ଇସଲାମାବାଦ: ପାକିସ୍ତାନର ସବୁଠାରୁ ଅଶାନ୍ତ ଅଞ୍ଚଳ ଭାବେ ଜଣାଶୁଣା ବାଲୁଚିସ୍ତାନ ପ୍ରଦେଶରୁ ଏକ ଦୁଃଖଦ ଓ ସାଂଘାତିକ ଖବର ସାମ୍ନାକୁ ଆସିଛି। ବାଲୁଚିସ୍ତାନର ରାଜଧାନୀ କ୍ୱେଟା ସହରରେ ଏକ ଚଳନ୍ତା ଯାତ୍ରୀବାହୀ ଟ୍ରେନକୁ ଲକ୍ଷ୍ୟ କରି ରେଳ ଟ୍ରାକ୍ ନିକଟରେ ଶକ୍ତିଶାଳୀ ବୋମା ବିସ୍ଫୋରଣ କରାଯାଇଛି। ଏହି ଭୟାବହ ବ୍ଲାଷ୍ଟରେ ବର୍ତ୍ତମାନ ସୁଦ୍ଧା ଅତିକମରେ ୨୩ ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଥିବା ବେଳେ ୪୭ ରୁ ଅଧିକ ଲୋକ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଗୁରୁତର ହୋଇଛନ୍ତି। ବିସ୍ଫୋରଣର ତୀବ୍ରତା ଏତେ ଭୟଙ୍କର ଥିଲା ଯେ ଏହାର ପ୍ରଭାବରେ ସମ୍ପୂର୍ଣ୍ଣ ଟ୍ରେନଟି ଦୋହଲି ଯାଇଥିଲା ଏବଂ କିଛି ବଗି ଧାରଣାରୁ ତଳକୁ ଖସି ପଡ଼ିଥିଲା।

ଚଳନ୍ତା ଟ୍ରେନକୁ କରାଗଲା ଟାର୍ଗେଟ୍, ବିସ୍ଫୋରଣ ପରେ ଶୁଭିଲା ଗୁଳିର ଶବ୍ଦ

ମିଳିଥିବା ସୂଚନା ମୁତାବକ, ଏକ ସ୍ପେଶାଲ ଶଟଲ୍ ଟ୍ରେନ୍ ଯାତ୍ରୀମାନଙ୍କୁ ନେଇ କ୍ୱେଟା କ୍ୟାଣ୍ଟ୍ ଅଭିମୁଖେ ଯାଉଥିଲା। ଟ୍ରେନଟି ଚମନ୍ ଫାଟକ ନିକଟ ଦେଇ ଗତି କରୁଥିବା ସମୟରେ ହଠାତ୍ ରେଳ ଲାଇନ୍ ଉପରେ ପୂର୍ବରୁ ଖଞ୍ଜା ଯାଇଥିବା ଏକ ଶକ୍ତିଶାଳୀ ଆଇଇଡି (IED) ବୋମା ବିସ୍ଫୋରଣ ହୋଇଥିଲା। ବିସ୍ଫୋରଣ ସହିତ ଚତୁର୍ଦ୍ଦିଗ ଧୂଆଁମୟ ହୋଇଯାଇଥିଲା ଏବଂ ଯାତ୍ରୀମାନଙ୍କ ମଧ୍ୟରେ ଚିତ୍କାର ତଥା ଆଫ୍ରାତଫ୍ରିର ବାତାବରଣ ସୃଷ୍ଟି ହୋଇଥିଲା। ସ୍ଥାନୀୟ ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ବ୍ଲାଷ୍ଟ ହେବାର କିଛି ସମୟ ପରେ ସଂପୃକ୍ତ ଅଞ୍ଚଳରେ ପ୍ରବଳ ଗୁଳିବିନିମୟ ଶବ୍ଦ ମଧ୍ୟ ଶୁଣିବାକୁ ମିଳିଥିଲା, ଯାହା ଫଳରେ ସ୍ଥାନୀୟ ଲୋକଙ୍କ ମଧ୍ୟରେ ପ୍ରବଳ ଆତଙ୍କ ଖେଳିଯାଇଥିଲା।

ଘଟଣା ସମ୍ପର୍କରେ ଖବର ପାଇ ପାକିସ୍ତାନୀ ସେନା, ସ୍ଥାନୀୟ ପୋଲିସ ଏବଂ ସମସ୍ତ ଉଦ୍ଧାରକାରୀ ଦଳ ତୁରନ୍ତ ସେଠାରେ ପହଞ୍ଚିଥିଲେ। ଟ୍ରେନର ଭାଙ୍ଗିଯାଇଥିବା ବଗି ଭିତରୁ ମୃତଦେହ ଏବଂ ଆହତମାନଙ୍କୁ ବାହାର କରାଯାଇ ସ୍ଥାନୀୟ ମେଡିକାଲରେ ଭର୍ତ୍ତି କରାଯାଇଛି। ପରିସ୍ଥିତିର ଗାମ୍ଭୀର୍ଯ୍ୟକୁ ଦେଖି କ୍ୱେଟାର ସମସ୍ତ ସରକାରୀ ଚିକିତ୍ସାଳୟରେ ମେଡିକାଲ ଇମରଜେନ୍ସି ବା ଜରୁରୀକାଳୀନ ସ୍ଥିତି ଘୋଷଣା କରାଯାଇଛି। ଡାକ୍ତରଙ୍କ କହିବା ଅନୁଯାୟୀ ଆହତଙ୍କ ମଧ୍ୟରୁ ପ୍ରାୟ ଏକ ଦଶନ୍ଧିରୁ ଅଧିକ ଲୋକଙ୍କ ଅବସ୍ଥା ଅତି ସଂକଟାପନ୍ନ ରହିଛି, ଯାହା ଫଳରେ ମୃତ୍ୟୁସଂଖ୍ୟା ଆଗକୁ ଆହୁରି ବୃଦ୍ଧି ପାଇବା ଆଶଙ୍କା କରାଯାଉଛି।

ପ୍ରଭାବ ଏତେ ତୀବ୍ର ଥିଲା ଯେ ଓଲଟି ପଡ଼ିଲା ବଗି, ଚୂରମାର୍ ହେଲା ଘରର କାଚ

ରେଳବାଇ ଅଧିକାରୀଙ୍କ ସୂତ୍ରରୁ ଜଣାପଡ଼ିଛି ଯେ ବିସ୍ଫୋରଣର ପ୍ରଭାବ ଅତ୍ୟନ୍ତ ସାଂଘାତିକ ଥିଲା। ବ୍ଲାଷ୍ଟ ଯୋଗୁଁ ଟ୍ରେନର ମୁଖ୍ୟ ଇଞ୍ଜିନ ସହିତ ତିନୋଟି ବଗି ସମ୍ପୂର୍ଣ୍ଣ ଭାବେ ଲାଇନଚ୍ୟୁତ ହୋଇଯାଇଥିଲା ଏବଂ ସେଥିମଧ୍ୟରୁ ଦୁଇଟି ବଗି ମାଟିରେ ଓଲଟି ପଡ଼ିଥିଲା। କେବଳ ସେତିକି ନୁହେଁ, ରେଳ ଲାଇନ୍ ନିକଟରେ ଥିବା ପାର୍କିଂ ଏରିଆରେ ଛିଡ଼ା ହୋଇଥିବା ପ୍ରାୟ ୧୦ରୁ ଅଧିକ ଚାରିଚକିଆ ଯାନ ଏହି ବ୍ଲାଷ୍ଟ ପ୍ରଭାବରେ ସମ୍ପୂର୍ଣ୍ଣ ନଷ୍ଟ ହୋଇଯାଇଛି। ବିସ୍ଫୋରଣର କମ୍ପନ ଏତେ ଅଧିକ ଥିଲା ଯେ ଆଖପାଖରେ ଥିବା କୋଠାବାଡ଼ି ଏବଂ ଦୋକାନ ବଜାରର ଝରକା କାଚ ଭାଙ୍ଗି ଚୂରମାର୍ ହୋଇଯାଇଛି। ସୁରକ୍ଷାକୁ ଦୃଷ୍ଟିରେ ରଖି ପ୍ରଶାସନ ପକ୍ଷରୁ ସେହି ରୁଟ୍‌ ଦେଇ ପେଶାୱର ଯାଉଥିବା ଅନ୍ୟ ଏକ ପ୍ରମୁଖ ଟ୍ରେନ 'ଜାଫର ଏକ୍ସପ୍ରେସ'କୁ କ୍ୱେଟା ରେଳ ଷ୍ଟେସନରେ ଅଟକାଇ ଦିଆଯାଇଛି।

ବଲୁଚିସ୍ତାନ ସରକାରଙ୍କ ବରିଷ୍ଠ ଅଧିକାରୀ ବାବର ୟୁସୁଫଜଇ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ ସୁରକ୍ଷାକର୍ମୀମାନେ ପୂରା ଅଞ୍ଚଳକୁ ସିଲ୍ କରି ବଡ଼ ଧରଣର ସର୍ଚ୍ଚ ଅପରେସନ ଆରମ୍ଭ କରିଛନ୍ତି। ତେବେ ବର୍ତ୍ତମାନ ସୁଦ୍ଧା କୌଣସି ଆତଙ୍କବାଦୀ ସଂଗଠନ ଆନୁଷ୍ଠାନିକ ଭାବେ ଏହି ବର୍ବର କାଣ୍ଡ ପାଇଁ ନିଜକୁ ଦାୟୀ କରିନାହାନ୍ତି। ପ୍ରକାଶଥାଉ କି, ବାଲୁଚିସ୍ତାନରେ ଦୀର୍ଘ ବର୍ଷ ହେବ ପାକିସ୍ତାନ ସରକାରଙ୍କ ଶାସନ ଓ ଶୋଷଣ ବିରୋଧରେ ସ୍ଥାନୀୟ ଅଲଗାବାଦୀ ସଂଗଠନଗୁଡ଼ିକ ସଶସ୍ତ୍ର ଆନ୍ଦୋଳନ ଚଳାଇଛନ୍ତି ଏବଂ ସେମାନେ ପ୍ରାୟତଃ ପାକିସ୍ତାନୀ ସେନା ଓ ସରକାରୀ ସମ୍ପତ୍ତିକୁ ଏଭଳି ଟାର୍ଗେଟ୍ କରିଥାନ୍ତି।