ମରୁଡି କ୍ଷତିଗ୍ରସ୍ତ ଚାଷୀଙ୍କ ପାଇଁ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ପ୍ୟାକେଜ୍ ଘୋଷଣା, ୩୩ % ବା ତଦୁର୍ଦ୍ଧ କ୍ଷତିଗ୍ରସ୍ତ ଚାଷୀଙ୍କୁ ମିଳିବ କ୍ଷତିପୂରଣ
Khabar Odisha:Odisha-CM-Special-Package-Announced-for-Drought-Affected-Farmer
ଭୁବନେଶ୍ୱର, ୧୫ ନଭେମ୍ବର(ଖବର ଓଡ଼ିଶା):

 ରାଜ୍ୟ ସରକାର ଆଜି ୨୦୧୮ ବର୍ଷ ପାଇଁ ମରୁଡି ପ୍ରଭାବିତ ଅଂଚଳ ପାଇଁ ପ୍ୟାକେଜ୍ ଘୋଷଣା କରିଛନ୍ତି । ସରକାରଙ୍କ ଘୋଷଣା ଅନୁସାରେ ଚାଷ ଜମିର ୩୩ ପ୍ରତିଶତ ଅଥବା ଏହା ଠାରୁ ଅଧିକ କ୍ଷତି ହୋଇଥିଲେ କ୍ଷତିପୂରଣ ମିଳିବ। ଅଣଜଳସେଚିତ ଜମିକୁ ହେକ୍ଟର ପିଛା ୬୮୦୦ ଟଙ୍କା କ୍ଷତିପୂରଣ ମିଳିବ। ସେହିପରି ନିଶ୍ଚିତ ଜଳସେଚିତ ଜମିକୁ ୧୩ ହଜାର ୫୦୦ ଟଙ୍କା କ୍ଷତିପୂରଣ ମିଳିବ । ବର୍ଷବ୍ୟାପୀ ଫସଲ ନିମନ୍ତେ ହେକ୍ଟର ପିଛା ୧୮ ହଜାର ଟଙ୍କା ମିଳିବ । ଚାଷୀମାନଙ୍କୁ ୧ ଲକ୍ଷ ଡାଲି ମିନିକିଟ୍, ୩୦ ହଜାର ତୈଳବୀଜ ମିନିକିଟ୍ ଓ ୨୦ ହଜାର ପନିପରିବା ବିହନ ମିନିକିଟ୍ ମାଗଣାରେ ମିଳିବ । ୨୦୧୮ର ସ୍ୱଳ୍ପଅବଧି ଖରିଫ ଋଣ ମଧ୍ୟମ ଅବଧି ଋଣ ହେବ। ଖରିଫରେ ମରୁଡ଼ି ପ୍ରଭାବିତ ଚାଷୀଙ୍କୁ ରବି ଚାଷ ପାଇଁ କୃଷି ଋଣ ଦିଆଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।

ଏହା ବ୍ୟତୀତ ମରୁଡ଼ି ପ୍ରଭାବିତ ଅଂଚଳର ସମସ୍ତ ସରକାରୀ ଓ ସରକାର ଅନୁଦାନପ୍ରାପ୍ତ ବିଦ୍ୟାଳୟ ଓ ମହବିଦ୍ୟାଳୟରେ ପଢୁଥିବା ଛାତ୍ରଛାତ୍ରୀଙ୍କ ପରୀକ୍ଷା ଓ ଟ୍ୟୁସନ୍ ଫି ଛାଡ଼ ହେବ । ୩୩ ପ୍ରତିଶତ ଅଥବା ଅଧିକ ଫସଲହାନୀରେ ଖଜଣା, ଜଳକର ସଂପୂର୍ଣ୍ଣ ଛାଡ଼ ହେବ । ମନେରଗା ଅଧୀନରେ ଅତିରିକ୍ତ ୫୦ଟି ଶ୍ରମଦିବସ ସୃଷ୍ଟିକରାଯିବ ବୋଲି ମୁଖ୍ୟମନ୍ତ୍ରୀ ଘୋଷଣା କରିଛନ୍ତି ।

ମୁଖ୍ୟମନ୍ତ୍ରୀ ତାଙ୍କ ଘୋଷଣାରେ କହିଛନ୍ତି ଯେ ପ୍ରତି ଚାଷୀଙ୍କୁ ସର୍ବାଧିକ ୨ ହେକ୍ଟର ପର୍ଯ୍ୟନ୍ତ କ୍ଷତିପୂରଣ ଦିଆଯିବ । ବର୍ଷବ୍ୟାପୀ ଫସଲ ପାଇଁ ସର୍ବନିମ୍ନ ୨ହଜାର ଟଙ୍କା ଏବଂ ଅନ୍ୟାନ୍ୟ ଫସଲ ପାଇଁ ସର୍ବନିମ୍ନ ଏକ ହଜାର ଟଙ୍କା ହେକ୍ଟର ପ୍ରତି ଇନପୁଟ୍ ସବସିଡି ପ୍ରଦାନ କରାଯିବ । ଶତକଡା ୫୦ ଭାଗ ଓ ସର୍ବାଧିକ ୧୫ ହଜାର ଟଙ୍କା ରିହାତିରେ ୩ ହଜାର ଗୋଟି ପାଣି ପମ୍ପ (୦.୫ଏଚପି) ଏବଂ ୯୦ ପ୍ରତିଶତ ଓ ସର୍ବାଧିକ ୫୪ ହଜାର ଟଙ୍କା ରିହାତିରେ ସୌର ଜଳନିଧି ଯୋଜନାରେ ଏକ ହାଜରଟି ସୌର ଚାଳିତ ପାଣି ପମ୍ପ ଯୋଗାଇ ଦିଆଯିବ । ରବି ୨୦୧୮-୧୯ରେ ୫୦ ପ୍ରତିଶତ କିମ୍ପା ସର୍ବାଧିକ ୩୮୦୦ ଟଙ୍କା ରିହାତିରେ ବ୍ୟାଟେରୀ ଚାଳିତ ସିଂଚନ ଯନ୍ତ୍ର ଓ ସର୍ବାଧିକ ୬୦୦ ଟଙ୍କା ରିହାତିରେ ହସ୍ତ ଚଳିତ ସିଂଚନ ଯନ୍ତ୍ର ସମୁଦାୟ ୩ ହଜାର ଟି ପ୍ରଦାନ କରାଯିବ ।

୨୦ ହଜାର ଚାଷୀଙ୍କୁ କୁକୁଡା ଚାଷ ପାଇଁ ସହାୟତା ଏବଂ ସଘନ ଘାସ ଚାଷ ପାଇଁ ଉପଯୁକ୍ତ ବିହନ ଯୋଗାଇ ଦିଆଯିବ । ଗ୍ରାମାଂଚଳରେ ମହାଜନୀ କାରବାର କରୁଥିବା ଏବଂ ଚାଷୀଙ୍କୁ ଆର୍ଥିକ ଶୋଷଣ କରୁଥିବା ବ୍ୟକ୍ତିଙ୍କ ଉପରେ ଜିଲ୍ଲା ପ୍ରଶାସନ ତୀକ୍ଷ୍ଣ ଦୃଷ୍ଟି ରଖିବ ଏବଂ ସେମାନଙ୍କ ବିରୋଧରେ ସ୍ଥାନୀୟ ପୋଲିସ୍ ଆଇପିସି ଓ ମନି ଲେଣ୍ଡିଂ ଆକ୍ଟରେ କାର୍ଯ୍ୟାନୁଷ୍ଠାନ ଗ୍ରହଣ କରିବେ । ପୋଲିସ୍ ଉପନିର୍ଦ୍ଦେଶକ ଏହାର ସମୀକ୍ଷା କରିବେ ।

ସେହିପରି ଧାର୍ଯ୍ୟ ସମୟରେ ଋଣ ପରିଶୋଧକାରୀ ଚାଷୀଙ୍କୁ ମଧ୍ୟ ଅବଧି ଋଣ ପାଇଁ ୩ ପ୍ରତିଶତ ସୁଧ ପ୍ରୋତ୍ସାହନ ରାଶି ପ୍ରଦାନ କରିବାକୁ କେନ୍ଦ୍ର ସରକାରଙ୍କୁ ଅନୁରୋଧ କରାଯିବ ବୋଲି ମୁଖ୍ୟମନ୍ତ୍ରୀ ପ୍ରକାଶ କରିଛନ୍ତି ।

Subscribe

National International State Sports Entertainment