକାରୀ ସଂସ୍ଥା ଦାବି କରିଛି।

ଡ୍ରୋନ୍ ଓ ସାଟେଲାଇଟ୍ ସର୍ଭେରେ ଧରାପଡ଼ିଲା ବେଆଇନ ଖନନ

ବେଆଇନ ଖନନର ପରିମାଣ ଆକଳନ କରିବା ପାଇଁ ଓଡ଼ିଶା ସ୍ପେସ୍ ଆପ୍ଲିକେସନ୍ ସେଣ୍ଟର (ORSAC) ପକ୍ଷରୁ ଡ୍ରୋନ୍ ଓ ସାଟେଲାଇଟ୍ ସର୍ଭେ କରାଯାଇଥିଲା। ଏହି ସର୍ଭେରୁ ଲିଜ୍ ଅଞ୍ଚଳ ମଧ୍ୟରେ ଅଧିକ ଖନନ ହୋଇଥିବା ସହ ଅନୁମୋଦିତ ଅଞ୍ଚଳ ବାହାରେ ୭ଟି ସ୍ଥାନରେ ବେଆଇନ ଖନନ ହୋଇଥିବା ତଥ୍ୟ ମିଳିଥିବା ED କହିଛି।

କମ୍ପାନୀ ନାମରେ ସମ୍ପତ୍ତି କିଣି ଟଙ୍କା ହେରଫେର ଅଭିଯୋଗ

ତଦନ୍ତରେ ମା’ ତାରିଣୀ ଷ୍ଟୋନ୍ କ୍ରସର, ସାଇ ଶମ୍ଭୁ ଇନ୍‌ଫ୍ରାଷ୍ଟ୍ରକ୍ଚର ପ୍ରାଇଭେଟ୍ ଲିମିଟେଡ୍ ଏବଂ ଆସ୍ୟୁରାନ୍ସ ମେଟାଲଏଡ୍ ଏକ୍ସିମ୍ ପ୍ରାଇଭେଟ୍ ଲିମିଟେଡ୍ ଭଳି ସଂସ୍ଥାର ନାମ ସାମ୍ନାକୁ ଆସିଛି। EDର ଅଭିଯୋଗ ଅନୁସାରେ, ବିଭିନ୍ନ ବ୍ୟାଙ୍କ ଖାତା ଓ କମ୍ପାନୀ ମାଧ୍ୟମରେ ଅର୍ଥ ହେରଫେର କରାଯାଇଥିଲା। ଏହା ସହ ରତିକାନ୍ତ, ତାଙ୍କ ପରିବାର ସଦସ୍ୟ ଓ ସମ୍ପୃକ୍ତ କମ୍ପାନୀଙ୍କ ନାମରେ ସ୍ଥାବର ଓ ଅସ୍ଥାବର ସମ୍ପତ୍ତି କିଣାଯାଇଥିବା ଦାବି କରାଯାଇଛି।

୨୦୨୫ ଜାନୁଆରୀରୁ ଚାଲିଛି ତଦନ୍ତ

୨୦୨୫ ଜାନୁଆରୀ ୮ ତାରିଖରେ ED ରତିକାନ୍ତଙ୍କ ସହ ଜଡ଼ିତ ବିଭିନ୍ନ ସ୍ଥାନରେ ଚଢ଼ାଉ କରିଥିଲା। ପରେ ଅଗଷ୍ଟ ୨୦ରେ ତାଙ୍କୁ ଗିରଫ କରାଯାଇଥିଲା। ସ୍ୱତନ୍ତ୍ର ଅଦାଲତ ତାଙ୍କୁ ପ୍ରଥମେ ୫ ଦିନିଆ ED ହେପାଜତକୁ ପଠାଇଥିଲେ। ଅଗଷ୍ଟ ୨୬ରେ ଜାମିନ ଆବେଦନ ଖାରଜ ହେବା ପରେ ସେ ନ୍ୟାୟିକ ହେପାଜତକୁ ଯାଇଥିଲେ। ପରେ ସେପ୍ଟେମ୍ବର ୭ରେ ED ଅଧିକ ପଚରାଉଚରା ପାଇଁ ଆଉ ୪ ଦିନିଆ ରିମାଣ୍ଡ ହାସଲ କରିଥିଲା।

ଏବେ ସପ୍ଲିମେଣ୍ଟାରୀ ଚାର୍ଜସିଟ୍ ଦାଖଲ ହେବା ପରେ ମାମଲାର ଆଇନଗତ ପ୍ରକ୍ରିୟା ଆଗକୁ ବଢ଼ିବ। ତେବେ ରତିକାନ୍ତଙ୍କ ବିରୋଧରେ ଥିବା ଅଭିଯୋଗର ଚୂଡ଼ାନ୍ତ ନିଷ୍ପତ୍ତି ଅଦାଲତରେ ହେବ।

ଅନଲାଇନ୍‌ରେ ଜୀବନସାଥୀ ଖୋଜୁଥିବା ମହିଳାଙ୍କୁ ଟାର୍ଗେଟ୍ କରି ଠକେଇ ଅଭିଯୋଗ। ନିଜକୁ ଡାକ୍ତର କହି ଏକାଧିକ ମହିଳାଙ୍କଠାରୁ ୧ କୋଟି ୧୯ ଲକ୍ଷ ଟଙ୍କା ଠକିଥିବା ଅଭିଯୋଗରେ ଗୋଆରୁ ଗିରଫ ହୋଇଛନ୍ତି ୩୯ ବର୍ଷୀୟ ଜିନୁ ସାହାଣୀ ଓରଫ ରାକେଶ ରାଜପୁତ।

ପୋଲିସର କହିବା ଅନୁଯାୟୀ, ଅଭିଯୁକ୍ତ ମାଟ୍ରିମୋନିଆଲ୍ ୱେବସାଇଟ୍‌ରେ ମହିଳାଙ୍କ ସହ ସମ୍ପର୍କ ସ୍ଥାପନ କରୁଥିଲେ। ପରେ ନକଲି ମେଡିକାଲ୍ ରିପୋର୍ଟ ଓ ହ୍ୱାଟ୍ସଆପ୍ ଭିଡିଓ କଲ୍ ଜରିଆରେ ବିଶ୍ୱାସ ଜିତି ଟଙ୍କା ମାଗୁଥିବା ଅଭିଯୋଗ ହୋଇଛି।

ଏହି ଘଟଣାରେ ଗଞ୍ଜାମ ଜିଲ୍ଲା ଭଞ୍ଜନଗରର ଜଣେ ବିଧବା ମହିଳା ମଧ୍ୟ ଠକେଇର ଶିକାର ହୋଇଛନ୍ତି। ଅଭିଯୁକ୍ତ ତାଙ୍କୁ ନିଜ ନାମ ସାଇ କୃପା ଦାସ ଏବଂ ଘର ଭୁବନେଶ୍ୱର ବୋଲି କହିଥିଲେ।

ପୋଲିସର ବଡ଼ କାର୍ଯ୍ୟାନୁଷ୍ଠାନ

ଅଭିଯୁକ୍ତଙ୍କଠାରୁ ୭ଟି ମୋବାଇଲ୍ ଫୋନ୍‌, ଏକାଧିକ ସିମ୍ କାର୍ଡ ଓ ରବର ଷ୍ଟାମ୍ପ ଜବତ ହୋଇଛି। ତାଙ୍କ ସହ ସମ୍ପୃକ୍ତ ୧୨.୩୧ ଲକ୍ଷ ଟଙ୍କା ମଧ୍ୟ ଫ୍ରିଜ୍ କରାଯାଇଛି। ଅନ୍ୟ ଅଭିଯୁକ୍ତ ଉତ୍ତମ କୁମାର ସାହୁ ଓରଫ ମିକିଙ୍କୁ ଅଗଷ୍ଟ ୨ରେ ଗିରଫ କରାଯାଇଥିଲା।ପୋଲିସ ଏବେ ଏହି ଠକେଇ ଘଟଣାର ଅଧିକ ଖୋଳତାଡ଼ କରୁଛି।

ଅହମ୍ମଦାବାଦ: ଗୁଜରାଟର ଭାବ୍-ଥାରାଦ ଅଞ୍ଚଳରେ ଏକ ଲୋମହର୍ଷଣକାରୀ ହତ୍ୟାକାଣ୍ଡ ଘଟିଛି । ଜନ୍ମ କଲା ରାକ୍ଷସ ପାଲଟିଯାଇଛି । ବାପା ନିଜର ଅଢ଼େଇ ବର୍ଷର ପୁଅକୁ ପଟ୍ରୋଲ୍ ଢାଳି ଜିଅନ୍ତା ଜାଳି ଦେଇଛି । ପୋଲିସ ଅଭିଯୁକ୍ତ ବାପା ଅଶୋକ ରାୱଲକୁ ଗିରଫ କରିଛି । 

ସୂଚନା ଅନୁସାରେ, ଭାବ୍ ଥାରାଦ ଅନ୍ତର୍ଗତ ସୁଇଗାମର ଅଶୋକ ପତ୍ନୀ ନିଜ ପୁଅକୁ ସ୍ୱାମୀଙ୍କ ପାଖରେ ଛାଡ଼ି ବାପ ଘରକୁ ଯାଇଥିଲେ । ପିଲା ସମ୍ଭାଳିବା କଷ୍ଟକର ହୋଇପଡ଼ିବାରୁ ବାପା ଶିଶୁଟି ଦେହରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲା । ଗତ ୧୩ ତାରିଖ ଅପରାହ୍ନରେ, ଦିନ ୧ଟାରୁ ୨ଟା ମଧ୍ୟରେ ଏହି ଘଟଣା ଘଟିଛି । ଶିଶୁଟି ଗୁରୁତର ହୋଇ ପଡ଼ିବାରୁ ବାପା ନାଟକ କରି ହସ୍ପିଟାଲରେ ଭର୍ତ୍ତି କରିଥିଲା । କିନ୍ତୁ ଡାକ୍ତର ଶିଶୁଟିକୁ ମୃତ ଘୋଷଣା କରିଥିଲେ । 

ଏହା ପରେ ଅଶୋକ ନିଜର ପରିବାର ସଦସ୍ୟଙ୍କ ସାହାଯ୍ୟରେ ତରବରିଆଭାବେ ମୃତଦେହକୁ ପୋତିବାକୁ ଚେଷ୍ଟା କରିଥିଲା । ମାତ୍ର ତାଙ୍କର ସାନ ବାପାଙ୍କ ସନ୍ଦେହ ହେବାରୁ ସେ ଥାନାରେ ଏକ ଲିଖିତ ଅଭିଯୋଗ କରିଥିଲେ । ପୋଲିସ ତଦନ୍ତ ପରେ ହତ୍ୟା ଷଡ଼ଯନ୍ତ୍ର ଉପରୁ ପରଦା ହଟିଥିଲା । 

ପୋଲିସ ଉକ୍ତ ମୃତଦେହକୁ ମାଟି ତଳୁ ଖୋଳି ବାହାର କରିବା ସହିତ ଅଭିଯୁକ୍ତ ବାପାକୁ ଗିରଫ କରିଛି । ପିଲା ସମ୍ଭାଳିବାରେ ଅସୁବିଧା ହେବାରୁ ସେ ଏଭଳି ବର୍ବର ହତ୍ୟାକାଣ୍ଡ କରିଥିବା ସ୍ୱୀକାର କରିଛି । ପୋଲିସ ତଦନ୍ତ ଜାରି ରଖିଛି ।