ଢେଙ୍କାନାଳ: ଆଜିଠାରୁ ଆରମ୍ଭ ହେଉଛି ଗଜଲକ୍ଷ୍ମୀ ପୂଜା। ମା' ଙ୍କ ଆବାହନ ପାଇଁ ସମସ୍ତ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ଆଜି ମାଙ୍କ ଚକ୍ଷୁଦାନ ।  ଢେଙ୍କାନାଳର ୪୧ ଟି ପୂଜା ମଣ୍ଡପରେ ମା' ଙ୍କୁ ଆବାହନ କରାଯାଉଛି । ସାତୋଟି ପୂଜା ମଣ୍ଡପରେ କୁଇଣ୍ଟାଲ୍ କୁଇଣ୍ଟାଲ୍ ଓଜନର ଚାନ୍ଦିମେଢ ସାଙ୍ଗକୁ ସୁନା ମୁକୁଟ, ସୁନ୍ଦର ଆଲୋକ ମାଳା ଓ ସୁ-ଉଚ୍ଚ ତୋରଣ ସାଜିବ ଆକର୍ଷଣର କେନ୍ଦ୍ରବିନ୍ଦୁ । ଲକ୍ଷାଧିକ ଭକ୍ତଙ୍କ ସମାଗମ କୁ ଦୃଷ୍ଟିରେ ରଖି ପୋଲିସ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି।

ଆଜିଠାରୁ ୧୦ ଦିନ ବ୍ୟାପି ଢେଙ୍କାନାଳରେ ଗଜଲକ୍ଷ୍ମୀ ପୂଜା ଚାଲିବ । ଗଜଲକ୍ଷ୍ମୀ ପୂଜା କୁ ଅଧିକ ଆକର୍ଷଣୀୟ କରିବା ପାଇଁ ଦେଢ଼ ମାସ ପୂର୍ବରୁ ପ୍ରସ୍ତୁତିରେ ଲାଗିଛନ୍ତି ସମସ୍ତ ପୂଜା କମିଟିର କର୍ମକର୍ତ୍ତା । ମୃଣ୍ମୟୀ ମୂର୍ତ୍ତି କାମଠୁ ନେଇ କପଡାର ସୁ-ଉଚ୍ଚ ତୋରଣ , ଲାଇଟ୍ ଗେଟ୍ ଏସବୁ କାମ ସାରିବା ପାଇଁ ଦିନ ରାତି ଏକ କରି ଲାଗିଛନ୍ତି କାରିଗର । ୮୬  ବର୍ଷରେ ପଦାର୍ପଣ କରିଥିବା ଢେଙ୍କାନାଳର ଏହି ଗଣପର୍ବ କୁ ଅଧିକ ଆକର୍ଷଣୀୟ କରିବ ଭଳିକି ଭଳି ଚାନ୍ଦି ମେଢ଼ ସାଙ୍ଗକୁ ଗୋଟିଏ ଲାଇନ୍ ରେ ୧୦ କିଲୋମିଟର ବ୍ୟାପି ରଙ୍ଗ ବେରଙ୍ଗର ସୁନ୍ଦର ଆଲୋକମାଳା ।  

ଗଣେଷ ବଜାର ପକ୍ଷରୁ ତାମିଲନାଡୁର ବାବାଜି ତିରୁପତି ସଦୃଶ କପଡ଼ା ତୋରଣ , ମୀନା ବଜାର ରେ ଭର୍ଟୀକାନ୍ ସଦୃଶ କପଡ଼ା ତୋରଣ ଓ ଲକ୍ଷ୍ମୀ ବଜାର ର  ତୋରଣ ଶ୍ରଦ୍ଧାଳୁଙ୍କୁ ବେଶ୍ ଆକୃଷ୍ଟ କରିବ । ୪୧ ଟି ପୂଜା ମଣ୍ଡପକୁ ବିଭିନ୍ନ ଥିମ୍ ରେ ମଧ୍ୟ ସଜାଯାଇଛି । ଯାହା ଅନ୍ୟତମ ମୁଖ୍ୟ ଆକର୍ଷଣ ସାଜିବ । 

ସୁରକ୍ଷା ବ୍ୟବସ୍ଥା 

ଲକ୍ଷାଧିକ ଭକ୍ତଙ୍କ ସମାଗମକୁ ଦୃଷ୍ଟିରେ ରଖି ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ପୂଜା ମଣ୍ଡପ ଗୁଡିକୁ ସିସିଟିଭି ସର୍ଭେଲାନ୍ସରେ ରଖାଯିବା ସହ ଭିଡ଼ ନିୟନ୍ତ୍ରଣ ପାଇଁ ଭଲାଣ୍ଟିୟର ମୃତୟନ ରହିବେ । ଟ୍ରାଫିକ୍ କଣ୍ଟ୍ରୋଲ୍ ଆଇନ୍ ଶୃଙ୍ଖଳା ରକ୍ଷା ପକେଟ୍ ମାରୁ ଛିନତାଇ ଓ ନିଶା ଦ୍ରବ୍ୟ ରୋକ୍ ପାଇଁ ୨୪ ପ୍ଲାଟୁନ୍ ପୋଲିସ ଫୋର୍ସ ମୃତୟନ କରାଯିବ ବୋଲି ଏସପି କହିଛନ୍ତି। ଏଥିପାଇଁ ସାଧା ପୋଷାକରେ ସ୍ପେଶାଲ ସ୍କ୍ୱାର୍ଡ , ପିକେଟିଂ ପାର୍ଟୀ ,ଆଣ୍ଟି ସ୍ନାଚିଙ୍ଗ୍ ସ୍କ୍ୱାର୍ଡ ଭଳି ବିଭିନ୍ନ ଟିମ୍ ଗଠନ କରାଯାଇଥିବା ଏସପି କହିଛନ୍ତି। ଏଥି ସହିତ ଦୁଇ ଜଣ ଅତିରିକ୍ତ ଏସପି , ୧୦ ଜଣ ଡିଏସପି , ୨୬ ଜଣ ଇନ୍ସପେକ୍ଟର , ସବ୍ ଇନ୍ସପେକ୍ଟର ଓ ଏଏସ୍ଆଇ ୧୦୭ ଜଣ ୧୪୫ ପୋଲିସ୍ ଅଫିସର୍ ମୃତୟନ ରହିବେ ।

ଅହମ୍ମଦାବାଦ: ମାଆ ଦୁର୍ଗାଙ୍କ ନବରାତ୍ରୀ ଉତ୍ସବ ଏବଂ ଗର୍ବା କହିଲେ କେବଳ ଗୁଜରାଟକୁ ହିଁ ବୁଝାଏ । ଯଦିଓ ଏହି ଗର୍ବା ଏବଂ ଦାଣ୍ଡିଆ ଖେଳ ଏବେ ଅନ୍ୟ ରାଜ୍ୟରେ ଆୟୋଜିତ ହେଉଛି । କିନ୍ତୁ ଏହାର ମୂଳ ପରମ୍ପରା, ସଂସ୍କୃତି ଏବଂ ନିଆରା ଉତ୍ସବ କେବଳ ଗୁଜରାଟ ସହିତ ଜଡ଼ିତ । ଗୁଜରାଟ ରାଜ୍ୟ ବିଭିନ୍ନ ସ୍ଥାନରେ ବିଭିନ୍ନ ପ୍ରକାର ଗର୍ବା ଉତ୍ସବ ଅନୁଷ୍ଠିତ ହୋଇଥାଏ । କେଉଁଛି ପୁରୁଷ ମାନେ ନାରୀଙ୍କ ବେଶ ଧାରଣ କରି ଗର୍ବା ଖେଳନ୍ତି ତ ଆଉ କେଉଁଠି ମହିଳାମାନେ ନିଜର ବୀରଙ୍ଗନା ପ୍ରଦର୍ଶନ କରନ୍ତି । ଆଉ ସେମିତି ଏକ ଭିନ୍ନ ଗର୍ବା ପରମ୍ପରା ରାଜକୋଟରେ ଦେଖିବାକୁ ମିଳେ । ଯେଉଁଠି ମହିଳାମାନେ ପାରମ୍ପାରିକ ନାଲି ବସ୍ତ୍ର ପରିଧାନ କରି ସୁନା ଅଳଙ୍କାରରେ ଆଭୂଷିତ ହୋଇ ଗର୍ବା ନାଚନ୍ତି । 

ତେବେ ଏଠି ପ୍ରଶ୍ନ ଉଠୁଛି କାହିଁକି ଏହା ଏତେ ଆଲୋଚ୍ୟର ବିଷୟ । ରାଜକୋଟରେ ଆୟୋଜିତ ସାହି ଗର୍ବା ଉତ୍ସବରେ ମହିଳାମାନେ ୯୦୦ କିଲୋଗ୍ରାମ ସୁନା ଅଳଙ୍କାର ପିନ୍ଧି ଗର୍ବା ଖେଳିଛନ୍ତି । ଯାହାର ଆନୁମାନିକ ମୂଲ୍ୟ ୧୩୦୦ କୋଟି ଟଙ୍କା ହେବ । ଏହି ସୁନା କିଛି ଦେଶର ଗଚ୍ଛିତ ସୁନାଠାରୁ ମଧ୍ୟ ଅଧିକ ଅଟେ । 

ରାଜକୋଟ ଆହିର ସେନା ପକ୍ଷରୁ ନବ ଦିନାତ୍ମକ ଗରବା ଉତ୍ସବ ପାଳିତ ହୋଇଯାଇଛି । ଏହାର ମୁଖ୍ୟ ଉଦ୍ଦେଶ୍ୟ ଆଧୁନିକ ଯୁଗରେ ମଧ୍ୟ ପାରମ୍ପାରିକ ଗରବା ଏବଂ ତାର ମହତ୍ୱକୁ ବଜାୟ ରଖିବା । ମହିଳା ଏବଂ ପୁରୁଷମାନେ ପାରମ୍ପାରିକ ପୋଷାକରେ ରାସ କରିଥିଲେ । ପ୍ରଥମେ ଦ୍ୱାରିକାଧୀଶ ଶ୍ରୀକୃଷ୍ଣଙ୍କ ମହାଆଳତୀ କରାଯାଏ ଏବଂ ପରେ ଗରବା ଖେଳ ଆରମ୍ଭ ହୁଏ । ଏଥିରେ ପ୍ରାୟ ୧୫୦୦୦ ମହିଳା ସାମିଲ ହୋଇଥିଲେ । ନାଲି ବସ୍ତ୍ର ସହିତ ସୁନାର ଅଳଙ୍କାର ଗରବା ଉତ୍ସବକୁ ଆହୁରି ନିଆରା କରିଥିଲା । 

ଆହିର ସମ୍ପ୍ରଦାୟ ପାଇଁ ଗର୍ବା କେବଳ ଏକ ନୃତ୍ୟ ନୁହେଁ, ବରଂ ଏହା ସେମାନଙ୍କ ପରିଚୟ ଓ ଐତିହ୍ୟକୁ ପରବର୍ତ୍ତୀ ପିଢ଼ି ନିକଟରେ ପହଞ୍ଚାଇବାର ଏକ ମାଧ୍ୟମ ମଧ୍ୟ ଅଟେ। ପାରମ୍ପରିକ ପୋଷାକ ପରିଧାନ କରି ମହିଳାମାନଙ୍କର ଏକତ୍ର ହୋଇ 'ରାସ' ପରିବେଷଣ କରିବା, ସାମୂହିକ ଏକତା ଏବଂ ସାଂସ୍କୃତିକ ସମ୍ପର୍କକୁ ମଧ୍ୟ ସୂଚିତ କରେ ।

 ଆଜିଠାରୁ ଆରମ୍ଭ ହୋଇଛି ଶାରଦୀୟ ନବରାତ୍ରି। ସାରାଦେଶରେ ଆରମ୍ଭ ହୋଇଛି ନବରାତ୍ର ବା ନବଦିନାତ୍ମକ ଶକ୍ତି ପୂଜା । ନବରାତ୍ରର ନଦଦିନରେ ମା’ଙ୍କର ନଅଟି ସ୍ୱରୂପର ଆରାଧନା କରାଯାଏ । ଆଜି ପ୍ରଥମ ଦିନରେ ମାତାଙ୍କୁ ମା’ ଶୈଳପୁତ୍ରୀ ରୂପରେ ପୂଜା କରାଯାଉଛି। ଭକ୍ତି ଓ ଶ୍ରଦ୍ଧାର ସହ ମା’ଙ୍କ ଆରାଧନା କରି ଭକ୍ତମାନେ ସୁଖ, ଶାନ୍ତି, ସମୃଦ୍ଧି ଓ ଶକ୍ତି ପ୍ରାପ୍ତି ପାଇଁ ପ୍ରାର୍ଥନା କରୁଛନ୍ତି। ନବରାତ୍ରିର ପ୍ରଥମ ଦିନରେ ଘଟସ୍ଥାପନା ସହ ମା’ଙ୍କ ପୂଜା ଆରମ୍ଭ ହୋଇଥାଏ।

 ପାରମ୍ପରିକ ବିଧି ଅନୁସାରେ ପୂଜାସ୍ଥଳକୁ ପ୍ରଥମେ ସଫା କରାଯାଏ। ଏହାପରେ ମାଟିପାତ୍ରରେ ମାଟି ଓ ଧାନ ବୁଣି ତା’ ନିକଟରେ ଶୁଭ କଳସ ସ୍ଥାପନ କରାଯାଏ। କଳସରେ ଜଳ ଭରି ଆମ୍ବପତ୍ର, ନଡ଼ିଆ ଆଦି ରଖି ଦେବୀଙ୍କୁ ଆବାହନ କରାଯାଏ। ତେବେ ଭିନ୍ନ ଅଞ୍ଚଳର ଭିନ୍ନ ପରମ୍ପରା ଅନୁଯାୟୀ ପୂଜାବିଧିରେ କିଛି ପାର୍ଥକ୍ୟ ରହିପାରେ। 

ପୌରାଣିକ ମତ ଅନୁସାରେ, ‘ଶୈଳପୁତ୍ରୀ’ ଶବ୍ଦର ଅର୍ଥ ହେଉଛି ପର୍ବତର କନ୍ୟା। ‘ଶୈଳ’ ଅର୍ଥାତ ପର୍ବତ ଏବଂ ‘ପୁତ୍ରୀ’ ଅର୍ଥାତ୍ କନ୍ୟା। ମା’ ଶୈଳପୁତ୍ରୀ ହେଉଛନ୍ତି ପର୍ବତରାଜ ହିମାଳୟଙ୍କ କନ୍ୟା। ତାଙ୍କୁ ମା’ ପାର୍ବତୀଙ୍କ ସ୍ୱରୂପ ଏବଂ ଦେବୀ ସତୀଙ୍କ ପୁନର୍ଜନ୍ମ ଭାବେ ବର୍ଣ୍ଣନା କରାଯାଇଛି। ନବଦୁର୍ଗାଙ୍କ ନଅଟି ସ୍ୱରୂପ ମଧ୍ୟରୁ ମା’ ଶୈଳପୁତ୍ରୀ ପ୍ରଥମ ରୂପ ଅଟନ୍ତି । 

ମା’ ଶୈଳପୁତ୍ରୀଙ୍କ ବିଶେଷତ୍ୱ 

ମା’ ଶୈଳପୁତ୍ରୀ ବୃଷଭ ଅର୍ଥାତ୍ ନନ୍ଦୀ ଉପରେ ବିରାଜମାନ କରିଥାନ୍ତି। ତାଙ୍କର ଗୋଟିଏ ହାତରେ ତ୍ରିଶୂଳ ଓ ଅନ୍ୟ ହାତରେ ପଦ୍ମ ଶୋଭା ପାଏ। ମସ୍ତକରେ ଅର୍ଦ୍ଧଚନ୍ଦ୍ର ତାଙ୍କ ସ୍ୱରୂପର ଆକର୍ଷଣ ବୃଦ୍ଧି କରିଥାଏ। ତ୍ରିଶୂଳ ଶକ୍ତିର ପ୍ରତୀକ ହୋଇଥିବା ବେଳେ ପଦ୍ମ ପବିତ୍ରତାର ପ୍ରତୀକ ଭାବେ ପରିଚିତ। ସେ ହେଉଛନ୍ତି ତ୍ରିଦେବ ବ୍ରହ୍ମା-ବିଷ୍ଣ ଓ ମହେଶଙ୍କ ମୂଳ ଶକ୍ତି ସ୍ୱରୂପା। ମା ଶୈଳପୁତ୍ରୀ ସାଧକର ସମସ୍ତ ଭୌତିକ ଓ ଆଧ୍ୟାତ୍ମିକ ମନୋସ୍କାମନା ପୂରଣ କରନ୍ତି। ଯୋଗ ଦୃଷ୍ଟିକୋଣରୁ ନବରାତ୍ରର ପ୍ରଥମ ଦିନ ବେଶ ଗୁରୁତ୍ୱପୂର୍ଣ୍ଣ। ଏହି ପ୍ରଥମ ଦିନରୁ ହିଁ ସାଧକ ମା ଶୈଳପୁତ୍ରୀଙ୍କ ଆରାଧନା ସହ ଉଚ୍ଚତର ସିଦ୍ଧି ଅଭିମୁଖେ ଅଗ୍ରସର ହୁଏ। ମାଦ ଯୋଗରେ ମା’ ଶୈଳପୁତ୍ରୀଙ୍କୁ ମୂଳାଧାରଚକ୍ର ସହ ତୁଳନା କରାଯାଇଛି। ସାଧକ ମୂଳାଧାର ଚକ୍ରରୁ ସାଧନା ଆରମ୍ଭ କରି ସର୍ବୋଚ୍ଚ ପର୍ଯ୍ୟାୟ ସହସ୍ରାରଚକ୍ର ପର୍ଯ୍ୟନ୍ତ ଗତି କରିଥାଏ । ଭାରତରେ ବାରାଣାସୀରେ ମାତା ଶୈଳପୁତ୍ରୀଙ୍କ ମନ୍ଦିର ରହିଛି। 

ଭୁବନେଶ୍ୱର: ଆଜି ହେଉଛି ପବିତ୍ର ମହାଳୟା ଅମାବାସ୍ୟା । ପିତୃପକ୍ଷର ଶେଷ ଦିନରେ ପିତୃପୁରୁଷଙ୍କୁ ଦାନ କରୁଛନ୍ତି ପରିବାର ବର୍ଗ । ଏହା ସହିତ ଆଜିଠାରୁ ଦେବୀ ପକ୍ଷ ଆରମ୍ଭ ହେବ । ଶ୍ରୀକ୍ଷେତ୍ର, ବିରଜା କ୍ଷେତ୍ର ଆଦି ପରିତ୍ର ସ୍ଥାନରେ ଶ୍ରଦ୍ଧାଳୁମାନେ ପିତୃପୁରୁଷଙ୍କୁ ଦାନ କରୁଛନ୍ତି । ବଡ଼ ଦେଉଳରେ ବାଇଶି ପାହାଚରେ ପିଣ୍ଡଦାନ କର୍ମ ଚାଲିଛି ।

ସେପଟେ ମହାଳୟା ଅମାବାସ୍ୟା ଉପଲକ୍ଷେ ମା ସମଲେଶ୍ୱରୀ ଧବଳମୁଖୀ ବେଶରେ ଭକ୍ତଙ୍କୁ ଦର୍ଶନ ଦେଉଛନ୍ତି । ଦେବୀଙ୍କ ଏହି ଅଲୌକିକ ବେଶକୁ ଦର୍ଶନ କଲେ ଗଙ୍ଗାସ୍ନାନର ଫଳ ମିଳେ ବୋଲି ବିଶ୍ୱାସ ରହିଛି । ଦଶହରା ମାସ ପିତୃପକ୍ଷରେ ପରଲୋକଗତ ପିତୃପୁରୁଷଙ୍କୁ ପିଣ୍ଡପ୍ରଦାନ ପରେ ଗଙ୍ଗାସ୍ନାନ ବିଧି ରହିଥିବାରୁ ପଶ୍ଚିମ ଓଡ଼ିଶାର ଦେବୀ ସମଲେଶ୍ୱରୀଙ୍କ ଧବଳମୁଖୀ ବେଶ ଦର୍ଶନ କରିଥାଆନ୍ତି ।

ଆଶ୍ୱିନ ମାସର ପ୍ରଥମ ପକ୍ଷ "ପିତୃ ପକ୍ଷ" ନାମରେ ଜଣା । ଆଶ୍ୱିନ ମାସ କୃଷ୍ଣ ପକ୍ଷ ପ୍ରତିପଦାଠାରୁ ଅମାବସ୍ୟା ପର୍ଯ୍ୟନ୍ତ ପନ୍ଦର ଦିନକୁ ପିତୃପକ୍ଷ କୁହାଯାଏ । ଏହି ପକ୍ଷର ଅମାବାସ୍ୟା "ମହାଳୟା ଅମାବାସ୍ୟା" ନାମରେ ପାଳିତ । ପିତୃଗଣଙ୍କ ଉଦ୍ଦେଶ୍ୟରେ ପିଣ୍ଡ ଦାନ କରାଯାଇଥାଏ । ଚତୁର୍ଦ୍ଦଶୀ ଯାଏଁ ତର୍ପଣ କଲାପରେ ଅମାବସ୍ୟା ଦିନ ପିଣ୍ଡ ଦାନ କରାଯାଏ । ସୂର୍ଯ୍ୟ କନ୍ୟା ରାଶିରେ ଥିବାବେଳେ ଯେଉଁ ଅମାବାସ୍ୟା ପଡ଼େ ତାହା ମହାଳୟା ଅମାବାସ୍ୟା । ଏହି ଅବସରରେ ପିତୃ ପକ୍ଷରେ ଯେକୌଣସି ଦିନ ନିଜର ପିତୃପୁରୁଷଙ୍କୁ ଶ୍ରାଦ୍ଧ ଓ ବ୍ରାହ୍ମଣ ଭୋଜନ ଦିଆଯାଏ । 

ପୁରୀ: ବୁଧବାର ଶ୍ରୀମନ୍ଦିରରେ ଶ୍ରୀଜୀଉଙ୍କ ବାମନ ଜନ୍ମନୀତି ଅନୁଷ୍ଠିତ ହେବ । ଏହା ଗୁପ୍ତ ନୀତି ହୋଇଥିବାରୁ ଆଜି ପ୍ରାୟ ୬ ଘଣ୍ଟା ସର୍ବସାଧାରଣ ଦର୍ଶନ ବନ୍ଦ ରହିବ । ସନ୍ଧ୍ୟା ୫ଟାରୁ ରାତି ୧୧ଟା ପର୍ଯ୍ୟନ୍ତ ଦର୍ଶନ ବନ୍ଦ ରହିବା ନେଇ ଶ୍ରୀମନ୍ଦିର ପ୍ରଶାସନ ପକ୍ଷରୁ ଶ୍ରଦ୍ଧାଳୁଙ୍କୁ ସୂଚିତ କରାଯାଇଛି । 

ଭାଦ୍ରବ ମାସ, କୃଷ୍ଣ ପକ୍ଷ ଦ୍ୱାଦଶୀ ତିଥିରେ ଭଗବାନ ବିଷ୍ଣୁ ନିଜର ପଞ୍ଚମ ଅବତାର ବାମନ ରୂପ ନେଇଥିଲେ । ଏହି ଦିନ ପ୍ରଭୁ ଶ୍ରୀଜଗନ୍ନାଥଙ୍କୁ ବାମନ ବେଶରେ ସଜା ଯାଇଥାଏ। ମହାପ୍ରଭୁଙ୍କ ଶ୍ରୀଭୁଜର ବାମ ହସ୍ତରେ ଛତା ଓ ଡାହାଣ ହାତରେ କୁଶବଟୁ ଗଡ଼ୁ ଧରି ଏକ ବାମନ ବେଶରେ ସଜ୍ଜିତ କରାଯାଇଥାଏ । ପୁଷ୍ପାଳକ ସେବକମାନେ ଶ୍ରୀଜଗନ୍ନାଥ ମହାପ୍ରଭୁଙ୍କୁ ଏପରି ବେଶ କରିଥାନ୍ତି । ଏହା ଏକ ଗୁପ୍ତ ନୀତି ହୋଇଥିବାରୁ ମଧ୍ୟାହ୍ନ ଧୂପ ପରେ ଜୟ ବିଜୟ ଦ୍ୱାରକୁ ବନ୍ଦ ରଖାଯିବ । ଏହା ପରେ ଏହି ସ୍ୱତନ୍ତ୍ର ବେଶ ନୀତି ଅନୁଷ୍ଠିତ ହେବ । 

ପୌରାଣିକ କଥାବସ୍ତୁ ଅନୁସାରେ, ରାକ୍ଷସ ରାଜା ବଳିଙ୍କର ଦୌରାତ୍ମ୍ୟ ବଢ଼ିଯାଇଥିଲା । ରାଜା ବଳି ନିଜ ବଚନରେ ସିଦ୍ଧ ଥିଲେ , ସେ କଦାପି ନିଜ ବଚନରୁ ଓହରୁନଥିଲେ । କିନ୍ତୁ ତାଙ୍କ ଦୌରାତ୍ମ୍ୟରେ ଅତିଷ୍ଠ ହୋଇ ଦେବତାମାନେ ଭଗବାନ ବିଷ୍ଣୁଙ୍କ ଶରଣ ନେଇଥିଲେ । ଏହା ପରେ ଭଗବାନ ବିଷ୍ଣୁ କାଶ୍ୟପ ରାଜା ଏବଂ ଅଦିତିଙ୍କ ଗର୍ଭରୁ ବାମନ ରୂପେ ଜନ୍ମ ଗ୍ରହଣ କରିଥିଲେ । ରାଜା ବଳି ନିୟମିତ ଯଜ୍ଞ ଓ ଦାନ କରୁଥିଲେ । ଏକ ଯଜ୍ଞରେ ବାମନ ଉପସ୍ଥିତ ହୋଇ ବଳିଙ୍କୁ କେବଳ ତିନିପାଦ ଜମି ଦେବାକୁ ଅନୁରୋଧ କରିଥିଲେ । ଗୁରୁ ଶୁକ୍ରାଚାର୍ଯ୍ୟ ଚେତାବନୀ ଦେଲେ ଯେ ବାମନ ବାସ୍ତବରେ ବିଷ୍ଣୁ, ତେଣୁ ତାଙ୍କ ମାୟା ବୁଝିବା ସହଜ ନୁହେଁ । ଶୁକ୍ରାଚାର୍ଯ୍ୟଙ୍କ ଚେତାବନୀ ସତ୍ତ୍ୱେ ବଳି ଦାନ ଦେବା ପାଇଁ ସମ୍ମତ ହୋଇଥିଲେ । ବାମନ ନିଜର ବିଶାଳ ଆକାର ଧାରଣ କରିଥିଲେ । ପ୍ରଥମ ପାଦରେ ପୃଥିବୀ, ଦ୍ୱିତୀୟ ପାଦରେ ଆକାଶ ଏବଂ ତୃତୀୟ ପାଦରେ ବଳି ରାଜାକୁ ପାତାଳକୁ ପଠାଇଥିଲେ । ଏହା ପରେ ଇନ୍ଦ୍ର ରାଜାକୁ ତାଙ୍କ ଇନ୍ଦ୍ରପୁର ଫେରାଇ ଦିଆଯାଇଥିଲା । ବାମନ ତାଙ୍କ ପାଦ ବଳିଙ୍କ ମୁଣ୍ଡ ଉପରେ ରଖି ତାଙ୍କୁ ଅମରତ୍ୱ ଦେଇଥିଲେ ।

 ଭୁବନେଶ୍ୱର : ନୂଆଁଖାଇ ପାଇଁ ଆଜି ପଶ୍ଚିମ ଓଡ଼ିଶାରେ ଉତ୍ସବର ମାହୋଲ। ପିଲାଠୁ ବୁଢା ଲାଗି ପଡିଛନ୍ତି ନୂଆଁଖାଇ ପ୍ରସ୍ତୁତିରେ। ଘରେ ଘରେ ନୂଆଁଖାଇ ପାଇଁ ପିଠା ପଣା ସାଙ୍ଗକୁ ଭିନ୍ନ ଭିନ୍ନ ବ୍ୟଞ୍ଜନ ତିଆରି ହେଉଛି। 

ଏହି ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ସମଗ୍ର ଓଡ଼ିଶାବାସୀଙ୍କୁ ନୂଆଁଖାଇର ଶୁଭେଚ୍ଛା ଏବଂ ଶୁଭକାମନା ଜଣାଇଛନ୍ତି । ମୁଖ୍ୟମନ୍ତ୍ରୀ କହିଛନ୍ତି,"ସମସ୍ତଙ୍କୁ ମୋର ନୂଆଁଖାଇ ଜୁହାର୍ । ଓଡ଼ିଶାର ମହାନ୍ କୃଷିଭିତ୍ତିକ ଗଣପର୍ବ ନୂଆଁଖାଇର ଶୁଭ ଅବସରରେ ସବୁ ରାଜ୍ୟବାସୀଙ୍କୁ ଅନେକ ଅନେକ ଶୁଭେଚ୍ଛା ଓ ଅଭିନନ୍ଦନ ଜଣଉଛେଁ । ନୂଆଁଖାଇ, ଖାଲି ଗୁଟେ ପରବ୍ ନାଇଁସେ, ଇଟା ଆମର୍ ମାଟି, ସଂସ୍କୃତି, ଚାଲିଚଲନ୍ ଆର୍ ସାମାଜିକ ଏକତାର୍ ପ୍ରାଣସ୍ପନ୍ଦନ୍ ଆଏ । ଇ ଆନନ୍ଦମୟ ପରବେ, ମନର୍ ସବୁ ଭେଦଭାବ, ତିକ୍ତତା ଆର୍ ଅହଂକାରକେ ପଛେ ପକେଇ କରି , ଆମେ ବଡ୍ ଗୁରୁ-ଗୁରୁଜନ୍ ମାନକର୍ ପାହାତଲେ "ଜୁହାର୍- ମୁଁଡିଆ" ଜନେଇଥିସୁଁ, ଆର୍ ସାନ ମାନଙ୍କୁ ଭଲପାଏବାର୍ ଆର୍ ଆଶୀର୍ବାଦ୍ ଦେଇଥିସୁଁ ।"

ସେହିପରି ରାଷ୍ଟ୍ରପତି ଦ୍ରୌପଦୀ ମୁର୍ମୁ ନୂଆଁଖାଇର ଶୁଭେଚ୍ଛା ଜଣାଇଛନ୍ତି। ନିଜ ସୋସିଆଲ ମାଧ୍ୟମରେ ଶୁଭେଚ୍ଛା ଜଣାଇ ବାର୍ତ୍ତା ଦେଇ ରାଷ୍ଟ୍ରପତି ଲେଖିଛନ୍ତି ଯେ କୃଷିଭିତ୍ତିକ ଗଣପର୍ବ ନୂଆଁଖାଇ ଉପଲକ୍ଷେ ମୁଁ ଦେଶବାସୀଙ୍କୁ ବିଶେଷକରି ଓଡ଼ିଶାବାସୀଙ୍କୁ ହାର୍ଦ୍ଦିକ ଶୁଭେଚ୍ଛା ଜଣାଉଅଛି । ନୂଆଁଖାଇ କେବଳ ଏକ ପାରଂପରିକ ପର୍ବ ନୁହେଁ, ପଂକ୍ତି ଭୋଜନ ଓ ବନ୍ଧୁମିଳନ ମାଧ୍ୟମରେ ସାମାଜିକ ଓ ପାରିବାରିକ ଆତ୍ମୀୟତାର ପ୍ରତୀକ ମଧ୍ୟ । ଏହି ପର୍ବ ମାଧ୍ୟମରେ ପାରସ୍ପରିକ ସୌହାର୍ଦ୍ଦ୍ୟ ଓ ସଂପ୍ରୀତି ଆହୁରି ସୁଦୃଢ଼ ହେବ ବୋଲି ମୋର ବିଶ୍ୱାସ । ନୂଆଁଖାଇ ଅବସରରେ ମୁଁ ସମସ୍ତଙ୍କର ସୁଖ, ଶାନ୍ତି ଓ ସମୃଦ୍ଧି କାମନା କରୁଅଛି ।

ସମ୍ବଲପୁର ସାଂସଦ ଧର୍ମେନ୍ଦ୍ର ପ୍ରଧାନ ମଧ୍ଯ ନୂଆଁଖାଇ ଜୁହାର୍ ଜଣାଇ କହିଛନ୍ତି 'ନୂଆଁଖାଇ ହେଉଛି ଏକତା, ସୌହାର୍ଦ୍ଦ୍ୟ ଓ ସଦ୍ଭାବନାର ପର୍ବ । ନବାନ୍ନ ସେବନ, ବନ୍ଧୁମିଳନ ଓ ଗୁରୁଜନଙ୍କ ପ୍ରତି ସମ୍ମାନର ପର୍ବ । ଏହି ପର୍ବ ସମସ୍ତଙ୍କୁ ମିଳିମିଶି କରି ରହିବାର ମହତ ବାର୍ତ୍ତା ଦେଉଛି । ଆଜିର ଏହି ମହାନ ଅବସରରେ ମା’ ସମଲେଶ୍ୱରୀଙ୍କ ପାଖରେ ସମସ୍ତଙ୍କ ସୁଖ, ସମୃଦ୍ଧି ଓ ମଙ୍ଗଳ କାମନା କରୁଛି ।

ଭୁବନେଶ୍ୱର: ଆଜି ହେଉଛି ପବିତ୍ର ରାକ୍ଷୀ ପୂର୍ଣ୍ଣିମା । ସାରା ରାଜ୍ୟରେ ଆଜି ରାକ୍ଷୀ ପୂର୍ଣ୍ଣିମା ପାଳିତ ହେଉଛି । ଭାଇ ହାତରେ ରକ୍ଷା ସୂତ୍ର ବାନ୍ଧୁଛି ଉଭଣୀ । ଆଉ ଭଉଣୀକୁ ସବୁ ବିପଦରୁ ରକ୍ଷା କରିବାକୁ ପ୍ରତିଶ୍ରୁତି ଦେଉଛି ଭାଇ । ଭାଇ ଓ ଭଉଣୀର ପବିତ୍ର ଓ ଅତୁଟ ସମ୍ପର୍କର ସାକ୍ଷୀ ହୋଇଛି ଏହି ରାକ୍ଷୀ । 

ରାକ୍ଷୀ ପୂର୍ଣ୍ଣିମାକୁ ନେଇ ଦ୍ୱନ୍ଦ୍ୱ ଦେଖା ଦେଇଛି । ଆଜି ସକାଳ ୯ ଟା ୯ ମିନିଟରୁ ଆସନ୍ତାକାଲି ୯ ଟା ୪୯ ମିନିଟ୍ ଯାଏ ପୂର୍ଣ୍ଣିମା ତିଥି ରହୁଛି ।  ତେଣୁ ଆଜି ରାକ୍ଷୀ ପୂର୍ଣ୍ଣିମା ପାଳିତ ହେଉଛି । ଅନ୍ୟପକ୍ଷେ ଶ୍ରୀମନ୍ଦିରରେ ଆସନ୍ତାକାଲି ରାକ୍ଷୀ ପୂର୍ଣ୍ଣିମା ପାଳନ ହେବ । ସେପଟେ ସାରା ଭାରତରେ ଆସନ୍ତାକାଲି ରକ୍ଷା ବନ୍ଧନ ପାଳନ ହେବ । 

ପୌରାଣିକ ମତ ଅନୁସାରେ ଅସୁର ସମ୍ରାଟ ବଳି ଭଗବାନ ବିଷ୍ଣୁଙ୍କର ଜଣେ ବଡ଼ ଭକ୍ତ ଥିଲେ । ସେଥିପାଇଁ ବଳିଙ୍କୁ ସମସ୍ତ ସଙ୍କଟରୁ ରକ୍ଷା କରିବାକୁ ଭଗବାନ ଚାହୁଁଥିଲେ । ବଳି ଉପରେ ବିପଦ ଥିବା ଜାଣି ବିଷ୍ଣୁ ବୈକୁଣ୍ଠ ତ୍ୟାଗକରି ବଳିର ରାଜପ୍ରାସାଦରେ ଅବସ୍ଥାନ କଲେ । ତେଣେ ମହାଲକ୍ଷ୍ମୀ ଏହା ଚାହୁଁ ନଥିଲେ । ସେ ଚାହୁଁ ଥିଲେ ବିଷ୍ଣୁ ତାଙ୍କ ସହ ବୈକୁଣ୍ଠରେ ଅବସ୍ଥାନ କରନ୍ତୁ । ଏହାର ଏକ ଉପାୟ ଚିନ୍ତାକରି ଲକ୍ଷ୍ମୀ ବ୍ରାହ୍ମଣୀ ବେଶରେ ବଳିକୁ ଭେଟି ଶ୍ରାବଣ ପୂର୍ଣ୍ଣିମାରେ ବଳି ହାତରେ ରାକ୍ଷୀ ବାନ୍ଧି ଦେଇଥିଲେ । ଏହାପରେ ଲକ୍ଷ୍ମୀଙ୍କ ମନ କଥା ବୁଝିପାରି ବଳି ରାଜା ଭଗବାନ ବିଷ୍ଣୁଙ୍କୁ ବୈକୁଣ୍ଠ ପୁରକୁ ଫେରିଯିବାକୁ ଅନୁରୋଧ କରିଥିଲେ । 

ସେହିପରି ମହାଭାରତର କାହାଣୀ ଅନୁସାରେ ଦ୍ରୌପଦୀ ଶ୍ରୀକୃଷ୍ଣଙ୍କ ହାତରେ ରାକ୍ଷୀ ବାନ୍ଧିଥିଲେ । ଅର୍ଥାତ ଶ୍ରୀକୃଷ୍ଣ ଅତ୍ୟାଚାରୀ ଶିଶୁପାଳକୁ ବଧ କରିବା ବେଳେ ତାଙ୍କର ଅଙ୍ଗୁଳି କଟିଯାଇଥିଲା । ସେଥିରୁ ରକ୍ତ ବାହାରିବା ଦେଖି ଦ୍ରୌପଦୀ ନିଜ ପିନ୍ଧା ଶାଢ଼ୀ ଚିରି ସେଥିରେ ଗୁଡ଼ାଇ ଦେଇଥିଲେ, ଫଳରେ ରକ୍ତ ବନ୍ଦ ହୋଇଯାଇଥିଲା । ଦ୍ରୌପଦୀଙ୍କ ମଧ୍ୟରେ ଶ୍ରୀକୃଷ୍ଣ ଭଉଣୀର ସ୍ନେହ ପାଇଥିଲେ । ଯେତେବେଳେ କୁରୁସଭାରେ ଦ୍ରୌପଦୀଙ୍କୁ କୌରବମାନେ ବିବସନା କରିବାକୁ ଉଦ୍ୟତ ହେଲେ ସେତେବେଳେ ଶ୍ରୀକୃଷ୍ଣ ବସ୍ତ୍ରଦାନକରି ଦ୍ରୌପଦୀଙ୍କ ସମ୍ମାନ ରକ୍ଷା କରିଥିଲେ ।

ଭୁବନେଶ୍ୱର: ଆଜି ଶ୍ରାବଣ ମାସର ତୃତୀୟ ସୋମବାର । ଏହା ସହିତ ଆଜି ସଂକ୍ରାନ୍ତି । ଶ୍ରାବଣ ସୋମବାର ସହିତ ସଂକ୍ରାନ୍ତି ହୋଇଥିବାରୁ ଶିବ ମନ୍ଦିରରେ ନାହିଁ ନ ଥିବା ଭିଡ଼ । ‘ବୋଲ୍ ବମ୍ ହର ହର ବମ୍ ନାଦ’ରେ କମ୍ପି ଉଠୁଛି ଗଗନ ପବନ । ଭୁବନେଶ୍ୱରରେ ବାବା ଲିଙ୍ଗରାଜ, ପୁରୀରେ ଶ୍ରୀ ଶ୍ରୀ ଲୋକନାଥ ପୀଠ, କଟକ ଜିଲ୍ଲା ଆଠଗଡ଼ ଧବଳେଶ୍ୱର ଓ ଗୋରେଖନାଥ ଆଦି ପୀଠରେ ମାନସିକଧାରୀ କାଉଁଡ଼ିଆମାନେ ଜଳ ଲାଗି କରୁଛନ୍ତି । 

ପ୍ରବଳ ଭକ୍ତଙ୍କ ସମାଗମକୁ ଦେଖି ଲିଙ୍ଗରାଜ ପୀଠରେ ମନ୍ଦିର ପ୍ରଶାସନ ଏବଂ କମିଶନରେଟ୍ ପୋଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । କାଉଁଡ଼ିଆମାନେ ନିର୍ଦ୍ଧାରିତ ବ୍ୟାରିକେଡ୍ ଦେଇ ମନ୍ଦିର ଭିତରକୁ ପ୍ରବେଶ କରି ଜଳାଭିଷେକ କରୁଛନ୍ତି । ରାଜ୍ୟର ବିଭିନ୍ନ ଜିଲ୍ଲାରୁ ଶ୍ରଦ୍ଧାଳୁମାନେ ପାଣି ନେଇ ଆସିଛନ୍ତି । 

ଅଧିକ ପଢ଼ନ୍ତୁ- ବିହାରର ଅଶୋକଧାମ ମନ୍ଦିରରେ ଅଘଟଣ: ୭ ଜଣ ଭକ୍ତଙ୍କ ମୃତ୍ୟୁ, ୮ ଜଣ ଆହତ

ସେହିପରି ପୁରୀର ପ୍ରସିଦ୍ଧ ପ୍ରଭୁ ଶ୍ରୀ ଶ୍ରୀ ଲୋକନାଥଙ୍କ ପୀଠରେ ମଧ୍ୟ ସମାନ ବ୍ୟବସ୍ଥା କରାଯାଇଛି । ଭକ୍ତଙ୍କ ପାଇଁ ବ୍ୟାରିକେଡ୍ ବ୍ୟବସ୍ଥା କରାଯାଇଛି । ସେହିପରି ସଂକ୍ରାନ୍ତି ଥିବାରୁ ସ୍ଥାନୀୟ ଭକ୍ତଙ୍କ ସମାଗମ ମଧ୍ୟ ହୋଇଛି । ସୁରକ୍ଷା ଓ ଶୃଙ୍ଖଳିତ ଦର୍ଶନ ପାଇଁ ବ୍ୟାପକ ପୋଲିସ ଫୋର୍ସ ମୁତୟନ କରାଯାଇଛି । 

ସେପଟେ ବାବା ଧବଳେଶ୍ୱର ପୀଠରେ ହଜାର ହଜାର ସଂଖ୍ୟାରେ ଭକ୍ତଙ୍କ ସମାଗମ ହୋଇଛି । ଶ୍ରଦ୍ଧାଳୁମାନେ ପୋଲ ଏପଟେ ପାର୍ଶ୍ୱରେ ବାହୁଙ୍ଗି ରଖି କାନ୍ଧରେ ପାଣି କଳସ ଧରି ଜଳ ଲାଗି କରିବାକୁ ଯାଉଛନ୍ତି ।  

ଅଧିକ ପଢ଼ନ୍ତୁ- ପ୍ରୟାଗରାଜରେ ସଡ଼କ ଦୁର୍ଘଟଣା: ବାଇକ୍ ଆରୋହୀ ତିନି ଜଣ କାଉଡ଼ିଆଙ୍କ ମୃତ୍ୟୁ

ବଲାଙ୍ଗିର: ଆସନ୍ତା ମାସରେ ଅନୁଷ୍ଠିତ ହେବାକୁ ଯାଉଛି ପଶ୍ଚିମ ଓଡ଼ିଶାର ଗଣପର୍ବ ନୂଆଁ ଖାଇ । ଏଥିପାଇଁ ପଶ୍ଚିମ ଓଡ଼ିଶାରେ ବିଭିନ୍ନ ଦେବୀଙ୍କ ମନ୍ଦିର ଚଳଚଞ୍ଚଳ ହୋଇ ଉଠିଲାଣି । ପ୍ରାଥମିକ ପର୍ଯ୍ୟାୟରେ ବଲାଙ୍ଗିର ଜିଲ୍ଲାରେ ପାଟଣା ମହାରାଜାଙ୍କ ଶୈଳଶ୍ରୀ ପ୍ୟାଲେସର ନୂଆଁ ଖାଇ ଲଗ୍ନ ସ୍ଥିରୀକୃତ ହୋଇଛି । ଆସନ୍ତା ସେପ୍ଟେମ୍ବର ୧୫ ତାରିଖ ସକାଳ ୯ଟା ୩୬ ମିନିଟରୁ ୧୦ଟା ୧୦ ମିନିଟ ଯାଏଁ ଅମୃତ ବେଳା ରହିଛି ।  ଏହି ସମୟ ମଧ୍ୟରେ ମା ପାଟଣେଶ୍ୱରୀଙ୍କ ନିକଟରେ ନବାନ୍ନ ଲାଗି ହେବ । ଏହା ପରେ ସମସ୍ତେ ନବାନ୍ନ ଖାଇବେ । 

ଶୈଳଶ୍ରୀ ପ୍ୟାଲେସ ସ୍ଥିତ ପାଟଣା ମହାରାଜାଙ୍କ ହାଉସହୋଲ୍ ଅଫିସ ପକ୍ଷରୁ ଆସନ୍ତା ସେପ୍ଟେମ୍ବର ୧୫ରେ ବଲାଙ୍ଗିର ଜିଲ୍ଲାରେ ନୂଆଁ ଖାଇ ପାଇଁ ଲଗ୍ନ ନିର୍ଦ୍ଧାରଣ କରାଯାଇଛି। ଜିଲ୍ଲାର ଜ୍ୟୋତିଷ ପଣ୍ଡିତ ମହାସଭାର ନବାନ୍ନ ଲଗ୍ନ ନିର୍ଣ୍ଣାୟକ କମିଟି ତଥା ରାଜପୁରୋହିତଙ୍କ ସିଦ୍ଧାନ୍ତକ୍ରମେ ପୂର୍ବତନ ପାଟଣାଷ୍ଟେଟ ତଥା ମହାରାଜାଙ୍କ ଇଷ୍ଟଦେବୀ ମା' ପାଟଣେଶ୍ଵରୀ ଓ ମା'ସମଲେଶ୍ଵରୀଙ୍କ ରାଶି ନକ୍ଷତ୍ର ଓ ପୂର୍ବ ପରମ୍ପରା ଅନୁଯାୟୀ ଚଳିତ ବର୍ଷ ଭାଦ୍ରବ ଶୁକ୍ଳପକ୍ଷ ପଞ୍ଚମୀ ୧୫ ତାରିଖ ମଙ୍ଗଳବାର ବିଶୁଦ୍ଧ ତୁଳା ଲଗ୍ନେ ଅମୃତ ବେଳାରେ ସକାଳ ୯ଟା ୩୬ରୁ ସକାଳ ୧୦ଟା ୧୦ ମଧ୍ୟରେ ନବାନ୍ନ ଲାଗି ହେବ। ପଣ୍ଡିତ ମହାସଭାର ନବାନ୍ନ ଲଗ୍ନ କମିଟି ପକ୍ଷରୁ ଏହି ଲଗ୍ନ ନିର୍ଦ୍ଧାରଣ କରାଯାଇଛି । ଏ ନେଇ ବଲାଙ୍ଗିର ଶୈଳଶ୍ରୀ ପଲେସସ୍ଥିତ ପାଟଣା ମହାରାଜାଙ୍କ ହାଉସ୍ ହୋଲ୍ମ ଅଫିସ ପକ୍ଷରୁ ରାଜପୁରୋହିl  ସନ୍ତୋଷ କୁମାର ଦାଶ ଜ୍ୟୋତିଷ ଭଗବାନ ମୋହନ ମିଶ୍ର ସୂଚ ସୂଚନା ଦେଇଛନ୍ତି।

ବ୍ରହ୍ମଗିରି: ଦେବସ୍ନାନ ପୂର୍ଣ୍ଣିମାରେ ୧୦୮ ଗରା ସୁବାଷିତ ଜଳରେ ସ୍ନାନ କରିବା ପରେ ଭୀଷଣ ଜ୍ୱରରେ ପୀଡ଼ିତ ହେବା ପରେ ଅଣସର ଗୃହରେ ରହିଛନ୍ତି ଚତୁର୍ଦ୍ଧାମୂରତି । ସେଥିପାଇଁ ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ ବନ୍ଦ ରହିଛି । ସେପଟେ ବ୍ରହ୍ମଗିରି ଶ୍ରୀଅଲାରନାଥଙ୍କ ପୀଠରେ ମଙ୍ଗଳବାର ଠାରୁ ଅଣସର ଦର୍ଶନ ହୋଇଛି । ଆଜିଠାରୁ ୧୪ ଦିନ ଧରି ଅଲାରନାଥପୀଠରେ ମହାପ୍ରଭୁ ଚତୁର୍ଭୁଜ ନାରାୟଣ ରୂପରେ ଦର୍ଶନ ଦେବେ। ସକାଳୁ ସକାଳୁ ପ୍ରବଳ ଭକ୍ତଙ୍କ ସମାଗମ ହୋଇଛି ।

ଭୋର ୫ଟାରୁ ମନ୍ଦିର ଖୋଲା ଯାଇଥିଲା । ମଙ୍ଗଳ ଆଲତୀ, ତଡ଼ପଲାଗି, ଶ୍ରୀଗୋପାଳବଲ୍ଲଭ ଧୂପ ଲାଗି ହେବା ପରେ ଦର୍ଶନ ଆରମ୍ଭ ହୋଇଥିଲା । ୧୨ଟାରେ ପହଡ଼ ପଡ଼ିବ ଏବଂ ଦ୍ୱିତୀୟ ଭୋଗ ଲାଗି ହେବ । 

ଅଲାରନାଥ ପୀଠରେ ଅନବସର ଦର୍ଶନ ଆରମ୍ଭ ହୋଇଛି । ଭକ୍ତଙ୍କ ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା ଗ୍ରହଣ କରାଯାଇଛି । ଭକ୍ତଙ୍କ ଶୃଙ୍ଖଳିତ ଦର୍ଶନ ନିମନ୍ତେ ପ୍ରଶାସନ ତରଫରୁ ବ୍ୟାରିକେଡ୍ର ବ୍ୟବସ୍ଥା କରାଯାଇଛି । ଏହା ସହିତ ପ୍ରବଳ ଗରମ ଓ ଗୁଳୁଗୁଳିକୁ ଦୃଷ୍ଟିରେ ରଖି ପାନୀୟ ଜଳର ବ୍ୟବସ୍ଥା କରାଯାଇଛି । ସେହିପରି ଟ୍ରାଫିକ୍ ବ୍ୟବସ୍ଥା ମଧ୍ୟ କଡ଼ାକଡ଼ି କରାଯାଇଛି । ଭିଡ଼ ନିୟନ୍ତ୍ରଣ ପାଇଁ ଗୋପଛକ ମୁଖ୍ୟ ରାସ୍ତାରୁ ହିଁ ଭକ୍ତମାନେ ଚାଲି ଚାଲି ଅଲାରନାଥଙ୍କ ପୀଠକୁ ଯିବେ । ସେହିପରି ପାର୍କିଂ ବ୍ୟବସ୍ଥା କରାଯାଇଛି । 

ମନ୍ଦିର ପରିସରରେ ଅତିରିକ୍ତ ଏସ୍ପିଙ୍କ ନେତୃତ୍ୱରେ ୫ ଜଣ ଇନ୍ସପେକ୍ଟରଙ୍କ ସମେତ ୧୭ ଅଫିସର, ୮ ପ୍ଲାଟୁନ୍ ଫୋର୍ସ, ୭୦ରୁ ଅଧିକ ହୋମଗାର୍ଡ, ୬ ଜଣ ଟ୍ରାଫିକ ପୁଲିସ୍, ୨ ପ୍ଲାଟୁନ୍ ସାଦା ପୋଷାକଧାରୀ ପୋଲିସ ମୁତୟନ ହୋଇଛନ୍ତି । ପ୍ରାୟ ୫୦ରୁ ଅଧିକ ସିସି କ୍ୟାମେରା ଲଗାଯାଇଛି ।

ଅଧିକ ପଢ଼ନ୍ତୁ:- ମହାପ୍ରଭୁଙ୍କୁ ହୋଇଛି ଜ୍ୱର, ଅଣସର ଗୃହରେ ଚାଲିଛି ଉପଚାର