ପୁରୀ: ଆଜି ଶ୍ରୀମନ୍ଦିରରେ ଶ୍ରୀଜୀଉମାନଙ୍କର ପଇତା ଲାଗି ନୀତି ଅନୁଷ୍ଠିତ ହେବ । ରତ୍ନ ସିଂହାସନ ଉପରେ ମହାପ୍ରଭୁଙ୍କଠାରେ ପଇତା ଲାଗି କରାଯିବ । ଆଜି ସନ୍ଧ୍ୟାରେ ଅପରାହ୍ନ ୫ଟା ଠାରୁ ରାତି ୯ଟା ପର୍ଯ୍ୟନ୍ତ ନୀତି ଚାଲିବ । ଏଥିପାଇଁ ଚତୁର୍ଦ୍ଧାମୂର୍ତ୍ତୀଙ୍କ ଦର୍ଶନ ସର୍ବସାଧାରଣଙ୍କ ନିମନ୍ତେ ବନ୍ଦ ରହିବ ବୋଲି ଶ୍ରୀମନ୍ଦିର କାର୍ଯ୍ୟାଳୟ ପକ୍ଷରୁ ସୂଚନା ମିଳିଛି । 

ଶ୍ରୀବିଗ୍ରହଙ୍କଠାରେ ଦୈନନ୍ଦିନ ଲାଗି ହେଉଥିବା ଚନ୍ଦନରୁ ଶ୍ରୀଅଙ୍ଗକୁ ସୁରକ୍ଷା ଦେବା ପାଇଁ ଏହି ପଇତା ଲାଗି କରାଯାଇଥାଏ । ମାର୍ଗଶୀର କୃଷ୍ଣପକ୍ଷ ଦଶମୀ ତିଥି ଅବସରରେ ମହାପ୍ରଭୁଙ୍କ ପଇତା ଲାଗି କରାଯିବ । ଦଇତାପତି ସେବାୟତମାନେ ତିନି ଭାଗରେ ବିଭକ୍ତ ହୋଇ ରତ୍ନ ସିଂହାସନ ଉପରେ ଚଢି ମହାପ୍ରଭୁଙ୍କ ଏହି ଗୁପ୍ତ ସେବା କରିଥାନ୍ତି ।  ଦ୍ଵିପହର ଧୂପ ସରିବାପରେ ଦଇତାପତି ସେବକମାନେ ମହାପ୍ରଭୁଙ୍କୁ ପଇତାଲାଗି କରିବେ । ପ୍ରାୟ ୪ ଘଣ୍ଟା ଧରି ଏହି ନୀତି ଚାଲିବ । ଏହା ଏକ ଗୁପ୍ତ ନୀତି ହୋଇଥିବାରୁ ସେହି ସମୟରେ ଶ୍ରୀମନ୍ଦିରର ଜୟ ବିଜୟ ଦ୍ଵାର ବନ୍ଦ ରହିବ । ଫଳରେ ଶ୍ରଦ୍ଧାଳୁମାନେ ମହାପ୍ରଭୁଙ୍କ ଦର୍ଶନ କରି ପାରିବେ ନାହିଁ । ଏହି ନୀତି ସମ୍ପୂର୍ଣ୍ଣ ହେବାପରେ ଶ୍ରୀବିଗ୍ରହଙ୍କୁ ମହାସ୍ନାନ କରାଯିବା ପରେ ଶ୍ରଦ୍ଧାଳୁମାନେ ଦର୍ଶନ କରିପାରିବେ । ବର୍ଷକୁ ପ୍ରାୟ ଦୁଇଥର ଓ ଆବଶ୍ୟକ ପଡିଲେ ତିନିଥର ମହାପ୍ରଭୁଙ୍କ ପଇତାଲାଗି ନୀତି ଅନୁଷ୍ଠିତ ହୋଇଥାଏ ।

କଟକ: ସରି ଆସୁଛି ପବିତ୍ର କାର୍ତ୍ତିକ ମାସ । ଆଜି ହେଉଛି ଧରମର ମାସ କାର୍ତ୍ତିକର ଶେଷ ସୋମବାର । ସେଥିପାଇଁ ରାଜ୍ୟର ପ୍ରମୁଖ ଶୈବ ପୀଠରେ ଶ୍ରଦ୍ଧାଳୁଙ୍କ ଭିଡ଼ ଜମିଛି । ସେହିପରି ଧବଳେଶ୍ୱର ପୀଠରେ ବାବାଙ୍କ ଦର୍ଶନଙ୍କ ପାଇଁ ଭକ୍ତମାନଙ୍କ ନାହିଁ ନ ଥିବା ଭିଡ଼ ଦେଖିବାକୁ ମିଳିଛି । କାହି କେତେ ଦୂରରୁ ଭକ୍ତମାନେ ଧାଇଁ ଆସିଛନ୍ତି ଧବଳେଶ୍ୱରଙ୍କ ଦର୍ଶନ ପାଇଁ । 

ଆଜି ଭୋର ୩ଟା ବେଳେ ମନ୍ଦିର ଦ୍ଵାର ଫିଟା ନୀତି ସମ୍ପନ୍ନ ହୋଇଥିଲା । ଏହା ପରେ ୧୦୮ ପବିତ୍ର କଳସ ଜଳରେ ଧବଳେଶ୍ୱରଙ୍କ ମହାସ୍ନାନ କରାଯାଇଛି । ଏହା ପରେ ମଙ୍ଗଳ ଆଳତି ଓ ଅନ୍ୟାନ୍ୟ ନୀତି କରାଯାଇଛି । ଏହା ପରେ ଶ୍ରଦ୍ଧାଳୁମାନେ ଧାଡ଼ିରେ ଆସି ଶୃଙ୍ଖଳିତଭାବେ ବାବାଙ୍କ ଦର୍ଶନ କରୁଛନ୍ତି । ହୁଳହୁଳି, ହରିବୋଲ ଏବଂ ବାବା ଧବଳେଶ୍ୱରଙ୍କ ଜୟ ଗାନର ପ୍ରକମ୍ପିତ ହେଉଛି ମନ୍ଦିର ପରିସର । ଭକ୍ତଙ୍କ ସମାଗମକୁ ଦେଖି ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । 

ଅନ୍ୟପକ୍ଷରେ ପୁରୀ ଲୋକନାଥ, ଭଦ୍ରକ ଆଖଣ୍ଡଳଣୀ, ଜଗତପୁରଜିଲ୍ଲା ଗୋରେଖ ନାଥରେ ମଧ୍ୟ ଶ୍ରଦ୍ଧାଳୁଙ୍କ ସମାଗମ ହୋଇଛି । କାର୍ତ୍ତିକ ଶେଷ ସୋମବାରରେ ଦେବ ଦେବ ମହାଦେବଙ୍କ ଦର୍ଶନ କରୁଛନ୍ତି ଭକ୍ତ । 

ସେପଟେ ଆସନ୍ତାକାଲିଠାରୁ ପଞ୍ଚକ ବ୍ରତ ଆରମ୍ଭ ହେବ । ଚଳିତବର୍ଷ ୪ ଦିନ ପଞ୍ଚକ ବ୍ରତ ଅନୁଷ୍ଠିତ ହେବ । 

ପୁରୀ: ଚଳିତ ବର୍ଷ ପଞ୍ଚୁକ ବ୍ରତ ୫ ଦିନ ବଦଳରେ ୪ ଦିନ ପାଳନ ହେବ । ଆସନ୍ତା ୧୨ ତାରିଖରୁ ୧୫ ତାରିଖ ଯାଏ ପଞ୍ଚୁକ ବ୍ରତ ଅନୁଷ୍ଠିତ ହେବ । ଚତୁର୍ଦ୍ଦଶୀ କ୍ଷୟ ରହୁଥିବାରୁ ମହାପ୍ରଭୁଙ୍କ ୪ଟି ବେଶର ଦର୍ଶନର ସୁଯୋଗ ମିଳିବ । କିନ୍ତୁ ଚଳିତଥର ଲକ୍ଷ୍ମୀନୃସିଂହ ବେଶ ଅନୁଷ୍ଠିତ ହେବ ନାହିଁ । ପ୍ରଥମ ଦିନ ଲକ୍ଷ୍ମୀନାରାୟଣ ବେଶ, ଦ୍ଵିତୀୟ ଦିନ ବାଙ୍କଚୁଳ ବେଶ, ତୃତୀୟ ଦିନ ତ୍ରିବିକ୍ରମ ବେଶ ଏବଂ କାର୍ତ୍ତିକ ପୂର୍ଣ୍ଣିମା ଦିନ ସୁନାବେଶ ବା ରାଜାଧିରାଜ ବେଶରେ ଦର୍ଶନ ଦେବେ ତିନି ଠାକୁର ।

କାର୍ତ୍ତିକ ମାସରେ ଶ୍ରୀକ୍ଷେତ୍ରରେ ପ୍ରବଳ ଭକ୍ତଙ୍କ ସମାଗମ ହେଉଛି । ପଞ୍ଚୁକ ସମୟରେ ଏହି ଗହଳି ଆହୁରି ବୃଦ୍ଧି ପାଇବାର ସମ୍ଭାବନା ରହିଛି । ଭକ୍ତ ଭିଡ଼କୁ ଦୃଷ୍ଟିରେ ରଖି ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ୱତନ୍ତ୍ର ବ୍ୟବସ୍ଥା କରାଯାଇଥିବାବେଳେ ପୁଲିସ ପ୍ରଶାସନ ପକ୍ଷରୁ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ମହାପ୍ରଭୁଙ୍କ ନୀତିକାନ୍ତି ଏବଂ ଦର୍ଶନ କିପରି ସୁରୁଖରେ ହେବ ସେଥିପ୍ରତି ଧ୍ୟାନ ଦିଆଯାଇଛି । 

ପଞ୍ଚୁକ ସମୟରେ ୩୮ପ୍ଲାଟୁନ ଫୋର୍ସ ମୁତୟନ କରାଯିବ । ସେହିପରି ବ୍ୟାରିକେଡ ଓ ପାନୀୟ ଜଳର ବ୍ୟବସ୍ଥା କରାଯାଉଛି । ଭିଡ଼ ନିୟନ୍ତ୍ରଣ ଏବଂ ଟ୍ରାଫିକ ସୁପରିଚାଳନା ଉପରେ ଗୁରୁତ୍ୱ ଦିଆଯାଇଥିବା କହିଛନ୍ତି ଏସପି ବିନୀତ ଅଗ୍ରୱାଲ ।

ଭୁବନେଶ୍ୱର: ପରିବାର ସୁଖ ଏବଂ ସମୃଦ୍ଧି ପାଇଁ ମହିଳାମାନେ ଆରମ୍ଭ କରିଥିବା ‘ଛଟ୍‌’ ପୂଜାର ଆଜି ହେଉଛି ତୃତୀୟ ଦିନ । ଆଜି ବ୍ରତଧାରୀ ମହିଳାମାନେ ଅସ୍ତଗାମୀ ସୂର୍ଯ୍ୟଙ୍କୁ ଅର୍ଘ୍ୟ ପ୍ରଦାନ କରିଛନ୍ତି । ଏଥିପାଇଁ ବିଭିନ୍ନ ଜଳାଶୟରେ ଶ୍ରଦ୍ଧାଳୁଙ୍କ ଭିଡ଼ ଦେଖିବାକୁ ମିଳିଛି । ଓଡ଼ିଶାରେ ମଧ୍ୟ ବିଭିନ୍ନ ଜଳାଶୟ ଏହି ପ୍ରସିଦ୍ଧ ବ୍ରତ ବିଦ୍ଧି ଦେଖିବାକୁ ମିଳିଛି । ବିଶେଷ କରି ବିହାରର ମହିଳାମାନେ କୂଆଖାଇ ନଦୀପଠାରେ ଆୟୋଜିତ ପୂଜାରେ ଅସ୍ତଗାମୀ ସୂର୍ଯ୍ୟ ଦେବତାଙ୍କୁ ପୂଜା କରିଛନ୍ତି । 

ରାଜଧାନୀ ଭୁବନେଶ୍ବର ଓ ଏହାର ଆଖପାଖ ଅଞ୍ଚଳରେ ବସବାସ କରୁଥିବା ବିହାରୀ ସମ୍ପ୍ରଦାୟ ପ୍ରତିବର୍ଷ କୁଆଖାଇ ନଦୀକୂଳରେ ସୂର୍ଯ୍ୟ ଦେବତା ସମେତ ଜଳ ଏବଂ ବାୟୁମଣ୍ଡଳକୁ ପୂଜା କରିଥାନ୍ତି। ତେଣୁ ବହୁ ସଂଖ୍ୟାରେ ମହିଳାମାନେ ଏକ ଶୋଭାଯାତ୍ରାରେ ଆସି ନଦୀକୂଳରେ ପୂଜାର୍ଚ୍ଚନା କରିଛନ୍ତି। ଆଖୁ, ଫଳମୂଳ ଏବଂ ଅର୍ଘ୍ୟ ଦେଇ ସୂର୍ଯ୍ୟ ଦେବତାଙ୍କୁ ପୂଜା କରିଛନ୍ତି। କାର୍ତ୍ତିକ ଶୁକ୍ଳପକ୍ଷ ଷଷ୍ଠୀ ତିଥିରେ ପରିବାରର ସୁଖ ଶାନ୍ତି ସମୃଦ୍ଧି କାମନା କରି ଏହି ପୂଜା କରାଯାଏ ।

ସେହିପରି ଆସନ୍ତାକାଲି ବ୍ରତର ଚତୁର୍ଥ ତଥା ଶେଷ ଦିବସ । ଆସନ୍ତାକାଲି ବ୍ରତ କରୁଥିବା ମହିଳା ଉଦିତ ସୂର୍ଯ୍ୟଙ୍କୁ ଅର୍ଘ୍ୟ ଦେଇ ବ୍ରତ ସମାପନ କରିବେ । 

ଛଟ୍ ପୂଜା ବିହାରର ଏକ ପ୍ରସିଦ୍ଧ ବ୍ରତ । ବିଶେଷ କରି ବିହାର,ଝାଡ଼ଖଣ୍ଡର ମହିଳାମାନେ ଛଟି ମାଆଙ୍କୁ ପୂଜା କରିଥାନ୍ତି । ଛଟି ହେଉଛି ମାତା ପାର୍ବତୀଙ୍କର ରୂପ । ଏଥିରେ ସୂର୍ଯ୍ୟ, ପ୍ରକୃତି, ବାୟୁ, ଜଳ ଓ ଛଟି ମାତାଙ୍କୁ ପୂଜା କରାଯାଇଥାଏ । କାର୍ତ୍ତିକ ଅମାବାସ୍ୟ ଅର୍ଥାତ ଦୀପାବଳି ଅମାବାସ୍ୟାର ଚତୁର୍ଥୀରୁ ଏହି ପୂଜା ଆରମ୍ଭ ହୋଇ ଚାରିଦିନ ଧରି ଚାଲିଥାଏ । 

ପୁରୀ: ପୁଣି ଥରେ ଜଗନ୍ନାଥ ସଂସ୍କୃତି ବିରୋଧରେ କାର୍ଯ୍ୟ କରିଛି ଇସ୍କନ ସଂଗଠନ । ଅଦିନରେ ଆୟୋଜିତ ହୋଇଛି ମହାପ୍ରଭୁଙ୍କ ମହାସ୍ନାନ ଏବଂ ରଥଯାତ୍ରା । ଯାହାକୁ ନେଇ ତୀବ୍ର ପ୍ରତିକ୍ରିୟା କରିଛନ୍ତି ଜଗନ୍ନାଥ ପ୍ରେମୀ । ଅନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟାନାୟକ ମଧ୍ୟ ଟୁଇଟ୍ କରି କ୍ଷୋଭ ପ୍ରକାଶ କରିଛନ୍ତି । 

ଆମେରିକାର ହୋଷ୍ଟନରେ ଇସ୍କନ ସଂଗଠନ ପକ୍ଷରୁ ଜ୍ୟେଷ୍ଠ ଏବଂ ଆଷାଢ଼ ମାସ ବଦଳରେ କାର୍ତ୍ତିକ ମାସରେ ରଥଯାତ୍ରା କରିବାକୁ ଆୟୋଜନ କରାଯାଇଛି । ଆଗାମୀ ନଭେମ୍ବର ୩ରେ ମହାପ୍ରଭୁଙ୍କ ଦେବସ୍ନାନ ଏବଂ ନଭେମ୍ବର ୯ ତାରିଖରେ ରଥଯାତ୍ରା ଅନୁଷ୍ଠିତ ହେବ ବୋଲି ସୂଚନା ଦେଇଛନ୍ତି । 

ତେବେ ଏହାକୁ ନେଇ ଗଭୀର ଦୁଃଖ ପ୍ରକାଶ କରିଛନ୍ତି ଅନ୍ତର୍ଜାତୀୟ ବାଲୁକା ଶିଳ୍ପୀ ସୁଦର୍ଶନ ପଟ୍ଟାନାୟକ । ସେ ନିଜର ସୋସିଆଲ ମିଡିଆ ଆକାଉଣ୍ଟ ‘ଏକ୍ସ’ରେ ଅଦିନିଆ ରଥଯାତ୍ରା ନ କରିବାକୁ ହୋଷ୍ଟନ୍ ଇସ୍କନ ସଂଗଠନକୁ ଅନୁରୋଧ କରିଛନ୍ତି । ମହାପ୍ରଭୁ ଜଗନ୍ନାଥଙ୍କ ସହିତ ଜଡ଼ିତ ସବୁଠାରୁ ଗୁରୁତ୍ୱ ପୂର୍ଣ୍ଣ ରଥଯାତ୍ରାର ପରମ୍ପରାକୁ ପରିବର୍ତ୍ତନ ନ କରିବାକୁ ସେ କହିଛନ୍ତି । 

ତେବେ ଅଦିନରେ ରଥଯାତ୍ରା କରିବା ଇସ୍କନର ନିୟମିତ ସ୍ୱଭାବ ହୋଇଯାଇଛି । ପୂର୍ବରୁ ମଧ୍ୟ ଜଗନ୍ନାଥ ସଂସ୍କୃତିକୁ ବିକୃତ କରିବାକୁ ବାରମ୍ବାର ଇସ୍କନ ଚେଷ୍ଟା କରିଛି । ଗଜପତିଙ୍କ ତାଗିଦ ପରେ ମଧ୍ୟ ସୁଧୁରୁ ନାହାଁନ୍ତି । 

ଏଠାରେ ଉଲ୍ଲେଖ ଯୋଗ୍ୟ, ଗତ ୨୦୧୯ ମସିହାରେ ନଭେମ୍ବର ୨୭ ତାରିଖରେ ପଞ୍ଜାବ ଲୁଧିଆନାରେ ଇସ୍କନ ପକ୍ଷରୁ ଅଦିନିଆ ରଥାଯାତ୍ରା କରାଯାଇଥିଲା । ଯାହାକୁ ନେଇ ଜଗନ୍ନାଥ ପ୍ରେମୀ ଏବଂ ପୁରୀ ଗଜପତି ମହାରାଜ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା । ଏହା ପରେ ଏଥିରୁ ଓହରିଥିଲା ଲୁଧିଆନା ଇସ୍କନ । ସେହିପରି ୨୦୨୦, ମାର୍ଚ୍ଚ ୧୮ ତାରିଖରେ ମଥୁରାରେ ଇସ୍କନ ପକ୍ଷରୁ ଅଦିନିଆ ରଥଯାତ୍ରା କରାଯାଇଥିଲା । ସେହିପରି ୨୦୨୨, ଡିସେମ୍ବର ୧୦ ତାରିଖରେ ପଞ୍ଜାବ ଅମୃତସର ସହରରେ ରଥଯାତ୍ରା ଆୟୋଜନ କରାଯାଇଥିଲା । ୨୦୨୩, ଜୁନ ୨୪ରେ ରଥଯାତ୍ରାର ତିଥି ନ ଥିବା ସତ୍ତ୍ୱେ ଗ୍ୱାଲିଅରରେ ରଥଯାତ୍ରା କରାଯାଇଥିଲା ।

Jai Jagannath, 🙏 Today, I am very surprised to see that your organisation @ISKCONofHouston is going to organise Maha Prabhu Jagannath Rath Yatra and Snana Yatra in the month of November in Houston, USA. My humble request to the organiser, please do not change the tradition of… pic.twitter.com/rof2QZ2LxR

— Sudarsan Pattnaik (@sudarsansand) October 26, 2024

ଭୁବନେଶ୍ୱର: ଓଡ଼ିଶାରେ ବାତ୍ୟା ହେବା ନେଇ ପାଣିପାଗ ବୈଜ୍ଞାନିକମାନେ ବର୍ତ୍ତମାନ ପୂର୍ବାନୁମାନ କରିଛନ୍ତି । ଆଧୁନିକ ଯନ୍ତ୍ରପାତି ସାହାଯ୍ୟରେ ଅନେକ ଗବେଷଣା କରିବା ପରେ ଆମକୁ ବାତ୍ୟାର ସମ୍ଭାବନା ନେଇ ସୂଚିତ କରାଇଥାନ୍ତି । କିନ୍ତୁ ବିଜ୍ଞାନକୁ ଆଳ କରି ଯେଉଁ ଜାତକ ଏବଂ ପଞ୍ଜିକାକୁ କିଛି ଲୋକ ହେ ଜ୍ଞାନ କରନ୍ତି ସେହି ପଞ୍ଜିକା ଆମକୁ ବର୍ଷ ଆରମ୍ଭରୁ ବାତ୍ୟାର ପୂର୍ବାଭାଷ ଦେଇଛି । ତୁଳାମାସ ଅର୍ଥାତ ଅକ୍ଟୋବର ମାସରେ ମହାବାତ୍ୟା ଆସିବ ବୋଲି ପୂର୍ବାନୁମାନ କରିଥିଲେ ଖଡ଼ିରତ୍ନ ପଞ୍ଜିକାର ଜ୍ୟୋର୍ତିବିଦମାନେ । 

ପଠାଣି ସାମନ୍ତ ଦୁଇ ଖଣ୍ଡ କାଠିରେ ଭବିଷ୍ୟ ଗଣନା କରୁଥିଲେ । ପଞ୍ଜିକାକୁ ନେଇ ତାଙ୍କର ଅତୁଳନୀୟ ଅବଦାନ ରହିଛି ।  ସୂର୍ଯ୍ୟ, ଚନ୍ଦ୍ର, ଗ୍ରହ ଆଦିଙ୍କର ଦୈନିକ ଓ ବାର୍ଷିକ ଆବର୍ତ୍ତନର ନିର୍ଭୁଲ ଗଣନା କରିବା, ସୂର୍ଯ୍ୟପରାଗ ଓ ଚନ୍ଦ୍ରଗ୍ରହଣର ସଠିକ୍ ସମୟ ନିର୍ଦ୍ଧାରଣ କରିବାରେ ସେ ପାରଙ୍ଗମ ଥିଲେ । ତାଙ୍କ ପରେ ଅନେକ ଜ୍ୟୋତିର୍ବିଦମାନେ ଗ୍ରହ, ନକ୍ଷତ୍ରକୁ ଦେଖି ଆମ ରାଜ୍ୟ ତଥା ଦେଶ ଉପରେ ଆସୁଥିବା ଅନେକ ବିପଦର ଆଗୁଆ ସୂଚନା ଦେଇଥାନ୍ତି । ସେହିପରି ଚଳିତ ବର୍ଷ ଖଡ଼ିରତ୍ନ ପଞ୍ଜିକାରେ ମହାବାତ୍ୟା ନେଇ ପୂର୍ବାନୁମାନ କରାଯାଇଥିଲା । ଏମିତିକି ମାସ ଏବଂ ତାରିଖ ମଧ୍ୟ ଉଲ୍ଲେଖ କରାଯାଇଛି । 

ଖଡ଼ିରତ୍ନ ପଞ୍ଜିକାର ପୂର୍ବାନମାନ ଅନୁଯାୟୀ, ଜଳ ବିଷୁବ ସଂକ୍ରାନ୍ତି ଦାଢ଼ ସଞ୍ଚାର ହେତୁ ଦୀନ ଜଳ ବୃଷ୍ଟି ହେବ । ରାଜ୍ୟର ଉପକୂଳ ଜିଲ୍ଲା ପୁରୀ, କଟକ, ଗୋପାଳପୁର, କୋଣାର୍କର ଅସ୍ତରଙ୍ଗ, ଯାଜପୁର, ଭୁବନେଶ୍ୱର, ନୟାଗଡ଼, କାକଟପୁର, ନିଆଳି ପ୍ରଭୃତି ସ୍ଥାନରେ ଘୂର୍ଣ୍ଣିବାତ୍ୟା, ପ୍ରଚଣ୍ଡ ବାୟୁ ପ୍ରବାହ ଏବଂ ସାମୁଦ୍ରିକ ଝଡ଼ ତଥା ମହାବାତ୍ୟା ଭଳି ଭୟଙ୍କର ପରିସ୍ଥିତି ସୃଷ୍ଟି ହେବ । ଅକ୍ଟୋବର ୧୭ରୁ ୨୩, ଅକ୍ଟୋବର ୨୬ରୁ ୩୦, ନଭେମ୍ବର ୫ ରୁ ୯ ତାରିଖ ଏବଂ ନଭେମ୍ବର ୧୧ରୁ ୧୫ ତାରିଖ ମଧ୍ୟର ପ୍ରଚଣ୍ଡ ବାୟୁ ପ୍ରବାହ, ସାମୁଦ୍ରିକ ଝଡ଼, ଲଘୁଚାପ , ଜୁଆର ଆଦି ହେବାର ସମ୍ଭାବନା ରହିଥିବା ପଞ୍ଜିକାରେ ଉଲ୍ଲେଖ କରାଯାଇଛି । ଏହା ସହିତ ଅନେକ ଧନ ଜୀବନ ମଧ୍ୟ ପ୍ରଭାବିତ ହେବ । 

ସେହିପରି ଶୀତ ନେଇ ମଧ୍ୟ ଆକଳନ କରାଯାଇଛି । ଜ୍ୟୋତିର୍ବିଦମାନେ ଚଳିତ ମାସଠାରୁ ଶୀତ ହେବ ବୋଲି ମଧ୍ୟ ଆକଳନ କରିଛନ୍ତି । 

ପୁରୀ: ସରିଲା ପାର୍ବଣ ଋତୁ, ଆଜିଠାରୁ ଶ୍ରୀମନ୍ଦିରରେ ଆରମ୍ଭ ହୋଇଛି କାର୍ତ୍ତିକ ନୀତି । ରାଧା ଦାମୋଦର ବେଶରେ ଦର୍ଶନ ଦେବେ ମହାପ୍ରଭୁ । ଶ୍ରୀମନ୍ଦିରରେ ଆରମ୍ଭ ହେବ କାର୍ତ୍ତିକ ମାସ ବାଳଧୂପ ନୀତି । ଆଶ୍ୱିନ ଶୁକ୍ଳ ଏକାଦଶୀରୁ ମହାପ୍ରଭୁଙ୍କ ରାଧା ଦାମୋଦର ବେଶ ଆରମ୍ଭ ହୋଇ କାର୍ତ୍ତିକ ଶୁକ୍ଳ ଦଶମୀ ପର୍ଯ୍ୟନ୍ତ ଅନୁଷ୍ଠିତ ହେବ ।

କାର୍ତ୍ତିକ ମାସରେ ରାତ୍ର ୧୨ଟାରେ ପହୁଡ଼ ସମ୍ପନ୍ନ ହୋଇ ରାତି ୪ଟାରେ ଦ୍ୱାର ଫିଟାଯିବ । ସାଢେ ୪ଟାରେ ଭିତର ଶୋଧ କରାଯାଇ ଭୋର ୫ଟାରେ ମଙ୍ଗଳ ଆଳତି କରାଯିବାକୁ ନୀତି ନିର୍ଘଣ୍ଟ ହୋଇଛି । ଧର୍ମମାସ କାର୍ତ୍ତିକର ମୁଖ୍ୟ ଆକର୍ଷଣ ରାଧା ଦାମୋଦର ବେଶ ସକାଳ ସାଢେ ୬ଟାରୁ ସାଢେ ୭ଟାରେ ସମ୍ପନ୍ନ ହେବ । ସାଢେ ୮ଟାରୁ ୯ଟା ସକାଳ ଧୂପ (କେବଳ କୋଠଭୋଗ) ପରେ ପୂର୍ବାହ୍ନ ୧୦ଟାରୁ ସାଢେ ୧୦ଟା ମଧ୍ୟରେ ବାଳଧୂପ ବଢିବ ।

ପ୍ରତ୍ୟହ ଆଳତି ଅବକାଶ ପରେ ରାଧା-ଦାମୋଦର ବେଶ ହୋଇ ଗୋପାଳବଲ୍ଲଭ ଭୋଗ ହେବ । ରାଧା-ଦାମୋଦର ବେଶରେ ଦିଅଁମାନେ ୩୦ ମୂର୍ତ୍ତି ସୁନା ଅଳଙ୍କାର ଲାଗି ହୁଅନ୍ତି । ତାହା ହେଲା- ନଳୀଭୁଜ-୪, କୁଣ୍ଡଳ-୪, ତିଳକ-୨, ଆଡ଼କାନି-୪, ଚନ୍ଦ୍ରିକା-୨, ଚନ୍ଦ୍ରସୂର୍ଯ୍ୟ-୬, ତଡ଼କୀ- ୨, ଓଡ଼ିଆଣୀ-୩, ମାଳି-୩ (ମୋଟ-୩୦) । 

ସେହିପରି ପଞ୍ଚୁକକୁ ନେଇ ଶ୍ରଦ୍ଧାଳୁଙ୍କ ମଧ୍ୟରେ ବେଶ୍‌ ଉତ୍ସାହ ଥିବାବେଳେ ଅନ୍ୟ ଏହାର ତାରିଖ ନିର୍ଘଣ୍ଟ ହୋଇଛି । ରାଧା ଦାମୋଦର ବେଶ ପରେ ପଞ୍ଚୁକ ଚାଲିବ । ଚଳିତବର୍ଷ ପଞ୍ଚୁକ ୪ ଦିନ ପଡିଛି । ଫଳରେ ଏଥର ଲକ୍ଷ୍ମୀନୃସିଂହ ବେଶ ଅନୁଷ୍ଠିତ ହେବ ନାହିଁ । ନଭେମ୍ବର ୧୨ ତାରିଖରେ ମହାପ୍ରଭୁଙ୍କ ଠିଆକିଆ ବା ଲକ୍ଷ୍ମୀନାରାୟଣ ବେଶ ସହିତ ହରି ଉତ୍‌ଥାପନ ନୀତି ରହିଛି ।

ଆଜି ପୀଠରେ ପାଳିତ ହେଉଛି ବିଜୟା ଦଶମୀ ଏବଂ ଆସନ୍ତାକାଲି ମଣ୍ଡପରେ ପାଳିତ ବିଜୟା ଦଶମୀ । ଏହି ଦିନରେ ରାବଣ ଦହନ କରାଯିବ । ଏହି ପ୍ରଭୁ ଶ୍ରୀରାମ ରାବଣକୁ ବଦ୍ଧ କରି ବିଜୟଲାଭ କରିଥିବାରୁ ସେଥିପାଇଁ ଏହାର ନାମ ବିଜୟା ଦଶମୀ ରଖାଯାଇଛି । ତେବେ ଦେଶରେ ଏମିତି ଏକ ସ୍ଥାନ ଅଛି ଯେଉଁଠି ରାବଣ ପୋଡ଼ିରେ ଦୁଃଖ ପ୍ରକାଶ କରାଯାଏ । ଏଠାରେ ରାବଣ ପୋଡ଼ି ଅନୁଷ୍ଠିତ ହୋଇ ନ ଥାଏ ବରଂ ଏଠାରେ ଏହି ଦିନରେ ରାବଣଙ୍କର ଆଳତୀ କରି ଆରାଧନା କରାଯାଏ । ଆଉ ଏହି ସ୍ଥାନ ଉତ୍ତର ପ୍ରଦେଶରେ ରହିଛି । ଯେଉଁ ଗ୍ରାମର ନାମ ହେଉଛି ବିଶ୍ରାଖ । 

ଦିଲ୍ଲୀଠାରୁ ମାତ୍ର 40 କିଲୋମିଟର ଦୂରରେ ଅବସ୍ଥିତ ଉତ୍ତରପ୍ରଦେଶର ବିସ୍ରାଖ ଗ୍ରାମ । ଏହି ଗାଁକୁ ରାବଣର ଜନ୍ମସ୍ଥାନ ବୋଲି ବିବେଚନା କରାଯାଏ ଏବଂ ଗ୍ରାମବାସୀମାନେ ତାଙ୍କ ବଂଶଧର ଭାବରେ ନିଜକୁ ପରିଚୟ ଦିଅନ୍ତି । ଯେଉଁଠି ସାରା ଦେଶ ରାବଣ, କୁମ୍ଭକର୍ଣ୍ଣ ଏବଂ ତାଙ୍କ ପୁଅ ମେଘନାଦଙ୍କର ଦହନ କରିଥାନ୍ତି, ସେଇଠି ଏହି ଗ୍ରାମରେ ରାବଣଙ୍କ ମୃତ୍ୟୁରେ ଶୋକ ପ୍ରକାଶ କରନ୍ତି । ତାଙ୍କ ଆତ୍ମାର ଶାନ୍ତି ନିମନ୍ତେ ପ୍ରାର୍ଥନା କରନ୍ତି । 

ବିଶ୍ରାଖର ବାସିନ୍ଦା ବିଶ୍ୱାସ କରିନ୍ତି ରାବଣ ହେଉଛନ୍ତି ଜ୍ଞାନର ଭଣ୍ଡାର ମହାଜ୍ଞାନୀ ଏବଂ ସେ ପ୍ରଭୁ ଶିବଙ୍କର ଜଣେ ବିଶିଷ୍ଟ ଭକ୍ତ । ସେଥିପାଇଁ ତାଙ୍କ ବଂଶଧର ଭାବରେ ଏମାନେ ଦଶହରା ପାଳନ କରନ୍ତି ନାହିଁ । ରାବଣଙ୍କୁ ଯେତିକି ସମ୍ମାନ କରନ୍ତି ସେମାନେ ପ୍ରଭୁ ଶ୍ରୀରାମଙ୍କୁ ମଧ୍ୟ ସେତିକି ଭକ୍ତି କରନ୍ତି ।  କିନ୍ତୁ କାହିଁ କେଉଁ ଯୁଗରୁ ବିଶ୍ୱାସ ରହିଛି କିଛି ଅଘଟଣ ଘଟିବା ଭୟରେ ଗ୍ରାମବାସୀ ରାମଲୀଲା ଉତ୍ସବ ପାଳନ କରନ୍ତି ନାହିଁ । ଦଶହରା ସମୟରେ ସେମାନେ ଗାଁରେ ଥିବା ରାବଣ ମନ୍ଦିରରେ ପୂଜା ଅର୍ଚ୍ଚନା କରାଯାଇଥାଏ । ଏହି ମନ୍ଦିରରେ ସେହି ଶିବ ଲିଙ୍ଗ ରହିଛି ଯାହାକୁ ଏକଦା ରାବଣ ଏବଂ ତାଙ୍କ ପିତା ବିଶ୍ରାବା ଋଷି ପୂଜା କରୁଥିଲେ ବୋଲି ବିଶ୍ୱାସ ରହିଛି । 

କାହିଁକି ଗାଁର ନାମ ବିଶ୍ରାଖ ରଖାଯାଇଛି ?

କୁହାଯାଏ ବିଶ୍ରାବା ଋଷିଙ୍କ ନାମରୁ ଗାଁର ନାମ ବିଶ୍ରାଖ ରଖାଯାଇଛି । ଶାସ୍ତ୍ର ଅନୁସାରେ ରାବଣ ହେଉଛି ଲଙ୍କାର ରାଜା ଏବଂ ସେ ବହୁତ ଶକ୍ତିଶାଳୀ ଥିଲେ । ତେବେ କୁହାଯାଏ ଭାରତ ବର୍ଷରେ ବିଭିନ୍ନ ଜାତିର ପ୍ରତୀକ ହେଉଛନ୍ତି ରାବଣ । ଆଉ ତାଙ୍କର ବଂଶଧରମାନେ ଏବେବି ଦେଶରେ ଅଛନ୍ତି । 

କେଉଁଠି ଅଛି ରାବଣ ମନ୍ଦିର ? 

ମଧ୍ୟପ୍ରଦେଶ ବିଦିଶା ଜିଲ୍ଲାରେ କାନପୁରରେ ରାବଣ ମନ୍ଦିର ରହିଛି । ସେହିପରି କର୍ଣ୍ଣାଟକର ମନ୍ଦ୍ୟା ଜିଲ୍ଲାରେ ମଧ୍ୟ ରାବଣଙ୍କୁ ପୂଜା କରାଯାଇଥାଏ । ସେଠାରେ ମଧ୍ୟ ରାବଣଙ୍କର ମନ୍ଦିର ରହିଛି । 

ପଶ୍ଚିମ ଦିଲ୍ଲୀ: ନବରାତ୍ରୀ ଆରମ୍ଭ ହେବା ପରେ ଲୋକେ ଏବେ ରାବଣ ଦହନ ଦେଖିବା ପାଇଁ ଦଶହରାକୁ ଅପେକ୍ଷା କରିଛନ୍ତି। ସେହିପରି ଦ୍ୱାରକାର ରାମଲୀଳା ପଡ଼ିଆରେ ଏକ ଲମ୍ବା ଓ ବିରାଟ ରାବଣ ନିର୍ମାଣ କରାଯାଇଛି, ଯାହା ଲୋକଙ୍କ ଦୃଷ୍ଟି ଆକର୍ଷଣ କରୁଛି। ଏହାକୁ ପ୍ରସ୍ତୁତ କରିବା ପାଇଁ ୩୦ ଲକ୍ଷ ଟଙ୍କା ଖର୍ଚ୍ଚ ହୋଇଥିବା ଆୟୋଜକ ପକ୍ଷରୁ କୁହାଯାଇଛି।

ପିଲାଙ୍କଠାରୁ ଆରମ୍ଭ କରି ବୟସ୍କ ପର୍ଯ୍ୟନ୍ତ ସମସ୍ତେ ଏହାକୁ ଦେଖିବାକୁ ଆସୁଛନ୍ତି, କାରଣ ଏହାକୁ କେବଳ ଦିଲ୍ଲୀ ନୁହେଁ ବରଂ ବିଶ୍ୱର ସବୁଠାରୁ ଉଚ୍ଚ ରାବଣ ବୋଲି ବର୍ଣ୍ଣନା କରାଯାଉଛି। ଆୟୋଜକ ଏହା ଦାବି କରିଛନ୍ତି। ଏହା ରାବଣ ଜଳନିରୋଧକ କାରଣ ଏହା ମଖମଲି କପଡାରେ ତିଆରି ହୋଇଛି, ଏଥିରେ କାଗଜ ବ୍ୟବହାର କରାଯାଇନାହିଁ। ରାବଣ ମୂର୍ତ୍ତିର ଉଚ୍ଚ ୨୧୧ ଫୁଟ ।

ତେଣୁ ରାବଣଙ୍କୁ ଦେଖିବା ପାଇଁ ଲୋକଙ୍କୁ ମୁଣ୍ଡ ଉଠାଇବାକୁ ପଡ଼ୁଛି। ରାବଣଙ୍କ ଜୋତା ମଧ୍ୟ ତିଆରି କରାଯାଇଛି ଯାହା ଲୋକଙ୍କୁ ସେମାନଙ୍କ ଆଡକୁ ଆକର୍ଷିତ କରୁଛି। ସେଥିପାଇଁ ଲୋକେ ତାଙ୍କ ସହ ଫଟୋ ମଧ୍ୟ ଉଠାଉଛନ୍ତି।

ଦ୍ୱାରକା ଶ୍ରୀରାମଲୀଲା ସୋସାଇଟିର ଅଧ୍ୟକ୍ଷ ରାଜେଶ ଗେହଲଟ କହିଛନ୍ତି ଯେ ପ୍ରତିବର୍ଷ ଭଳି ଏଥର ମଧ୍ୟ ରାମଲୀଳାକୁ ଅଧିକ ଭବ୍ୟତାର ସହ ଆୟୋଜନ କରାଯାଉଛି। ରାବଣଙ୍କ ଉଚ୍ଚତା ପ୍ରତିବର୍ଷ ବଢିବାରେ ଲାଗିଛି । ପୂର୍ବରୁ ରାବଣର ଲମ୍ବ ୬୦ରୁ ୭୦ ଫୁଟ୍ ଥିଲା, ପରେ ଧୀରେଧୀରେ ଏହା ବୃଦ୍ଧି ପାଇଥିଲା। ଏଥର ରାବଣର ଲମ୍ବ ୨୧୧ ଫୁଟ।

ପଞ୍ଜାବର ଅମ୍ବାଲା ନିକଟସ୍ଥ ଭରାରା ଗାଁର ଜିତେନ୍ଦ୍ର ଖାନ୍ନା ଏହି ରାବଣକୁ ପ୍ରସ୍ତୁତ କରିଛନ୍ତି। ଏହି ରାବଣକୁ ବିଭିନ୍ନ ସ୍ଥାନରୁ ପ୍ରାୟ ୪୦ ଜଣ କଳାକାର ପ୍ରସ୍ତୁତ କରିଛନ୍ତି, ଯେଉଁଥିପାଇଁ ୪ ମାସ ସମୟ ଲାଗିଥିଲା। ଅକ୍ଟୋବର ୨ ତାରିଖରେ ରାବଣ ମଇଦାନରେ ଏହାକୁ ନିର୍ମାଣ କରାଯାଇଛି। ଏହି ରାବଣ ତିଆରି କରିବା ପାଇଁ ପ୍ରାୟ ୩୦ ଲକ୍ଷ ଟଙ୍କା ଖର୍ଚ୍ଚ ହୋଇଛି ବୋଲି ସେ କହିଛନ୍ତି।

ରାଜେଶ ଗେହଲଟ କହିଛନ୍ତି ଯେ ଏହି ରାବଣକୁ ଏକ ଲୁହା ଢାଞ୍ଚାରେ ନିର୍ମାଣ କରାଯାଇଛି। ମାଟିଠାରୁ ୧୦ ଫୁଟ ତଳକୁ ଲୁହା ପାଇପ୍ ଲଗାଯାଇଛି, ଯେଉଁଥିରେ ରାବଣ ଛିଡ଼ା ହୋଇଛନ୍ତି। ଏହାବ୍ୟତୀତ ଲୁହା ଢାଞ୍ଚାକୁ ଚାରିଆଡ଼ୁ ଲୁହା ଚେନ୍ ରେ ବାନ୍ଧି ରଖାଯାଇଥାଏ। ବାଉଁଶ ସାହାଯ୍ୟରେ ରାବଣ ତିଆରି କରାଯାଏ। ଏଥିସହିତ ଏଥିରେ ବ୍ୟବହୃତ କପଡ଼ା ମଖମଲର ହୋଇଥିବାରୁ ରାବଣ ମଧ୍ୟ ସୁନ୍ଦର ଓ ସୁନ୍ଦର ଦେଖାଯାଆନ୍ତି।

ଅଧିକ ପଢ଼ନ୍ତୁ: ଆଜି ମଣ୍ଡପରେ ଦୁର୍ଗତିନାଶିନୀ ମା' ଦୁର୍ଗାଙ୍କର ସପ୍ତମୀ ପୂଜା

ନବରାତ୍ରୀ ପର୍ବ ଆଜିଠାରୁ ଆରମ୍ଭ ହୋଇଛି। ଏହି ଅବସରରେ ଦେବୀ ଶୈଳପୁତ୍ରୀଙ୍କୁ ପୂଜା କରାଯାଉଛି। ନବରାତ୍ରୀର ପ୍ରଥମ ଦିନରେ ଘାଟ ପ୍ରତିଷ୍ଠା ପରେ ମା' ଶୈଳପୁତ୍ରୀଙ୍କ ପୂଜାର ବିଶେଷ ମହତ୍ତ୍ୱ ରହିଛି। ଶୈଳ ଅର୍ଥ ହିମାଳୟ ଏବଂ ପର୍ବତରାଜ ହିମାଳୟର କନ୍ୟା ହୋଇଥିବାରୁ ମାତା ପାର୍ବତୀଙ୍କୁ ଶୈଳପୁତ୍ରୀ କୁହାଯାଏ। ଦେବୀ ପାର୍ବତୀ ଭଗବାନ ଶଙ୍କରଙ୍କ ପତ୍ନୀ ଏବଂ ତାଙ୍କର ବାହନ ବୃଷ ଅର୍ଥାତ୍ ଷଣ୍ଢ, ତେଣୁ ତାଙ୍କୁ ବୃଷଭରୁଡ ମଧ୍ୟ କୁହାଯାଏ। ବିଶ୍ୱାସ ରହିଛି ଯେ, ଯିଏ ମା' ଶୈଳପୁତ୍ରୀଙ୍କୁ ଶ୍ରଦ୍ଧା ଓ ରୀତିନୀତିରେ ପୂଜା କରେ, ତା'ର ସମସ୍ତ ମନସ୍କାମନା ପୂରଣ ହୋଇଥାଏ ଓ ସେ ସବୁ ପ୍ରକାର କଷ୍ଟରୁ ମୁକ୍ତି ପାଇଥାଏ। ମା' ଶୈଳପୁତ୍ରୀଙ୍କ ଆଶୀର୍ବାଦରେ ଆଶାନୁରୂପ ଫଳ ପ୍ରାପ୍ତି ହୋଇଥାଏ।

ନବରାତ୍ରୀର ପ୍ରଥମ ଦେବୀ ମା' ଶୈଳପୁତ୍ରୀଙ୍କ ରୂପ ଅତ୍ୟନ୍ତ ଶାନ୍ତ, ସରଳ, କୋମଳ ଏବଂ ଦୟାରେ ପରିପୂର୍ଣ୍ଣ। ମା' ଡାହାଣ ହାତରେ ତ୍ରିଶୂଳ ଓ ବାମ ହାତରେ ପଦ୍ମ ଧରିଛନ୍ତି। ନନ୍ଦି ନାମକ ଏକ ଷଣ୍ଢ ଉପରେ ଚଢ଼ି ସେ ସମଗ୍ର ହିମାଳୟରେ ବସିଛନ୍ତି। ନନ୍ଦି ଷଣ୍ଢଭଗବାନ ଶିବଙ୍କ ଗଣମାନଙ୍କ ମଧ୍ୟରୁ ଅନ୍ୟତମ ବୋଲି ବିବେଚନା କରାଯାଏ। କଠୋର ତପସ୍ୟା କରୁଥିବା ମା' ଶୈଳପୁତ୍ରୀ ମଧ୍ୟ ସମସ୍ତ ବନ୍ୟଜନ୍ତୁଙ୍କ ରକ୍ଷକ ଏବଂ ସେ ରୂପ ଓ ଦୟାର ମୂର୍ତ୍ତି ଅଟନ୍ତି। ନବରାତ୍ରୀର ପ୍ରଥମ ଦିନରେ ମା' ଶୈଳପୁତ୍ରୀଙ୍କୁ ପୂଜା କରି ବ୍ରତ ରଖୁଥିବା ଭକ୍ତଙ୍କ ଜୀବନରେ ସବୁ ପ୍ରକାର କଷ୍ଟ ଦୂର ହୋଇଥାଏ ଏବଂ ପ୍ରତିକୂଳ ପରିସ୍ଥିତିରେ ମା' ସେମାନଙ୍କୁ ସୁରକ୍ଷା ଦେଇଥାନ୍ତି। ସେ ତାଙ୍କ ଭକ୍ତଙ୍କ ସମସ୍ତ ମନୋକାମନା ପୂରଣ କରନ୍ତି ଏବଂ ସାଧକଙ୍କ ମୁଲାଧର ଚକ୍ରକୁ ଜାଗ୍ରତ କରିବାରେ ସାହାଯ୍ୟ କରନ୍ତି। ମୁଲାଧର ଚକ୍ର ଆମ ଶରୀରରେ ଶକ୍ତିର କେନ୍ଦ୍ର ଯାହା ଆମକୁ ସ୍ଥିରତା ଏବଂ ନିରାପତ୍ତା ପ୍ରଦାନ କରିଥାଏ।

ନବରାତ୍ରୀର ପ୍ରଥମ ଦିନରେ ଘଟସ୍ଥାପନା କରାଯାଏ। ଘଟସ୍ଥାନରେ ମା' ଦୁର୍ଗାଙ୍କୁ ତମ୍ବା କିମ୍ବା ମାଟି କଳସରେ ଆରାଧନା କରାଯାଏ। ଏହି କଳସକୁ ନଅ ଦିନ ପର୍ଯ୍ୟନ୍ତ ପୂଜା ସ୍ଥଳରେ ରଖାଯାଏ। ଘାଟସ୍ଥାନ ପାଇଁ ଗଙ୍ଗାଜଳ, ନଡ଼ିଆ, ଲାଲ କପଡ଼ା, ମୌଲି, ରୋଲି, ଚନ୍ଦନ, ପାନ, ଧୂପକାଠି, ଘିଅ ଦୀପ, ତାଜା ଫଳ, ଫୁଲ ମାଳ, ପାନ ପତ୍ର ମାଳ ଓ ଗୋଟିଏ ପ୍ଲେଟରେ ସ୍ୱଚ୍ଛ ଚାଉଳ ର ଆବଶ୍ୟକତା ରହିଛି। ବୈଦିକ କ୍ୟାଲେଣ୍ଡର ଅନୁଯାୟୀ ଏଥର ଶାରଦୀୟ ନବରାତ୍ରୀ ଅକ୍ଟୋବର ୩ରୁ ଆରମ୍ଭ ହୋଇଛି। ଘଟସ୍ଥପନା ପାଇଁ ଆଜି ଶୁଭ ସମୟ ରହିଛି। ମନ୍ଦିର ଓ ଶକ୍ତିପୀଠରେ ଭୋର ୪ଟା ୯ରୁ ସକାଳ ୫ଟା ୭ ପର୍ଯ୍ୟନ୍ତ ବିଶେଷ ଶୁଭ ଥିଲା। ସକାଳ ୯ଟା ୪୦ରୁ ୧୧ଟା ୫୦ ପର୍ଯ୍ୟନ୍ତ ଘର ଓ ମଣ୍ଡପରେ ଭଗବତୀଙ୍କୁ ପୂଜା କରାଯାଇପାରିବ। ଏହି ସମୟ ବୃଷ ରାଶିରେ ରହିବ ଏବଂ ସାଧାରଣତଃ ଶୁଭ ରହିବ।

ନବରାତ୍ରୀର ପ୍ରଥମ ଦିନରେ ଦେବୀ ଶୈଳପୁତ୍ରୀଙ୍କୁ ପୂଜା କରାଯାଏ। ପଥର ଅର୍ଥ ପଥର, ଯାହାକୁ ସର୍ବଦା ଅତୁଟ ବୋଲି ବିବେଚନା କରାଯାଏ। ନବରାତ୍ରୀର ପ୍ରଥମ ଦିନରେ ମା' ଶୈଳପୁତ୍ରୀଙ୍କ ପୂଜାରେ ଧଳା ରଙ୍ଗର ଅତ୍ୟନ୍ତ ଗୁରୁତ୍ବ ରହିଛି। ମା'ଙ୍କୁ ପ୍ରସନ୍ନ କରିବା ପାଇଁ ଧଳା ଫୁଲ, ପୋଷାକ ଓ ମିଠା ଅର୍ପଣ କରିବା ଉଚିତ। ବିଶ୍ୱାସ ରହିଛି ଯେ ମାତା ଶୈଳପୁତ୍ରୀଙ୍କୁ ପୂଜା କରିବା ଦ୍ୱାରା କୁମାରୀ କନ୍ୟାମାନଙ୍କୁ ଭଲ ବର ମିଳିଥାଏ। ଏଥିସହିତ ଘରେ ଧନର ଅଭାବ ମଧ୍ୟ ନାହିଁ।