ନୂଆଦିଲ୍ଲୀ: ଦକ୍ଷିଣ କଶ୍ମୀରର ପହଲଗାମ ଆତଙ୍କବାଦୀ ଆକ୍ରମଣରେ ସମ୍ପୃକ୍ତ ଲସ୍କର-ଏ-ତୈବାର ଏକ ଫ୍ରଣ୍ଟ ସଂଗଠନ ଦି ରେଜିଷ୍ଟାନ୍ସ ଫ୍ରଣ୍ଟ (ଟିଆରଏଫ୍‌) ଉପରେ ଆମେରିକା ପ୍ରତିବନ୍ଧକ ଲଗାଇବା ପରେ ପାକିସ୍ତାନରେ ହଇଚଇ ସୃଷ୍ଟି ହୋଇଛି। ଭାରତର ସମ୍ଭାବ୍ୟ ବିମାନ ଆକ୍ରମଣକୁ ନେଇ ପାକିସ୍ତାନ ସତର୍କ ଥିବା ପରି ମନେ ହେଉଛି। ଏହି କାରଣରୁ ସେ ଏକ ସପ୍ତାହ ପାଇଁ ଏହାର ଆକାଶ ସୀମାରେ ‌ନୋଟାମ୍‌ ଜାରି କରିଛି।

ପାକିସ୍ତାନୀ ସାମରିକ ଅଧିକାରୀଙ୍କ ଅନୁସାରେ, କେନ୍ଦ୍ରୀୟ କ୍ଷେତ୍ରର ବାୟୁସୀମା ଜୁଲାଇ ୧୬ରୁ ୨୩ ପର୍ଯ୍ୟନ୍ତ ସମ୍ପୂର୍ଣ୍ଣ ବନ୍ଦ ରହିବ। ସେହି ସମୟରେ ଦକ୍ଷିଣ ପାକିସ୍ତାନର ବାୟୁ ସୀମା ମଧ୍ୟ ଜୁଲାଇ ୨୨ରୁ ୨୩ ବନ୍ଦ କରାଯାଇଛି। ଆନୁଷ୍ଠାନିକ ଭାବରେ ଏହାକୁ ଏକ ସାମରିକ ଅଭ୍ୟାସ କିମ୍ବା କ୍ଷେପଣାସ୍ତ୍ର ପରୀକ୍ଷଣ ଭାବରେ ବର୍ଣ୍ଣନା କରାଯାଇଛି। ସୂତ୍ର ଅନୁସାରେ, ସମ୍ପ୍ରତି ପାକିସ୍ତାନରେ ଚୀନ୍ କାର୍ଗୋ ବିମାନର ଗତିବିଧି ଦେଖାଯାଇଥିଲା। ଏହା ସନ୍ଦେହକୁ ଆହୁରି ଦୃଢ଼ କରିଛି ଯେ ଚୀନ୍ ପାକିସ୍ତାନକୁ ନୂତନ ସାମରିକ ପ୍ରଯୁକ୍ତିବିଦ୍ୟା, ଅସ୍ତ୍ରଶସ୍ତ୍ର ଏବଂ ବାୟୁ ପ୍ରତିରକ୍ଷା ପ୍ରଣାଳୀ ଯୋଗାଇଛି।

ପହଲଗାମ ଆତଙ୍କବାଦୀ ଆକ୍ରମଣ ଏବଂ ‘ଅପରେସନ ସିନ୍ଦୂର’ ପରେ ଭାରତ-ପାକିସ୍ତାନ ସମ୍ପର୍କ ଅଧିକ ଉତ୍ତେଜନାପୂର୍ଣ୍ଣ ହୋଇଛି। ପହଲଗାମରେ ପର୍ଯ୍ୟଟକଙ୍କ ଉପରେ ଆକ୍ରମଣରେ ପାକିସ୍ତାନ ସମର୍ଥିତ ଆତଙ୍କବାଦୀ ସଂଗଠନ ଟିଆରଏଫ୍‌ର ସମ୍ପୃକ୍ତି ଭାରତକୁ କଠୋର ଆଭିମୁଖ୍ୟ ଗ୍ରହଣ କରିବାକୁ ବାଧ୍ୟ କରିଛି। ପ୍ରତିଶୋଧ ସ୍ୱରୂପ ଭାରତ ଅପରେସନ ସିନ୍ଦୁର ଅଧୀନରେ ସୀମା ଆରପାରିରେ ଆତଙ୍କବାଦୀ ଆଡ୍ଡାଗୁଡ଼ିକୁ ଟାର୍ଗେଟ କରିଥିଲା। ଏହି ଘଟଣା ପରେ, ପାକିସ୍ତାନ ଭାରତ ପାଇଁ ତାର ଏୟାରସ୍ପେସ୍ ବନ୍ଦ କରିଦେଇଥିଲା ଏବଂ ସାମରିକ କାର୍ଯ୍ୟକଳାପକୁ ତୀବ୍ର କରିଥିଲା। ଦୁଇ ଦେଶ ମଧ୍ୟରେ ଯୋଗାଯୋଗ ପ୍ରାୟ ସ୍ଥଗିତ ରହିଛି ଏବଂ ସୀମାରେ ସୁରକ୍ଷା ବାହିନୀ ମୁତୟନ ବୃଦ୍ଧି ପାଇଛି, ଯାହା ପରିସ୍ଥିତିକୁ ଅଧିକ ଗମ୍ଭୀର କରିଛି।

ଆମେରିକା ପହଲଗାମ ଆତଙ୍କବାଦୀ ଆକ୍ରମଣରେ ସମ୍ପୃକ୍ତ ଲସ୍କର-ଏ-ତୈବାର ଏକ ଫ୍ରଣ୍ଟ ସଂଗଠନ 'ଦି ରେଜିଷ୍ଟାନ୍ସ ଫ୍ରଣ୍ଟ'କୁ ନିଷିଦ୍ଧ କରିଛି। ଏହି ସଂଗଠନ ଲସ୍କରର ଏକ ଗୁପ୍ତ ଶାଖା, ଯାହା ଜମ୍ମୁ ଓ କାଶ୍ମୀରରେ ଆତଙ୍କବାଦୀ ଘଟଣା ଘଟାଇ ଆସୁଛି। ଆମେରିକାର ବୈଦେଶିକ ବିଭାଗ ଟିଆରଏଫ୍‌କୁ ଏକ ବିଶ୍ୱ ଆତଙ୍କବାଦୀ ସଂଗଠନ ଘୋଷଣା କରିଛି ଏବଂ ଏହାର ସମ୍ପତ୍ତି ଜବତ କରିବା ଏବଂ ଆମେରିକୀୟ ନାଗରିକଙ୍କ ସହିତ ଯେକୌଣସି କାରବାର ଉପରେ ପ୍ରତିବନ୍ଧକ ଲଗାଇବାକୁ ନିଷ୍ପତ୍ତି ନେଇଛି। ଏହି ପଦକ୍ଷେପ ଏପରି ସମୟରେ ଆସିଛି ଯେତେବେଳେ ଭାରତ ଅନ୍ତର୍ଜାତୀୟ ମଞ୍ଚରେ TRF ର ଭୂମିକା ଉପରେ ନିରନ୍ତର ପ୍ରମାଣ ପ୍ରଦାନ କରିଆସୁଛି। ଏହା ପାକିସ୍ତାନ ଉପରେ କୂଟନୈତିକ ଚାପକୁ ଆହୁରି ବୃଦ୍ଧି କରିବ।

ଅଧିକ ପଢ଼ନ୍ତୁ: କାଉଡ଼ିଆମାନେ ନେଇପାରିବେନି ତ୍ରିଶୂଳ-ହକି ଷ୍ଟିକ୍!