ନୂଆଦିଲ୍ଲୀ: ହରିୟାଣାର ଫରିଦାବାଦର ଆତଙ୍କବାଦୀ ମଡ୍ୟୁଲର ମହିଳା କମାଣ୍ଡର ହେଉଛନ୍ତି ଡାକ୍ତର ଶାହିନ ସୟଦ । ଯିଏ ଜୈଶ-ଏ-ମହମ୍ମଦ ଆତଙ୍କବାଦୀ ସଂଗଠନର ମହିଳା ଶାଖାର ନେତୃତ୍ୱ ନେଉଥିଲେ । ମହିଳାମାନଙ୍କୁ ଆତଙ୍କୀ କାର୍ଯ୍ୟକଳାପ ପାଇଁ ପ୍ରବର୍ତ୍ତାଉଥିଲେ । ତେବେ ଶାହିନ ପୂର୍ବରୁ ବିବାହିତ ଅଟନ୍ତି । ତାଙ୍କର ଦୁଇଟି ପିଲା ଥିବାବେଳେ ସେ ସ୍ୱାମୀଙ୍କଠାରୁ ଛାଡ଼ପତ୍ର ନେଇସାରିଛନ୍ତି । ଶାହିନଙ୍କୁ ଗିରଫ କରିବା ପରେ ଏବେ ସମସ୍ତେ ଆଶ୍ଚର୍ଯ୍ୟ ହୋଇଯାଇଛନ୍ତି । ତାଙ୍କର ପ୍ରଥମ ସ୍ୱାମୀ ଡକ୍ଟର ଜାଫର ହୟାତଙ୍କ ପ୍ରତିକ୍ରିୟା ସାମ୍ନାକୁ ଆସିଛି । 

ଜୈଶ-ଏ-ମହମ୍ମଦ ଆତଙ୍କବାଦୀ ସଂଗଠନର ମହିଳା ଶାଖା ସହିତ ଜଡିତ ଦିଲ୍ଲୀ କାର ବୋମା ବିସ୍ଫୋରଣ ମାମଲାରେ ଡକ୍ଟର ଶାହିନଙ୍କ ନାମ ଆସିବା ପରେ ତାଙ୍କ ପରିବାର ଏବଂ ସମ୍ପର୍କୀୟମାନେ ଆଶ୍ଚର୍ଯ୍ୟ ହୋଇଯାଇଛନ୍ତି । ଡକ୍ଟର ଶାହିନଙ୍କ ପ୍ରଥମ ସ୍ୱାମୀ ଡକ୍ଟର ଜାଫର ହୟାତ ବର୍ତ୍ତମାନ ଲକ୍ଷ୍ନୌରେ ରହୁଛନ୍ତି । ଡକ୍ଟର ଜାଫର ବର୍ତ୍ତମାନ କାନପୁରର ସରକାରୀ ପରିଚାଳିତ କେପିଏମ ହସ୍ପିଟାଲରେ ଚକ୍ଷୁ ବିଶେଷଜ୍ଞ ଭାବରେ କାର୍ଯ୍ୟ କରନ୍ତି। ସେ ଗଣମାଧ୍ୟମକୁ ପ୍ରତିକ୍ରିୟା ଦେଇ ଶାହିନଙ୍କ ବିଷୟରେ ଅନେକ ଖୁଲାସା କରିଛନ୍ତି । ସେ କହିଛନ୍ତି ଯେ ଶାହିନ ପାଠପଢ଼ାରେ ବହୁତ ଆଗ୍ରହୀ ଥିଲେ । କିନ୍ତୁ ସେ ଏପରି ଭୁଲ ରାସ୍ତାରେ ପଡ଼ିବେ ବୋଲି ସେ ଜାଣି ନଥିଲେ।

ଡାକ୍ତାର ଜାଫରଙ୍କ କହିବା ମୁତାବକ, ସେ ୨୦୦୩ ଡାକ୍ତର ଜାଫରଙ୍କୁ ବିବାହ କରିଥିଲେ । ଶାହିନ ପାଠପଢ଼ାରେ ବହୁତ ଆଗ୍ରହୀ ଥିଲେ । ୨୦୦୬-୦୭ରେ, ଡକ୍ଟର ଶାହିନଙ୍କୁ ଉତ୍ତର ପ୍ରଦେଶ ପବ୍ଲିକ୍ ସର୍ଭିସ୍ କମିଶନ ଦ୍ୱାରା କାନପୁରର ଗଣେଶ ଶଙ୍କର ବିଦ୍ୟାର୍ଥୀ ମେଡିକାଲ କଲେଜରେ ସହାୟକ ପ୍ରଫେସର ପଦବୀ ପାଇଁ ମନୋନୀତ କରାଯାଇଥିଲା। ସେମାନଙ୍କ ବିବାହର ପ୍ରଥମ ଛଅରୁ ସାତ ବର୍ଷ ଭଲ ଥିଲା, କିନ୍ତୁ ଶାହିନ ତାଙ୍କୁ ବିଦେଶରେ ରହିବା ପାଇଁ ଚାପ ପକାଇବା ଆରମ୍ଭ କରିଥିଲେ, ଯାହା ଫଳରେ ସେମାନଙ୍କର ଛାଡପତ୍ର ହୋଇଥିଲା। ସେମାନଙ୍କ ବିବାହ ଅଧିକ ଦିନ ତିଷ୍ଠି ପାରିଲା ନାହିଁ ଏବଂ ୨୦୧୫ରେ ସେମାନଙ୍କର ଛାଡପତ୍ର ହୋଇଥିଲା। ଉଭୟଙ୍କର ଦୁଇଟି ପିଲା ଅଛନ୍ତି ଯେଉଁମାନେ ବାପାଙ୍କ ସହିତ ରୁହନ୍ତି, କିନ୍ତୁ ଶାହିନ କେବେ ସେମାନଙ୍କ ସହିତ ଯୋଗାଯୋଗ କରିବାକୁ ଚେଷ୍ଟା କରି ନାହାଁନ୍ତି । ପିଲାମାନେ ଛୋଟ ହୋଇଥିବାରୁ ସେମାନଙ୍କୁ ଛାଡ଼ପତ୍ର ବାବାଦରେ କିଛି କୁହାଯାଇନଥିଲା । 

ଡକ୍ଟର ଜାଫର କହିଛନ୍ତି ଯେ ପତ୍ନୀ (ଶାହିନ) ପ୍ରାୟତଃ ଅନ୍ୟ ଦେଶକୁ ଯିବାକୁ ଚାହୁଁଥିଲେ । ଯେପର୍ଯ୍ୟନ୍ତ ସେମାନେ ଏକାଠି ଥିଲେ, ସେ ଏଥିରେ ଆଗ୍ରହୀ ଥିଲେ ବୋଲି କେବେ ମନେ ହେଉନଥିଲା। ଛାଡପତ୍ର ପରଠାରୁ ସେମାନେ କଥା ହୋଇନାହାଁନ୍ତି । ସେମାନେ ପରିବାରରେ ସହମତିରେ ବିବାହ କରିଥିଲେ । ଆମେ ଇସଲାମ ଧର୍ମର ଶରିଆ ଆଇନ ଅନୁଯାୟୀ ଉଭୟଙ୍କର ଛାଡପତ୍ର ପାଇଲୁ। ବିବାହ ସମ୍ପର୍କ ମାତ୍ର ସାତ ବର୍ଷ ଦୁଇ ମାସ ପର୍ଯ୍ୟନ୍ତ ଚାଲିଥିଲା। 

ସେହିପରି ଆତଙ୍କବାଦୀ ଦୁନିଆରେ ପାଦ ରଖିଥିବା ଶାହିନ ସେତେବେଳେ କାନପୁରରେ ପୋଷ୍ଟିଂ ହୋଇଥିଲେ । କିନ୍ତୁ ସେ କେବେ ବୁର୍ଖା ପିନ୍ଧୁନଥିଲେ ଏବଂ ତାଙ୍କ ଉପରେ କୌଣସି ଧାର୍ମିକ ପ୍ରତିବନ୍ଧକ ମଧ୍ୟ ନଥିଲା। ସେ କେବଳ ତାଙ୍କ ଶ୍ୱଶୁର ଘର ଲୋକଙ୍କୁ ଭେଟିବାକୁ ଯିବା ସମୟରେ ବୁର୍ଖା ପିନ୍ଧୁଥିଲେ । କିନ୍ତୁ ଛାଡ଼ପତ୍ର ପରେ ସେ କେମିତି ଆତଙ୍କୀ ସଂଗଠନ ସହିତ ସାମିଲ ହେଲେ ତାହା ସେ ଜାଣି ନାହାଁନ୍ତି ବୋଲି କହିଛନ୍ତି ସ୍ୱାମୀ ଜାଫର । 

ଶାହିନ ନିଷିଦ୍ଧ ଜୈଶ-ଏ-ମହମ୍ମଦ ଦ୍ୱାରା ଆରମ୍ଭ ହୋଇଥିବା ନୂତନ ଆତଙ୍କବାଦୀ ସଂଗଠନ ଜମାତ-ଉଲ-ମୋମିନାତ ସହିତ ମଧ୍ୟ ଜଡିତ ଥିଲା । ସେ ପାକିସ୍ତାନ ସ୍ଥିତ ଜଣେ ହ୍ୟାଣ୍ଡଲରଙ୍କ ସମ୍ପର୍କରେ ଥିଲେ, ଯିଏ ଆତଙ୍କବାଦୀ କାର୍ଯ୍ୟକଳାପ ପାଇଁ ଯଥାସମ୍ଭବ ଅଧିକ ମହିଳାଙ୍କୁ ନିଯୁକ୍ତି ଦେବାକୁ ନିର୍ଦ୍ଦେଶ ଦେଉଥିଲେ। ତାଙ୍କ ଛାଡପତ୍ର ପରେ ଫରିଦାବାଦରେ ଥିବା ଅଲ୍-ଫଲାହ ବିଶ୍ୱବିଦ୍ୟାଳୟରେ ଯୋଗ ଦେଇଥିଲେ ଏବଂ ଏକାକୀ ରହୁଥିଲେ।