ଆଜି ରାଜକୀୟ ନବବର୍ଷ ‘ସୁନିଆଁ’, ପ୍ରଚଳନ ହେବ ନୂତନ ମୁଦ୍ରା
Khabar Odisha:tadoy-royal-new-year-sunia
ପୁରୀ, ସେପ୍ଟେମ୍ବର ୨୧ (ଖବର ଓଡ଼ିଶା):

ଆଜି ଭାଦ୍ରବ ଶୁକ୍ଳ ଦ୍ୱାଦଶୀ ତିଥି ତଥା ବୈଷ୍ଣବ ସମ୍ମତ ଏକାଦଶୀ ତିଥି  । ଏହି ଦିନ ‘ସୁନିଆଁ’ ପଡ଼େ । ସୁନିଆଁ ହେଉଛି ରାଜକୀୟ ନବବର୍ଷ । ରାଜାଙ୍କ ରାଜତ୍ୱର ଅଙ୍କ ଗଣନା ବର୍ଷ ଆଜିଠାରୁ ଆରମ୍ଭ ହୁଏ ଏବଂ ନୂତନ ମୁଦ୍ରା ପ୍ରଚଳନ କରାଯାଇଥାଏ । ତେଣୁ ପୁରୀ ଗଜପତି ମହାରାଜାଙ୍କର ସ୍ୱତନ୍ତ୍ର ଅଭିଷେକ ଉତ୍ସବ ପାଳନ ହେବ । ରାଜଗୁରୁ ସତେଇଶିଟି ବିଭିନ୍ନ ଦେବାଦେବୀଙ୍କ ଛବି ମୁଦ୍ରିତ ନୂତନ ସ୍ୱର୍ଣ୍ଣ ମୁଦ୍ରା ମହାରାଜାଙ୍କ ମସ୍ତକରେ ଉଲାଗି କରିଥାନ୍ତି । 

ରାଜାଙ୍କର ରାଜସ୍ୱ ଆଦାୟ ଓ ନୂଆ ଖାତା ଆରମ୍ଭ ହୁଏ ସୁନିଆଁ ଦିନ । ସୁନିଆଁ ଦିନ ଗୋଟିଏ ସୁନା ମୋହର ଉପରେ ରାଜାଙ୍କ ରାଜତ୍ୱର ଅଙ୍କ ବା ବର୍ଷ ଚିହ୍ନିତ କରାଯାଏ । ଏହାକୁ ସାଧାରଣ ଭାଷାରେ କହନ୍ତି ଅଙ୍କକଟା । ଏହିଦିନଟି ରାଜକୀୟ ବର୍ଷ ଆରମ୍ଭର ପ୍ରଥମ ଦିନ ଏବଂ ସୁନା ଶବ୍ଦ ସହ ଜଡ଼ିତ ହୋଇଥିବାରୁ ସମ୍ଭବତଃ ସୁନିଆଁ ଭାବେ ପାଳିତ ହେଉଛି । ପୂର୍ବରୁ ସୁନିଆଁ ଦିନରେ ପ୍ରଜାମାନେ ଖଜଣା ପୈଠ କରିବା ସହ ଜଳଜମି ପଟ୍ଟାର ନବୀକରଣ କରିଥାନ୍ତି । 

ପୁଣି ଏହି ଦିନ ସର୍ବତ୍ର ବାମନ ଜନ୍ମ ପାଳିତ ହୋଇଥାଏ । ବିଷ୍ଣୁଙ୍କ ଦଶ ଅବତାର ମଧ୍ୟରୁ ବାମନ ହେଉଛନ୍ତି ଏଭଳି ରାଜନୀତି ପ୍ରବଣ ଯେ ନିଜ ବୁଦ୍ଧି ବିଚକ୍ଷଣତା ଦ୍ଵାରା ସ୍ଵର୍ଗ, ମର୍ତ୍ତ୍ୟ, ପାତାଳ ତିନି ଭୁବନକୁ ନିଜ ପାଦତଳେ ରଖିବା ସହ ବଳୀ ପରି ଶାସକଙ୍କୁ ମଧ୍ୟ ପାତାଳକୁ ଚାପି ଦେଇଥିଲେ । ତେଣୁ ଫସଲ ଅମଳ ପରେ ରାଜକୋଷକୁ ସମୃଦ୍ଧ କରି ରାଜାମାନେ ତ୍ରିବିକ୍ରମ ବାମନଙ୍କ ପରାକ୍ରମକୁ ପାଥେୟ କରି ବାହାରୁଥିଲେ ଦେଶଜୟ କରିବାକୁ । ସୁନିଆଁଠାରୁ ସନ ଓ ସାଲ ଗଣନା ଆରମ୍ଭ ହୁଏ । ଆଜିର ଦିନକୁ ମଧ୍ୟ ଶ୍ରୀବାମନଙ୍କ ଜନ୍ମଦିବସ ଭାବରେ ପାଳନ କରାଯାଇଥାଏ । ଭଗବାନ ବିଷ୍ଣୁଙ୍କ  ବାମନ ଅବତାରଙ୍କ ଜନ୍ମଦିବସ ହୋଇଥିବାରୁ ଏହାକୁ ବାମନ ଦ୍ୱାଦଶୀ ଭାବରେ ପାଳନ କରାଯାଇଥାଏ । ଭଗବାନ ବିଷ୍ଣୁ ପଂଚମ ଅବତାରରେ ମାନବ  ରୂପରେ ବାମନ ଅବତାରରେ ପ୍ରକଟ ହୋଇଥିଲେ ।  

Subscribe

National International State Sports Entertainment