ଅସରାଏ ବର୍ଷାରେ ଜଳମଗ୍ନ ହେଉଛି ନୟାପଲ୍ଲୀ, ସ୍ଥାୟୀ ସମାଧାନ ଦାବିରେ ଯୁବ ଓଡ଼ିଶାର ଆମରଣ ଅନଶନ
Khabar Odisha:Juva-Odisha-on-hunger-strike
ଭୁବନେଶ୍ୱର, ଜୁଲାଇ ୨୬ (ଖବର ଓଡ଼ିଶା):

ଅସରାଏ ବର୍ଷାରେ ରାଜଧାନୀ ଭୁବନେଶ୍ୱରସ୍ଥିତ ନୟାପଲ୍ଲୀ ଉବୁଟୁବୁ ହେଉଛି । ଜନସାଧାରଣ  ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି  । ବାରମ୍ବାର ଅଭିଯୋଗ କରିବା ପରେ ମଧ୍ୟ ବିଏମ୍‌ସି, ବିଡ଼ିଏ, ଡ୍ରେନେଜ୍ ଡିଭିଜନ୍ ଏବଂ ଜିଲ୍ଲା ପ୍ରଶାସନ ସାଜିଛି ନୀରବଦ୍ରଷ୍ଟା  । ଯାହାର ପ୍ରତିବାଦରେ ଆଜି ଯୁବ ଓଡ଼ିଶା ପକ୍ଷରୁ ଆମରଣ ଅନଶନ ଆରମ୍ଭ ହୋଇଛି ।  

ବିଗତ ଦିନମାନଙ୍କରେ ବର୍ଷାଜଳ ନିଷ୍କାସନ ହୋଇ ୭ ଏକର ବିଶିଷ୍ଟ ଜଳାଶ୍ରୟରେ ପଡୁଥିବା ବେଳେ ତନ୍ମଧ୍ୟରୁ ୪ ଏକର ଜଳାଶ୍ରୟକୁ କିଛି ନ୍ୟସ୍ତସ୍ୱାର୍ଥ ବ୍ୟକ୍ତି ପୋତିବା ସହିତ ୪ଏକର ଦେବୋତ୍ତର ଜଳାଶ୍ରୟ ଜମି ବିକିବାରେ ଲାଗିଛନ୍ତି ବୋଲି ଯୁବ ଓଡ଼ିଶା ଭୁବନେଶ୍ୱର ଶାଖାର ସଭାପତି ଅର୍ଜୁନ ବେହେରା ଓ ସମ୍ପାଦକ ସମରେନ୍ଦ୍ର କୁମାର ଜେନା ଅଭିଯୋଗ କରିଛନ୍ତି । ନୟାପଲ୍ଲୀ ଜଳାଶ୍ରୟର ପୁନଃଉଦ୍ଧାର, ଆଇ.ଆର.ସି. ଭିଲେଜ ଇସ୍କନ୍ ପାଣି ନୟାପଲ୍ଲୀ ଅଞ୍ଚଳକୁ ନପଶି ତାହାର ସ୍ଥାୟୀ ସମାଧାନ କରିବା ଏବଂ ନୟାପଲ୍ଲୀ ପୋଖରୀରେ ଖର୍ଚ୍ଚ ହୋଇଥିବା ଏକ କୋଟି ଟଙ୍କାର ଭିଜିଲାନ୍ସ ତଦନ୍ତ ଦାବି କରି ଆଜି ଇସ୍କନ୍ ମନ୍ଦିର ସମ୍ମୁଖରେ ଯୁବ ଓଡ଼ିଶା ପକ୍ଷରୁ ଆମରଣ ଅନଶନ କରାଯାଇଛି  । ଜଳାଶ୍ରୟର ପୁର୍ନରୁଦ୍ଧାର ସହିତ ନାଳନର୍ଦ୍ଦମା ପାଣି ଆବଶ୍ୟକ ଭିତ୍ତିଭୂମି ନିର୍ମାଣ ନ ହେଲେ ସମସ୍ୟାର ସମାଧାନ ହୋଇପାରିବ ନାହିଁ  । ଏହି ଦାବି ପୂରଣ ନହେଲେ ବିଭିନ୍ନ ଜିଲ୍ଲାର ଯୁବ ଓଡ଼ିଶାର ୧୦ ହଜାରରୁ ଊର୍ଦ୍ଧ୍ୱ କର୍ମୀ ଅନଶନରେ ଯୋଗଦେବେ ବୋଲି ସଂଗଠନର ରାଜ୍ୟ ସଭାପତି ଉପେନ୍ଦ୍ର ଭଞ୍ଜ ପ୍ରକାଶ କରିଛନ୍ତି । 

  • Tags:

Subscribe

National International State Sports Entertainment